អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

សហរដ្ឋអាមេរិក៖លោកដូណាល់ ត្រាំសម្រេចកាត់បន្ថយទ័ពអាមេរិកនៅអាហ្វហ្កានីស្ថាន និងអ៊ីរ៉ាក់ពីពេលនេះទៅខែមករា ឆ្នាំ ២០២១

សំឡេង ០៦:៥៤
រដ្ឋមន្រ្តីក្រសួងការពារជាតិថ្មីអាមេរិក លោក Christopher Miller
រដ្ឋមន្រ្តីក្រសួងការពារជាតិថ្មីអាមេរិក លោក Christopher Miller AP
៣២ នាទី

នៅ​សហរដ្ឋអាមេរិក រដ្ឋមន្រ្តី​ក្រសួង​ការពារជាតិ​ថ្មី​លោក Christopher Miller បាន​ប្រកាស​ក្នុង​ថ្ងៃ​អង្គារ ទី១៧ វិច្ឆិកា​ពី​ការ​កាត់​បន្ថយ​ចំនួន​ទ័ពអាមេរិក​នៅ​ក្នុង​ប្រទេស​អាហ្វហ្កានីស្ថាន និង​នៅ​ក្នុង​ប្រទេស​អ៊ីរ៉ាក់។ ចាប់​ពី​ពេល​នេះ​ទៅ​ខែ​មករា ឆ្នាំ ២០២១ មាន​ទ័ពអាមេរិក​ប្រមាណ​ជា ២ ០០០នាក់​នឹង​ដក​ចេញ​ពី​អាហ្វហ្កានីស្ថាន និង​មាន ៥០០នាក់​នឹង​ដក​ចេញ​ពី​អ៊ីរ៉ាក់។ ការ​សម្រេច​របស់​លោក Christopher Miller ត្រាំ​យ៉ាង​ដូច​នេះ​បាន​បង្ក​ឲ្យ​មាន​ប្រតិកម្ម​នៅ​សហរដ្ឋអាមេរិក និង​ក្រុម​ប្រទេស​សម្ព័ន្ធមិត្ត​របស់​សហរដ្ឋអាមេរិក​ក្នុង​អង្គការ​អូតង់​ដែល​កំពុង​មាន​កម្លាំងទ័ព​នៅ​អាហ្វហ្កានីស្ថាន។

ផ្សាយពាណិជ្ជកម្ម

រឿង​សហរដ្ឋអាមេរិក​កាត់​បន្ថយ​ចំនួន​ទ័ព​នៅ​អាហ្វហ្កានីស្ថាន ឬ​នៅ​អ៊ីរ៉ាក់​មិនមែន​ជា​រឿង​ថ្មី​ទេ ព្រោះ​ជា​ឆន្ទៈ​របស់​លោក​ត្រាំ និង​ជា​អ្វី​ដែល​លោក​ត្រាំ​បាន​សន្យា​តាំង​ពី​នៅ​ក្នុង​សម័យ​ឃោសនា​បោះឆ្នោត​ឆ្នាំ ២០១៦។ សម្រាប់​លោក​ត្រាំ សង្រ្គាម​របស់​អាមេរិក​នៅ​អាហ្វហ្កានីស្ថាន និង​នៅ​អ៊ីរ៉ាក់​ជា​សង្រ្គាម​គ្មាន​ទីបញ្ចប់​ដែល​អាមេរិក​បាន​ចំណាយ​លុយ​យ៉ាង​ច្រើន​សម្បើម និង​ដែល​អាមេរិក​ត្រូវ​នាំ​ទាហាន​របស់​ខ្លួន​ឲ្យ​ត្រឡប់​ទៅ​ផ្ទះ​វិញ។ តាម​ការ​ប្រកាស​របស់​រដ្ឋមន្រ្តី​ក្រសួង​ការពារជាតិ​ថ្មី​លោក Christopher Miller មាន​ទ័ពអាមេរិក​ប្រមាណ​ជា ២ ០០០នាក់​នឹង​ដក​ចេញ​ពី​អាហ្វហ្កានីស្ថាន និង​មាន ៥០០នាក់​នឹង​ដក​ចេញ​ពី​អ៊ីរ៉ាក់។ កម្មវត្ថុ​របស់​លោក​ត្រាំ គឺ​រក្សា​ទុក​ទ័ពអាមេរិក​តែ​ចំនួន ២ ៥០០នាក់​នៅ​អាហ្វាហ្កានីស្ថាន និង ២ ៥០០នាក់​នៅ​អ៊ីរ៉ាក់។

ក្រៅ​ពី​ហេតុផល​ចង់​គោរព​ពាក្យ​សន្យា​ក្នុង​សម័យ​ឃោសនា​បោះឆ្នោត សហរដ្ឋអាមេរិក​ក៏​សំអាង​លើ​កិច្ចព្រមព្រៀងសន្តិភាព​ដែល​ខ្លួន​បាន​ចុះ​ហត្ថលេខា​ជាមួយ​ចលនា​ឧទ្ទាម​តាលីបង់​នៅ​អាហ្វហ្កានីស្ថាន។ តាម​រយៈ​កិច្ចព្រមព្រៀង​សន្តិភាព​មួយ​នេះ ក្រុង​វ៉ាស៊ីតោន​បាន​ទទួល​ពាក្យ​សន្យា​ពី​ពួក​តាលីបង់​ក្នុង​ការ​បញ្ឈប់​អំពើ​ភេរវកម្ម​នៅ​អាហ្វហ្កានីស្ថាន។ តែ​អ្វី​ដែល​គេ​បាន​ឃើញ​នា​ពេល​កន្លង​មក ពួក​ឧទ្ទាម​មួយ​នេះ​នៅ​តែ​បន្ត​ការ​វាយប្រហារ​ដដែល។ មាន​ការ​កត់សម្គាល់​មួយ​នៅ​ក្នុង​ការ​ប្រកាស​របស់​លោក Christopher Miller គឺ​ជម្រើស​ពេល​វេលា​នៃ​ការ​ដក​ទ័ពអាមេរិក​ដែល​ត្រូវ​ចាប់​ផ្តើម​ពី​ពេល​នេះ​ទៅ​ថ្ងៃទី១៥ មករា ឆ្នាំ ២០២១ ពោល ៥ថ្ងៃ​មុន​នឹង​ប្រធានាធិបតី​ជាប់ឆ្នោត​លោក​ចូ បៃដិន​ស្បថ​ចូល​កាន់​តំណែង។

អាហ្វហ្កានីស្ថាន​នឹង​ក្លាយ​ជា​មូលដ្ឋាន​របស់​ពួក​ភេរវជនអន្តរជាតិ​ឡើង​វិញ?

ក្រោយ​មហាភេរវកម្ម​ថ្ងៃ១១ កញ្ញា ឆ្នាំ ២០០១ នៅ​សហរដ្ឋអាមេរិក រដ្ឋបាល​អាមេរិក​ក្នុង​ជំនាន់​ប្រធានាធិបតី​លោក George W.Bush បាន​បើក​ការ​វាយប្រហារ​លើ​អាហ្កហ្វានីស្ថាន​ដើម្បី​តាម​ប្រម៉ាញ់​ពួក​អាល់កៃដា។ ប្រតិបត្តិការ​សឹក​របស់​អាមេរិក​នៅ​អាហ្វហ្កានីស្ថាន​បាន​ឈាន​ទៅ​ទម្លាក់​អំណាច​របស់​ពួក​តាលីបង់។ បន្ទាប់​មក​ក្នុង​ឆ្នាំ ២០០១ ដដែល ក្រុម​ប្រទេស​សមាជិក​អង្គការ​អូតង់​ក៏​បាន​បញ្ជូន​កម្លាំងទ័ព​ទៅ​រួម​ជាមួយ​អាមេរិក​ដើម្បី​ធានា​កុំ​ឲ្យ​អាហ្វហ្កានីស្ថាន​ក្លាយ​ជា​ទីជម្រក​របស់​ក្រុម​ភេរវជន​អាល់កៃដា។ នៅ ២ឆ្នាំ ក្រោយ​មក ពោល​ក្នុង​ឆ្នាំ ២០០៣ រដ្ឋបាល​អាមេរិក​របស់​លោក George W.Bush ក៏​បាន​បើក​សមរភូមិ​សង្រ្គាម​មួយ​ទៀត​នៅ​អ៊ីរ៉ាក់។

តែ​ខុស​ពី​អាហ្វហ្កានីស្ថាន សង្រ្គាម​របស់​អាមេរិក​នៅ​អ៊ីរ៉ាក់​មិន​សូវ​បាន​ទទួល​ការ​គាំទ្រ​ពី​សហគមន៍​អន្តរជាតិ​ប៉ុន្មាន​ទេ ពោល​មាន​ការ​គាំទ្រ​តែ​ពី​ប្រទេស​សម្ព័ន្ធមិត្ត​ជិតដិត​របស់​អាមេរិក​ប៉ុណ្ណោះ។ ប្រមុខ​អង្គការ​អូតង់​លោក Stoltenberg បាន​សម្តែង​ក្តី​បារម្ភ​ខ្លាំង​ស្តីពី​ការ​កាត់​បន្ថយ​ទ័ពអាមេរិក​នៅ​ងាហ្វហ្កានីស្ថាន។ លោក Stoltenberg បាន​និយាយ​ពេញ​មាត់​ថា ការ​ដែល​អាមេរិក​បាន​ប្រកាស​ដក​ទ័ព​យ៉ាង​ទាន់ហន់​របៀប​នេះ​នឹង​ធ្វើ​ឲ្យ​អាហ្វហ្កានីស្ថាន​ក្លាយ​ជា​ជម្រក​របស់​ពួក​ភេរវជនអន្តរជាតិ​ជា​ថ្មី។ ភេរវជនអន្តរជាតិ​ដែល​លោក Stoltenberg ចង់​និយាយ គឺ​ពួកជីហាត​អាល់កៃដា និង​ពួកជីហាត​អង្គការ​រដ្ឋអ៊ីស្លាម​ដែល​បាក់ទ័ព​ចេញ​ពី​ប្រទេស​ស៊ីរី និង​អ៊ីរ៉ាក់។

ប្រតិកម្ម​ជំទាស់​នឹង​ការ​កាត់​បន្ថយ​ទ័ពអាមេរិក​ពី​អាហ្វហ្កានីស្ថាន និង​ពី​អ៊ីរ៉ាក់​ក៏​មាន​នៅ​សហរដ្ឋអាមេរិក​ដែរ ពិសេស​ពី​រដ្ឋមន្រ្តី​ការពារជាតិ​លោក Mark Esper ដែល​លោក​ត្រាំ​ទើប​បាន​ដក​តំណែង និង​លោក Mitch McConnell ប្រធាន​ក្រុម​សំឡេង​ភាគច្រើន​នៅ​ព្រឹទ្ធសភា​មក​ពី​គណបក្ស​សាធារណរដ្ឋ។

អូតង់​ព្យាយាម​រក្សា​សាមគ្គីភាព​ផ្ទៃក្នុង ទោះ​មាន​ការ​សម្រេច​របស់​សហរដ្ឋអាមេរិក

បច្ចុប្បន្ន​នេះ មាន​កម្លាំងទ័ព​អូតង់​ប្រមាណ​ជា ១២ ០០០នាក់​កំពុង​ឈរ​ជើង​នៅ​ក្នុង​ប្រទេស​អាហ្វហ្កានីស្ថាន ក្នុង​នោះ មាន​ប្រមាណ​ជា​ពាក់កណ្តាល​ជា​ទ័ពអាមេរិក។ បើ​អាមេរិក​សម្រេច​ដក​ប្រមាណ​ជា ២ ០០០នាក់​ពី​ពេល​នេះ​ទៅ​ខែ​មករា ឆ្នាំ ២០២១ អូតង់​នឹង​នៅ​សល់​កម្លាំង​សរុប​ប្រមាណ​ជា ១០ ០០០នាក់។ ក្រោយ​អាមេរិក​ប្រកាស​កាត់​បន្ថយ​ចំនួន​ទ័ព អាល្លឺម៉ង់​ដែល​មាន​ទ័ព​ចំនួន ១ ៣០០នាក់​នៅ​អាហ្វហ្កានីស្ថាន​បាន​ថ្លែង​ពិចារណា​លើ​គ្រប់​ជម្រើស ក្នុង​នោះ​ក៏​មាន​ជម្រើស​កាត់បន្ថយ ឬ​ដក​ទ័ព​ចេញ​ដែរ។ តែ​អ្នក​នាំពាក្យ​ក្រសួង​ការពារជាតិ​អាល្លឺម៉ង់​បាន​បញ្ជាក់​ថា ការ​សម្រេច​ចិត្ត​ណា​មួយ​នឹង​ត្រូវ​ពិភាក្សា​ជាមួយ​សមាជិក​ផ្សេង​ទៀត​ដោយ​អាល្លឺម៉ង់​បន្ត​ប្រកាន់​យក​គោលការណ៍ « ចូល​ជាមួយ​គ្នា ចេញ​ជាមួយ​គ្នា »។

ឃ្លា​ស្រដៀង​គ្នា​នេះ​ក៏​ត្រូវ​បាន​បញ្ជាក់​ដោយ​ប្រមុខ​អង្គការ​អូតង់​លោក Stoltenberg ដែរ។ យ៉ាង​ណា​ក៏​ដោយ សំណុំរឿង​មួយ​នេះ​នឹង​ត្រូវ​រដ្ឋមន្រ្តី​ការបរទេស​អូតង់​លើក​យក​ទៅ​ជជែក​នៅ​ក្នុង​កិច្ចប្រជុំ​នា​ថ្ងៃទី១ និង​ទី២ ធ្នូ​ខាង​មុខ។ គួរ​រម្លឹក​ថា​តាំង​ពី​ឆ្នាំ ២០០១ មក មាន​ទាហាន​អឺរ៉ុប​ក្នុង​អង្គការ​អូតង់​ជាង ១ ០០០នាក់​បាន​ស្លាប់​នៅ​អាហ្វហ្កានីស្ថាន។ ចំណែក​សហរដ្ឋអាមេរិក បើ​គិត​នៅ​អាហ្វហ្កានីស្ថាន និង​នៅ​អ៊ីរ៉ាក់​បូក​បញ្ចូល​គ្នា គឺ​មាន​ទាហានអាមេរិក​ស្លាប់​ជាង ៦ ៩០០នាក់ និង​របួស​ជាង ៥២ ០០០នាក់​ក្នុង​រយៈពេល​ជិត ២០ឆ្នាំ​កន្លង​ទៅ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ