អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

ថៃ​​ព្យាយាម​​លាង​​ជម្រះ​​រសជាតិ​​ល្វីង​​ជូរចត់​​របស់​​បង្គារ​​ចិញ្ចឹម

សំឡេង ០៥:៥៦
កម្មករបរទេសដែលធ្វើការនៅតាមទូកនេសាទថៃ
កម្មករបរទេសដែលធ្វើការនៅតាមទូកនេសាទថៃ AFP
ដោយ៖ ម៉ម ពិសី
៣៩ នាទី

មាន​ការ​ចោទ​ប្រកាន់​ជា​បន្ត​បន្ទាប់​ ក្នុង​រយៈពេល​មួយ​ឆ្នាំ​កន្លង​មក​នេះ ទៅ​លើ​ប្រទេស​ថៃ​ថា​ជា​ប្រទេស​ដែល​មាន​ការ​ជួញដូរ​មនុស្ស ធ្វើ​ទារុណកម្ម​យ៉ាង​សាហាវ​ព្រៃផ្សៃ​លើ​កម្មករ​នេសាទ​នៅ​តាម​កប៉ាល់។ កម្មករ​នេសាទ​ទាំង​នោះ​ហើយ ដែល​ផ្គត់ផ្គង់​ត្រី​សមុទ្រ​ដែល​ជា​ចំណី​បង្គារ ឲ្យ​ដល់​កសិដ្ឋាន​ចិញ្ចឹម​បង្គារ​នៅ​ប្រទេស​ថៃ។  ឆ្លៀតក្នុងឱកាស ពិពណ៌​ចំណី​អាហារ​អន្តរជាតិ នៅ​ក្រុង​ប៉ារីស ដើម​សប្តាហ៍​នេះ ថៃ​បាន​បញ្ជូន​គណៈ​ប្រតិភូ​ ជា​ច្រើន​នាក់ ឲ្យ​មក​ចួលរួម​ក្នុង​ទិសដៅ ស្តារ​មុខមាត់ ដែល​ប្រឡាក់​ប្រឡូស​ ដោយ​ការ​ចោទ​ប្រកាន់ ពី​បរទេស និង​ជា​ពិសេស គឺ​ពី​ក្រុមហ៊ុន​បរទេស ដែល​ទទួល​ទិញ​បង្គារ​ថៃ។

ផ្សាយពាណិជ្ជកម្ម

បង្គារ​ថៃ ប្រឡាក់​ដោយ​ស្នាម​ឈាម​របស់​កម្មករ​ខ្មែរ និង​ភូមា៖

កាល​ពី​ខែ​មិថុនា ឆ្នាំ​២០១៤ មាន​លេចលឺ​រឿង​អាស្រូវ​ មួយ​ ទាក់ទិន​ទៅ​នឹង​កសិដ្ឋាន​ចិញ្ចឹម​បង្គារ​នៅ​ប្រទេស​ថៃ​ ដែល​ទទួល​ទិញ កូនត្រី​យក​មក​ធ្វើ​ចំណី​បង្គារ ដែល​កូនត្រី​ទំាងនោះ​គឺ​ នេសាទ​បាន​ពី​​សមុទ្រ​ដោយ​កម្មករ​ដែល​ត្រូវ​បាន​ម្ចាស់​កប៉ាល់​ធ្វើបាប​គ្មាន​ធម៌​មេត្តា។ ដើម​ដំបូង​គឺ​មាន​អ្នក​កាសែត​បរទេស​ដែល​ធ្វើការ​ឲ្យ​កាសែត​The Guardian របស់​ប្រទេស​អង់គ្លេស បាន​ចុះផ្សាយ​បទ​យកការណ៍​មួយ ស្តី​អំពី​ជីវិត​របស់​កម្មករ​នេសាទ​ដែល​ធ្វើការ​តាម​កប៉ាល់​នេសាទ​ត្រី​របស់​ថៃ។

យោង​តាម​សារព័ត៌មាន​នោះ​បញ្ជាក់​ថា កម្មករ​ទាំង​នោះ​ ភាគ​ច្រើន ជា​ជនជាតិ​ខ្មែរ និង​ភូមា។ កប៉ាល់​ដែល​ទៅ​នេសាទ​ត្រី​ឆ្ងាយៗ​ក្នុង​សមុទ្រ គឺ​ដើម្បី​យក​កូនត្រី​ទៅ​កិន​ឲ្យម៉ត់ ហើយ​លក់​បន្ត​ ទៅឲ្យ​កសិដ្ឋាន​ចិញ្ចឹម​បង្គារ​របស់​ថៃ ធ្វើ​ជា​ចំណី​បង្គារ។ កាសែត​អង់គ្លេស​នេះ បាន​ចុះ​ថា កម្មករ​ដែល​ធ្វើការ​នៅ​លើ​កប៉ាល់​ថៃ​ទាំង​នោះ បាន​រង​នូវ​ការ​ធ្វើ​ទារុណកម្ម​យ៉ាង​អមនុស្សធម៌​ ពី​សំណាក់​ម្ចាស់​កប៉ាល់​ជនជាតិ​ថៃ។ ​

កាសែត​បាន​ដកស្រង់​សម្តី របស់​កម្មករ​ខ្មែរ​ម្នាក់​ឈ្មោះ​វុធ ដែល​ធ្លាប់​ធ្វើការ​លើ​កប៉ាល់​ថៃ​ថា កម្មករ​ភាគច្រើន ត្រូវ​គេ​ចាប់​បង្ខំ​ យក​ទៅ​ធ្វើការ​លើ​កប៉ាល់ ហើយ​ម្ចាស់​កប៉ាល់​លក់​ពួក​គេ​ បន្ត​ពី​កប៉ាល់​មួយ​ ទៅ​កប៉ាល់​មួយ​ ដូច​សត្វ​ធាតុ​អញ្ចឹង។ កម្មករ​ធ្វើការ​២០ ម៉ោង​ក្នុង​មួយ​ថ្ងៃ ហើយ​ពេល​សំរាក ពួក​គេ​ត្រូវ​គេ​ដាក់​ច្រវ៉ាក់​នៅ​នឹង​ជើង ហូប​មិន​គ្រប់​គ្រាន់ ហើយ​គ្មាន​ថ្នាំ​ព្យាបាល​ទេ​ នៅ​ពេល​ដែល​ពួក​គេ​មាន​ជំងឺ។ ពួក​កម្មករ​នៅ​លើ​កប៉ាល់​នេសាទ​រាប់​ខែ ពេល​ខ្លះ​រាប់​ឆ្នាំ មិន​ដែល​បាន​ឡើង​គោក​ទេ។ ក្រៅ​តែ​ពី​ការ​ធ្វើ​ទារុណកម្ម​បង្អត់​បាយ ថៅកែ​កប៉ាល់ បាន​បង្ខំ​ឲ្យ​ពួក​កម្មករ​ ប្រើប្រាស់​ថ្នាំ​ញៀន ដើម្បី​មាន​កម្លាំង​ធ្វើការ។ កម្មករ​ម្នាក់​ទៀត បាន​និយាយ​ថា​​ បាន​ឃើញ​ថៅកែ​ម្នាក់​សម្លាប់ កម្មករ​ជាង​១០នាក់​នៅ​នឹងមុខ។ ហើយ​ពេល​ខ្លះ ពួក​ម្ចាស់​កប៉ាល់​ បាន​ចាប់​ចងដៃ​ចងជើង​កម្មករ ហើយ​បាន​បើក​កប៉ាល់​ទាញ​ហែក​គ្នា​ជាពី​ជាបី ចោល​ខ្មោច​ទៅ​ក្នុង​សមុទ្រ យ៉ាង​ឃោរឃៅ​ជា​ទី​បំផុត។

សូម​បញ្ជាក់​ថា ថៃ​ជា​ប្រទេស​ទី​បី​ លើ​ពិភពលោក​ ដែល​នំា​ចេញ​បង្គារ​ច្រើន​ជាង​គេ។ ការ​នាំ​ចេញ​បង្គារ​គឺ​ជា​សរសរ​ទ្រូង​សំខាន់​ណាស់​ របស់​សេដ្ឋកិច្ច​ថៃ។ ក្រោយ​ការ​ចេញផ្សាយ​របស់​កាសែត​អង់គ្លេស ស្តី​អំពី ការ​ធ្វើបាប​លើ​កម្មករ​នេសាទ​ដូច​ទាសករ​របស់​ថៅកែ​កប៉ាល់​ថៃ  ក្រុមហ៊ុន​ធំៗ​នៅ​សហរដ្ឋ​អាមេរិក និង​នៅ​អឺរ៉ុប មួយ​ចំនួន បាន​បញ្ឈប់​កិច្ចសន្យា ឈប់​ទិញ​បង្គារ​របស់​ថៃ។ ទន្ទឹម​នឹង​នោះ​ដែរ ក្រសួង​ការ​បរទេស​សហរដ្ឋ​អាមេរិក​ បាន​ដាក់​ប្រទេស​ថៃ​ នៅ​ក្នុង​បញ្ជីរ​ខ្មៅ​របស់​ខ្លួន ថា ជា​ប្រទេស​ដែល​មាន​ការ​ជិះជាន់ និង​ជួញ​ដួរ​មនុស្ស​ខ្លាំង​ជាង​គេ។
 
ប្រតិបត្តិការ លាង​បង្គារ​កក្វក់ និង​ស្តារ​មុខមាត់​ថៃ៖
ពិពណ៌​ចំណី​អាហារ​អន្តរជាតិ​ ដែល​រៀបចំ​ឡើង​នៅ​ក្រុង​ប៉ារីស ក្នុង​ចន្លោះ​ពី​ថ្ងៃ​ទី ១៩ ដល់ ថ្ងៃ ២៣ តុលា នេះ គឺ​ជា​វេទិកា​​ដ៏​ធំ​ ដែល​អាច​អនុញ្ញាត​ឲ្យ​បណ្តា​ប្រទេស ផលិត និង​នាំចេញ ផលិតផល​កសិឧស្សាហកម្ម បាន​តាំង​បង្ហាញ​ផលិតផល​របស់​ខ្លួន និង​បាន​ជួប​ដោយ​ផ្ទាល់​ ជាមួយ​ក្រុមហ៊ុន​ធំៗ ដែល​នាំ​ចូល​ទំនិញ​ទាំង​នោះ​ នៅ​តាម​បណ្តា​ប្រទេស​ផ្សេងៗ។ គ្រាន់​តែ​សហរដ្ឋ​អាមេរិក និង​អឺរ៉ុប ថៃ​នាំ​ចេញ​ផលិត​ផល​បង្គារ​ប្រហែល​៣៥​ភាគរយ នៃ​ការ​នាំចេញ​សរុប​របស់​ខ្លួន។ បើ​និយាយ​អំពី​ការ​នាំចេញ​សរុប​នៃ​ផលិតផល​ចំណី​អាហារ​របស់​ថៃ​ទៅ​បរទេស ការ​នាំចេញ​បង្គារ​ គឺ​ស្មើរ​នឹង​៤០​ភាគរយ​ឯណោះ។

ដូច្នេះ បើ​ក្រុមហ៊ុន​ធំៗ​នៅ​អឺរ៉ុប រឺ​អាមេរិក ឈប់ទិញ​បង្គារ​ថៃ មាន​ន័យ​ថា ថៃ​ខាតបង់​ច្រើន​ណាស់។ ដូចនេះ​ហើយ​បាន​ជា ថៃ​បាន​បញ្ជូន​គណៈប្រតិភូ​ជា​ច្រើន​នាក់ ដោយ​មាន​ទាំង​មន្ត្រី​ការទូត អ្នក​តំណាង​សហគ្រាស​ធំៗ​ថៃ និង​ភ្នាក់ងារ​កំចាត់​ការ​ជួញដូរ​មនុស្ស របស់​ថៃ​ផង ដើម្បី​ធ្វើ​ប្រតិបតិ្តការ​ ស្តារ​មុខមាត់​ថៃ​ឡើង​វិញ។ ចេញ​ពី​ប៉ារីស​ទៅ គណៈ​ប្រតិភូ​នេះ នឹង​បន្ត​ដំណើរ​ទៅ​ក្រុង​ប៊្រុយហ្ស៊ែល​ទៀត។
 
លោក សារុណ ចារើនសុវណ្ណ មន្ត្រី​ការទូត​ថៃ​ដែល​បាន​ដឹកនាំ​គណៈប្រតិភូ​មក​ក្រុង​ប៉ារីស​នា​ពេល​នេះ បាន​ថ្លែង​ប្រាប់​អ្នក​កាសែត​ថា ថៃ​មិន​បាន​បដិសេធ​ថា​វា​គ្មាន​ការ​ជួញដួរ និង​ធ្វើ​ទារុណកម្ម​លើ​កម្មករ​បរទេស​នោះ​ទេ។ ផ្ទុយ​ទៅ​វិញ រដ្ឋាភិបាល​ថៃ​បាន​ដាក់ចេញ​នូវ​វិធាន​ការ​ជា​ច្រើន ដើម្បី​ទប់ស្កាត់​បញ្ហា​នេះ។ កម្មករ​ដែល​រងគ្រោះ​ដោយសា​ការ​ជួញដូរ និង​ការ​ធ្វើ​ទារុណកម្ម​ផ្សេងៗ គឺ​ដោយសា​កម្មករ​ទាំង​នោះ ជា​កម្មករ​ដែល​លួច​ចូល​មក​ធ្វើការ​ខុសច្បាប់​នៅ​ប្រទេស​ថៃ។ ថ្មីៗ​នេះ រដ្ឋាភិបាល​ថៃ​បាន​ដាក់ចេញ​នូវ​ច្បាប់​ថ្មី ដើម្បី​តំរូវ​ឲ្យ​កម្មករ​បរទេស​ទាំង​អស់ មក​ចុះ​ឈ្មោះ មាន​ក្រដាស​ស្នាម​ត្រឹមត្រូវ​ តាម​ផ្លូវ​ច្បាប់។ យោង​តាម​របាយការណ៏​ចុង​ក្រោយ​គេ មាន​កម្មករ​បរទេស ​ចំនួន​១លាន ៤សែន​នាក់​ហើយ ដែល​បាន​ចុះ​បញ្ជីរ​តាម​ផ្លូវ​ច្បាប់។ ច្បាប់​ថ្មី​មួយទៀត​ ក៏​ត្រូវ​បាន​អនុម័ត​ដែរ ដោយ​តំរូវ​ឲ្យ​ថៅកែ ទាំង​អស់ ចុះ​កិច្ចសន្យា​ការងារ ជាមួយ​កម្មករ ព្រមទាំង បាន​កំណត់​​ពី ប្រាក់​ឈ្នូល​របស់​កម្មករ​ និង​មាន​កំណត់​​ពី​ពេល​វេលា ឈប់​សម្រាក​ច្បាស់​លាស់​ទៀត​ផង។

ជួញ​ជិត​ ប្រសើរ​ជាង​ជួញ​ឆ្ងាយ៖
ទោះ​បី​ជា​យ៉ាងណា ការ​ចុះផ្សាយ​របស់​កាសែត​អង់គ្លេស​នេះ មិនមែន​ទើបតែ​លើក​ទីមួយ​ទេ ដែល​មាន​ការ​បរិហារ​ពី​ការ​ជិះជាន់ និង​ជួញដូរ​កម្មករ​បរទេស​ដូច​សត្វធាតុ​នៅ​ថៃ។ កាលពី ឆ្នាំ២០១១ អង្គការ​អន្តោប្រវេសន៍​អន្តរជាតិ បាន​ចេញ​របាយការណ៍ មួយ​និយាយ​អំពី លក្ខខណ្ឌ​ការងារ​ដ៏​លំបាក​លំបិន របស់​កម្មករ​ខ្មែរ និង​ភូមា ដែល​ធ្វើការ​នៅ​តាម​កប៉ាល់​នេសាទ​របស់​ថៃ។ អង្គការ​ពលកម្ម​អន្តរជាតិ ក៏​ធ្លាប់​បាន​ចេញ របាយការណ៍​មួយ​ដែរ ថា​មាន​កម្មករ​ខ្មែរ និង​ភូមា​រាប់ពាន់​នាក់​ ដែល​ធ្វើការ​តាម​ទូក​នេសាទ​ថៃ ហើយ​ដែល​ត្រូវ​ចៅកែ​ថៃ​ ធ្វើបាប បង្ខំ​ឲ្យ​ធ្វើ​ការ​គ្មាន​ពេល​សម្រាក និង​ធ្វើ​ទារុណកម្ម​ទៀត​ផង។

កាល​ពី​ចុង​ឆ្នាំ​២០១៣ មាន​ក្រុមហ៊ុន​ថៃ ចំនួន ១៧៨​ បាន​ចុះ​ហត្ថលេខា លើ​វិធានការ​រួម​មួយ សន្យា​ចូលរួម​លប់​បំបាត់ ការ​ជួញដូរ និង​ការ​ធ្វើ​ទារុណកម្ម​លើ​កម្មករ។ វិធានការ​នោះ បាន​កំណត់​ថា នឹង​មាន​ការ​ចុះ​ត្រួត​ពិនិត្យ​តាម​កប៉ាល់ ហើយ​នឹង​បើក​ឲ្យ​ដំណើរ​ការ​លេខ​ទូរស័ព្ទ​បន្ទាន់​មួយ ដើម្បី​ឲ្យ​កម្មករ​រងគ្រោះ​ អាច​រាយការណ៏ ក្នុង​ករណី​ដែល​មាន​ការ​រំលោភ​បំពាន។

ប៉ុន្តែ បើ​តាម​ការ​រាយការណ៍ របស់​មន្ត្រី​ការពារ​សិទ្ធិមនុស្ស​នៅ​ថៃ អ្វីៗ​គ្មាន​បាន​ប្រសើរ​ឡើង​ទេ ព្រោះ​ថា មន្រ្តី​ដែល​ចុះ​ទៅ​ត្រួត​ពិនិត្យ សុទ្ធសឹង​ឃុបឃិត​គ្នា ជាមួយ​ថៅកែ​ក្រុមហ៊ុន ដោយ​បាន​ទទូល​ប្រាក់​សំណូក ហើយ​កម្មករ​គ្នា ខ្លាច គ្មាន​នរណា​ហ៊ាន​ទៅ​ប្រាប់​គេ​នោះ​ទេ។ សូម្បី​តែ​អ្នក​សារពត៌មាន​ក្នុង​ស្រុក​ថៃ ក៏​ធ្លាប់​បាន​សរសេរ​បរិហារ​សង្គម​ថៃ​ ថា​ជា​សង្គម​​រើស​អើង​ ជន​បរទេស​មក​ពី​ប្រទេស​ជិតខាង​ ជា​ទីបំផុត។ ប្រជាជន​ថៃ​ទូទៅ ជា​ពិសេស ថៅកែ​ថៃ មើល​ងាយ ធ្វើ​បាប​កម្មករ​បរទេស​ណាស់។ កម្មករ​បរទេស​ដែល​ឆ្លង​ដែន​ ទៅ​ធ្វើ​ការ​នៅ​ថៃ ទោះ​ស្រប​ច្បាប់ រឺ​ខុស​ច្បាប់  ប្រឈម​មុខ​នឹង​គ្រោះថា្នក់​ខ្លាំង​ណាស់។ ពាក្យ​ចាស់​ខ្មែរ​និយាយ​មិន​ខុស​ទេ ជួញ​ជិត ប្រសើរ​ជាង​ជួញ​ឆ្ងាយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ