បោះឆ្នោតប្រធានាធិបតីអាមេរិក ៖ លោកបៃដិន និង លោក ត្រាំ កំពុងប្រដេញគ្នាយ៉ាងកៀកកិត
ចុះផ្សាយនៅថ្ងៃ៖
តើនរណាជាប្រធានាធិបតីទី ៤៦របស់អាមេរិក ? លោកដូណាល់ ត្រាំ ឬលោក ចូ ដៃដិន ? អាមេរិកទំនងជាត្រូវប្រើពេលជាច្រើនថ្ងៃទៀតទើបអាចប្រកាសលទ្ធផលបាន ព្រោះការរាប់សន្លឹកឆ្នោត មិនទាន់ចប់សព្វគ្រប់ទេ។ លទ្ធផលបឋមនិងបណ្តោះអាសន្នបានធ្លាក់មកជាបណ្តើរ បានបង្ហាញថាគិតត្រឹមម៉ោង៣រសៀល ម៉ោងនៅកម្ពុជា លោក ចូ បៃដិន បេក្ខជននៃគណបក្សប្រជាធិបតេយ្យ ជាអ្នកនាំមុខ។
ប្រជាពលរដ្ឋអាមេរិកបានចូលរួមបោះឆ្នោតយ៉ាងច្រើនបំផុតមិនធ្លាប់មានទេ នៅថ្ងៃទី ៣ វិច្ឆិកា២០២០ ប៉ុន្តែសហរដ្ឋអាមេរិកត្រូវអត់ធ្មត់ជាច្រើនម៉ោង ឬដល់ជាច្រើនថ្ងៃផង ទម្រាំអាចដឹងច្បាស់ថាតើលោកដូណាល់ ត្រាំ ឬលោក ចូបៃដិន ជាឈ្នះឆ្នោតក្លាយជាប្រធានាធិបតីថ្មី។ បើតាមលទ្ធផលបឋមគិតត្រឹមម៉ោង១ភ្លឺ (ថ្ងៃទី ៤វិច្ឆិកា២០២០) ម៉ោងនៅសហរដ្ឋអាមេរិក លោក ចូ បៃដិន ទទួលជោគជ័យនៅក្នុងរដ្ឋចំនួន ១៨។ ចំណែកលោកដូណាល់ ត្រាំ ប្រធានាធិបតីផុតអាណត្តិបានទទួលជ័យជំនះ ក្នុងរដ្ឋចំនួន ២៣។ តែបើគិតអំពីចំនួនអង្គបោះឆ្នោត វិញ លោក ចូ បៃដិន ទទួលបានអង្គបោះឆ្នោតចំនួន២៣៨ ទល់នឹង២១៣សម្រាប់លោកត្រាំ (ដើម្បីអាចប្រកាសជោគជ័យបាន បេក្ខជនត្រូវមានអង្គបោះឆ្នោតចំនួន ២៧០)។
បេក្ខជនបក្សប្រជាធិបតេយ្យកំពុងនាំមុខផ្នែកអង្គបោះឆ្នោត និងបានយកឈ្នះរដ្ឋអារីហ្សូណា ដែលធ្លាប់តែបោះឆ្នោតគាំទ្របេក្ខជនប្រធានាធិបតីបក្សសាធារណរដ្ឋទៀត។ ប៉ុន្តែការរាប់សន្លឹកឆ្នោតនៅមិនទាន់សព្វគ្រប់ទេ និងរដ្ឋខ្លះមិនទាន់ផ្តល់លទ្ធផលបឋមផង។ រដ្ឋចំនួន៧ ជាគន្លឹះដែលអាចប្រែក្រឡាស់លទ្ធផលទាំងស្រុងបាន នោះគឺ ពេនស៊ីវ៉ានី មីស៊ីហ្កែន វីសខុនស៊ីន ន័រការ៉ូលីណា ចចជា និងនេវ៉ាដា។ ក្នុងចំណោមរដ្ឋទាំង៧នេះ ៥រដ្ឋ នាំមុខដោយលោក ដូណាល់ ត្រាំ។ វីសខុនស៊ីននិងនេវ៉ាដានាំមុខដោយចូបៃដិន។ រដ្ឋពេនស៊ីវ៉ានី ដែលមានតំណាងអង្គបោះឆ្នោតដ៏ច្រើន (២០) ទើបរាប់បានសន្លឹកឆ្នោត៧០% នឹងផ្តល់លទ្ធផលបឋមនៅល្ងាចថ្ងៃសុក្រ។ ឯរដ្ឋមីស៊ីហ្កែន រាប់បានដល់ទៅ៨២% ប៉ុន្តែមានគម្លាតសំឡេងតិចពេក ទើបពុំទាន់អាចប្រកាសលទ្ធផលបានភ្លាម។
យ៉ាងណាក៏ដោយ ក៏លោកចូបៃដិននៅតែមានសុទិដ្ឋនិយម។ លោកចូ បៃដិន បានចេញមុខថ្លែងមុនគេថាបក្សប្រជាធិបតេយ្យកំពុងធ្វើដំណើរលើវិថីនៃជ័យជំនះ។ ជាងមួយម៉ោងក្រោយ លោក ដូណាល់ត្រាំ បានថ្លែងតបពីសេតវិមាន ដោយទាមទារឱ្យបញ្ឈប់ការរាប់សន្លឹកឆ្នោតក្នុងរដ្ឋដែលលោកនាំមុខ និងប្រកាសអំពីជោគជ័យរបស់លោកក្នុងការបោះឆ្នោតនេះ។ លោកត្រាំថែមទាំងបានគំរាមដាក់បណ្តឹងទៅតុលាការកំពូល អំពីការលួចបន្លំសន្លឹកឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ