សហរដ្ឋ​អាមេរិក

សហរដ្ឋ​អាមេរិក​ ដើរ​ចេញពីវិបត្តិ​សេដ្ឋកិច្ច​ដើរថយ​ក្រោយ​

បើ​តាមធនាគារកណ្តាលអាមេរិក ៖ សហរដ្ឋ​អាមេរិក​មានកំណើន​សេដ្ឋកិច្ច​ដល់​៣៧%
បើ​តាមធនាគារកណ្តាលអាមេរិក ៖ សហរដ្ឋ​អាមេរិក​មានកំណើន​សេដ្ឋកិច្ច​ដល់​៣៧% AFP/File

បន្ទាប់​ពី​ដាំក្បាល​ធ្លាក់​ក្នុង​វិបត្តិ​សេដ្ឋកិច្ច​ដើរ​ថយក្រោយ​ខ្លាំង​ជា​ប្រវត្តិសាស្ត្រ ដោយ​ហេតុ​តែ​វិបត្តិ​កូវីដ១៩មក នៅ​ថ្ងៃព្រហស្បតិ៍​នេះ សហរដ្ឋ​អាមេរិកបានប្រកាសថាសេដ្ឋកិច្ចមាន​កំណើន​ឡើង​វិញ ផលិតផល​សរុប​ក្នុង​ស្រុក នៅ​ត្រីមាស​ទី​បីនេះ បានស្ទុះឡើង​យ៉ាង​ខ្លាំង​។ នេះ​ជា​ដំណឹង​ដ៏​ល្អ ដែលអាច​មាន​តម្លៃ​នយោបាយ​ខុស​សព្វមួយដង ព្រោះវា​ធ្លាក់​មកតែ​ ៥​ថ្ងៃ​មុន​ការ​បោះឆ្នោត​ប្រធានាធិបតី។ លោក ដូណាល់ ត្រាំ ដែល​កំពុង​ប្រកួត​ប្រជែង​យក​តំណែង​អាណត្តិទីពីរ តែង​អះអាង​ថា​លោក​ជា​​ប្រធានាធិបតីដែល​បានលើកស្ទួយ​សេដ្ឋកិច្ច​​ ឱ្យ​មានកំណើន និង​ជា​កំណើន​ខ្ពស់​ទៀត។

ផ្សាយពាណិជ្ជកម្ម

កំណើន​សេដ្ឋកិច្ច​អាមេរិក​នៅ​ត្រីមាស​ទី​បី បាន​កើន​លើស​៣០% និង​អាច​ឡើង​ដល់​ទៅ ៣៧%។ នេះ​បើ​តាម​របាយការណ៍​របស់​ធនាគារកណ្តាលអាមេរិក​ ចេញ​ផ្សាយ​នៅ​ល្ងាច​ថ្ងៃពុធ​ទី ២៨តុលា២០២០។ មិនតែ​ប៉ុណ្ណោះ នៅ​រវាង​ពី​ខែ​កក្កដា​ដល់​ខែកញ្ញា កំណើន​សេដ្ឋកិច្ចមានសន្ទុះ​លឿន​ខ្លាំង ខ្លាំង​ជាង​ក្រោយ​សម័យ​សង្គ្រាមលោក​លើ​ទីពីរ ដែល​មានត្រឹម​១៦,៧%​នៅត្រីមាស​ទីមួយ​​ឆ្នាំ​១៩៥០ ទៅ​ទៀត។​ ដោយ​ហេតុ​កូវីដ​១៩ ​អាមេរិក បានធ្លាក់ក្នុង​វិបត្តិ​សេដ្ឋកិច្ច​ដើរថយក្រោយ​​ដ៏​ធ្ងន់ធ្ងរខ្លាំង​មិនធ្លាប់​ប្រទះ​(-៣១,៤%)មែន ប៉ុន្តែ​​វិបត្តិលើក​​នេះមាន​រយៈ​ពេលខ្លី​បំផុត​ ​អាមេរិក​បាន​ងើប​ចេញ​រួច​យ៉ាង​ឆាប់​រហ័សខ្លាំង​ដែរ​។ នេះ​បើ​តាម​ការ​បញ្ជាក់​បន្ថែម​របស់​ធនាគារ​កណ្តាលអាមេរិក។

លោក ដូណាល់​ត្រាំ​ ដែល​តែ​ង​អួត​អាង​អំពី​សមត្ថភាព​លើក​ស្ទួយ​សេដ្ឋកិច្ចជាតិ និង​ធ្វើ​ឱ្យ​សេដ្ឋកិច្ច​​អាមេរិកកាន់​តែ​ខ្លាំង​ រំពឹង​លើ​លទ្ធផល​នៃកំណើន​សេដ្ឋកិច្ច ក្នុង​ដណ្តើម​តួនាទី​នៅ​អាណត្តិ​ទីពីរ។ លោក​បាន​បង្ហោះ​សារ​ទ្វីត ព្រលយ​ឱ្យ​ដឹង​ តាំង​ពី​ថ្ងៃ​អង្គារ ថា​អាមេរិក​មានកំណើន​ផលិតផលសរុប​ក្នុង​ស្រុក​ខ្ពស់ណាស់​។

 

ប៉ុន្តែសម្រាប់​អ្នកវិភាគ​សេដ្ឋកិច្ចខ្លះ ក្រៅ​អំពី​ប្រយោជន៍​ឃោសនា​នយោបាយ លទ្ធផលនៃ​កំណើន​សេដ្ឋកិច្ច​នៅ​ត្រីមាស​នេះ​មិន​អស្ចារ្យ​ទេ និង​មិនអាចប្រាប់​អំពី​អនាគត​បាន​ឡើយ។ បើ​តាមវិទ្យាស្ថាន​សេដ្ឋកិច្ច​អន្តរជាតិ​​ Peterson ដើម្បី​​មាន​សេដ្ឋកិច្ចស្មើ​សម័យ​មុន​កើត​វិបត្តិកូវីដ១៩​ សហរដ្ឋ​អាមេរិកត្រូវ​មានសន្ទុះ​កំណើន​សេដ្ឋកិច្ចដល់​ទៅ ៥៣,៣% ឯណោះទើប​បាន។ កំណើនផលិតផល​សរុប​ក្នុង​​ប្រវត្តិសាស្ត្រ​នេះ ​គ្រាន់​តែ​ផ្ទាំង​ទស្សនីយភាព​បង្ហាញ​អំពី​កំណើន​មួយ​រយៈ​ខ្លី​ប៉ុណ្ណោះ​ មិនមែនជាកំណើន​ជានិរន្ត​ទេ។ ​ទស្សនវិស័យ​សេដ្ឋកិច្ច​ត្រីមាស​ទីបួន នឹង​ស្រអាប់​ទៅៗ ព្រោះ​សភា​និង​ព្រឹទ្ធសភា​អាមេរិក​នៅ​តែ​ខ្វែង​គំនិត​គ្នា​លើ​ផែនការថ្មីសម្រាប់​​សង្គ្រោះ​ពលរដ្ឋ​និង​ក្រុមហ៊ុន​។ ផែនកា​រសង្គ្រោះ​ដំបូង ​​​ជិត​អស់​សុភពភាព​ហើយ។ គ្មានផែនការ​ថ្មី សេដ្ឋកិច្ចអាមេរិក​នឹង​ធ្លាក់​ចុះ​ខ្លាំង​។ ​មូលនិធិ​រូបិយវត្ថុអន្តរជាតិ​ព្យាករថា​អាមេរិក​នឹង​មាន​កំណើន​សេដ្ឋកិច្ច​ធ្លាក់​ចុះ​៤,៣% តែ​ធនាគារកណ្តាលអាមេរិក​ព្យាករ​ថា​ចុះ​ត្រឹម​៣,៧%​ប៉ុណ្ណោះ បើ​គិត​ជាមធ្យម​ប្រចាំ​ឆ្នាំ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI