សហគមន៍​អន្តរជាតិ​ទាមទារ​ឲ្យ​ភូមា​ដោះលែង​អ្នកសារព័ត៌មាន​២នាក់​របស់​រ៉យទ័រ

អ្នកកាសែតរ៉យទ័រលោក Wa Lone និងលោក Kyaw Soe Oo នៅការិយាល៏យរបស់រ៉យទ័រក្នុងប្រទេសភូមា នាថ្ងៃទី១១ខែធ្នូឆ្នាំ២០១៧
អ្នកកាសែតរ៉យទ័រលោក Wa Lone និងលោក Kyaw Soe Oo នៅការិយាល៏យរបស់រ៉យទ័រក្នុងប្រទេសភូមា នាថ្ងៃទី១១ខែធ្នូឆ្នាំ២០១៧ REUTERS/Antoni Slodkowski
ដោយ៖ លីម ស៊ីវជួង
១២ នាទី

កាលពីថ្ងៃអង្គារមុននេះ មានការបាត់ខ្លួន​របស់អ្នកសារព័ត៌មាន​រ៉យទ័រចំនួន​ពីរ​រូបនៅប្រទេសភូមា​។ រហូតមក​ដល់ថ្ងៃ​សុក្រម្សិលមិញ​នេះ រដ្ឋាភិបាល​របស់ភូមា បាន​ឲ្យដឹង​ថា ពួកគេ​ទាំងពីរ​ត្រូវបានចាប់ឃាត់​ខ្លួនដោយមន្ត្រីប៉ូលីស​ភូមា។ អង្គការសហប្រជាជាតិ សហរដ្ឋអាមេរិក អង់គ្លេស រួមទាំង​ប្រទេស​និងអង្គការបរទេស​មួយចំនួន ក៏បានចូលរួម​ក្នុងការទាមទារ​អោយមាន​ការដោះលែង​អ្នកទាំងពីររូបនោះ។

ផ្សាយពាណិជ្ជកម្ម

រដ្ឋមន្ត្រីការបរទេសអាមេរិកលោកRex Tillerson​ បានលើកឡើង​កាលពីល្ងាច​ថ្ងៃសុក្រថា អាមេរិកទាមទារឲ្យភូមាធ្វើការដោះលែងជាបន្ទាន់អ្នកកាសែតរ៉យទ័រទាំង​ពីររូបដែលត្រូវបាន​ចាប់ខ្លួននៅភូមា ឬត្រូវផ្តល់នូវព័ត៌មាន​ជុំវិញការបាត់ខ្លួនរបស់ពួកគេ។

គួររំលឹកថា​ កាលពីថ្ងៃអង្គារដើម​សប្តាហ៍នេះ ​អ្នកសារព័ត៌មានរបស់រ៉យទ័រ​ចំនួនពីររូបបានបាត់ខ្លួននៅប្រទេសភូមា ហើយក្រោយមកក្រសួង​ព័ត៌មានរបស់​ប្រទេសនេះបានប្រកាស​​ឲ្យ​​ដឹងកាលពីថ្ងៃសុក្រថា ពួកគេទាំងពីរត្រូវបានចាប់ឃាត់ខ្លួន​ដោយប៉ូលីសភូមា ក្នុងបទចោទប្រកាន់ថា ពួកគេបាន​ប្រមូលយកព័ត៌មានដោយខុស​ច្បាប់​ហើយ​មានបំណងចែកចាយ​ទិន្នន័យទាំងនោះជាមួយសារព័តមានបរទេស។ ក្រសួងព័ត៌មានភូមា​ក៏បានបញ្ចេញ​នូវរូបថតមួយសន្លឹក​របស់ពួកគេដែល​កំពុងជាប់ខ្នោះដៃផងដែរ។

គួរបញ្ជាក់ឲ្យដឹងថា អ្នកសារព័ត៌មានទាំងពីររូបនោះបានយកការណ៏ ជុំវិញ​សកម្មភាពយោធា​ភូមានៅរដ្ឋរ៉ាឃីន ដែលនាំឲ្យមានជនជាតិ​ភាគតិចរ៉ូហ៊ីងយ៉ា ៦០ម៉ឺននាក់ ភៀសខ្លួនទៅ​កាន់ប្រទេសបង់ក្លាដែស​ចាប់តាំងពីចុងខែសីហាមក។

ចំពោះករណីចាប់ខ្លួន​អ្នកការសែតរ៉យទ័រនេះ​ អង់គ្លេស ស៊ុយអ៊ែត រួមទាំងប្រទេសនិងអង្គការ​ពិភពលោកមួយចំនួនដូចជា អង្គការសហប្រជាជាតិ​និង​សមាគម​ការពារ​អ្នកសារព័ត៌មាន បានទាមទារ​អោយមានការដោះលែង​ដោយ​គ្មានលក្ខខណ្ឌ​​ក្នុងពេលឆាប់បំផុតតាមដែលអាចធ្វើទៅបាន។

ចំណែក​លោកនាយកនិងប្រធានរបស់រ៉យទ័រខ្លួនឯងផ្ទាល់ ក៏បានស្នើសុំឲ្យមាន​ការដោះលែង​ភ្លាមៗនូវអ្នកការសែតរបស់ខ្លួន​ ហើយពួកគេបានលើកឡើងកាល​ពីថ្ងៃពុធមុននេះថា អង្គភាពសារព័ត៌មានពិភពលោកមាន​កំហឹង​និងមិនពេញចិត្តខ្លាំង​ចំពោះ​ការវាយប្រហារទៅ​លើសិទ្ធិសេរីភាពសារព័ត៌មានបែបនេះ។

ក្រសួងព័ត៌មានរបស់ភូមាធ្លាប់បានលើកឡើងថា អ្នកទាំងពីររូបនោះអាចប្រឈមមុខនឹងការកាត់ទោសឲ្យជាប់ពន្ធធនាគាររហូតដល់​ទៅ១៤ឆ្នាំ តែទោះជាយ៉ាងណាក្តី ក្រសួងនេះក៏បាន​ឲ្យដឹងថា មកទល់ពេលបច្ចុប្បន្ននេះ ពួកគេពុំទាន់ត្រូវបានចោទប្រកាន់ជាផ្លូវការនៅឡើយទេ។

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI