អានតួអត្ថបទ
សហរដ្ឋ​អាមេរិក-អាល្លឺម៉ង់

លោក ត្រាំ ប្រកាស​កាត់បន្ថយវត្តមាន​​កងទ័ព​​អាមេរិក​នៅអាល្លឺម៉ង់

ទាហាន​អាមេរិក នៅ​អាល្លឺម៉ង់ ក្នុង​ពេលធ្វើ​សមយុទ្ធ ថ្ងៃទី ៤​មីនា ២០២០
ទាហាន​អាមេរិក នៅ​អាល្លឺម៉ង់ ក្នុង​ពេលធ្វើ​សមយុទ្ធ ថ្ងៃទី ៤​មីនា ២០២០ Christof STACHE / AFP
ដោយ៖ អៀង សុខម៉ិញ
1 នាទី

លោក​ប្រធានាធិបតី​អាមេរិក បានប្រកាសនៅ​ថ្ងៃទី ១៥​មិថុនា ២០២០ កាត់​បន្ថយ​ចំនួនកងទ័ព​អាមេរិក​ដែលឈរ​ជើង​នៅ​អាល្លឺម៉ង់ ឱ្យ​នៅតិចមែនទែន។ មូលហេតុ​ គឺ​បណ្តាល​មក​ពី​អាល្លឺម៉ង់​ មិនព្រមបង់​វិភាគ​ទាន​​ឱ្យ​អង្គការ​អូតង់ និង​បាន​ធ្វើ​បាប​អាមេរិក​ក្នុង​វិស័យ​ពាណិជ្ជកម្ម។ នេះ​បើ​តាមការ​បញ្ជាក់​របស់​លោក ដូណាល់ ត្រាំ។

ផ្សាយពាណិជ្ជកម្ម

នៅ​ចំពោះ​មុខ​អ្នក​កាសែត លោក ដូណាល់ ត្រាំ ​បាន​អះអាង​ថា​ អាមេរិក​មាន​​កងទ័ពឈរ​ជើង​នៅ​អាល្លឺម៉ង់​ ក្នុង​ក្របខ័ណ្ឌ​អូតង់ ចំនួនដល់​ទៅ​​៥២០០០នាក់។ នេះ​ជាបន្ទុកហិរញ្ញវត្ថុ​​ដ៏​ធ្ងន់ ដូច្នេះ​អាមេរិក​នឹង​កាត់​បន្ថយទាហាន​​​ចំនួនពាក់កណ្តាល ពោលគឺ​មកនៅ​ត្រឹមតែ​២៥០០​០នាក់​​។

បើ​តាម​តួលេខផ្លូវការ ​​របស់​ក្រសួងការពារ​ជាតិ កាលពីខែ​មីនា កងទ័ព​អាមេរិកប្រចាំ​ការ​ជាអចិន្ត្រៃយ៍​លើ​ទឹកដី​អាល្លឺម៉ង មាន​ចំនួន​តែ​៣៤៦៧៤នាក់​ប៉ុណ្ណោះ។ ប៉ុន្តែ​ចំនួនទាហាន​ឡើង​ដល់​ជាង​៥ម៉ឺននាក់ នៅ​ពេល​ត្រូវ​បង្វិល​ផ្លាស់​ប្តូរ​ក្រុមចាស់​ចេញក្រុមថ្មី​ចូល និង​នៅ​ពេលធ្វើ​សមយុទ្ធ។

ក្នុង​បរិបទ​ដែល​រុស្ស៊ី​កំពុង​បង្កើន​​កម្លាំងយោធា​ វត្តមាន​កងទ័ពអាមេរិក​នៅ​អាល្លឺម៉ង់​កាន់​តែ​ចាំបាច់​ ប៉ុន្តែសម្រាប់​​​លោក​ត្រាំការ​​សម្រេច​ចិត្ត​កាត់​បន្ថយ​កងទ័ព មកពី​អាល្លឺម៉ង់​​​ចូល​រួម​បង់​វិភាគ​ទាន​ទ្រទ្រង់​អង្គការ​អូតង់ តិច​តួច​ពេក។ អាល្លឺម៉ង់​ត្រូវ​បង់​ហិរញ្ញវត្ថុ​ឱ្យ​អូតង់​ដល់​ទៅ​រាប់​ពាន់​លាន​ តែ​​ប៊ែរ​ឡាំង​មិន​ព្រមធ្វើ។ ដូច្នេះ​អាមេរិក​ដូច​ជា​ឆោត​ល្ងង់​ពេក​ដែល​ត្រូវចំណាយ​ថវិកាការពារ​អាល្លឺម៉ង់​នោះ។ នេះ​បើ​តាម​ប្រសាសន៍របស់លោក​ត្រាំ។

មូលហេតុ​សំខាន់មួយ​ទៀត​គឺ​ការផ្តោះប្តូរ​ពាណិជ្ជកម្ម។ លោក​ត្រាំ បាន​បន្ទោស​អាល្លឺម៉ង់​ដែល​ជា​មហាអំណាចសេដ្ឋកិច្ច​ប្រចាំ​តំបន់​​អឺរ៉ុប​ថា បាន​ធ្វើ​ពាណិជ្ជកម្ម​មិន​ល្អ​ជាមួយ​អាមេរិក។ អាមេរិក​មិន​ពេញ​ចិត្ត​នឹង​កិច្ចព្រមព្រៀង​​ពាណិជ្ជកម្មដែល​អាល្លឺម៉ង់​បាន​លើក​មក​ចរចា​ទេ។ បើ​តាម​សេចក្តី​ប្រកាស​របស់​លោក​ត្រាំ អាល្លឺម៉ង់​ចំណេញ​លើ​អាមេរិក​ដល់​រាប់​ពាន់លាន​ដុល្លារ​ ក្នុង​ការ​ផ្តោះប្តូរ​ពាណិជ្ជកម្ម​កន្លង​មកនេះ។ ហេតុ​ដូច្នេះ​ហើយ​បាន​ជា​លោក​ត្រាំ​មិន​បណ្តោយអាមេរិក​ចាញ់ប្រៀប​អាល្លឺម៉ង់​ទាំង​ក្នុង​វិស័យ​ពាណិជ្ជកម្ម​និង​យោធា​ទៀត​ទេ។

សូម​បញ្ជាក់ថា ថ្វីបើ​ចំនួន​កងទ័ព​អាមេរិក​នៅ​​អាល្លឺម៉ង់បាន​ចុះថយតាំង​ពី​សម័យ​សង្គ្រាមត្រជាក់មក​ក្តី​ ក៏​អាល្លឺម៉ង់​នៅ​តែ​ស្វាគមន៍​ទទួល​កងទ័ព​អាមេរិក​ច្រើន​ជាងគេ ច្រើន​ជាង​​សម្ព័ន្ធមិត្តអឺរ៉ុប​​ក្នុង​សម័យ​សង្គ្រាម​លោក​លើកទីពីរផ្សេង​ទៀត​ទាំងអស់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ