សព្វាវុធ

រុស្ស៊ីដាក់ពង្រាយមីស៊ីលទំនើបដែលមានល្បឿនលឿនជាងសំឡេងដល់ទៅ២៧ដង

លោក​វ៉្លាឌីមៀរ ពូទីន ប្រធានាធិបតី​រុស្ស៊ី រួមជាមួយ​នឹង​ប្រមុខដឹកនាំ​កងទ័ព​រុស្ស៊ី (រូបភាពឯកសារ)
លោក​វ៉្លាឌីមៀរ ពូទីន ប្រធានាធិបតី​រុស្ស៊ី រួមជាមួយ​នឹង​ប្រមុខដឹកនាំ​កងទ័ព​រុស្ស៊ី (រូបភាពឯកសារ) Sputnik/Mikhail Klimentyev/Kremlin via REUTERS

រុស្ស៊ី​បាន​ប្រកាស​ឲ្យដឹង នៅថ្ងៃ​សុក្រ​ថា ខ្លួន​បាន​ចាប់ផ្តើម​ដាក់​ឲ្យ​ដំណើរការ​នូវ​ប្រភេទ​មីស៊ីល​ធុនទំនើប​ថ្មី​របស់​ខ្លួន ដែល​កន្លងមក ធ្លាប់​ត្រូវ​បាន​លោក​ប្រធានាធិបតី​ពូទីន​លើកឡើង​ថា ជា​ប្រភេទ​សព្វាវុធ​ដ៏​ទំនើប​បំផុត គ្មាន​អ្នកណា​អាច​យកប្រៀបបាន ហើយ​គ្មាន​ប្រទេស​ណា​អាច​មាន​សមត្ថភាព​ផលិត​បាន​នៅឡើយ ទោះជា​នៅ​ពេលបច្ចុប្បន្ន ឬ​ក៏​នៅ​ក្នុង​រយៈពេល​ប៉ុន្មាន​ឆ្នាំ​ខាងមុខ។

ផ្សាយពាណិជ្ជកម្ម

យោងតាម​សេចក្តីប្រកាស​ព័ត៌មាន​របស់​ក្រសួង​ការពារជាតិ​រុស្ស៊ី រដ្ឋមន្រ្តី​ការពារជាតិ​រុស្ស៊ី​បាន​រាយការណ៍​ទៅ​លោក​ប្រធានាធិបតី​ពូទីន​ថា មីស៊ីលប្រភេទ​ថ្មី ​ឈ្មោះ “អាវ៉ង់ហ្កាដ” (Avangard) ត្រូវ​បាន​កងទ័ព​​ដាក់​ពង្រាយ​​ជាផ្លូវការ ចាប់តាំង​ពីព្រឹកថ្ងៃ​សុក្រ។

សេចក្តីប្រកាស​ព័ត៌មាន​នេះ​មិនបាន​បញ្ជាក់​លម្អិត​ថា តើ​មីស៊ីល​ទាំងនេះ​ត្រូវ​បាន​ដាក់ពង្រាយ​នៅ​តាម​តំបន់​ណា​ពិតប្រាកដ​នោះទេ។ ក៏ប៉ុន្តែ កាល​ពី​ខែធ្នូ​ឆ្នាំ២០១៨​កន្លងទៅ កងទ័ព​រុស្ស៊ី​ធ្លាប់​បាន​អះអាង​ថា អង្គភាព​ដែល​បំពាក់​មីស៊ីល​អាវ៉ង់ហ្កាដ​នេះ​មុនគេ គឺ​ត្រូវ​ដាក់​ពង្រាយ​នៅ​ក្នុង​តំបន់ជួរភ្នំអួរ៉ាល់។

មន្រ្តី​ជាន់ខ្ពស់​រុស្ស៊ីក៏​បាន​ឲ្យដឹង​ផងដែរ​​ថា មីស៊ីល​ធុន “អាវ៉ង់ហ្កាដ” នេះ ជា​ប្រភេទ​មីស៊ីល​យុទ្ធសាស្ត្រ ដែល​​អាច​ហោះ​ក្នុងល្បឿន​រហូតដល់​ទៅ​ជាង ៣ម៉ឺន៣ពាន់គីឡូម៉ែត្រ​ក្នុងមួយម៉ោង ពោលគឺ លឿន​ជាង​សំឡេង​រហូតដល់​ទៅ ២៧ដង ហើយ​អាច​ផ្លាស់ប្តូរ​រយៈកម្ពស់ និង​ទិសដៅ នៅ​ក្នុង​ពេល​កំពុងហោះហើរ។

ហេតុដូច្នេះហើយ​បាន​ជា​លោក​ប្រធានាធិបតី​​ពូទីន​ធ្លាប់​បាន​លើក​ឡើង​ថា វា​ជា​ប្រភេទ​មីស៊ីល​ដែល​គ្មាន​អ្នកណា​អាច​យក​ប្រៀបបាន ហើយ​ក្នុង​ចំណោម​ប្រព័ន្ធ​ខែល​ការពារ​មីស៊ីល ដែល​មាន​នៅលើ​ពិភពលោក​ក្នុងពេល​បច្ចុប្បន្ន​នេះ ​គ្មាន​ប្រព័ន្ធ​ខែល​ការពារ​មីស៊ីលណាមួយ​អាច​ស្ទាក់​ចាប់​មីស៊ីល​នេះ​បាន​នោះទេ ដោយ​ក្នុង​នោះ រាប់​ទាំង​ប្រព័ន្ធ​ខែល​ការពារ​មីស៊ីល​របស់​សហរដ្ឋ​អាមេរិក​ផងដែរ។

កាល​ពី​ប៉ុន្មាន​ថ្ងៃ​មុននេះ លោក​ពូទីន​ក៏​បាន​លើកឡើង​ផងដែរ​ថា នៅ​ក្នុង​វិស័យ​បច្ចេកវិទ្យា​សព្វាវុធ​ទំនើបៗ​នេះ រុស្ស៊ី​លែង​រត់​តាម​ពីក្រោយ​ប្រទេស​លោកខាងលិច​ដូច​ពីមុន​ទៀតហើយ ផ្ទុយ​ទៅវិញ គឺ​ប្រទេស​លោកខាងលិច​ទៅវិញ ដែល​កំពុង​រត់​តាម​ពីក្រោយ​រុស្ស៊ី​វិញ​ម្តង ដែល​ជា​រឿង​មិន​ធ្លាប់​មាន​ក្នុង​ប្រវត្តិសាស្ត្រ។

គួរបញ្ជាក់ថា ក្រៅពី​មីស៊ីល “អាវ៉ង់ហ្កាដ” នេះ លោក​ប្រធានាធិបតី​ពូទីន​ធ្លាប់​បាន​លើកឡើង​ថា នៅ​មាន​ប្រភេទ​សព្វាវុធ​ជាច្រើន​ផ្សេងទៀត ដែល​រុស្ស៊ី​ផលិតបាន ហើយ​គ្រោង​នឹង​ដាក់​ពង្រាយ​នៅ​ក្នុង​ពេល​ឆាប់ៗ​ខាងមុខ ហើយ​សុទ្ធតែ​ជា​ប្រភេទ​សព្វាវុធ​ដែល​គ្មាន​អ្នកណា​អាច​យក​ប្រៀបបាន។

ក៏ប៉ុន្តែ ក្នុងពេល​ជាមួយគ្នា គេ​ឃើញ​ថា វិស័យ​សព្វាវុធរបស់​រុស្ស៊ី​ក៏​ជួប​នឹង​បញ្ហា​ធ្ងន់ធ្ងរ​មួយ​ចំនួន​ផងដែរ នៅ​ក្នុង​ឆ្នាំ២០១៩​នេះ ជាពិសេស គឺ​ហេតុការណ៍​ផ្ទុះ​ដ៏ធ្ងន់ធ្ងរ​ជា​លក្ខណៈ​នុយក្លេអ៊ែរ កាល​ពីថ្ងៃ​ទី៨​សីហា នៅ​ក្នុង​អំឡុង​ពេល​ធ្វើការ​សាកល្បង​អាវុធ​ធុន​ថ្មី ដែល​កាលណោះ​បាន​សម្លាប់​មនុស្ស​​ចំនួន ៥នាក់ ព្រមទាំង​​បង្ក​ឲ្យ​មាន​ការ​លេចធ្លាយ​សារធាតុ​វិទ្យុសកម្ម​ទៅ​ក្នុង​បរិយាកាស៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI