អ៊ីរ៉ង់

អ៊ីរ៉ង់ប្រារព្ធខួប ៤២ឆ្នាំនៃបដិវត្តន៍អ៊ីស្លាម ទោះប្រទេសកំពុងប្រឈមនឹងកូវីដ១៩

អ៊ីរ៉ង់ប្រារព្ធខួប ៤២ឆ្នាំនៃបដិវត្តន៍អ៊ីស្លាម ទោះប្រទេសកំពុងប្រឈមនឹងកូវីដ១៩
អ៊ីរ៉ង់ប្រារព្ធខួប ៤២ឆ្នាំនៃបដិវត្តន៍អ៊ីស្លាម ទោះប្រទេសកំពុងប្រឈមនឹងកូវីដ១៩ AP - Ebrahim Noroozi

នៅ​ថ្ងៃ​ពុធ ទី១០ កុម្ភៈ មាន​ប្រជាជន​អ៊ីរ៉ង់​ជា​ច្រើន​ពាន់នាក់​បាន​ជិះ​ឡាន ម៉ូតូ និង​កង់​ដង្ហែរក្បួន​ដើម្បី​អបអរសាទរ​ខួប​លើកទី៤២ នៃ​កំណើត​បដិវត្តន៍​អ៊ីស្លាម​កាល​ពី​ឆ្នាំ ១៩៧៩។ មាន​រថយន្ត ម៉ូតូ និង​កង់​មួយ​ចំនួន​ត្រូវ​ប្រជាជន​លាបពណ៌​ក្រហម ស និង​បៃតង​ដែល​ជា​ពណ៌ទង់ជាតិ​អ៊ីរ៉ង់។ ពិធី​ដង្ហែរ​ក្បួន​នេះ​បាន​សំដៅ​ទៅ​កាន់​ទីលាន​ល្បីល្បាញ​ឈ្មោះ​អាហ្សាឌី​ដែល​មាន​ដាក់​តាំង​គ្រាប់មីស៊ីល​បាលីស្ទិក និង​គ្រឿងបរិក្ខារ​យោធា Made in Iran។ ប្រធានាធិបតី​អ៊ីរ៉ង់​លោក​ហាសាន រ៉ូហានី​បាន​ថ្លែង​សុន្ទរកថា​តាម​ទូរទស្សន៍​ដោយ​អរគុណ​ដល់​ប្រជាជន​ដែល​បាន​ស៊ូទ្រាំ និង​អត់ធ្មត់​ចំពោះ​ទុក្ខវេទនា​រយៈពេល ៣ឆ្នាំ​កន្លង​ទៅ​ដោយសារ​ទណ្ឌកម្ម​អាមេរិក។

ផ្សាយពាណិជ្ជកម្ម

បើ​ធៀប​នឹង​ឆ្នាំ​មុនៗ អ៊ីរ៉ង់​មិន​បាន​រៀបចំ​ពិធី​ដង្ហែរ​ក្បួន​ព្យុះហយាត្រា និង​ការ​ជួបជុំ​អ្វី​ទេ​សម្រាប់​ខួប​លើកទី៤២ នៃ​កំណើត​បដិវត្តន៍អ៊ីស្លាម​ឆ្នាំ​នេះ។ នេះ​ក៏​ដោយសារ​តែ​ប្រទេស​កំពុង​ប្រឈម​នឹង​វិបត្តិ​កូវីដ១៩ ធ្ងន់ធ្ងរ។ គិត​ត្រឹម​ថ្ងៃ​ពុធ ទី១០ កុម្ភៈ ជំងឺ​កូវីដ១៩ បាន​សម្លាប់​មនុស្ស​ជាង ៥៨ ០០០នាក់ និង​មាន​អ្នក​ឆ្លង​ជិត ១ ៥០០ ០០០នាក់។ អ៊ីរ៉ង់​ដែល​មាន​ប្រជាជន​ជាង ៨០ ០០០ ០០០នាក់​ទើប​បាន​ចាប់​ផ្តើម​យុទ្ធនាការ​ចាក់វ៉ាក់សាំង​ក្នុង​ថ្ងៃ​អង្គារ ទី៩ កុម្ភៈ។ ទោះ​ជា​យ៉ាង​នេះ​ក្តី គ្មាន​អ្វី​អាច​រារាំង​ប្រជាជន​មិន​ឲ្យ​ប្រារព្ធ​ខួប​កំណើត​បដិវត្តន៍​អ៊ិស្លាម​អ៊ីរ៉ង់​បាន​ឡើយ។

នៅ​ក្នុង​ក្បួន​ដង្ហែរ​ដោយ​រថយន្ត ម៉ូតូ និង​កង់​នៅ​ក្នុង​ទីក្រុង និង​ស្រុក​ធំ​ជាង​ច្រើន ប្រជាជន​ខ្លះ​បាន​លើក​រូបថត​ប្រមុខ​សាសនា​អ៊ីស្លាម​លោក​អាលី ខាមេណី និង​រូបថត​ឧត្តមសេនីយ​កាសឹម សូឡីម៉ានី​ដែល​ត្រូវ​បាន​កងទ័ព​អាមេរិក​សម្លាប់​ក្នុង​ទឹកដី​អ៊ីរ៉ាក់​កាល​ពី​ខែ​មករា ឆ្នាំ ២០២០។ ចំណែក​អ្នក​ខ្លះ​ទៀត​បាន​ដុត​ទង់ជាតិ​អាមេរិក និង​អ៊ីស្រាអែល​ដែល​ជា​សត្រូវ​ស៊ូពូជ​របស់​អ៊ីរ៉ង់ ព្រម​ទាំង​សរសេរ​លើ​បដា​ថា « ស្លាប់​ទៅ​អាមេរិក »។ ចំណែក​ប្រធានាធិបតី​អ៊ីរ៉ង់​លោក​ហាសាន រ៉ូហានី​បាន​ថ្លែង​សុន្ទរកថា​តាម​កញ្ចក់​ទូរទស្សន៍​នា​ឱកាស​នេះ​ដោយ​ថ្លែង​អរគុណ​ដល់​ប្រជាជន​ដែល​បាន​ស៊ូទ្រាំ និង​អត់ធ្មត់​ចំពោះ​ទុក្ខវេទនា​រយៈពេល ៣ឆ្នាំ​កន្លង​ទៅ​ដោយសារ​ទណ្ឌកម្ម​អាមេរិក។

ទណ្ឌកម្ម​អាមេរិក​ដែល​លោក​រ៉ូហានី​ចង់​និយាយ​នេះ គឺ​ទណ្ឌកម្ម​អាមេរិក​ដែល​លោក​ដូណាល់ ត្រាំ​បាន​ដាក់​លើ​អ៊ីរ៉ង់​ក្នុង​ឆ្នាំ ២០១៨ បន្ទាប់​ពី​លោក​ត្រាំ​បាន​ដក​អាមេរិក​ចេញ​ពី​កិច្ចព្រមព្រៀង​នុយក្លេអ៊ែរ​អ៊ីរ៉ង់​ឆ្នាំ ២០១៥។ តាម​លោក​រ៉ូហានី សករាជ​នៃ​ទណ្ឌកម្ម​អតិបរមា​បាន​ចប់​ហើយ សករាជ​នៃ​សង្រ្គាម​សេដ្ឋកិច្ច​ក៏​បាន​ចប់​ហើយ​ដែរ ហើយ​ទាំង​អស់​បាន​ដឹង​ខ្លួន​ថា សម្ពាធ​អតិបរិមា​បាន​ទទួល​បរាជ័យ។ នៅ​ក្នុង​ន័យ​នេះ លោក​រ៉ូហានី​ចង់​បញ្ជាក់​ពី​ការ​ចប់​សករាជ​របស់​លោក​ដូណាល់ ត្រាំ និង​សង្ឃឹម​ទទួល​បាន​ទំនាក់ទំនង​ប្រក្រតី​ឡើង​វិញ​ជាមួយ​អាមេរិក​ក្នុង​ជំនាន់​លោក​ចូ បៃដិន។

ពិត​ណាស់ លោក​បៃដិន​បាន​សន្យា​នាំ​អាមេរិក​ចូល​ក្នុង​កិច្ចព្រមព្រៀង​នុយក្លេអ៊ែរ​អ៊ីរ៉ង់​ឆ្នាំ ២០១៥ ឡើង​វិញ ប្រសិន​បើ​អ៊ីរ៉ង់​ត្រឡប់​ទៅ​គោរព​កិច្ចព្រមព្រៀង​ឲ្យ​បាន​ពេញលេញ។ ចំណែក​អ៊ីរ៉ង់​បាន​ដាក់​លក្ខខណ្ឌ​ត្រឡប់​វិញ​ថា អាមេរិក​ត្រូវ​ដក​ទណ្ឌកម្ម​ចេញ​ពី​អ៊ីរ៉ង់​ជា​មុន​សិន​ទើប​អ៊ីរ៉ង់​ត្រឡប់​ទៅ​គោរព​កិច្ចព្រមព្រៀង​ឲ្យ​បាន​ពេញ​លេញ។ ឃើញ​ថា ទំនាក់ទំនង​ប្រក្រតី​ឡើង​វិញ​ដែល​អ៊ីរ៉ង់​ចង់​មាន​ជាមួយ​អាមេរិក​របស់​លោក​បៃដិន​ដូច​ជា​មិន​ងាយ​ស្រួល​ប៉ុន្មាន​ទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI