អានតួអត្ថបទ
អាមេរិក

អាមេរិក៖​បទសម្ភាសន៍​ដ៏​កម្រ​របស់​លោក​អូបាម៉ា​នៅ​ក្នុង​ទូរទស្សន៍ Fox News

បទសម្ភាសន៍ដ៏កម្ររបស់លោកអូបាម៉ានៅក្នុងទូរទស្សន៍ Fox News
បទសម្ភាសន៍ដ៏កម្ររបស់លោកអូបាម៉ានៅក្នុងទូរទស្សន៍ Fox News REUTERS/Jim Young
១២ នាទី

នៅ​សហរដ្ឋអាមេរិក លោក​ប្រធានាធិបតី​បារ៉ាក់ អូបាម៉ា​បាន​ផ្តល់​បទសម្ភាសន៍​ដ៏​កម្រ​ឲ្យ​ទូរទស្សន៍ Fox News។ នៅ​ក្នុង​បទសម្ភាសន៍​នោះ លោក​អូបាម៉ា​បាន​ឆ្លៀត​និយាយ​ពី​យុទ្ធនាការ​ប្រយុទ្ធ​ប្រឆាំង​នឹង​ភេរវនិយម ដោយ​វាយប្រហារ​លើ​ពាក្យ​សម្តី​លើក​ឡើង​ដោយ​បេក្ខជន​ប្រធានាធិបតី​មក​ពី​គណបក្ស​សាធារណរដ្ឋ​លោក​ដូណាល់ ត្រាំ និង​លោក​តេដ គ្រូស។ ទន្ទឹម​គ្នា​នេះ លោក​អូបាម៉ា​ក៏​បាន​ចេញ​មុខ​ការពារ​បេក្ខជន​ប្រធានាធិបតី​មក​ពី​គណបក្ស​ប្រជាធិបតេយ្យ ពិសេស​លោកស្រី​ហ៊ីលឡារី គ្លីនតុន​ទាក់ទង​នឹង​រឿង​អ៊ីមែល។

ផ្សាយពាណិជ្ជកម្ម

វា​ពិត​ជា​កម្រ​ណាស់​ដែល​គេ​ឃើញ​លោក​ប្រធានាធិបតី​អាមេរិក​បារ៉ាក់ អូបាម៉ា​យល់​ព្រម​ផ្តល់​បទសម្ភាសន៍​ឲ្យ​ទូរទស្សន៍ Fox News។ ជា​រឿង​កម្រ​ក៏​ព្រោះ​តែ Fox News ជា​ទូរទស្សន៍​ដែល​មាន​និន្នាការ​គាំទ្រ​គណបក្ស​សាធារណរដ្ឋ​ដែល​ជា​បក្សប្រឆាំង។ តែ​ការ​ដែល​លោក​អូបាម៉ា​បាន​យល់ព្រម​ឲ្យ​ទូរទស្សន៍ Fox News ជួប​សម្ភាសន៍​ក៏​ជា​រឿង​មួយ​ល្អ​ដែរ ព្រោះ​លោក​បាន​ឆ្លៀត​យក​ឱកាស​ដ៏​កម្រ​នោះ​ដើម្បី​វាយប្រហារ​បេក្ខជន​ប្រធានាធិបតី​ចំនួន​ពីរ​នាក់​មក​ពី​គណបក្ស​សាធារណរដ្ឋ គឺ​លោក​ដូណាល់ ត្រាំ និង​លោក​តេដ គ្រូស​ទាក់ទង​នឹង​ប្រធានរឿង​យុទ្ធនាការ​ប្រយុទ្ធប្រឆាំង​នឹង​ភេរវនិយម។

« នៅ​ពេល​ដែល​ខ្ញុំ​បាន​ឮ​បេក្ខជន​ខ្លះ​និយាយ​ថា គេ​ត្រូវ​ទម្លាក់​គ្រាប់បែក​លើ​ជនស៊ីវិល​ស្លូតត្រង់ នេះ​មិនមែន​ជា​វិធីសាស្រ្ត​ក្នុង​ការ​ប្រយុទ្ធប្រឆាំង​នឹង​ភេរវនិយម​ទេ។ នៅ​ពេល​ដែល​ខ្ញុំ​បាន​ឮ​បេក្ខជន​ខ្លះ​ទាមទារ​ឲ្យ​មាន​ការ​ហាម​ឃាត់​អ្នក​កាន់​សាសនា​អ៊ីស្លាម​ចូល​ក្នុង​ទឹកដី​អាមេរិកាំង នេះ​ក៏​មិនមែន​ជា​វិធីសាស្រ្ត​ល្អ​ក្នុង​ការ​ប្រយុទ្ធប្រឆាំង​នឹង​ភេរវនិយម​ដែរ »។

បន្ទាប់​ពី​បាន​និយាយ​វាយប្រហារ​បេក្ខជន​ប្រធានាធិបតី​របស់​បក្សប្រឆាំង លោក​អូបាម៉ា​ក៏​បាន​ឆ្លៀត​និយាយ​ការពារ​បេក្ខនារី​ប្រធានាធិបតី​របស់​បក្ស​ប្រជាធិបតេយ្យ​លោកស្រី​ហ៊ីលឡារី គ្លីនតុន​ដែរ។ លោក​អូបាម៉ា​មិន​បាន​និយាយ​ការពារ​លោកស្រី​គ្លីនតុន​ក្នុង​នាម​ជា​បេក្ខជន​ប្រធានាធិបតី​ទេ តែ​ក្នុង​នាម​លោកស្រី​ជា​អតីត​រដ្ឋមន្រ្តី​ការបរទេស​របស់​លោក​នៅ​ក្នុង​រឿងអាស្រូវ​អ៊ីមែល​លោកស្រី​គ្លីនតុន។ លោក​អូបាម៉ា​បាន​បញ្ជាក់​ច្បាស់ៗ​ថា គ្មាន​ការ​ប្រើ​ឥទ្ធិពល​នយោបាយ​នៅ​ក្នុង​ការ​ស៊ើបអង្កេត​រឿងអាស្រូវ​នោះ​ទេ។

 « ខ្ញុំ​សូម​ធានា​ថា គ្មាន​ការ​ប្រើ​ឥទ្ធិពល​នយោបាយ​ណា​មួយ​ដើម្បី​ដាក់​គំនាប​លើ​ការ​ស៊ើបអង្កេត​របស់​តុលាការ ឬ​ការ​ស៊ើបអង្កេត​របស់​ក្រសួង​ស៊ើបការណ៍​សម្ងាត់ FBI ឡើយ។ មិនមែន​តែ​ក្នុង​ករណី​មួយ​ទេ តែ​នៅ​ក្នុង​គ្រប់​ករណី​ទាំង​អស់ »៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ