ទស្សនៈព្រឹត្តិការណ៍ពិភពលោក

វិបត្តិកូវីដ​ជាដើមហេតុ​ធ្វើ​ឲ្យ​និស្សិតស្រី​ម៉ាឡេស៊ី ចុះឈ្មោះ ជាសមាជិក​របស់ SugarBook?

សំឡេង ០៥:០៤
ឡានផ្សាយពាណិជ្ជកម្មវិបសៃតិ៍​ណាត់ជួប​របស់​ក្រុមហ៊ុន​បែលហ្សិក នៅទីក្រុង​ប៉ារីស ដែលមាន​គោលការណ៍ដូច​វិបសៃតិ៍​របស់ក្រុមហ៊ុន​ម៉ាឡេស៊ី Sugarbook
ឡានផ្សាយពាណិជ្ជកម្មវិបសៃតិ៍​ណាត់ជួប​របស់​ក្រុមហ៊ុន​បែលហ្សិក នៅទីក្រុង​ប៉ារីស ដែលមាន​គោលការណ៍ដូច​វិបសៃតិ៍​របស់ក្រុមហ៊ុន​ម៉ាឡេស៊ី Sugarbook AFP - ANAIS CAQUANT
ដោយ៖ ឈាង បុប្ផា
២៩ នាទី

សំណុំរឿង​តុលាការ​មួយ​នៅ​ម៉ាឡេស៊ី បាន​ឆ្លុះបញ្ចាំង​ពី​ផលវិបាក​នៃ​វិបត្តិកូវីដ ទៅលើ​សង្គម និង​សេដ្ឋកិច្ច។ នៅ​សប្តាហ៍មុននេះ​ប៉ូលិស​ម៉ាឡេស៊ី​បាន​សម្រេច​ចាប់ខ្លួន​ស្ថាបនិក​វិបសៃតិ៍ ជំនាញ​ខាង​ណាត់ជួប មួយ ឈ្មោះ SugarBook ក្រោម​បទចោទប្រកាន់ ជំរុញ​ឲ្យ​ប្រព្រឹត្ត​អំពើពេស្យាចារ។ ស្ថាបនិក​វិបសៃតិ៍​Sugarbook ដែល​បាន​បង្កើតរឿង​ចម្រូងចម្រាសក្នុង​សង្គមអភិរក្ស ម៉ាឡេស៊ី ត្រូវ​បង្ហាញ​មុខ​នៅ តុលាការ​ម៉ាឡេស៊ី នៅថ្ងៃ​ពុធ​ទី ២៤​កុម្ភៈនេះ។ តើ​SugarBook ជាអ្វី​ឲ្យបា្រកដ? យើងស្តាប់​ឈាង បុប្ផា 

ផ្សាយពាណិជ្ជកម្ម

នៅលើ​ទំព័រវិបសៃតិ៍​របស់​SugarBook គេអាច​អាន​យល់​ថា SugarBook​គឺជា​កម្មវិធី បណ្តាញសង្គម​ជាន់ខ្ពស់ ដែល​នៅក្នុង​នោះ សមាជិក​អាច​ទាក់ទង ជួបគ្នា និង​អភិវឌ្ឍ​ទំនាក់ទំនង ដោយ​ផ្តល់ផល​ប្រយោជន៍​ឲ្យ​គ្នា​ទៅវិញ ទៅមក។ ផលប្រយោជន៍​នោះ គឺ​ម្នាក់​មាន​កាបូប​លុយ ដែល​គេ​ហៅថា Sugar Daddy ចំណែក​ម្នាក់ទៀត​មាន​សំរស់ស្រស់ស្អាត និង​នៅក្មេង​ដែល​គេ​ឲ្យឈ្មោះថា Sugar baby។ ពាក្យស្លោកមួយ ​របស់​ SugarBook​បាន​សរសេរ​យ៉ាងច្បាស់ថា នៅពេល​មនោសញ្ជេតនា ជួបប្រទាក់ជាមួយ ទឹកប្រាក់ និង​មាន​គោលដៅ ជួយ​ចាប់ផ្គូផ្គង រវាង​បុរស អ្នកមាន ជាមួយ នារី​វ័យក្មេង ដោយ​ភាគី​បុរស​ត្រូវ​ផ្តល់​គាំទ្រ​ផ្នែក​ហិរញ្ញវត្ថុ ដល់ភាគីម្ខាងទៀត​ជាថ្នូរ​នឹង​ទំនាក់ទំនង​ផ្លូវភេទ។

អំពើពេស្យាចារ​នៅពីក្រោយ វិបសៃតិ៍ SugarBook? ដូចជា​កម្មវិធី​ចាប់គូ តាមអ៊ីនធ័នែត​ផ្សេងទៀត SugarBook​អះអាងថា គេ​បានត្រឹម​តែ​ជួយ​ឲ្យ​មនុស្ស​ជួបគ្នា ប៉ុន្តែ មិន​បាន​ជំរុញ​លើកទឹកចិត្ត​ឲ្យ​គេ​មាន​ទំនាក់ទំនង​ផ្លូវភេទ​នោះទេ។

អាជ្ញាធរ​ម៉ាឡេស៊ី​មិន​យល់​ដូច្នេះ​នោះទេ។ នៅ​ថ្ងៃ​ពុធ​សប្តាហ៍មុន ប៉ូលិស​ម៉ាឡេស៊ី បាន​ចូល​ចាប់ ស្ថាបនិក​របស់​វិបសៃតិ៍ SugarBook នៅក្រោម​បទចោទប្រកាន់​ថា ប្រើប្រាស់​អ៊ីនធ័រនែត មិនត្រឹមត្រូវ និង​ញុះញង់​ឲ្យមាន​ការប្រព្រឹត្ត​អំពើពេស្យាចារ។ តាម​កាសែត​ក្នុង​ស្រុក​ម៉ាឡេស៊ី អាជ្ញាធរ​បាន​សម្រេច​បិទខ្ទប់​វិបសៃតិ៍ SugarBook រួចហើយ ប៉ុន្តែ នៅ​តែ​មាន​អ្នកលួច​ចូល​ប្រើ តាមរយៈ បណ្តាញអ៊ីនធ័រនែត​ផ្សេងទៀត ឬ កម្មវិធី ដែលគេ​ដោនឡូត ក្នុងទូរស័ព្ទ ដៃ នោះបើទោះបី​ជា​មាន​ការព្រមាន ពីអាជ្ញាធរ​ក្តី។

SugarBook​ត្រូវ​បាន​បង្កើតឡើង នៅ​ឆ្នាំ ២០១៦ ប៉ុន្តែ ហេតុអ្វី​អាជ្ញាធរ​ម៉ាឡេស៊ី ចាត់វិធានការប្រឆាំង ​នៅពេលនេះ ?

ក្រៅពី​ម៉ាឡេស៊ី SugarBook​មាន​វត្តមាន​ដំណើរការ ​នៅ​ប្រទេស​សិង្ហបុរី ថៃ និង​សហរដ្ឋអាមេរិក។ នៅម៉ាឡេស៊ី វិបសៃតិ៍​ SugarBook ត្រូវ​បិទខ្ទប់ ចំណែក​ស្ថាបនិកត្រូវ​ចាប់ខ្លួន និង​បញ្ជូន​ទៅ​តុលាការ ក៏ដោយសារ​តែ​ការរពឹសមាត់​របស់ SugarBook​ខ្លួនឯង។ នៅសប្តាហ៍មុន នៅលើ​ទំព័រ​ហ្វេសប៊ុក​របស់ខ្លួន SugarBook​បានអះអាងថា និស្សិតជាច្រើនពាន់នាក់ ដែល​មក​ពី​សកលវិទ្យាល័យ ល្បីៗ ទាំង​១០​របស់ម៉ាឡេស៊ី បាន​ចុះឈ្មោះ ជា​សមាជិក របស់​ក្នុង​នាម ជា​Sugarbabies។ តាម​របាយការណ៍​ផ្ទៃក្នុង​របស់​SugarBook ចំនួន​សមាជិក​ផ្នែក​Sugarbabies បាន​កើនឡើង ៤០% ដោយមកពី​និស្សិតស្រី​នៅ​សកលវិទ្យាល័យ​កាន់តែច្រើន​បាន​ចុះឈ្មោះ​ជា​សមាជិក​Sugarbabies ដើម្បី បាន​ប្រាក់​សម្រាប់​បង់ថ្លៃ​សាលារៀន ថ្លៃ​រស់នៅប្រចាំថ្ងៃ និង​ការស្នាក់នៅ​ជាដើម។ ការណ៍នេះ​ធ្វើ​ឲ្យ​ម៉ាឡេស៊ី​ជាប់ចំណាត់​លេខ​៣ នៅ​អាស៊ី ក្នុង​នាម​ជា​ប្រទេស​ដែលសំបូរ​មនុស្ស​ចុះឈ្មោះ ស្វែងរក​ទំនាក់ទំនង នៅលើ​បណ្តាញ​ណាត់ជួប។

នៅក្រោយ​ការចេញផ្សាយ​របាយការណ៍​ផ្ទៃក្នុង​របស់​SugarBook មនុស្ស​ជាច្រើន​មិនមាន​ការភ្ញាក់ផ្អើល​នោះទេ ព្រោះថា ភាពអត្តខាត់ ស្ថានភាព​មិននឹងន របស់​និស្សិត​មាន​កាន់តែ​ច្រើន ដែល​ធ្វើ​ឲ្យ​វិបសៃត៍ SugarBook​កាន់តែ​ជោគជ័យ មានសមាជិកច្រើន ចាប់តាំង​ពី​ផ្ទុះកើតមាន​វិបត្តិកូវីដ។ ជាក់ស្តែង របាយការណ៍​របស់​SugarBook​បានបង្ហាញថា សកលវិទ្យាល័យ​ដ៏ល្បីឈ្មោះ Sunway ដែល​មាន​និស្សិតស្រី​ច្រើនជាងគេ ចុះឈ្មោះ​ជា​សមាជិក​របស់​កម្មវិធី SugarBook មាន​តម្លៃ​សិក្សា ប្រមាណ ១២ ២០០​ដុល្លារ ពោល​គឺ​មិនចុះ​ថ្លៃ​ទាល់តែសោះ ចាប់តាំង​ពី​មាន​វិបត្តិកូវីដ១៩។

យ៉ាងណាក៏ដោយ របាយការណ៍​ផ្ទៃក្នុង​របស់​វិបសៃតិ៍ SugarBook ល្មម​អាច​ទាញ​ចំណាប់អារម្មណ៍​របស់​អនុរដ្ឋមន្រ្តី​ទទួលបន្ទុក​កិច្ចការ​សាសនា​អ៊ីស្លាម ឲ្យ​ចេញមុខ ទាមទារ​បិទ​វិបសៃតិ៍ SugarBook ដើម្បី​ទប់ស្កាត់​កុំ​ឲ្យ​យុវជន​លង់ខ្លួន​ចូល​ក្នុង​អំពើអសីលធម៌។ អសីលធម៌ ព្រោះថា នៅ​ម៉ាឡេស៊ី ជា​ទី​ដែល​ប្រជាជន​ពាក់កណ្តាល (នៃ​ប្រជាជន​សរុប ៣២លាននាក់ )​គោរពជឿ​សាសនា​អ៊ីស្លាម ការមានទំនាក់ទំនង​ផ្លូវភេទ​ក្រៅ​ចំណងអាពាហ៍ពិពាហ៍ គឺជារឿង​ខុសច្បាប់។

នៅ​សប្តាហ៍មុន បុរស វ័យ ៣៤​ឆ្នាំ ដែល​ជា​ស្ថាបនិក​របស់​ SugarBook ត្រូវ​ប៉ូលិស​ចាប់ខ្លួន នៅក្រោយ​ការស៊ើបអង្កេត​ប្រឆាំង​ ពេស្យាចារ ដែល​ជា​អំពើខុសច្បាប់​នៅ​ប្រទេស​អភិរក្ស​និយម​ដូចជា​ម៉ាឡេស៊ី។ ស្ថាបនិក របស់​SugarBook​ត្រូវ​ចោទប្រកាន់ ថា បានអូសទាញ​និស្សិតស្រី ឲ្យ​ធ្លាក់ខ្លួន​ក្នុងអំពើពេស្យាចារ ព្រោះថា បើសិន​គេ​ប្រើម៉ែលនិស្សិត​ដើម្បី​ចុះឈ្មោះ ជា​សមាជិក នោះ គេ​មិនចាំបាច់​បង់​ថ្លៃ សម្រាប់​ការចុះឈ្មោះទេ។

សម្រាប់ អ្នកវិភាគឯករាជ្យ និង​អ្នកចម្រើននិយម​ជាតិ​ម៉ាឡេស៊ី មួយចំនួន គេ​មិនគួរ​ដាក់បន្ទុក ប្រញាប់ ថ្កោលទោស​និស្សិត​ថា គ្មាន​សីលធម៌​នោះទេ។ ម្យ៉ាង អ្នកដែល​ពាក់ព័ន្ធ នៅ​បណ្តាញ របស់​SugarBook​សុទ្ធតែ​មាន​អាយុ ធំពេញវ័យ អាច​សម្រេច​ចិត្ត​ខ្លួនឯង ដោយ​គ្មានអ្នកបង្ខំនោះទេ។ អ្នកនយោបាយ​ម៉ាឡេស៊ី ដែលមកពីក្រុមអភិរក្ស​និយម គួរ​តែ​ផ្តោត​សំខាន់​ទៅលើ​បញ្ហា រៀបការ​មុនអាយុ វិញ​ប្រសើរជាង។ តាមអ្នកវិភាគ​ខាងលើ នៅ​ម៉ាឡេស៊ី អ្នកនយោបាយ​ជាច្រើន ធ្វើថ្លង់ ធ្វើគ ស្ពឹកស្រពន់ គ្មាន​ចាត់វិធានការ​អ្វីទេ នៅចំពោះមុខ​ទំនៀមទម្លាប់ ចាប់បង្ខំ​ក្មេងស្រី ឲ្យរៀបការ នៅមុន​អាយុ ១៨ឆ្នាំ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI