អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

សហរដ្ឋអាមេរិក៖ទីភ្នាក់ងារឱសថអនុញ្ញាតឲ្យក្រុមហ៊ុន Regeneron ប្រើ « REGEN-COV2 » ដើម្បីប្រឆាំងនឹងកូវីដ១៩

សំឡេង ០៦:៥៦
ក្រុមហ៊ុនជីវបច្ចេកវិទ្យាអាមេរិក Regeneron
ក្រុមហ៊ុនជីវបច្ចេកវិទ្យាអាមេរិក Regeneron REUTERS - Brendan McDermid
៣៣ នាទី

នៅ​សហរដ្ឋអាមេរិក ទីភ្នាក់ងារ​ឱសថអាមេរិក​ហៅកាត់​ជា​ភាសា​អង់គ្លេស FDA (Food and Drugs Administration) បាន​អនុញ្ញាត​ជា​បន្ទាន់​នា​ថ្ងៃ​សៅរិ៍ ទី២១ វិច្ឆិកា​ឲ្យ​ក្រុមហ៊ុន​ជីវបច្ចេកវិទ្យា Regeneron ប្រើ « REGEN-COV2 » ឬ​ហៅ​អង់ទី កសំយោគ​ដើម្បី​ប្រឆាំង​នឹង​ជំងឺ​កូវីដ១៩។ អង់ទី កសំយោគ​នេះ​ធ្លាប់​បាន​ប្រើ​ព្យាបាល​ប្រធានាធិបតី​អាមេរិក​លោក​ដូណាល់ ត្រាំ​កាល​ពី​ដើមខែ​តុលា​នៅ​ពេល​ដែល​លោក​បាន​ឆ្លង​ជំងឺ​កូវីដ១៩។ ក្រៅ​ពី​ក្រុមហ៊ុន Regeneron វិធីសាស្រ្ត​ប្រើ​អង់ទី កសំយោគ​ដើម្បី​ប្រឆាំង​នឹង​កូវីដ១៩​ក៏​ត្រូវ​បាន​ទីភ្នាក់ងារ​ឱសថអាមេរិក​អនុញ្ញាត​ឲ្យ​ក្រុមហ៊ុន Eli Lilly កាល​ពី​ថ្ងៃទី៩ វិច្ឆិកា​កន្លង​ទៅ​ដែរ។ គួរ​បញ្ជាក់​ថា​នៅ​សហរដ្ឋអាមេរិក គិត​ត្រឹម​ថ្ងៃ​អាទិត្យ ទី២២ វិច្ឆិកា មាន​ករណី​កូវីដ១៩​ជាង ១២លានករណី និង​មាន​អ្នក​ស្លាប់​ចំនួន ២៥៥ ៨០០នាក់។

ផ្សាយពាណិជ្ជកម្ម

អង់ទី កសំយោគ​ដែល​​ក្រុមហ៊ុន​ជីវបច្ចេកវិទ្យា Regeneron បាន​លើក​ឡើង​នេះ គឺ​ជា​ការ​ផ្សំ​បញ្ចូល​គ្នា​រវាង​អង់ទី ក​ចំនួន​ពីរ​ដែល​គេ​ឲ្យ​ឈ្មោះ « REGEN-COV2 »។ តែ​ក្រុមហ៊ុន Regeneron មិន​បាន​បញ្ជាក់​ទេ​ថា តើ​អង់ទីក​នីមួយៗ​បាន​ផលិត​ឡើង​យ៉ាង​ដូចម្តេច និង​ចេញ​ពី​ប្រភព​អ្វី។ បើ​តាម​មើល​ទៅ អាច​មាន​អង់ទីក​មួយ​ផលិត​ចេញ​ពី​ប្រព័ន្ធ​ការពារ ឬ​អង់ទី ក​របស់​អ្នក​ជា​សះស្បើយ​ពី​ជំងឺ​កូវីដ១៩។ វិធីសាស្រ្ត​ព្យាបាល​កូវីដ១៩ ដោយ​ប្រើ​អង់ទី ក របស់​អ្នក​ជា​សះស្បាយ​ពី​កូវីដ១៩ មិនមែន​ជា​រឿង​ថ្មី​ទេ។ កាល​ពី ៤ខែ​កន្លង​ទៅ ក្រុម​អ្នកស្រាវជ្រាវ​ចិន​ក៏​ធ្លាប់​បាន​បញ្ជាក់​ពី​ការ​ពន្លឿន​ការ​ជា សះស្បើយ និង​ថែម​ទាំង​អាច​ទប់​ការ​ឆ្លង​កូវីដ១៩ ដោយ​ប្រើ​ត្រឹម​អង់ទី ក​ដែល​យក​ចេញ​ពី​អ្នក​ជា​សះស្បាយ​កូវីដ១៩។

ក្រុមហ៊ុន​ជីវបច្ចេកវិទ្យា Regeneron បាន​បញ្ជាក់​ថា អង់ទី កសំយោគ​របស់​ខ្លួន​មាន​ប្រសិទ្ធិភាព​សម្រាប់​តែ​អ្នក​ឆ្លង​កូវីដ១៩ នៅ​ក្នុង​ដំណាក់ការ​ទី១ មាន​ន័យ​ថា ជា​ដំណាក់ការ​ដែល​វីរុស​នៅ​មិន​ទាន់​បាន​វាយ​លុក​ចូល​ដល់​សួត និង​សេរីរាង្គ​ផ្សេង​ទៀត​នៅ​ក្នុង​ខ្លួន។ តួនាទី​របស់ អង់ទី កសំយោគ​នេះ គឺ​ប្រឆាំង​ទប់ និង​រារាំង​កុំ​ឲ្យ​វត្តមាន​វីរុស​កូវីដ១៩ នៅ​ក្នុង​ខ្លួន​របស់​អ្នក​ទើប​ឆ្លង​ថ្មី​ចូល​ទៅ​វាយប្រហារ​ដល់​សួត និង​សេរីរាង្គ​ផ្សេង​ទៀត។ បើ​អ្នក​ជំងឺ​កូវីដ១៩ ធ្លាក់​ខ្លួន​ចូល​ដំណាក់ការ​ទី២ ដែល​ត្រូវ​ចូល​ព្យាបាល​ក្នុង​មន្ទីរពេទ្យ និង​ត្រូវ​ការ​ជំនួយ​ផ្លូវដង្ហើម ការ​ប្រើ​អង់ទី កសំយោគ​ក៏​គ្មាន​ប្រសិទ្ធិភាព​ដែរ។ ប្រធានាធិបតី​អាមេរិក​លោក​ដូណាល់ ត្រាំ​ដែល​បាន​ជា​សះស្បើយ​ពី​កូវីដ១៩ ក៏​ដោយសារ​តែ​ការ​ប្រើ​អង់ទី កសំយោគ។

លោក Leonard Schleifer ប្រធាន​ក្រុមហ៊ុន Regeneron បាន​បញ្ជាក់​ថា ក្រុមមនុស្ស​ដែល​មាន​ហានិភ័យខ្ពស់ និង​ងាយ​រងគ្រោះ​ខ្លាំង​ជា​ប្រភេទ​មនុស្ស​ដែល​នឹង​ទទួល​បាន​មុន​គេ​នូវ​ការ​ព្យាបាល​កូវីដ១៩​ដោយ​អង់ទី កសំយោគ​នៅ​ក្នុង​ការ​ឆ្លង​ដំណាក់ការ​ទី១។ ប្រធាន​ក្រុមហ៊ុន Regeneron រូប​នេះ​ដដែល​បាន​ធានា​ថា ការ​ដែល​ទីភ្នាក់ងារ​ឱសថអាមេរិក​អនុញ្ញាត​ឲ្យ​ប្រើ​អង់ទី កសំយោគ​នេះ​ជា​ការ​បោះ​មួយ​ជំហាន​យ៉ាង​សំខាន់​នៅ​ក្នុង​យុទ្ធនាការ​ប្រឆាំង​នឹង​កូវីដ១៩ នៅ​សហរដ្ឋអាមេរិក។

មាន​វ៉ាក់សាំង​បង្ការ​កូវីដ១៩ នៅ​មុន​ដំណាច់​ឆ្នាំ ២០២០?

ការ​ដែល​ទីភ្នាក់ងារ​ឱសថអាមេរិក FDA បាន​អនុញ្ញាត​ឲ្យ​ប្រើ​អង់ទី កសំយោគ​ដើម្បី​ប្រឆាំង​នឹង​កូវីដ១៩ ពេល​នេះ​បាន​ធ្វើ​ឡើង ខណៈ​ដែល​ក្តីសង្ឃឹម​មាន​វ៉ាក់សាំង​បង្ការ​កូវីដ១៩ លេច​ពន្លឺ​កាន់​តែ​ច្បាស់​ឡើងៗ។ មាន​មន្ទីរពិសោធន៍​អាមេរិក​ចំនួន​ពីរ​បាន​ប្រកាស​ពី​ប្រសិទ្ធិភាព​វ៉ាក់សាំង​បង្ការ​កូវីដ១៩ គឺ​មន្ទីរពិសោធន៍ Pfizre/BioNTech និង​មន្ទីរពិសោធន៍ Moderna។ មន្ទីរពិសោធន៍ Moderna បាន​បញ្ជាក់​ពី​ប្រសិទ្ធិភាព​វ៉ាក់សាំង​ខ្លួន​ចំនួន ៩៤,៥% ហើយ​ក្រុមហ៊ុន Pfizre/BioNTech ដែល​បាន​ប្រកាស​ដំបូង​ពី​ប្រសិទ្ធិភាព ៩០% បាន​បញ្ជាក់​ជា​លើកទី២ ពី​មាន​ប្រសិទ្ធិភាព​ដល់​ទៅ ៩៥%។ បន្ទាប់​មក​ក្នុង​ថ្ងៃទី១៩ វិច្ឆិកា មន្ទីរពិសោធន៍ Pfizre/BioNTech បាន​ដាក់​ពាក្យ​សុំ​អាជ្ញាបណ្ណ​ពី FDA ដើម្បី​ផលិត និង​ចែកចាយ​វ៉ាក់សាំង​បង្ការ​កូវីដ​១៩។

នាយក FDA លោក Stephen Hahn បាន​បញ្ជាក់​ថា គណៈកម្មាធិការ​ពិគ្រោះយោបល់​នឹង​បើក​កិច្ចប្រជុំ​ជា​​សាធារណៈ​នា​ពេល​ឆាប់ៗ​ខាង​មុខ។ មាន​លក្ខខណ្ឌ​សំខាន់​ចំនួន​ពីរ​ដែល FDA ត្រូវ​ពិនិត្យ មុន​នឹង​ផ្តល់​អាជ្ញាបណ្ណ គឺ​ប្រសិទ្ធិភាព​របស់​វ៉ាក់សាំង និង​សន្តិសុខ​របស់​វ៉ាក់សាំង​នៅ​ក្រោយ​ការ​ចាក់​លើ​មនុស្ស។ បើ​តាម​លោក Moncef Slaoui អ្នក​ទទួល​ខុស​ត្រូវ​វិទ្យសាស្រ្តា​នៃ​ប្រតិបត្តិការ​រដ្ឋាភិបាល​ឈ្មោះ « Warp Speed » FDA នឹង​ផ្តល់​ការ​អនុញ្ញាត​ឲ្យ​ប្រើប្រាស់​វ៉ាក់សាំង​ក្នុង​ក្របខណ្ឌ​បន្ទាន់​សុខភាព​នៅ ២សប្តាហ៍​ដើម​ខែ​ធ្នូ ឆ្នាំ ២០២០។

ការ​អនុញ្ញាត​ឲ្យ​ប្រើប្រាស់​វ៉ាក់សាំង​ក្នុង​ក្របខណ្ឌ​បន្ទាន់​សុខភាព​នឹង​ត្រូវ​ធ្វើ​ឡើង​ទៅ​លើ​ប្រភេទ​មនុស្ស​មួយ​ចំនួន។ តែ​កូនក្មេង​មិន​មាន​ស្ថិត​ក្នុង​ប្រភេទ​មនុស្ស​ដែល​ត្រូវ​ចាក់​វ៉ាក់សាំង​មនុស្ស​គេ​ទេ ព្រោះ​មក​ទល់​ពេល​នេះ មន្ទីរពិសោធន៍ Pfizre/BioNTech នៅ​មិន​បាន​ធ្វើ​ការ​សាកល្បង​វ៉ាក់សាំង​របស់​ខ្លួន​ក្រោម​ទ្រង់ទ្រាយ​ធំ​ទៅ​លើ​កូនក្មេង​ក្រោម​អាយុ ១៨ឆ្នាំ​នៅ​ឡើយ​ទេ។ នៅ​សហរដ្ឋអាមេរិក មជ្ឈមណ្ឌល​បង្ការ និង​ប្រយុទ្ធប្រឆាំង​ជំងឺ​ជា​អ្នក​កំណត់​ប្រភេទ​មនុស្ស​ដែល​មាន​អាទិភាព​ចាក់​វ៉ាក់សាំង ដូច​ជា​ក្រុម​បុគ្គលិក​ពេទ្យ និង​មនុស្សចាស់​ដែល​រស់នៅ​តាម​​មជ្ឈមណ្ឌល​ថែរក្សា​មនុស្សចាស់។ ដោយឡែក ប្រទេស​ផ្សេង​ដូច​ជា​នៅ​អឺរ៉ុប អង់គ្លេស កាណាដា ជប៉ុន និង​អូស្រា្តលី​មាន​នីតិវិធី​ខុស​គ្នា​បន្តិចបន្តួច​ពី​សហរដ្ឋអាមេរិក។ រដ្ឋអំណាច​សុខភាព​របស់​ប្រទេស​ទាំង​នេះ​កំពុង​សិក្សា​លើ​ទិន្នន័យ និង​លទ្ធផល​សាកល្បង​វ៉ាក់សាំង​ដែល​មន្ទីរពិសោធន៍​នានា​បាន​ផ្តល់​ឲ្យ​បណ្តើរៗ។

មន្ទីរពិសោធន៍ Pfizre/BioNTech បាន​បញ្ជាក់​ថា ក្រោយ​ពី​ទទួល​បាន​អាជ្ញាបណ្ណ​ពី FDA ភ្លាម ខ្លួន​នឹង​ផ្តើម​បញ្ជូន​វ៉ាក់សាំង​បង្ការ​កូវីដ១៩ ភ្លាមភ្លែត​ចេញ​ពី​កន្លែង​ផលិត។ មាន​កំណត់សម្គាល់​មួយ​សម្រាប់​វ៉ាក់សាំង​បង្ការ​កូវីដ១៩ ការ​ដឹកជញ្ជូន​ត្រូវ​រក្សា​ក្នុង​សីតុណ្ហភាព​នៅ​ចន្លោះ​ពី -៧០ ទៅ -៨០អង្សារ​ក្រោម​សូន្យ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ