អានតួអត្ថបទ
សហរដ្ឋ​អាមេរិក

សហរដ្ឋ​អាមេរិក ​បាតុករបារព្វ​ខួប​៥៧​ឆ្នាំ​នៃ​ការដង្ហែក្បួន​ប្រឆាំងនឹង​ការ​ប្រកាន់ពូជសាសន៍

បាតុកម្ម​ប្រឆាំ​ងនឹង​ការ​រើងអើង​ពូជសាសន៍​ នៅ​អាមេរិក ថ្ងៃទី ២៨ សីហា ២០២០
បាតុកម្ម​ប្រឆាំ​ងនឹង​ការ​រើងអើង​ពូជសាសន៍​ នៅ​អាមេរិក ថ្ងៃទី ២៨ សីហា ២០២០ Olivier Douliery/Pool via REUTERS
ដោយ៖ អៀង សុខម៉ិញ
១៦ នាទី

បាតុករ​ប្រឆាំង​នឹង​ការ​រើង​អើង​ពូជសាស​ន៍ស្បែក​ខ្មៅ​នៅ​អាមេរិក បាន​មក​ជួប​ជុំ​គ្នា​ដង្ហែក្បួន​ជា​ថ្មី នៅ​ទី​ក្រុង​វ៉ាស៊ីនតោន នា​រសៀល​ថ្ងៃ​សុក្រ​ទី ២៨ សីហា ២០២០។ ជា​​បាតុកម្ម​ឧទ្ទិស​ដល់​ខួប​នៃការ​ដង្ហែ​ក្បួន​ព្យុហយាត្រាដ៏​ធំ​មួយ​ កាលពី​ឆ្នាំ​១៩៦៣ ដែល​ពេល​នោះ​ឥស្សរជន​ដ៏​ល្បី​ឈ្មោះ​លោក Martin Luther King បាន​ថ្លែង​សុន្ទរកថា​ ជាមួយ​នឹង​​ឃ្លា​ដ៏​ល្បី​ល្បាញថា​ "I have a dream ខ្ញុំ​មាន​ក្តី​សុបិនមួយ"ផង និង​ដើម្បី​ទាមទារ​ឱ្យ​ប៉ូលិស​អាមេរិក​បញ្ឈប់ការ​ប្រើ​អំពើ​ហិង្សា​លើពលរដ្ឋ​ស្បែក​ខ្មៅផង។​

ផ្សាយពាណិជ្ជកម្ម

ថ្ងៃទី​២៨​សីហា ២០២០ ជា​គម្រប់​ខួប​៥៧​ឆ្នាំ​គត់ (២៨ សីហា ១៩៦៣) នៃ​ការដង្ហែក្បួន​ព្យុហយាត្រា​កណ្តាល​រដ្ឋ​ធានី​ដើម្បី​​ទាមទារ​សិទ្ធិសេរីភាព​​សម្រាប់​ពលរដ្ឋ​អាមេរិក​ស្បែក​ខ្មៅ។ ​ ប៉ុន្តែ​ទោះបី​ជា​កម្តៅ​អាកាសធាតុ​បាន​ឡើងខ្ពស់​ខ្លាំង​​ដល់​៤០​អង្សា​ក្តី ក៏ពលរដ្ឋ​អាមេរិក​ រាប់​សិប​ម៉ឺន​នាក់ បានមក​​ប្រមូល​ផ្តុំ​គ្នា​ នៅមុខទីលាន​ Lincoln Memorial ទី​ដែល​​កាលពី​ជាង​កន្លះ​សតវត្សរ៍​មុន​ លោក Martin Luther King  បាន​ថ្លែង​សុន្ទរកថា​​ជា​ប្រវត្តិសាស្ត្រ​ ដក់​ជាប់​ក្នុ​ងការ​ចង​​ចាំ​រហូត​មក​ទល់​សព្វថ្ងៃនូវ​ឃ្លាមួយ​ថា “ខ្ញុំ​មាន​ក្តី​សុបិនមួយ”។

ចលនា​បាតុកម្ម​ថ្ងៃ​សុក្រទី ២៨សីហា​២០២០ ប្រព្រឹត្ត​ទៅក្រោម​ប្រធានបទ​ “លើក​ជង្គង់​ចេញ​ពី​កយើង” ដែល​ចង់​សំដៅ​លើ​កាយ​វិការ​របស់ប៉ូលិស​ស្បែកស​សង្កត់ក​ពលរដ្ឋ​ស្បែក​ខ្មៅ​ George Floyd​ កាលពី​ថ្ងៃទី ២៥​ឧសភា២០២០ រហូត​ដល់​ស្លាប់​ និង​ធ្វើ​ឱ្យចលនា​ប្រឆាំង​នឹង​ការ​រើសអើង​ពូជសាសន៍​ផ្ទុះ​ឡើងខ្លាំង​មិន​ធ្លាប់​មាន​​នៅ​អាមេរិក។

កូន​ប្រុស​បង្កើត​របស់​លោក Martin Luther King ក៏​បាន​បង្ហាញ​វត្តមាន​ក្នុង​ក្បួន​​ដែរ និង​បាន​អះអាង​បញ្ជាក់​ជា​ថ្មីថា​ការ​ទាមទារ​សិទ្ធិ​សេរីភាព​របស់ពលរដ្ឋ​ស្បែក​ខ្មៅ ​ថា​ជា​បុព្វហេតុ​​សំខាន់​ដូច​កាល​ពី​ឆ្នាំ​១៩៦៣។ ជាមួយ​នឹង​ការ​រៀបរាប់​ឈ្មោះ​ជនស្បែកខ្មៅ​រងគ្រោះ​ក្រោម​ស្នាដៃ​ហិង្សា​របស់​ប៉ូលិស លោក​បាន​ប្រកាស​ថែមទៀត​ថា “ដល់​ពេល​ដែល​ត្រូវមាន​ការ​​ប្តូរ​ផ្លាស់​ដោយ​ពិតៗ ដោយ​ស៊ីជម្រៅ និង​ជា​និរន្តរ៍ហើយ” ហើយ​ត្រូវ​តែ​ចូល​រួម​បោះឆ្នោត​ឱ្យ​បាន​ច្រើន​នៅ​ថ្ងៃ​ទី​៣ វិច្ឆិកា។

​សូមបញ្ជាក់​ថា​បាតុកម្ម​នេះ​ប្រព្រឹត្ត​ទៅ​តែ​មួយ​ថ្ងៃ​ក្រោយ​ការ​បិទ​បញ្ចប់​សមាជបក្ស​សាធារណរដ្ឋ​ ដែល​លោក ដូណាល់ ត្រាំ បាន​ប្រកាស​ទទួល​ឈរ​ឈ្មោះ​ជា​បេក្ខជន​ប្រធានាធិបតី​ អាណត្តិ​ទីពីរ​ជា​ផ្លូវការ។ ប៉ុន្តែ​ក្នុង​អំឡុង​ពេល​នោះ​ លោក ដូណាល់ ត្រាំ បាន​បរិហារ​ទង្វើ​ហិង្សា​ពេល​មាន​បាតុកម្ម តែ​គ្មាន​មួយ​ម៉ាត់​ទាក់ទង​នឹង​ការ​ទាមទារ​របស់​ពលរដ្ឋ​ស្បែក​ខ្មៅ។ នេះ​បើ​តាមការ​រិះគន់​របស់​​មេដឹកនាំ​ចលនា​បាតុកម្មម្នាក់។ ឯលោកស្រី កាម៉ាឡា ហារី Kamala Harris ដែល​ជា​​បេក្ខនារី​អនុប្រធានាធិបតី​បក្ស​ប្រជាធិបតេយ្យ​ ស្បែកខ្មៅ​អាមេរិក​ដំបូង​គេ បាន​បង្ហោះ​សារ​វីដេអូ​គាំទ្រ​បាតុករ​ថា “យើង​មាន​ឱកាស​រំឮក​ប្រវត្តិសាស្ត្រ​នៅ​ទីនេះ​និង​ពេល​នេះ”៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ