អ៊ីរ៉ង់-អាមេរិក

អ៊ីរ៉ង់៖ប្រមុខកងឆ្មាំបដិវត្តន៍សន្យាវាយបកលើគ្រប់ទង្វើរបស់សហរដ្ឋអាមេរិក

ប្រមុខកងឆ្មាំបដិវត្តន៍អ៊ីរ៉ង់លោកហូសសេន សាឡាមី
ប្រមុខកងឆ្មាំបដិវត្តន៍អ៊ីរ៉ង់លោកហូសសេន សាឡាមី AP - Ebrahim Noroozi
១៧ នាទី

ថ្ងៃទី៣ មករា​នេះ​ជា​ខួប​គម្រប់ ១ឆ្នាំ​គត់​នៃ​ការ​ស្លាប់​ឧត្តមសេនីយ​អ៊ីរ៉ង់​កាសឹម សូឡីម៉ានី​នៅ​ក្រោម​គ្រាប់​កាំភ្លើង​អាមេរិក​ក្នុង​ទឹកដី​អ៊ីរ៉ាក់​កាល​ពី​ថ្ងៃទី៣ មករា ឆ្នាំ ២០២០។ នៅ​ក្នុង​ថ្ងៃ​ខួប​នៃ​ការ​ស្លាប់​របស់​លោក​កាសឹម សូឡីម៉ានី​ដោយ​ស្នាដៃ​អាមេរិក​នេះ ប្រមុខ​ឆ្នាំ​បដិវត្តន៍​អ៊ីរ៉ង់​លោក​ហូសសេន សាឡាមី​បាន​ចេញ​មុខ​ព្រមាន​ក្នុង​ថ្ងៃ​សៅរ៍ ទី២ មករា​ថា អ៊ីរ៉ង់​នឹង​ធ្វើ​ការ​វាយបក​លើ​គ្រប់​ទង្វើ​ទាំង​អស់​របស់​សហរដ្ឋអាមេរិក។ ការ​ព្រមាន​ដូច​គ្នា​នេះ​ក៏​មាន​ពី​ប្រធាន​តុលាការ​អ៊ីរ៉ង់​លោក​អ៊ីប្រាហ៊ីម រ៉ាអ៊ីស៊ី​កាល​ពី​ថ្ងៃ​សុក្រ ទី១ មករា​នៅ​ក្នុង​ពិធី​រម្លឹក​ថ្ងៃ​ស្លាប់​ឧត្តមសេនីយ​កាសឹម សូឡីម៉ានី។

ផ្សាយពាណិជ្ជកម្ម

សម្តី​ព្រមាន​របស់​ប្រមុខ​កងឆ្មាំបដិវត្តន៍​អ៊ីរ៉ង់​លោក​ហូសសេន សាឡាមី​បាន​ធ្វើ​ឡើង​នា​ឱកាស​ចុះ​សួរ​សុខទុក្ខ​កម្លាំង​ឆ្មាំ​បដិវត្តន៍​ដែល​កំពុង​ឈរ​ជើង​លើ​កោះ​អាប៊ូ មូសា​ដែល​ជា​កោះ​ដ៏​សំខាន់ និង​យុទ្ធសាស្រ្ត​មួយ​នៅ​តំបន់​ឈូងសមុទ្រពែក្ស។ កោះ​អាប៊ូ មូសា​មាន​ទីតាំង​នៅ​ជិត​ច្រក​យុទ្ធសាស្រ្ត​នៃ​ដៃសមុទ្រ Ormuz ដែល​ជា​ផ្លូវ​ដឹកប្រេង​មួយ​ដ៏​សំខាន់​ទៅ​កាន់​ពិភពលោក។ « យើង​ស្ថិត​នៅ​ទីនេះ​ថ្ងៃ​នេះ​ដើម្បី​ធានា​បាន​នូវ​កងជើងទឹក​របស់​យើង​ប្រឆាំង​នឹង​សត្រូវ​ដែល​តែង​អួតអាង និង​គំរាមកំហែង​យើង។ យើង​នឹង​ធ្វើ​ការ​វាយបក​លើ​គ្រប់​ទង្វើ​របស់​សត្រូវ​ដែល​ប្រឆាំង​យើង » នេះ​ជា​ការ​ថ្លែង​របស់​ឧត្តមសេនីយ​ហូសសេន សាឡាមី។

ចំណែក​នៅ​ថ្ងៃ​សុក្រ ទី១ មករា ប្រធាន​តុលាការ​អ៊ីរ៉ង់​លោក​អ៊ីប្រាហ៊ីម រ៉ាអ៊ីស៊ី​បាន​ព្រមាន​ត្រង់ៗ​នា​ពិធី​រម្លឹក​ខួប ១ឆ្នាំ​នៃ​ការ​ស្លាប់​ឧត្តមសេនីយ​អ៊ីរ៉ង់​កាសឹម សូឡីម៉ានី​ក្នុង​ប្រទេស​អ៊ីរ៉ាក់​ថា ប្រធានាធិបតី​អាមេរិក​ផុតអាណត្តិ​លោក​ដូណាល់ ត្រាំ និង​ថ្នាក់ដឹកនាំ​អាមេរិក​ដទៃ​ទៀត​ដែល​បាន​បញ្ជា​ឲ្យ​សម្លាប់​លោក​កាសឹម សូឡីម៉ានី​នឹង​គ្មាន​ថ្ងៃ​សុខ​ឡើយ​ទោះ​ស្ថិត​នៅ​ទីកន្លែង​ណា​ក៏​ដោយ​លើ​ផែនដី​នេះ។ ឃើញ​ថា ភាព​តានតឹង​រវាង​អ៊ីរ៉ង់ និង​សហរដ្ឋអាមេរិក​ដែល​កំពុង​មាន​ស្រាប់​ហាក់​បាន​ឡើង​ខ្លាំង​មួយ​កម្រិត​ទៀត​នា​ឱកាស​ខួប ១ឆ្នាំ​នៃ​ការ​សម្លាប់​ឧត្តមសេនីយ​អ៊ីរ៉ង់​ដោយ​ទាហាន​អាមេរិក។

កាល​ពី​ដំណាច់​ខែ​វិច្ឆិកា​កន្លង​ទៅ សហរដ្ឋអាមេរិក​បាន​ដំឡើង​សាច់ដុំ​ដាក់​អ៊ីរ៉ង់​ដោយ​បាន​បញ្ជូន​នាវា​ផ្ទុក​យន្តហោះចម្បាំង USS Nimitz ទៅ​កាន់​តំបន់​ឈូងសមុទ្រពែក្ស និង​ប្រើ​យន្តហោះ B៥២ ហោះ​ពី​លើ​តំបន់​ក្នុង​ថ្ងៃទី១០ ធ្នូ។ តែ​បើ​តាម​កាសែត New York Time រដ្ឋមន្រ្តី​ការពារជាតិ​អាមេរិក​លោក Christopher Miller បាន​បញ្ជា​ឲ្យ​ដក​នាវា​ផ្ទុក​យន្តហោះចម្បាំង USS Nimitz ចេញ​ពី​តំបន់​​វិញ​ហើយ។ ក្នុង​ថ្ងៃ​ព្រហស្បតិ៍ ទី៣១ ធ្នូ រដ្ឋមន្រ្តី​ការបរទេស​អ៊ីរ៉ង់​បាន​ចោទ​លោក​ត្រាំ​ពី​បទ​ព្យាយាម​បង្កើត​លេស​ដើម្បី​វាយប្រហារ​អ៊ីរ៉ង់​នៅ​មុន​លោក​ត្រាំ​ចុះ​ចេញ​ពី​តំណែង​នៅ​ថ្ងៃទី២០ មករា។

គួរ​រម្លឹក​ថា​កាល​ពី​ថ្ងៃទី៣ មករា ឆ្នាំ ២០២០ ឧត្តមសេនីយ​អ៊ីរ៉ង់​លោក​កាសឹម សូឡីម៉ានី​ត្រូវ​បាន​ទាហាន​អាមេរិក​ប្រើ​ដ្រូន​បាញ់​សម្លាប់​នៅ​ក្នុង​ទីក្រុង​បាកដាដ ប្រទេស​អ៊ីរ៉ាក់។ ប្រតិកម្ម​ភ្លាមៗ​កាល​ណោះ អ៊ីរ៉ង់​បាន​បាញ់​គ្រាប់មីស៊ីល​សំដៅ​លើ​មូលដ្ឋាន​យោធា​អាមេរិក​ក្នុង​ទឹកដី​អ៊ីរ៉ាក់។ តែ​មិន​បាន​បណ្តាល​ឲ្យ​ស្លាប់​ទាហាន​អាមេរិក​ទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI