អានតួអត្ថបទ
អ៊ីរ៉ង់-អ៊ីស្រាអែល-អាមេរិក

អ៊ីរ៉ង់​ធ្វើ​បុណ្យ​បញ្ចុះ​សព​អ្នក​វិទ្យាសាស្ត្រ​នុយក្លេអ៊ែ​ររបស់​ខ្លួន​និង​ប្តេជ្ញា​សង​សឹក​តប​នឹង​ឃាតកម្ម

មឈូសដាក់សពលោកម៉ូសេន ហ្វាករីហ្សាដេះមានបំពាក់រូបទង់ជាតិអ៊ីរ៉ង់ ត្រូវបានទាហានលែងយកទៅធ្វើបុណ្យនៅឯពិធីបុណ្យសពមួយក្នុងទីក្រុងតេហេរ៉ង់ នាថ្ងៃចន្ទ ទី៣០ វិច្ឆិកា ឆ្នាំ២០២០។
មឈូសដាក់សពលោកម៉ូសេន ហ្វាករីហ្សាដេះមានបំពាក់រូបទង់ជាតិអ៊ីរ៉ង់ ត្រូវបានទាហានលែងយកទៅធ្វើបុណ្យនៅឯពិធីបុណ្យសពមួយក្នុងទីក្រុងតេហេរ៉ង់ នាថ្ងៃចន្ទ ទី៣០ វិច្ឆិកា ឆ្នាំ២០២០។ © Iranian Defense Ministry via AP
ដោយ៖ អ៊ុង គឹមអ៊ាន់
១១ នាទី

ប្រទេស​អ៊ីរ៉ង់​នៅថ្ងៃ​ចន្ទ​ ទី៣០​វិច្ឆិកា​ បាន​រៀបចំ​ពិធី​បញ្ចុះ​សព​អ្នក​វិទ្យាសាស្ត្រ​នុយក្លេអ៊ែរ​ម្នាក់​ឈ្មោះម៉ូសេន​ ហ្វាករីហ្សាដេះ​ (Mohsen Fakhrizadeh) ដែល​ត្រូវ​បាន​គេ​លប​ធ្វើឃាត​កាល​ពី​ថ្ងៃសុក្រ​នៅក្នុង​ការវាយ​ប្រហារមួយ​ដែល​អ៊ីរ៉ង់​ចោទថា​អ៊ីស្រាអែល​ជាអ្នកនៅពី​ក្រោយ​។ ខណៈ​ប្រារព្ធ​ពិធី​បុណ្យសព​អ្នក​​វិទ្យាសាស្រ្ត​នុយក្លេអ៊ែរ​កំពូល​របស់​ខ្លួន​ សាធារណរដ្ឋ​អ៊ីស្លាមអ៊ីរ៉ង់​ ក៏​កំពុង​ពិចារណា​ផងដែរ​ពីវិធី​និង​ពេលវេលា​ដើម្បី​សងសឹក​ចំពោះការ​ធ្វើ​ឃាតនេះ​។

ផ្សាយពាណិជ្ជកម្ម

ឃាតកម្មទៅលើ​លោក​ម៉ូសេន​ ហ្វាករីហ្សាដេះ​ ដែល​អ៊ីស្រាអែល​បាន​ដាក់​ឈ្មោះថាជា ​“បិតា”​ នៃ​កម្មវិធី​អាវុធ​នុយក្លេអ៊ែរ​របស់​អ៊ីរ៉ង់​ បាន​ជំរុញឲ្យ​មាន​ភាព​តានតឹង​កាន់តែ​ខ្លាំង​ឡើង​រវាង​អ៊ីរ៉ង់​ និងអ៊ីស្រាអែល​ ដោយ​ប្រធានាធិបតី​អ៊ីរ៉ង់​ហាសាន​ រ៉ូហានី​ បាន​ចោទ​ប្រកាន់​រដ្ឋ​ជ្វីហ្វ​មួយ​នេះ​ថា​ជាឃាតករ​ស៊ីឈ្នួល​របស់​អាមេរិក​។

យោងតាម​ក្រសួង​ការពារជាតិ​អ៊ីរ៉ង់​ លោក​ម៉ូសេន​ ហ្វាករីហ្សាដេះ​ ដែល​ជា​អ្នកវិទ្យាសាស្ត្រ​នុយក្លេអ៊ែរ​កំពូលម្នាក់​របស់​ប្រទេស​បាន​ស្លាប់​កាលពីថ្ងៃ​សុក្រ​ ទី២៧​ វិច្ឆិកា​ បន្ទាប់​ពីរង​របួស​យ៉ាងធ្ងន់ធ្ងរ​ពីការ​វាយប្រហារ​។

នៅក្នុង​ពិធី​បុណ្យសព​នាថ្ងៃចន្ទនេះដែរ​ មានការ​បញ្ចាំង​បង្ហាញ​ដ៏ធំ​មួយពី​រូបភាព​នៃ​អ្នក​វិទ្យាសាស្ត្រ​នុយក្លេអ៊ែរ​ដែល​ត្រូវ​គេសម្លាប់​ នៅក្បែរ​មគ្គទេសក៍​សាសនា​កំពូល​របស់​អ៊ីរ៉ង់​ អាយ៉ាតូឡា​ អាលី ខាមេណី​ និង​នៅក្បែរ​រូបភាពឧត្តម​សេនីយ​អ៊ីរ៉ង់​កាសឹម សូឡីម៉ានី ដែល​ត្រូវ​បាន​សម្លាប់​ដោយ​សហរដ្ឋ​អាមេរិក​នៅក្នុងការវាយប្រហារ​ដោយយន្តហោះដ្រូន​នៅបាកដាដ​កាលពី​ដើមឆ្នាំ ២០២០​នេះ​។

សភាអ៊ីរ៉ង់​ កាលពីថ្ងៃ​អាទិត្យ​ម្សិលមិញ​បាន​ទាមទារឲ្យ​បញ្ឈប់​ការត្រួតពិនិត្យ​លក្ខណៈ​អន្តរជាតិ​ទៅលើទីតាំង​នុយក្លេអ៊ែរ​នៅក្នុងប្រទេស​ ដែលនេះ​គឺជា​សញ្ញា​ប្រាប់ពី​ការចង់​ដក​ខ្លួន​ចេញពី​កិច្ចព្រមព្រៀង​នុយក្លេអ៊ែរ​ឆ្នាំ​ ២០១៥​។

ទាក់ទងរឿងនេះ​ លោក​ប្រធានាធិបតី​ហាសាន ​រ៉ូហានី​បាន​សង្កត់ធ្ងន់ថា​ ប្រទេស​អ៊ីរ៉ង់​នឹង​​សងសឹក​ចំពោះ​ការធ្វើឃាត​លើរូប​លោកម៉ូសេន ហ្វាករីហ្សាដេះ​ ឲ្យ​បានស័ក្តិសមជាទីបំផុត​នៅក្នុងពេលវេលាដ៏សមស្រប ដោយមិន​ត្រូវ​ធ្លាក់​ចូល​ក្នុង​“ អន្ទាក់” ឡើយ​។ ជាអន្ទាក់​ដែល​ប្រមុខដឹកនាំ​អ៊ីរ៉ង់​ចង់​ថាជា​ការរៀបចំ​ដោយ​អាមេរិក​ និង​អ៊ីស្រាអែល​ ដើម្បី​ទាញអ៊ីរ៉ង់​ឲ្យដើរធ្លាក់រណ្តៅនិង​អាងយកជាលេស​ដើម្បីព្រួតគ្នា​ធ្វើបាបអ៊ីរ៉ង់​កាន់តែខ្លាំងឡើង​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ