កម្ពុជា កូវីដ១៩

កូវីដ១៩ក្នុងសហគមន៍៖ អ្នកស្លាប់ដោយកូវីដ១៩ កើនលើសពី១០០នាក់

ទិដ្ឋភាពទូទៅនៃការធ្វើដំណើររបស់ប្រជាជនកំឡុងពេលកូវីដ១៩
ទិដ្ឋភាពទូទៅនៃការធ្វើដំណើររបស់ប្រជាជនកំឡុងពេលកូវីដ១៩ AP - Heng Sinith

ចាប់​តាំងពី​មាន​ការ​ផ្ទុះឆ្លង​រាលដាល​កូវីដ១៩​ក្នុង​សហគមន៍ រហូត​មក​ដល់​ពេល​នេះ ករណី​ស្លាប់​ដោយ​ជំងឺ​កូវីដ១៩​បាន​កើន​ឡើង​ដល់​១០៣​នាក់​ បន្ទាប់​ពី​មាន​ករណីស្លាប់​ថ្មី​នៃ​ជំងឺ​នេះ​ចំនួន​៦នាក់​ទៀត​។ នេះ​បើ​តាម​ក្រសួង​សុខាភិ​បាល នៅ​ថ្ងៃទី​០២ ខែ​ឧសភា ខណៈ​ករណី​ឆ្លង​ថ្មី មាន​ចំនួន​៧៣០​ករណី​។ សម្រាប់ភ្នំពេញ បើទោះជា​មាន​ករណី​ឆ្លង​ថ្មី​បន្ថែម​ តែ​ករណី​ឆ្លង​នេះ គឺមាន​តែ​ក្នុង​តំបន់​បិទខ្ទប់ ជា​ពិសេស​តំបន់​ក្រហម​។ នេះ​បើ​តាម​អភិបាល​រាជធានី​ភ្នំពេញ​។

ផ្សាយពាណិជ្ជកម្ម

គិតត្រឹម​ព្រឹក​ថ្ងៃទី០២ ខែ​ឧសភា កម្ពុជា មាន​ករណី​ស្លាប់​ថ្មី​ដោយ​ជំងឺ​កូវីដ​១៩ចំនួន​៦នាក់ ដែល​ក្នុង​នោះ​៥នាក់​ស្ថិត​នៅ​រាជធានី​ភ្នំពេញ និង​ម្នាក់​នៅ​ខេត្ត​ព្រះសីហនុ ដែល​ធ្វើ​ឲ្យ​អ្នក​ស្លាប់​សរុប​ចាប់​តាំង​ពី​ផ្ទុះ​ករណី​ឆ្លង​សហគមន៍​២០កុម្ភៈ មាន​ចំនួន​១០៣​នាក់ ហើយ​ភាគ​ច្រើន​គឺ​នៅ​រាជធានី​ភ្នំពេញ​។ នេះ​បើ​តាម​សេចក្តី​ប្រកាស​របស់​ក្រសួង​សុខាភិបាល​កម្ពុជា​។

បើ​តាម​ក្រសួង​សុខាភិបាល ករណីឆ្លង​ថ្មីវិញ មាន​ចំនួន​៧៣០​នាក់ ដែល​ក្នុង​នោះ​រាជធានី​ភ្នំពេញ មាន​ចំនួន​៤៥៤​នាក់ ខេត្ត​ព្រះសីហនុ ១២៤នាក់ កណ្តាល១០៧នាក់ កំពង់ធំ១៤នាក់ តាកែវ១១នាក់ ព្រៃវែង៦នាក់  ត្បូងឃ្មុំ​៥នាក់ កំពង់ចាម៤នាក់ សៀមរាប២នាក់ ស្ទឹងត្រែង១នាក់ កំពត១នាក់ និងខេត្តពោធិ៍សាត់១នាក់។ ករណី​ឆ្លងថ្មី​នេះ មាន​ការ​កើន​ឡើង​ដល់​ទៅ​ជិត​ទ្វេ​ដង បើ​ប្រៀបធៀប​នឹង​ករណី​ថ្មី ដែល​រាយ​ការណ៍​ដោយ​ក្រសួង​សុខាភិ​បាល កាលពីថ្ងៃទី០១ ខែ​ឧសភា ដែល​មាន​ត្រឹម​តែ​ ៣៨៨នាក់។ ក្រៅពី​ករណី​ឆ្លង ក៏​មាន​ដែរ អ្នក​ជា​សះស្បើយ​ពី​ជំងឺ​កូវីដ​១៩ ចំនួន​ ១៦៩​នាក់​។

ចាប់​តាំង​ពី​ដើម​ឆ្នាំ២០២០ រហូត​មក​ដល់​ពេល​នេះ​កម្ពុជា មាន​ករណី​ឆ្លង​កូវីដ១៩​សរុប​ទូទាំង​ប្រទេស​ ចំនួន ១៤ ៥២០​នាក់ ដែល​ក្នុង​នោះ​មាន​ជា​សះស្បើយ​សរុប​ចំនួន​ ៥ ៣៦៩នាក់ និង​កំពុង​សម្រាក​ព្យាបាល​ចំនួន​៩ ០៤០នាក់​។

ឆ្លើយនឹង​សំនួរ​ថា តើ​អាជ្ញាធរ​អាច​គ្រប់គ្រង​បាន​ឬទេ​ ជុំវិញ​ស្ថានភាព​ឆ្លង​កូវីដ​១៩​? អភិបាល​រាជធានី​ភ្នំពេញ លោក ឃួង ស្រេង បាន​ថ្លែង​ប្រាប់​វិទ្យុបារាំង​អន្តរជាតិ នៅថ្ងៃ​ទី​០២ ខែ​ឧសភា​នេះថា​ អាជ្ញាធរ​កំពុង​តែ​ធ្វើ​កិច្ចការ​នេះ​បន្ថែម ដោយសារ​មួយ​ថ្ងៃៗ នៅមាន​អ្នក​ជំងឺ​ពី ២០០ ទៅ៣០០នាក់ ប៉ុន្តែការ​ឆ្លង​មាន​តែ​ក្នុង​តំបន់​ក្រហម ដែល​អាជ្ញាធរ​បាន​កំណត់ ហើយ​ជា​ទីតាំង​ដែល​អាជ្ញាធរ​កំពុង​គ្រប់គ្រង និង​មិន​រាយប៉ាយ​ទៅ​កាន់​ទីតាំង​ផ្សេង​ទៀត​ខ្លាំង​នោះ​ទេ​។

លោក​បន្ថែម​ថា សាលាក្រុង​នឹង​ធ្វើការងារ​សុខាភិបាល​បន្ត​ទៀត ហើយ​ក្រសួងសុខាភិបាល និង​ក្រុម​គ្រូពេទ្យ​ស្ម័គ្រ​ចិត្តធីតា​នឹង​តាម​យក​សំណាក​អ្នក​ដែល​ពាក់​ព័ន្ធ​បន្ថែម​ទៀត​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI