ព្រឹត្តិការណ៍អន្តរជាតិប្រចាំថ្ងៃ

ពលរដ្ឋ​ភូមា​ចុះ​ធ្វើ​បាតុកម្ម​កាន់​តែ​ច្រើន ក្រោយ​ការ​គំរាម​របស់​រដ្ឋាភិបាល​សឹក

សំឡេង ០៦:៤៩
បាតុកម្ម​ទូទៅ​នៅភូមា​ថ្ងៃទី ២២​កុម្ភៈ ២០២១
បាតុកម្ម​ទូទៅ​នៅភូមា​ថ្ងៃទី ២២​កុម្ភៈ ២០២១ AP
ដោយ៖ អៀង សុខម៉ិញ
៣០ នាទី

ថ្ងៃ​សៅរ៍ ថ្ងៃ​អាទិត្យ ថ្ងៃ​ចន្ទ ... ពី​មួយ​ថ្ងៃ​ទៅ​មួយ​ថ្ងៃ ចំនួន​បាតុករ​ចុះ​ថ្នល់​សម្តែង​កំហឹង​ប្រឆាំង​​នឹង​រដ្ឋប្រហារ​ទម្លាក់​រដ្ឋាភិបាល​ស៊ីវិលដឹកនាំ​ដោយ​លោកស្រី អ៊ុងសាន ស៊ូជី រីក​កាន់​តែ​ធំ។ ប្រឈម​នឹង​ស្ថានភាព​បែប​នេះ មេដឹកនាំ​សឹក​បាន​ចេញ​សេចក្តី​ព្រមាន​ជា​សាធារណៈ​ដោយ​ចំៗ ថា​ធ្វើ​បាតុកម្ម​អាច​ប្រថុយ​នឹង​បាត់​បង់​ជីវិត។ ប៉ុន្តែ​ពលរដ្ឋ​ភូមា​ហាក់​មិន​ចុះ​ញ៉ម​នឹង​ពាក្យ​គំរាម​នេះ​ទេ មនុស្ស​រាប់ម៉ឺន​នាក់​បាន​នាំ​គ្នា​ធ្វើ​បាតុកម្ម​ទៀត នៅ​ថ្ងៃ​ចន្ទទី ២២​កុម្ភៈ​​នេះ​។

ផ្សាយពាណិជ្ជកម្ម

កាន់​តែ​គំរាម​ សន្ទុះ​បាតុកម្ម​មាន​កាន់​តែ​ធំ ពលរដ្ឋ​ភូមា ​រាប់ម៉ឺន​នាក់​បាន​នាំ​គ្នា​ធ្វើ​បាតុកម្ម​ទូទៅ​ទៀត នៅ​ថ្ងៃ​ចន្ទ​​នេះ។ នៅ​វេលា​ម៉ោង​៩ព្រឹក​ បាតុករ​បាន​មក​ប្រមូល​ផ្តុំ​គ្នា​ពេញ​ផ្លូវ​រួច​ជា​ស្រេច​ទៅ​ហើយ ! ថ្ងៃ​នេះ​ គឺ​ជា​កុប្បកម្ម​ទូទៅ ព្រោះ​ជា​ថ្ងៃ​ដែល​មាន​លេខ​ពិសេស។ ២២-​២-២០២១។ ពលរដ្ឋ​ភូមា​មាន​ជំនឿ​​និង​ផ្តល់​តម្លៃ​ខ្លាំង​ណាស់ នៅ​ពេល​សរសេរ​ថ្ងៃ​ខែ​ទៅ​ឃើញ​​លេខ​តែ​មួយដូច​គ្នា​តរដឹក​​អ៊ីចឹង។ មិន​តែ​ប៉ុណ្ណោះ​ពួកគេ​បាន​ភ្ជាប់​ថ្ងៃ​មាន​លេខ​ពីរ​ច្រើន​រដឹកនេះ​ទៅ​នឹង​ថ្ងៃ​បដិវត្ត​ កាលពីថ្ងៃ​ទី ៨​ សីហា ​ឆ្នាំ​១៩៨៨ ដែលកាលណោះ​​មាន​លេខ​៨​មួយ​ជួរ។

ចំពោះ​​ស្ថានភាព​បាតុកម្ម​វិញ ទីតាំង​បាតុកម្ម​ខ្លះ ត្រូវ​បាន​ក្រុម​បាតុករ​មក​តាំង​ទី​​ប្រមូល​ផ្តុំ​គ្នា​តាំង​ថ្ងៃ​អាទិត្យ​ម្សិលមិញ​មក។ នៅ​តាម​ផ្លូវ​គេ​ឃើញ​មាន​តែ​សារ​ឧទ្ទិស​ដល់​​ ​សព​បាតុករ​ ស្លាប់​ដោយ​ត្រូវ​គ្រាប់​កាំភ្លើង​របស់​ប៉ូលិស និង​​បដា​អំពាវនាវ​សុំ​ជំនួយ​​អន្តរាគមន៍​​អន្តរជាតិ ឬ​គំនូស​សរសេរ​ពាក្យ​ស្លោក​ធំ​ៗនៅទ្រូង​ផ្លូវ​តែ​ម្តង​ផង។ ប្រជាពលរដ្ឋ​ភូមា​ហាក់​កំពុង​ក្តោប​ក្តាប់​​ទីក្រុង​កាន់​តែ​ខ្លាំង​ឡើងៗហើយ។

ចំណែក​​កង​កម្លាំង​នគរ​បាលវិញ​ ដូច​ជា​មិន​សូវ​តឹង​តែង។ កង​កម្លាំង​រក្សា​សន្តិសុខ​ មិន​បាន​បិទ​ផ្លូវ​ធំៗ​របស់​ក្រុង​និង​រដ្ឋធានី​ទេ។ គឺ​បិទ​ខ្ទប់​តែ​ផ្លូវ​នាំ​ទៅ​ស្ថានទូត​ និង​ការិយាល័យ​​អង្គការ​សហប្រជាជាតិតែប៉ុណ្ណោះ។

ស្ថានការណ៍​ភូមា ​ចូល​ដល់​ដំណាក់កាល​ថ្មី​ ?

ប៉ុន្តែ​​កាលពី​ម្សិលមិញ ក្រុម​យោធា​បាន​ចេញ​សេចក្តី​ព្រមាន​ចលនា​បះបោរ​ស៊ីវិល​ ដោយ​ចំ​ៗ​ថា “ បាតុករ​កំពុង​តែ​ញុះញង់​មនុស្ស ជា​ពិសេស​ក្មេង​ជំទង់ និងក្មេង​ទំនើង​ ឱ្យ​លុង​ក្នុងកុប្បកម្ម​ និង​អំពើ​អនាធិបតេយ្យ​ដែល​នឹងអាច​នឹង​ត្រូវ​បាត់​បង់​ជីវិត”។ សេចក្តី​ថ្លែងការណ៍​នេះ មាន​ផ្សាយ​ក្នុង​កញ្ចក់​ទូរទស្សន៍​ជាតិ MRTV ដោយមាន​​ប្រែ​ជា​ភាសា​អង់គ្លេស​ទៀត។

អ្នក​រាយការណ៍​ពិសេស​​របស់​អង្គការ​សហប្រជាជាតិ​ផ្នែក​សិទ្ធិមនុស្ស​នៅភូមា លោក Tom Andrews បាន​សម្តែង​ការ​ព្រួយ​បារម្ភ​យ៉ាង​ខ្លាំង​ចំពោះ​ស្ថានភាព​ភូមា​នាពេល​នេះ​។

អាជ្ញាធរ​សឹក​​បាន​ប្រកាស​ប្រើ​មធ្យោបាយ​ក្តៅ ដើម្បី​បិទ​បញ្ចប់​សកម្មភាពដែល​គេ​ហៅ​ថា​ ជា​ភាព​ “អនាធិបតេយ្យ”។ តែ​​គួរឱ្យ​ស្ងើច ចំនួន​បាតុករ​បែរ​ជា​កើន​ឡើង​​ខ្លាំង​ណាស់ ច្រើន​សឹង​អាច​និយាយ​បាន​ថា​​មិន​ធ្លាប់​មាន​ទេ​ពី​មុន​មកទេ។ បាតុករ​មាន​គ្រប់​សណ្ឋាន មាន​ទាំង​ជនជាតិ​ភាគ​តិច ស្ហាន កាឈីន ណាហ្កា អ៊ីស្លាម​ កសិករ​អ្នក​ស្រែ​ចម្ការ អ្នក​ក្រុង​ អ្នក​មធ្យម​ ... បើ​គិត​ត្រឹម​ចំណុច​នេះ គេ​ពិត​ជា​អាច​និយាយ​បាន​ថាស្ថានការណ៍​ភូមា​​បាន​ឆ្លង​ចូល​ដំណាក់កាល​ថ្មីមួយមែន។ បី​សប្តាហ៍​ក្រោយ​រដ្ឋ​ប្រហារ​ និង​ការ​បញ្ចេញ​សាច់​ដុំ​របស់​យោធា ពេល​នេះ​​ក្រុម​បាតុករ​ក៏​ចាប់​ផ្តើម​បង្ហាញ​កម្លាំង​របស់​ពួក​គេ​ដែរ។ ជា​ការ​ល្បង​កម្លាំងចិត្ត​សាស្ត្រ​គ្នា ដែល​អាច​រុញ​ច្រាន​​ស្ថានការណ៍ឱ្យ​កាន់​តែ​​តាន​តឹងបាន។

មានការ​ជ្រៀតជ្រែក​កិច្ចការ​ផ្ទៃក្នុង​ភូមា

សហគមន៍​អន្តរជាតិ​ អង្គការ​សហប្រជាជាតិ​បាន​ចេញ​សារ​ថ្កោល​ទោស​របប​សឹក​ភូមា​ជា​ថ្មី​ទៀត។ សហភាព​អឺរ៉ុបក៏​​ត្រូវ​ប្រជុំ​សម្រេច​ដាក់​ទណ្ឌកម្ម​ក្រុមយោធា​ភូមា​ទៀត នៅ​ថ្ងៃ​នេះ ប៉ុន្តែ​មេដឹកនាំ​យោធា​ភូមា​ ហាក់​គ្មាន​ស្កៀប​រមាស់​អ្វី​នឹង​ប្រតិកម្ម​របស់​អន្តរជាតិ​ទេ​។

មិន​​​ខ្វល់​ខ្វាយ​ហើយ​ មេដឹកនាំ​យោធា​ភូមា​​បាន​ថែម​ទាំង​បរិហារ​បក​វិញ​ នៅ​ល្ងាច​មិញ តាម​រយៈ​សំដី​របស់​រដ្ឋ​មន្ត្រីការបរទេស​ថា មាន​ការ​ជ្រៀតជ្រែក​កិច្ចការ​ផ្ទៃក្នុង​ភូមា យ៉ាង​ក្រឡែត និ​ងដោយ​ឥត​លាក់​លៀមទេ។ ថ្វី​បើ​មាន​បាតុកម្ម​ខុសច្បាប់ មានកា​រញុះញង់​ឱ្យ​មាន​វិបត្តិ​និ​ងអំពើ​ហិង្សា​ រដ្ឋាភិបាល​ភូមា​ខំ​អត់​ធ្មត់​ខ្លាំង​ណាស់ និ​ងប្រើ​មធ្យោបាយ​បង្ក្រាប​យ៉ាង​តិច​តួច​បំផុត​ហើយ។ នេះ​ជា​សេចក្តី​ថ្លែងការណ៍​របស់​ក្រសួង​ការ​បរទេស​ភូមា​ទៅ​កាន់​សហគមន៍​អន្តរជាតិ។

មេដឹកនាំ​យោធា​ដែល​ទំនង​ជាមិន​នឹក​ស្មាន​ដល់​ថា​ពលរដ្ឋ​ភូមា​អាច​ហ៊ាន​ធ្វើ​បាតុកម្ម​ដល់​កំរិត​នេះ មិន​ខ្វល់​នឹ​ងប្រតិកម្ម​ថ្កោល​ទោស​របស់​អន្តរជាតិ​ ក៏​ព្រោះ​​ចង់​យក​គំរូ​តាម​របប​ដឹកនាំ ដូច​នៅ​តាម​​បណ្តា​ប្រទេស​នៅ​ក្នុង​តំបន់​ផ្សេង​មាន​ជា​អាទិ៍​ថៃ ជា​ឧទាហរណ៍​ជាក់​ស្តែង​និង​ថ្មីៗ​បំផុត។ គំរូ​ដឹកនាំ​ដែលមេ​ដឹកនាំ​តាំង​ខ្លួន​ជា​អ្នកមាន​អំណាច​ពិតៗ មាន​សមត្ថភាព​ត្រឹម​ត្រូវ​ ក្នុង​ការ​​​ធានា​សិ្ថរភាព ​ និង​សន្តិភាព​ជូន​​ជាតិ។ គំរូ​ដឹកនាំ​ដែល​មាន​ប្រភពដក​ស្រង់​​​ចេញ​ពីគំរូ​នយោបាយរបស់​​​ចិន។ ហើយ​យើ​ងមិន​ត្រូវ​ភ្លេច​ទេថា ​ចិន ជា​តួអង្គ​ដ៏​សំខាន់​មួយ តាំង​ពី​យូរ​លង់​មក​ហើយ​ក្នុង​ល្បែង​នយោបាយ​នៅ​ភូមា​នេះ។ គ្រាន់​តែថា​​ចិន​​បច្ចុប្បន្ន​​ក៏​ប្រុងប្រយ័ត្ន​ខ្លាំង​ជាមួយ​ភូមា ដើម្បីរក្សា​តម្លៃ​ចិន​និង​កុំ​​ឱ្យ​ខូច​ប្រយោជន៍​ធំប៉ុណ្ណោះ។ ចិន​ពេល​នេះ​ក៏​កំពុង​ពិគ្រោះ​ជាមួយ​ក្រុម​ប្រទេស​ក្នុ​ងសហគមន៍​ប្រជាជាតិ​អាស៊ីអាគ្នេយ៍ ហៅកាត់​ថា​អាស៊ាន​ ដើម្បី​រក​ដំណោះស្រាយ​ឱ្យ​​វិបត្តិ​ភូមា​នេះដែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI