កិច្ចព្រមព្រៀងអាកាសធាតុត្រូវចុះហត្ថលេខាជាផ្លូវការនៅអ.ស.ប
ចុះផ្សាយនៅថ្ងៃ៖ កែប្រែថ្ងៃទី៖
កិច្ចព្រមព្រៀងអាកាសធាតុ ដែលកើតចេញពីការចរចានៅក្នុងទីក្រុងប៉ារីស កាលពីខែធ្នូកន្លងទៅ នឹងត្រូវដាក់ឲ្យចុះហត្ថលេខាជាផ្លូវការ នៅថ្ងៃសុក្រនេះ នៅឯទីស្នាក់ការអ.ស.ប នៅក្នុងទីក្រុងញូវយ៉ាក។ ការចុះហត្ថលេខានេះគ្រាន់តែជាជំហានដំបូងមួយប៉ុណ្ណោះ ហើយកិច្ចព្រមព្រៀងអាកាសធាតុនេះនៅមិនទាន់អាចចូលជាធរមានបាននៅឡើយទេ។
កិច្ចព្រមព្រៀងអាកាសធាតុនេះនឹងត្រូវចុះហត្ថលេខាដោយតំណាងមកពីប្រទេសចំនួន ១៦៥ ក្នុងនោះ មានប្រមាណជា ៦០រូប គឺជាប្រមុខរដ្ឋ ឬប្រមុខរដ្ឋាភិបាល រួមមានដូចជា លោកប្រធានាធិបតីបារាំង នាយករដ្ឋមន្រ្តីកាណាដា នាយករដ្ឋមន្រ្តីអ៊ីតាលី ជាដើម។
ក៏ប៉ុន្តែ គេធ្វើការកត់សម្គាល់ឃើញថា មេដឹកនាំកំពូលៗនៃបណ្តាប្រទេសមួយចំនួន ដែលសុទ្ធសឹងជាប្រទេសបញ្ចេញឧស្ម័នផ្ទះកញ្ចក់ធំៗនៅលើពិភពលោក រួមមានដូចជា លោកអូបាម៉ា លោកស៊ី ជីនពីង លោកវ៉្លាឌីមៀរ ពូទីន ឬក៏លោកនាយករដ្ឋមន្រ្តីឥណ្ឌា ណារិនដ្រា ម៉ូឌី ជាដើមនោះ មិនមានវត្តមាននៅក្នុងពិធីចុះហត្ថលេខានេះទេ។ សហរដ្ឋអាមេរិក តំណាងដោយលោករដ្ឋមន្រ្តីការបរទេសចន ឃែរី ចំណែកចិន តំណាងដោយឧបនាយករដ្ឋមន្រ្តី។
លោកស្រីសេហ្គោលែន រ៉ូយ៉ាល់ រដ្ឋមន្រ្តីក្រសួងបរិស្ថានបារាំង ដែលជាម្ចាស់ផ្ទះរៀបចំសន្និសីទអាកាសធាតុឆ្នាំ២០១៥ បានលើកឡើងថា អវត្តមានរបស់មេដឹកនាំកំពូលៗនៃប្រទេសប៉ុន្មានខាងលើនេះនឹងមិនធ្វើឲ្យប៉ះពាល់ទៅដល់ប្រសិទ្ធភាពនៃកិច្ចព្រមព្រៀងអាកាសធាតុនេះទេ។ ផ្ទុយទៅវិញ លោកស្រីបានធ្វើការកត់សម្គាល់ថា នៅក្នុងប្រវត្តិនៃទំនាក់ទំនងអន្តរជាតិ គេមិនដែលឃើញមានកិច្ចព្រមព្រៀងអន្តរជាតិណាមួយ ដែលត្រូវចុះហត្ថលេខាដោយប្រទេសយ៉ាងច្រើន រហូតដល់ទៅ ១៦៥ ក្នុងថ្ងៃតែមួយបែបនេះទេ។
ទោះជាយ៉ាងណា ការចុះហត្ថលេខានេះគ្រាន់តែជាជំហានដំបូងមួយប៉ុណ្ណោះ។ ដើម្បីឲ្យកិច្ចព្រមព្រៀងអាកាសធាតុនេះអាចចូលជាធរមានបាន ចាំបាច់ត្រូវឲ្យមានការផ្តល់សច្ចាប័នពីសំណាក់ប្រទេសយ៉ាងតិចចំនួន ៥៥ ដែលមានការបញ្ចេញឧស្ម័នផ្ទះកញ្ចក់យ៉ាងតិច ៥៥% នៃបរិមាណសរុបនៅទូទាំងពិភពលោក។
គួររំឭកឡើងវិញថា គោលការណ៍ចម្បងនៃកិច្ចព្រមព្រៀងអាកាសធាតុនេះ គឺធ្វើយ៉ាងណាទប់ស្កាត់កុំឲ្យសីតុណ្ហភាពមធ្យមលើភពផែនដីយើង កើនឡើងលើសពី ១,៥អង្សា នៅចុងសតវត្សរ៍ទី២១នេះ ហើយដើម្បីអាចសម្រេចបាននូវគោលដៅនេះ គេចាំបាច់ត្រូវតែចាត់វិធានការកាត់បន្ថយការប្រើប្រាស់ថាមពលផូស៊ីល រួមមាន ដូចជា ប្រេង និងធ្យូងថ្ម ជាដើម ដែលជាប្រភពចម្បងនៃការបញ្ចេញឧស្ម័នផ្ទះកញ្ចក់បង្កឲ្យភពផែនដីឡើងកម្តៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ