អានតួអត្ថបទ

G២០ សន្យា​មិន​រាថយ​ ក្នុង​ការ​ផ្តល់​វ៉ាក់​សាំង​សម្រាប់​គ្រប់ៗគ្នា​

«យើង​មិន​​រុញរាដើរថយក្រោយឡើង​ ចំពោះ​កិច្ច​​ខំប្រឹងប្រែង ដើម្បីធានាថា វ៉ាក់សាំងបង្ការ​កូវីដ​១៩​ នឹងត្រូវ​លក់​ក្នុង​តម្លៃ​សមរម្យ និង​ត្រូវ​ចែកចាយ​សម្រាប់​គ្រប់ៗគ្នា។​»
«យើង​មិន​​រុញរាដើរថយក្រោយឡើង​ ចំពោះ​កិច្ច​​ខំប្រឹងប្រែង ដើម្បីធានាថា វ៉ាក់សាំងបង្ការ​កូវីដ​១៩​ នឹងត្រូវ​លក់​ក្នុង​តម្លៃ​សមរម្យ និង​ត្រូវ​ចែកចាយ​សម្រាប់​គ្រប់ៗគ្នា។​» AP
ដោយ៖ ហេង ឧត្តម
១៨ នាទី

កិច្ចប្រជុំ​ G២0 នៃបណ្តា​​ប្រទេស​ថ្នាក់ដឹកនាំ​ឧស្សាហកម្ម​និងសេដ្ឋកិច្ចជឿនលឿន​ បាន​ចប់​ហើយ ពីថ្ងៃ​អាទិត្យ​ ។ ជាលទ្ធផល គឺ​ថ្នាក់ដឹកនាំប្រទេស​អ្នក​មានទាំង​ G២0 បាន​សម្រេច​សន្យា​ថា​ នឹង​ខំ​ខ្មីឃ្មាត​​ផ្តល់វ៉ាក់សាំងទប់​ស្កាត់​ជំងឺ​កូវី១៩ សម្រាប់គ្រប់ៗគ្នា ក្នុង​តម្លៃ​សមរម្យ​។ ក៏ប៉ុន្តែ នៅក្នុងសេចក្តីថ្លែងការណ៍​រួម គឺ​ការ​សន្យា​ ហាក់​មាន​ច្រើន​​ជាង​សាច់​ការ​ជាក់​ស្តែង។ នេះការ​សង្កេត​​របស់​បណ្តា​អ្នក​កាសែត​អន្តរជាតិ​ ចំពោះ​ដំណើរ​កិច្ចប្រជុំ​របស់​ G២០ ឆ្នាំ​នេះ​ ដែល​រៀបចំ​ដោយ​ អារ៉ាប៊ីសាអ៊ូឌីត​។

ផ្សាយពាណិជ្ជកម្ម

«យើង​មិន​​រុញរាដើរថយក្រោយឡើង​ ចំពោះ​កិច្ច​​ខំប្រឹងប្រែង ដើម្បីធានាថា វ៉ាក់សាំងបង្ការ​កូវីដ​១៩​ នឹងត្រូវ​លក់​ក្នុង​តម្លៃ​សមរម្យ និង​ត្រូវ​ចែកចាយ​សម្រាប់​គ្រប់ៗគ្នា។​»​ នេះបើតាម​​​ពង្រាងសេចក្តីថ្លែងការណ៍​រួម របស់ G២០​ ដែល​ទីភ្នាក់​ងារ​ព័ត៌មាន​បារាំង​ AFP បាន​ទទួល​​។​

សេចក្តី​ថ្លែងការណ៍រួម​​ ក៏​បាន​សន្យា​ថា​ជួយ​បំពេញ​តម្រូវ​ការ​របស់​អង្គការ​សុខភាព​ពិភពលោក​ ដើម្បីធានា​វ៉ាក់​សាំង​ដែល​ផលិត​បា​ននៅពេល​អនាគត គឺ​មិន​សម្រាប់តែ​ប្រទេស​អ្នក​មានតែម្នាក់​នោះទេ។ ក៏ប៉ុន្តែ ការ​សន្យា​នេះ មិន​បាន​បញ្ជាក់​ពីចំនួន​លុយ​ដែល​ត្រូវ​ឧបត្ថម្ភ​ឡើយ​។ ​ក្នុង​​ហិបថវិកា​​របស់​អង្កការ​សុខភាព​ពិភព​លោក គឺខ្វះ​លុយ​ ២៨ពាន់លានដុល្លារ  ក្នុងនោះគឺ​​​ខ្វះលុយ​បន្ទាន់​បំផុត ចំនួន​​​ជាង៤,២ពាន់​លាន​ដុល្លារ​ ​សម្រាប់​ចំណាយ​​​​ឱ្យ​ដល់​ដាច់​ឆ្នាំ្២០២០​។ នេះជាការ​ទទូរ​សុំ តែ​រឿងចំនួន​​លុយទាំង​​នេះ ​​មិនត្រូវ​បាន​លើកឡើង ​ក្នុង​សេចក្តីថ្លែងការណ៍​រួម​​ របស់​ G ២០​​ នោះឡើយ​។ នេះបើតាម AFP នៅល្ងាចថ្ងៃអាទិត្យ។​

នៅក្នុង​កិច្ចប្រជុំ ​​ប្រធានាធិបតីរុស្ស៊ី បង្ហាញ​ការ​យល់ឃើញថា ជារឿង​ដែល​ជៀស​មិន​ផុត​ ពីការ​ប្រកួត​ប្រជែង​ក្នុង​រុក​រក​វ៉ាក់​សាំង និង​ប្រជែង​គ្នា​លក់​វ៉ាក់សាំង​ទប់​ស្កាត់​កូវីដ​១៩។ ​លោក វ្ល៉ាឌីមៀរ ពូទីន គិត​ថា ទោះបីជាប្រណាំងប្រជែងគ្នា​​យ៉ាងនេះក្តី  រឿង​វ៉ាក់សាំងបង្ការ​នេះ ត្រូវតែ​ឈរលើ​គោលការណ៍​មនុស្ស​ធម៌ ជាធំ។​

គួរបញ្ជាក់ដែរថា ​អង្គការ​សហប្រជាជាតិនិ​ង​​ប្រទេស​អ្នក​ក្រ ​​បាន​សុំ​ឱ្យ​ផលិត​លុយ​បន្លែមសម្រាប់​ជំនួយដោយ​ផ្ទាល់​ដល់​ប្រទេស​ក្រីក្រី​​ដែល​រងគ្រោះ​ព្រោះតែកូវីដ១៩។ តែ​សំណើ​នេះ​មិនត្រូវ​បាន​លើកឡើង​ក្នុង​សេចក្តីថ្លែងការណ៍នោះ​ទេ។

​ក្នុង​សំណុំ​រឿង​អាកាសធាតុវិញ សេចក្តី​ថ្លែងការ​ណ៍​រួម ក៏​ប្រើពាក្យ​ពេចន៍​ប្រយ័ត្ន​ប្រយែង​បំផុត។​ ប្រទេស​ G20  គ្រាន់តែ​ចេញពាក្យសន្យា​ថានឹង​​«ប្រឈម​មុខ​បញ្ហា​វិបត្តិ​បរិស្ថានដែល​កំពុងតែប្រឈម​ខ្លាំង»។​ ចំណែក​ផ្នែកពាណិជ្ជកម្មអន្តរជាតិ​​វិញ ថ្នាក់ដឹកនាំ​​ G ២០ យល់ឃើញ​ថា វាមាន​សារៈសំខាន់​ណាស់​ក្នុង​ការ​ជំរុញ​ប្រព័ន្ធ​ពាណិជ្ជកម្ម​ពហុភាគី​ ហើយ​ធ្វើ​ជំនួយ​ដោយសមភាព​ត្រឹមត្រូវ​​។​ សំណុំ​រឿង​អាកាសធាតុនិង​ពាណិជ្ជកម្ម គេហាក់​ប្រើពាក្យ​ថ្មម​សម្តីណាស់ មិន​ឱ្យ​​រំខាន​​ខ្លាំង​ដល់​សហរដ្ឋអាមេរិក​ឬចិន​ឡើយ។​

ក្នុង​កិច្ចប្រជុំ​កំពូល​តាម​រយៈ​អ៊ិនធ័រនែត​អនឡាញរយៈពេល​២ថ្ងៃ​នេះ​ អ្នក​កាសែត​អន្តរជាតិ សង្កេត​ថា ​ប្រធានាធិបតី​ ដូណាល់ ត្រាំ ​បាន​​ចូល​រួម​ប្រជុំ​​ ហាក់​ឱ្យតែ​រួច​ពីដៃ​ពីជើង ដោយ​មិន​សូវ​ជា​ឱ្យ​តម្លៃ​ប៉ុន្មាន​ឡើយ ហើយផ្ទុយ​ទៅវិញ ​លោក​ ត្រាំ ទំនង​ហាក់​ដូច​ជា​ប្រញាប់​ប្រញាល់​ទៅ លេង​វាយ​កូន​ហ្គោល​ ច្រើន​ជាង៕​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ