អាមេរិក-កូវីដ១៩

លោកត្រាំ និងភរិយា ឆ្លងជំងឺកូវីដ១៩

លោក​ប្រធានាធិ​បតី​សហរដ្ឋ​អាមេរិក លោក​ដូណាល់ ត្រាំ និង​ភរិយា
លោក​ប្រធានាធិ​បតី​សហរដ្ឋ​អាមេរិក លោក​ដូណាល់ ត្រាំ និង​ភរិយា AFP

លោក​ប្រធានាធិបតី​សហរដ្ឋ​អាមេរិក ដូណាល់ ត្រាំ និង​ភរិយា ឆ្លង​ជំងឺ​កូវីដ​១៩ ដោយ​លទ្ធផល​នៃ​ការ​ធ្វើ​តេស្តន៍​បង្ហាញ​ថា​វិជ្ជមាន​​។ នេះ​បើ​តាម​ការ​ប្រកាស​របស់​លោក​ដូណាល់ ត្រាំ តាម​រយៈ​បណ្ដាញ​សង្គម​ធ្វីតធឺ​របស់​លោក នៅ​ថ្ងៃ​ទី​០២​តុលា​នេះ​។ លោក​ត្រាំ​បញ្ជាក់​បន្ថែម​ថា លោក​នឹង​ចាប់​ផ្ដើម​ដាក់​ខ្លួន​ឯង​ឲ្យនៅដាច់​ដោយ​ឡែក​ចាប់​ពី​ពេល​នេះ​ត​ទៅ។

ផ្សាយពាណិជ្ជកម្ម

បើ​ទោះ​បី​ជា​មាន​​លទ្ធផល​វិជ្ជមាន​កូវីដ​១៩​ក៏​ដោយ ក៏​លោក​ត្រាំ​និង​ភរិយា​នៅ​មាន​សុខភាព​ល្អ។ នេះ​ជា​អ្វី​ដែល​ក្រុម​គ្រូពេទ្យ​ប្រចាំ​សេតវិមាន​បញ្ជាក់​ឲ្យ​ដឹង​ភ្លាម​ៗ​ ដោយ​បាន​បន្ថែម​​ទៀត​ថា ការ​ធ្វើ​ចត្តាឡីស័ក​សម្រាប់​ប្រមុខ​ដឹក​នាំ​សហរដ្ឋ​អាមេរិក​រូប​នេះ នឹង​ត្រូវ​ធ្វើ​ឡើង​នៅ​ក្នុង​សេតវិមាន ដែល​ជា​ទី​ស្នាក់​នៅ​និង​ធ្វើ​ការ​របស់លោក​​ប្រធានាធិបតី​ត្រាំ​​តែ​ម្ដង​។

ប្រភព​ពី​សេតវិមាន​អាមេរិក​វិញ សង្កត់​ធ្ងន់​ថា ភារកិច្ច​របស់​លោកត្រាំ​ក្នុង​ដំណែង​ជា​ប្រធានាធិបតី​នៅ​តែ​បន្ត​ដដែលគ្មាន​ការ​ប្រែ​ប្រួល​ទេ។ យ៉ាង​ណា​ក៏​ដោយ សេតវិមាន​បាន​លុប​ចោល​គម្រោង​ទៅ​កាន់​រដ្ឋ​ហ្វ្លរីដា​របស់​លោក​ត្រាំ សម្រាប់​យុទ្ធនាការ​ឃោសនា​បោះ​ឆ្នោត​នៅ​ល្ងាច​ថ្ងៃ​សុក្រ​នេះ​​។

គួរ​បញ្ជាក់​ជូន​ដែរ​ថា ការ​ប្រកាស​របស់​លោក​ត្រាំ​ពី​ការ​ឆ្លង​ជំងឺ​កូវីដ​១៩​នេះ​កើត​ឡើង​តែ​ប៉ុន្មាន​ម៉ោង​ប៉ុណ្ណោះ​ក្រោយ​ពី​ទី​ប្រឹក្សា​ជំនិត​របស់​លោក​ម្នាក់​បាន​ធ្វើ​តេស្តន៍​ឃើញ​វិជ្ជមាន​កូវីដ​១៩​។ ទី​ប្រឹក្សា​ជំនិត​របស់​លោក​ត្រាំ គឺ​អ្នក​នាង Hope Hicks បាន​រួម​ដំណើរ​ជាមួយ​លោក​ត្រាំ​ជាប់​ជា​ប្រចាំ​។ កាល​ពី​ថ្ងៃ​អង្គារ​ដើម​សប្ដាហ៍​នេះ អ្នក​នាង Hope Hicks ធ្វើ​ដំណើរ​ជាមួយ​លោក​ប្រធានាធិបតី​តាម​ជើង​ហោះហើរ Air Force One ទៅ​កាន់​រដ្ឋ​អូហាយ៉ូ ដើម្បី​ចូល​រួម​ការ​ជជែក​ដេញ​ដោល​លើក​ទី​១ រវាង​លោក​ត្រាំ និង​លោក បៃដិន​។ មួយ​ថ្ងៃ​ក្រោយ​មក ពោល​គឺ​នៅ​ថ្ងៃ​ពុធ នាង​និង​លោក​ប្រធានាធិបតី​បាន​រួម​ដំណើរ​ទៅធ្វើ​យុទ្ធនាការ​ឃោសនា​បោះ​ឆ្នោត​នៅ​​រដ្ឋ​មីនីសូតា​ថែមទៀត។

លោក ដូណាល់ ត្រាំ បាន​រៀបរាប់​ថា ទី​ប្រឹក្សា​របស់​លោក គឺ​អ្នក​នាង Hope Hicks បាន​ពាក់​ម៉ាស​​ក៏ពិត​មែន ប៉ុន្តែ​លោក​និង​ភរិយា​បាន​ចំណាយ​ពេល​នៅ​ជាមួយ​អ្នក​នាង Hope ច្រើន​​មែន​ទែន​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI