ព្រឹត្តិការណ៍អន្តរជាតិប្រចាំថ្ងៃ

បោះឆ្នោត​អាមេរិក ៖ លោក ចូបៃដិន អំពាវនាវ​ឱ្យ​ពលរដ្ឋ​អាមេរិក​រួប​រួម​គ្នាវិញ

សំឡេង ០៧:០៩
លោក ចូ បៃដិន ធ្វើ​អន្តរាគមន៍​ ថ្ងៃទី ៦ វិច្ឆិកា ២០២០
លោក ចូ បៃដិន ធ្វើ​អន្តរាគមន៍​ ថ្ងៃទី ៦ វិច្ឆិកា ២០២០ AP - Carolyn Kaster
ដោយ៖ អៀង សុខម៉ិញ
៣១ នាទី

បន្ទាប់​ពី​រង់​ចាំ​បន្ថែម​អស់​ពេញ​ថ្ងៃសុក្រ​ទៀត អាមេរិក​​នៅ​តែ​មិន​ទាន់​ដឹង​បាន​ថា​តើ​លោក​ដូណាល់ ត្រាំ ឬ​លោក ចូបៃដិន នឹង​ក្លាយ​ជា​​ប្រធានាធិបតី​ជាប់​ឆ្នោត​ថ្មី។ ប៉ុន្តែ​បី​ថ្ងៃ​ក្រោយ​ការ​បោះឆ្នោត និង​ក្នុង​​​ជំនឿ​ជាក់កាន់​តែ​​ខ្លាំង​ឡើង​ចំពោះ​ជោគជ័យ លោក ចូ បៃ​ដិន បានធ្វើ​អន្តរាគមន៍​​ជាថ្មី​ នៅ​យប់​ថ្ងៃ​សុក្រ​ទី ៦ វិច្ឆិកា អំពាវនាវ​ឱ្យ​ប្រជាពលរដ្ឋ​អាមេរិក​ទាំង​អស់​​ ប្រមូលផ្តុំនិង​រួបរួម​គ្នា ឡើង​វិញ​។ ចំណែ​កលោក ដូណាល់ ត្រាំ​ វិញ ពុំ​បាន​បង្ហាញ​វត្តមាន​ជា​សាធារណៈ​ទេ​នៅ​ថ្ងៃម្សិលមិញ តែ​លោក​បាន​ផ្ញើ​សារ​ព្រមាន​ថា​កុំ​អាល​ប្រកាស​ជោគជ័យ​ បណ្តឹង​តាម​ផ្លូវ​ច្បាប់​ទើប​ចាប់​ផ្តើម​តែ​ប៉ុណ្ណោះ។

ផ្សាយពាណិជ្ជកម្ម

រដ្ឋPennsylvanie ដែល​លោក​ត្រាំ​ជា​អ្នក​នាំ​មុខ​ពីមុន​នោះ កំពុង​ត្រូវ​បាន​លោក​ដៃបិន​ឡើង​នាំ​មុខវិញ​ នៅ​ពេលរាប់​សន្លឹក​ឆ្នោត​អស់​៩៩%។ សំឡេង​គាំទ្រ​លោក​បៃដិន បាន​ឡើង​ដល់ ៤៩,៦៤% ទល់​នឹង​៤៩,២១%​សម្រាប់​លោក​ត្រាំ ដោយ​មាន​គម្លាត​ពី​គ្នា​ជាង​ពីរ​ម៉ឺន​៩ពាន់​សំឡេង​។ នេះ​បើ​តាម​តួលេខ​របស់​ Asscociated Press។

សម្រាប់​រដ្ឋ​Géogie រដ្ឋ​គន្លឹះ​មួយ​ដែរនោះ និង​ដែល​គេ​គិត​ស្មាន​ថា​នឹង​អាច​ប្រកាស​លទ្ធផល​បាន​កាលពី​ថ្ងៃ​សុក្រ​នោះ អាជ្ញាធរ​រដ្ឋ​បាន​សម្រេច​​រាប់​សន្លឹកឆ្នោត​ឡើង​វិញ ព្រោះ​គម្លាត​មាន​តិច​ពេក​។ ​Nevada រាប់​សន្លឹក​ឆ្នោត​បាន​ដល់​៨៧%​ហើយ ​លោក បៃដិន នៅ​តែ​នាំមុខ​ដដែរ។ មាន​​តែ​រដ្ឋ​ន័រការ៉ូលីណា​មួយ​ទេ​ដែល​លោកត្រាំ​នៅ​នាំមុខ​។

ដូច្នេះ​​សំណាងទទួល​បាន​ជោគជ័យ​​កំពុង​ទោរ​ខ្លាំង​ទៅ​រក​លោក ចូ ដៃបិន កាន់តែ​ច្បាស់ៗ​ឡើងៗ​ហើយ។ ក្រៅអំពី​លទ្ធផល​ គេ​ឃើញ​​មាន​​សកម្មភាព​ការពារជុំ​វិញ​លោក​ចូបៃដិន ក៏​ហាក់​ដូច​ជា​ចាប់​មានសន្ធឹក​ថ្មី។ នេះជា​សញ្ញា​មួយ​ទៀត​ថា​អាច​ជា​តំរ៉ុយ​ប្រាប់​ថា​គ្រប់គ្នា​កំពុង​ត្រៀមលក្ខណៈ​ទទួល​ប្រធានាធិបតី​ថ្មី​ហើយ។ ប៉ុន្តែ​ដរាប​ណា​គ្មានការប្រកាស​លទ្ធផល​ “ផ្លូវការ”ពី​សំណាក់​ប្រព័ន្ធ ឃោសនា​ព័ត៌មាន និង​ការ​ទទួល​ស្គាល់​បរាជ័យរបស់​គូប្រជែង គឹ​ប្រធានាធិបតី​កំពុង​កាន់​អំណាច​ទេ ភ្នាក់ងារ​ចារកិច្ច​និងការ​​រក្សា​សន្តិសុខ​ប្រធានាធិបតី​ជាប់​ឆ្នោត​ថ្មី​មិន​ទាន់​ដំណើរការ​បានឡើយ។ នេះ​ជា​បែប​បទ​របស់អាមេរិក។

 

​លោក​បៃដិន​​រៀប​ចំខ្លួនជា​ប្រធានាធិបតីជាប់​ឆ្នោត​ថ្មី​

 

ថ្វី​បើតាម​ក្បួន​គណិត​វិទ្យា លោក​ដូណាល់ត្រាំ នៅ​តែអាច​មាន​សំណាង​ឈ្នះ​ឆ្នោត​ ក្លាយ​ជា​ប្រធានាធិបតី​អាណត្តិ​ទីពីរ​មែន តែសំណាង​នោះ​កាន់​តែ​រួម​តូច។ ហេតុ​ដូច្នេះហើយ​បាន​​ ​នៅ​ល្ងាច​មិញ​លោក​​ចូបៃ​ដិន​ បាន​ចេញ​មុខធ្វើ​អន្តរាគមន៍​ជា​លើក​ទី​បី ដោយ​មិន​បាន​ប្រកាស​ជោគជ័យ​ទេ។ លោក បានត្រឹម​​បង្ហាញ​សុទិដ្ឋិនិយម​ ថា​លោកនឹង​ទទួល​បាន​ជោគជ័យ​ច្បាស់​លាស់។ លោកបានបញ្ជូន​សារ​សម្រប​សម្រួល​ ​​​អំពាវនាវ​ឱ្យ​ប្រជាពលរដ្ឋ​អាមេរិក​ទាំងអស់​ពន្លត់​កំហឹង និង​រួបរួមគ្នា​ឡើ​ងវិញ ដោយ​អះអាង​លោកកំពុង​ធ្វើការ​ជាមួយ​គ្រប់​ពលរដ្ឋ​មិនថា​អ្នកនោះ​បាន​បោះឆ្នោត​ឬ​មិន​បាន​បោះឆ្នោត​ឱ្យ​លោក​ឡើយ។ ហើយ​ឆ្លៀត​ក្នុង​ពេល​ដែល​សហរដ្ឋ​អាមេរិក​កំពុង​ប្រឈម​នឹង​អត្រា​ឆ្លង​កូវីដ​១៩​ឡើង​ខ្ពស់​ដល់​កំរិត​កំពូល និង​មានករណី​ឆ្លង​កូវីដ​១៩​នៅ​ក្នុង​សេតវិមានម្នាក់​ គឺ​អគ្គលេខា​សេតវិមាន​តែម្តង​ផង​នោះ លោក បៃដិន បាន​ប្រកាស​ ​ថា​ រដ្ឋាភិបាល​​អាណត្តិ​ថ្មី​នឹងបញ្ចេញ​សកម្មភាព​បន្ទាន់​ជួយ​សង្គ្រោះជីវិត​ ដល់​​ប្រជាពលរដ្ឋ​អាមេរិក​ពី​កូវីដ​១៩ ក្នុង​ថ្ងៃ​ដំបូង​ភ្លាម​តែម្តង។

 

បាត់​លោកដូណាល់ ត្រាំ មួយថ្ងៃ

 

ចំណែកលោក​ដូណាល់ ត្រាំ វិញ​ពុំ​បាន​ចេញ​មុខ​ថ្លែង​សុន្ទរកថា​អ្វី​ និងក៏​មិន​​បង្ហាញ​វត្តមានសោះ​ នៅ​ថ្ងៃសុក្រ​ម្សិលមិញ។ ​ក្រោយ​ប្រសាសន៍​របស់​លោក​បៃដិន លោកត្រាំ​បាន​បង្ហោះ​សារទ្វីតខ្លី​មួយ​ព្រមាន​ថា កុំ​ឱ្យលោក​បៃដិន​ប្រកាស​​ជោគជ័យ ដោយ​​ខុស​ច្បាប់។ បណ្តឹង​តាម​ផ្លូវ​តុលាការ​ទើប​ចាប់​ផ្តើមតែ​ប៉ុណ្ណោះ។

​ក្រុមការងារ​ឃោសនា​បោះឆ្នោត​របស់​​លោក​ត្រាំ បានចាប់​ផ្តើម​​ដាក់​ពាក្យ​បណ្តឹង​​​នៅ​តាម​រដ្ឋ​ផ្សេង​ៗ​ តាំង​ពីថ្ងៃ​អង្គារ​ក្រោយ​ការបិទការិយាល័យ​បោះឆ្នោត​ភ្លាមម្ល៉េះ។ មាន​ជា​អាទិ៍ បណ្តឹង​នៅ​រដ្ឋ​វីសខុន​ស៊ីន សុំ​ឱ្យ​រាប់​សន្លឹក​ឆ្នោត​ឡើង​វិញ។ បណ្តឹង​នេះ​អាច​មាន​សំណាង​បាន​សម្រេច​ ព្រោះ​បើគន្លាត​សំឡេង​មាន​តែ​១% ឬ​ក្រោម​១%នោះបេក្ខជន​អាច​សុំ​ឱ្យ​​​រាប់​ឡើង​វិញបាន។ តុលាការ​រដ្ឋ​នេះ​អាច​ផ្តល់​ចម្លើយ​នៅ​រវាង​មួយ​ថ្ងៃ​ ពីរ​ថ្ងៃ​ ដល់​អាទិត្យ​​ផង​។ តែ​​រដ្ឋនេះ​បាន​គោរព​តាម​បែប​បទ​យ៉ាង​ហ្មត់​ ទើប​អ្នកជំនាញ​ខ្លះ​យល់​ថាពិបាក​តវ៉ា​ប្រឆាំង​ណាស់​។

នៅMichigan ក្រុមលោក​ត្រាំ បានប្តឹង​ឱ្យ​ឈប់​រាប់​សន្លឹកឆ្នោត (មុន​ប្រកាស​ជោគជ័យ​ទៅ​លោក​បៃដិន)។ តែ​បើ​តាម​ប្រភពCNN តុលាការ​កំពូល​រដ្ឋ​នេះ​ទំនង​ជា​ច្រាន​ចោទ​បណ្តឹងនោះ។ នៅ​ហ្ស័កហ្ស៊ី អាជ្ញាធរ​បាន​ប្រកាស​រាប់​សាឡើង​វិញ​ទៅ​ហើយ។ ឯ​នៅតែPennsylvanie ដែលប្រកាស​ទទួល​សន្លឹក​ឆ្នោត​តាម​ប៉ុស្តិ៍​រហូត​ដល់​ថ្ងៃ​ទី ៦ វិច្ឆិកា ឱ្យ​តែ​សំបុត្រ​បោះត្រា​ចេញ​មុនថ្ងៃ​បោះឆ្នោត​​ថ្ងៃទី ៣​វិច្ឆិកា តុលាការ​បាន​បញ្ជា​ឱ្យរាប់​សន្លឹកឆ្នោតទទួលបានក្រោយ​ថ្ងៃទី ៣​វិច្ឆិកាដោយ​ឡែក តែ​មិនបានបញ្ជា​ឱ្យឈប់​រាប់​សន្លឹកឆ្នោត​ទាំង​នោះ​ ដូច​ការ​ទាមទារ​របស់​ក្រុមលោក​ត្រាំ​ឡើយ។

 

ប៉ុន្តែ​ការ​តវ៉ា​តាមផ្លូវ​តុលាការ និង​ពិសេស​ការ​បរិហារ​អំពី​ការ​លួច​បន្លំ​សន្លឹក​ឆ្នោត​របស់​លោក ត្រាំ​ បាន​ធ្វើ​ឱ្យ​ឥស្សរជន​ក្នុង​ជួរ​​​គណបក្សសាធារណរដ្ឋ​​ ផ្ទាល់​តែម្តង​ ខ្លះ​ ចាប់​ដក​ខ្លួន​ឱ្យ​ឃ្លាត​ពី​ជំហរ​របស់​លោកត្រាំ ជាក់ស្តែង​គឺ​ប្រធានព្រឹទ្ធសភា​ ដ៏​មាន​ឥទ្ធិពល​តែ​ម្តង។

​បណ្តឹង​របស់​លោក​ត្រាំ​គ្មានមូលដ្ឋាន​ទេសម្រាប់​បក្ស​ប្រជាធិបតេយ្យ ​ ប៉ុន្តែការ​តវ៉ា​​នេះ​អាច​ពន្យឺត​ពេលវេលា នៃ​ការ​ប្រកាស​លទ្ធផល​បោះឆ្នោត​ អស់​ជា​ច្រើន​ថ្ងៃ និង​ជា​ច្រើន​សប្តាហ៍​៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI