ទស្សនៈព្រឹត្តិការណ៍ពិភពលោក

យុទ្ធសាស្ត្រ​អាកាសធាតុ ជា​ស្នូល​​នៃ​​ផែនការ​​វិនិយោគ​ដ៏ធំ​មហាសាល របស់​​លោក​​ចូ បៃដិន

សំឡេង ០៥:៥២
រថយន្តរាប់ពាន់គ្រឿងកំពុងឆ្លងស្ពាន San Francisco-Oakland Bay Bridge
រថយន្តរាប់ពាន់គ្រឿងកំពុងឆ្លងស្ពាន San Francisco-Oakland Bay Bridge AP - Ben Margot

កាលពីសប្តាហ៍កន្លងទៅ លោក​ប្រធានាធិបតី ចូ បៃដិន បានដាក់បង្ហាញ​គំរោងវិនិយោគ​ ដែលមាន​តម្លៃ​ប្រមាណ​២០០ម៉ឺនលានដុល្លារ។ យុទ្ធសាស្ត្រអាកាសធាតុ ប្រយុទ្ធឆាំងនឹងការកើនឡើងកំដៅផែនដី ស្ថិតនៅ​ចំចំណុចកណ្តាល នៃផែន​ការវិនិយោគដ៏ធំមហាសាលនេះ។ ខុសពី​អាណតិ្តរបស់​លោកដូណាល់ ត្រាំ សម្រាប់លោកចូ បៃដិន បញ្ហាអាកាសធាតុគឺមិនមែនជាឧបសគ្គទេ តែជាឱកាសថ្មីក្នុងការវិនិយោគ បង្កើតការងារ និងជាពិសេសរួមចំណែកស្រោចស្រង់ភពផែនដី។

ផ្សាយពាណិជ្ជកម្ម

រដ្ឋបាលរបស់​លោកចូ បៃដិន មាន​មហិច្ឆិតាផ្តល់សន្ទុះសេដ្ឋកិច្ច តាមរយៈការ​វិនិយោគឲ្យ​បានច្រើន​បំផុត​ ទៅក្នុង​វិស័យ​បរិស្ថានអាកាសធាតុ ដើម្បី​ប៉ះប៉ូវនូវភាពយឺតយ៉ាវរបស់សហរដ្ឋអាមេរិក បណ្តាល​​មកពី​គោលនយោបាយ​ ប្រឆាំងអាកាសធាតុ ក្នុង​អាណត្តិរបស់​លោកដូណាល់ ត្រាំ។ កម្ម​វត្ថុ​​ធំៗ​២ របស់​រដ្ឋបាលលោកចូ បៃដិន គឺទីមួយ ទាញកម្រិតបញ្ចេញឧស្ម័នពុល​ឲ្យ​មកស្មើសូន្យ ក្នុងវិស័យ​ផលិត​ថាមពល​នៅអាមេរិក​ ពីនេះដល់ឆ្នាំ​២០៣៥។ ហើយទី​២ គឺសេដ្ឋកិច្ចអាមេរិកទាំងមូល នឹងត្រូវ​មាន​អព្យាក្រិត្យកាបូន នៅរវាង​ឆ្នាំ​២០៥០។

លោកស្រី​ Gina McCarthy ទីប្រឹក្សាផ្នែកបរិស្ថាន របស់​លោកចូ បៃដិន បានលើកឡើងថា កម្មវត្ថុទាំងនេះ គឺជាកម្មវត្ថុដែលប្រកបដោយសេចក្តីក្លាហានណាស់ ក៏ប៉ុន្តែ​ វាជារឿងចាំបាច់ ដែល​រដ្ឋាភិបាល​ ត្រូវតែធ្វើ ហើយ​សម្រេចវាឲ្យ​បាន​ តាម​រយៈការវិនិយោគ​។

រថយន្តអគ្គិសនី

សូមបញ្ជាក់ថា ផែនការ​របស់​លោកចូ បៃដិន ផ្តោតការ​យកចិត្តទុកដាក់ ទៅ​លើ​ការ​ធ្វើ​បំលាស់ប្តូរ ក្នុង​វិស័យយានយន្ត​។ ក្នុងន័យនេះ រដ្ឋាភិបាល​បានត្រៀមកញ្ចប់ប្រាក់ ចំនួន​១៧៤ពាន់លានដុល្លារ ដើម្បីជំរុញ​ទីផ្សារ​ ផលិតរថយន្ត​ដើរដោយ​ថាមពលអគ្គិសនី។ ទឹកប្រាក់នេះ នឹងត្រូវយកទៅប្រើជាអាទិ៍ ក្នុងការវិនិយោគ បណ្តាញ​ផលិតនិង​ផ្គត់ផ្គង់ ឬក្នុង​ការបំពាក់បរិក្ខា គ្រឿងយន្តចាំបាច់ ក្នុងឧស្សាកម្ម​​ផលិត​​រថយន្តអគ្គិសនី។

ជាមួយ​គ្នានេះ ស្ថានីយ៍​សាកថ្ម សម្រាប់រថយន្តអគ្គិសនី ចំនួន​៥សែន​ទីតាំង នឹងត្រូវរៀបចំស្ថាបនាឡើង ពីនេះដល់ឆ្នាំ២០៣០។ ចំណែក​រថយន្តក្រុងពណ៌លឿង ដឹកជញ្ជូនសិស្សសាលា ដែលគេតែងតែឃើញ នៅតាមខ្សែភាពយន្តនានា​នោះ​ គឺ​នឹងត្រូវ​ផ្លាស់ប្តូរ ឲ្យ​មកប្រើ​​ថាមពលអគ្គីសនី ឲ្យ​បានយ៉ាងហោច​២០%។

ថាមពលអគ្គិសនីដែលស្អាតស្អំ

ក្រៅពីវិស័យយានយន្ត រដ្ឋាភិបាល​លោកចូ បៃដិន បាន​ត្រៀមកញ្ចប់ថវិកាចំនួន​១០០ពាន់លានដុល្លារ ដើម្បីវិនិយោគ ក្នុង​វិស័យ​ផលិត​ថាមពលអគ្គិសនី។ នៅក្នុងផ្នែកនេះ រដ្ឋាភិបាល​នឹង​ផ្តល់ជូន​នូវ​អត្ថប្រយោជន៍ផ្នែកពន្ធដា ទៅលើ​វិស័យ​ផលិតថាមពលអគ្គិសនីស្អាតស្អំ ដូចជាអគ្គិសនី​ដើរដោយថាមពលព្រះអាទិត្យ និងដើរដោយ​កង្ហារខ្យល់ជាដើម។ អគ្គិសនីដែលផ្គត់ផ្គង់នៅតាមអាគាររដ្ឋបាល​​សហព័ន្ធ គឺត្រូវតែជា​ថាមពលអគ្គិសនី​ស្អាតស្អំ ជា​ដាច់ខាត។

ផែនការនេះ ក៏នឹងបង្កើតឲ្យ​មាន​នូវ​វិធានមួយ​ ដែលដាក់កំហិត ឲ្យ​ក្រុមហ៊ុន​ផលិត​និងផ្គត់ផ្គង់ថាមពលអគ្គីសនី ត្រូវមានចំណែក​ថាមពលដែលស្អាតស្អំ មិនបញ្ចេញឧស្ម័នកាបូនិក ក្នុងកម្រិតភាគរយ​​ណាមួយ ក្នុងចំណោមថាពលទាំងអស់ ដែលផលិតបាន។ វិធានការដាក់កំហិតរបៀបនេះ ត្រូវបាន​គេអនុវត្តរួចហើយ នៅរដ្ឋកាលីហ្វ័រញ៉ា ហើយ​ឃើញថា​វាមានផលវិជ្ជមាន។

លោកស្រី​Gina McCarthy អះអាងថា វាគឺ​ជាវិធីសាស្ត្រ​មួយដ៏មានប្រសិទ្ធភាព ក្នុងការកាត់បន្ថយ ការបញ្ចេញ​ឧស្ម័នពុល ទៅក្នុងបរិយាកាស។ យោងតាម​លោកស្រី រដ្ឋាភិបាល​អាមេរិក និង​ត្រៀមប្រាក់វិនិយោគ​ លើវិស័យ​ថាមពលអគ្គិសនី​ ដើរដោយ​កង្ការខ្យល់នៅលើ​លំហរសមុទ្រ ដែលកម្មវត្ថុគឺផលិតឲ្យ​បាន ៣០ជីហ្កាវ៉ាត់ ពីនេះដល់ឆ្នាំ​២០៣០។

ផែនការ​ក្លាហាន និងចាំបាច់

លោក ​Dan Lashof នាយក​អង្គការ World Resources Institute បានលើកឡើងថា នៅសហរដ្ឋអាេមរិក​ ប្រភពដ៏ធំបំផុតនៃ​ការបញ្ចេញឧស្ម័នពុលទៅក្នុងបរិយាកាស គឺមធ្យោបាយ​ដឹកជញ្ជូន និង​ការផលិត​ថាមពលអគ្គិសនី។ នៅក្នុងផែនការយុទ្ធសាស្ត្របរិស្ថានរបស់ លោកចូ បៃដិននេះ គឺបាន​​សំដៅ​ចំណុចធំៗទាំង២នេះតែម្តង។ លោក​បន្ថែមថា វាគឺជាផែនការ​ដែល​ហ៊ាន ដែលមានសេចក្តីក្លាហាន តែវាចាំបាច់ នឹងចំពេលវេលាល្អណាស់។

ដូចគ្នា​ដែរ​ លោក Amol Phadke អ្នកស្រាវជ្រាវវិទ្យាសាស្ត្រ នៅសកលវិទ្យាល័យ Barkeley រដ្ឋកាលីហ្វ័រញ៉ា បានលើកឡើងថា​ ការ​ផ្តោតការយក់ចិត្តទុកដាក់ខ្ពស់ លើការផលិតថាមពលអគ្គិសនីដែលស្អាតស្អំ វាគឺជារឿងល្អ ដែលត្រូវធ្វើ។ បង្កើនការប្រើប្រាស់រថយន្ត ដែលដើរដោយ​ថាមពលអគ្គិសនី ហើយអគ្គិសនីនោះ គឺជាអគ្គិសនីស្អាតស្អំ មិនកើតចេញពីការដុតចំហេះប្រេងកាត ឬធ្យូងថ្ម។

​លោក Amol Phadke លោក​បានបង្ហាញ​លំអិត នៅក្នុងរបាយការណ៍មួយ ស្តី​អំពីយុទ្ធសាស្ត្រដែល​អាចនាំ​ឲ្យ​សហរដ្ឋអាមេរិក ឈានទៅមាន​អគ្គិសនីមាន​ប្រភពស្អាតស្អំ ១០០% នៅរវាងឆ្នាំ​២០៣៥។ យោងរតាមរបាយការណ៍​នេះ ៩០%នៃថាមពលអគ្គិសនី គឺអាចបាន​មក​ពី​បច្ចេកវិទ្យាដែល​មានស្រាប់ ដូចជា កង្ហារដើរដោយខ្យល់ និង​ពន្លឺព្រះអាទិត្យ។ ចំណែក១០% គឺត្រូវ​ការការស្រាវជ្រាវបច្ចេកវិទ្យាថ្មីបន្ថែម ហើយ​ដែលតម្រូវឲ្យ​មានាការវិនិយោគ។

ដេញដោលនឹងលំបាក​ ​នៅសភាខុសហ្ក្រេស

គួរកត់សំគាល់ថា បច្ចុប្បន្ននេះ ៣៧%នៃថាមពលអគ្គិសនី នៅសហរដ្ឋអាេមរិក ត្រូវបានផលិតឡើង ដោយ​​មិនបញ្ចេញឧស្ម័នកាបូនិក ក្នុងនោះ ២០%គឺបានមកពីថាមពលនុយក្លេអ៊ែរ ១៧%​ជា​ប្រភព​ថាមពលវិលជុំ និងថាមពលវារីអគ្គិសនី​ ​មួយចំណែកធំដែរ។ រដ្ឋាភិបាល​លោក ចូ បៃដិន បាន​អះអាងថា ផែនការវិនិយោគ ដើម្បីសម្រេចកម្មវត្ថុបរិស្ថានអាកាសធាតុទាំងនេះ គឺនឹង​បង្កើតការងារ។

តែយ៉ាងណា សម្រាប់ពេលនេះ រដ្ឋាភិបាលលោក ចូ បៃដិន ត្រូវតែយកផែនការនេះ ទៅ​ឆ្លងការជជែក​ដេញដោល នៅ​សភាខុនហ្ក្រេស។​ លោក Mitch McConnell ព្រឹទ្ធសមាជិក​មកពី​បក្ស​សាធារណៈរដ្ឋ បានប្តេជ្ញាថា នឹង​រារាំងមិនឲ្យ​ផែនការ​នេះ អាចចេញទៅ​រួចទេ ព្រោះជាផែនការដែលចំណាយ​ប្រាក់ច្រើនសន្ធឹកសន្ធាប់ ទៅលើរថយន្តអគ្គិសនី តែមិនចំណាយ​ប្រាក់ទៅលើ​ការសាងសង់​ស្ពានថ្នល់​សោះ។ ដោយឡែក លោកស្រី Nancy Pelosi ប្រធានសភាតំណាង មកពី​បក្សប្រជាធិបតេយ្យ សង្ឃឹមថា សភាខុនហ្ក្រេស នឹង​អនុម័តផែនការនេះ នៅរវាងខែកក្កដាខាងមុខ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI