អារ៉ាប៊ីសាអូឌីត-សិទ្ធិស្ត្រី

តុលាការអារ៉ាប៊ីសាអូឌីត​​ កាត់ទោសស្ត្រីសកម្មជនសិទ្ធិ​មនុស្ស​​ម្នាក់​​ឲ្យ​ជាប់​ពន្ធនាគា ៥ឆ្នាំ​៨ខែ​

ស្ត្រី​សកម្មជនសិទ្ធិ​មនុស្ស Loujain al-Hathloul បង្ហាញរូបថតនៅលើ Facebook ពេលមិនទាន់ត្រូវបាន​គេ​ចាប់ឃាត់ខ្លួន នៅឆ្នាំ​២០១៨
ស្ត្រី​សកម្មជនសិទ្ធិ​មនុស្ស Loujain al-Hathloul បង្ហាញរូបថតនៅលើ Facebook ពេលមិនទាន់ត្រូវបាន​គេ​ចាប់ឃាត់ខ្លួន នៅឆ្នាំ​២០១៨ AFP - -
ដោយ៖ ម៉ម ពិសី
១៦ នាទី

ស្ត្រីសកម្មជនទាមទារសិទ្ធិស្ត្រីម្នាក់ នៅប្រទេសអារ៉ាប៊ីសាអូឌីត ឈ្មោះ លូចាអ៊ីន អាល់ហាថលូល (Loujain al-Hathloul) ត្រូវបាន​តុលាការ កាត់ទោសឲ្យ​ជាប់ពន្ធនាគារ រយៈពេល​៥ឆ្នាំ​៨ខែ ពីបទរំលោភបំពានច្បាប់ប្រឆាំងសកម្មភាពភេរវកម្ម។ ស្ត្រីម្នាក់នេះ ធ្លាប់ត្រូវបានគេស្គាល់ថា ជាអ្នកដែលបានចេញមុខទាមទារសិទ្ធិសេរីភាព​ ឲ្យស្ត្រីអារ៉ាប៊ីសាអូឌីត មុននឹងត្រូវគេ​ចាប់ខ្លួន កាលពី​ខែឧសភា ឆ្នាំ២០១៨។

ផ្សាយពាណិជ្ជកម្ម

យោងតាមការចុះផ្សាយ របស់​បណ្តាញ​ព័ត៌មានអារ៉ាប៊ីសាអូឌីត ស្ត្រីឈ្មោះ Loujain al-Hathloul ត្រូវជាប់ទោស​៥ឆ្នាំ​៨ខែ តែដោយក្នុងនោះ ២ឆ្នាំ១០ខែ គឺជាទោសព្យួរ បើសិន​ជាស្ត្រីរូបនេះ មិនប្រព្រឹត្តិអំពើឧក្រិដ្ឋណាមួយ​ផ្សេងទៀតទេ ក្នុងរយៈពេល៣ឆ្នាំទៅមុខ។ បន្ថែមពីនេះ តុលាការបានហាម​ឃាត់ មិនឲ្យ​ស្ត្រីរូបនេះ​ ធ្វើដំណើរចេញពី​អារ៉ាប៊ីសាអូឌីត ជាដាច់ខាត។

មានន័យថា ស្ត្រីសកម្មជនសិទ្ធិមនុស្ស​រូបនេះ អាចនឹងត្រូវគេដោះលែង ក្នុងរវាង២ខែទៀត ដោយ​សារនាងត្រូវបាន​គេចាប់ខ្លួន​ កាលពីខែ​ឧសភា ឆ្នាំ២០១៨ ហើយ​រយៈពេលជាប់ពន្ធនាគារ​បណ្តោះអាសន្ន ត្រូវបានចាត់បញ្ចូល​ជារយៈពេល​អនុវត្តទោស។ នេះបើផ្អែកតាមប្រភព ពីប្អូនស្រីរបស់ស្ត្រីរូបនេះ។

គួររំលឹកថា ​​​​ស្ត្រីឈ្មោះ Loujain al-Hathloul បច្ចុប្បន្នអាយុ៣១ឆ្នាំ បញ្ចប់ការសិក្សា ពីសកលវិទ្យាល័យនៅកាណាដា ធ្លាប់បានចេញមុខធ្វើ​សកម្មភាពដោយ​សន្តិវិធី ដោយ​មិនខ្លាចអាជ្ញាធរអារ៉ាប៊ីសាអូឌីត ក្នុងការ​​​​​ទាមទារ​ឲ្យស្ត្រីអារ៉ាប៊ីសាអូឌីត មានសិទ្ធិសេរីភាព​ មិនស្ថិតនៅក្រោម​អាណាព្យាបាល​របស់​​បុរសតទៅទៀត​។ កាលពីឆ្នាំ​២០១៤ នាងត្រូវបានគេចាប់ដាក់ឃុំរយៈពេល​ជាង​២ខែរួចម្តងហើយ បន្ទាប់ពីនាងហ៊ាន​បើករថយន្ត ពីអេមៀរ៉ាតអារ៉ាប់រួម ចូលទឹកដី​អារ៉ាប៊ីសាអូឌីត។

ក្រោយមក នាងបាន​ទាមទារ ឲ្យស្ត្រីអារ៉ាប៊ីសាអូឌីត មាន​សិទ្ធិមានបណ្ណបើកបរ អាចទៅ​ណា​មក​ណា​បាន ដោយ​មិនចាំបាច់មាន​អ្នកជូនជាមនុស្សប្រុស។ គឺដោយសារ​សកម្មភាព​​ទាមទារ​​នេះ​ហើយ ទើបបានជា​ព្រះអង្គម្ចាស់ ម៉ូហាម៉េដ បេនសាល់ម៉ាន់ បាន​សម្រេចចិត្ត​ធ្វើកំណែទម្រង បើកសិទ្ធិឲ្យ​ស្ត្រីអាចបើកបរបាន។

យោងតាម​រដ្ឋមន្ត្រី​ការបរទេសអារ៉ាប៊ីសាអ៊ូឌីត នាងត្រូវបាន​គេចាប់ខ្លួន នៅខែឧសភា ឆ្នាំ២០១៨ ដោយ​សង្ស័យមានពាក់ព័ន្ធឃុបឃិតជាមួយ​បរទេស ​​ធ្វើសកម្មភាពលួចព័ត៌មានសំងាត់ និង​​ប្រឆាំងរដ្ឋាភិបាល។ កាលពីចុងខែ​តុលា នាងបាន​បង្អត់អាហារខ្លួនឯង រយៈពេល២សប្តាហ៍។ ក្រុមគ្រួសារនាង បាន​អះអាងថា នៅក្នុងមន្ទីរឃុំឃាំង ជាង​២ឆ្នាំមកនេះ នាងបានរងទារុណកម្ម និង ការបំពានផ្លូវភេទ ដែលធ្វើឲ្យស្ថានភាពសុខភាពរបស់នាងចុះទ្រុឌទ្រោមជាខ្លាំង។

គួរកត់សំគាល់ថា ការរំលោភសិទ្ធិមនុស្ស ជាពិសេសទៅលើសិទ្ធិ​ស្ត្រី គឺជារឿងដែលអារ៉ាប៊ីសាអូឌីត ត្រូវគេរិះគន់ជាញឹកញាប់ នឹងបានធ្វើឲ្យ​ប្រទេសមហាអំណាចជាសម្ព័ន្ធមិត្ត​ខ្លះ​ មានការទើសទាល់ក្នុងចិត្តជាខ្លាំង។ យ៉ាងណាមិញ ការសម្រេចដាក់ទោសស្ត្រីឈ្មោះ Loujain al-Hathloul ដោយអនុញ្ញាតឲ្យ​អាចដោះលែងចេញមក​វិញ ក្នុងរវាង២ខែទៀតនេះ គឺជាវិធី ដើម្បីកុំឲ្យ​រដ្ឋាភិបាល​អារ៉ាប៊ីសាអូឌីត បាក់មុខតែប៉ុណ្ណោះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI