អានតួអត្ថបទ

Microsoft៖ ចោរអ៊ីនធ័រនែតរុស្ស៊ី និងកូរ៉េខាងជើងព្យាយាមលួចទិន្នន័យវ៉ាក់សាំង បង្ការជំងឺកូវីដ

មន្ទីរពិសោធន៍​របស់​ក្រុមហ៊ុន​ផលិត​ឱសថ Pfizer បង្ហាញ លទ្ធផល​គួរឲ្យ​លើកចិត្ត​ បន្ទាប់ពីការស្រាវជ្រាវ លើ​វ៉ាក់សាំង បង្ការ​កូវីដ
មន្ទីរពិសោធន៍​របស់​ក្រុមហ៊ុន​ផលិត​ឱសថ Pfizer បង្ហាញ លទ្ធផល​គួរឲ្យ​លើកចិត្ត​ បន្ទាប់ពីការស្រាវជ្រាវ លើ​វ៉ាក់សាំង បង្ការ​កូវីដ via REUTERS - PFIZER
ដោយ៖ ឈាង បុប្ផា
១៧ នាទី

ក្នុងពេល​ដែល​ក្រុមហ៊ុន​ផលិត​ឱសថ ជាច្រើន​រយ​កំពុង​ញាប់ដៃ ស្រាវជ្រាវ​រក​វ៉ាក់សាំង ប្រឆាំង​ជំងឺកូវីដ​១៩ ក្រុមចោរ​អ៊ីនធ័រនែត​ឯណោះវិញ ក៏​សកម្មខ្លាំងណាស់ដែរ ដើម្បី​ចូលលួច​ទិន្នន័យ​វ៉ាក់សាំង​ពី​មន្ទីរពិសោធន៍ របស់​ក្រុមហ៊ុន​ផលិត​ឱសថ។ តាម​អនុប្រធាន​ក្រុមហ៊ុន​អាមេរិកាំង Microsoft ចោរអ៊ីនធ័រនែត រុស្ស៊ី និង​កូរ៉េខាងជើង ​សកម្ម​ជាងគេ ក្នុង​ការវាយប្រហារ​តាមអ៊ីនធ័រនែត​ទៅ​លើ​ក្រុមហ៊ុន​ផលិត​ឱសថ​សំខាន់ៗ​ដែល​ធ្វើការ​ទៅលើ​ការស្រាវជ្រាវ​រកវ៉ាក់សាំង ហើយ​និង​ថ្នាំសម្រាប់​ព្យាបាល​ជំងឺកូវីដ​១៩។ 

ផ្សាយពាណិជ្ជកម្ម

ក្រុមហ៊ុន​Microsoft ដែល​បានអភិវឌ្ឍ​កម្មវិធី សន្តិសុខ​ព័ត៌មានវិទ្យា បានបង្ហាញថា នៅប៉ុន្មាន​ខែ​មកនេះ គេរកឃើញ​មាន​ការវាយប្រហារ​អ៊ីនធ័រនែត ទៅលើ​ក្រុមហ៊ុនផលិត​ឱសថ​ចំនួន ៧  នៅក្នុង​ប្រទេស​បារាំង កាណាដា ឥណ្ឌា កូរ៉េខាងត្បូង និង​សហរដ្ឋអាមេរិក​ដែល​កំពុងធ្វើការ​ស្រាវជ្រាវ​រក​វ៉ាក់សាំង និងថ្នាំ​សម្រាប់​ព្យាបាល​ជំងឺកូវីដ។

នៅក្នុង​ប្លុក​របស់​ខ្លួន កាលពី ថ្ងៃ​សុក្រម្សិលមិញ អនុប្រធាន​ក្រុមហ៊ុន​ Microsoft ទទួល​បន្ទុក​ផ្នែក​សន្តិសុខ​លោក Tom Burt បាន​បញ្ជាក់ ថា ការវាយប្រហារអ៊ីនធ័រនែត សំដៅ​ក្រុមហ៊ុន សា្រវជ្រាវ​វ៉ាក់សាំង គឺ​ជាស្នាដៃ​របស់​ក្រុមចោរអ៊ីនធ័រនែត រុស្ស៊ី ដែល​មាន​ឈ្មោះ ថា Strontium ហើយ​និង​ក្រុម​ចោរអ៊ីនធ័រនែត​កូរ៉េខាងជើង​២ផ្សេងទៀត ដែល Microsoft ឲ្យ​ឈ្មោះថា Zinc និង​Cerium។

ក្រុមចោរអ៊ីនធ័រនែត ទាំង​៣​បាន​វាយប្រហារ​ជាពិសេស​ទៅលើ​កុំព្យូទ័រ​របស់​មន្ទីរពិសោធន៍​ដែល​កំពុង​ធ្វើតេស្ត​សាកល្បង​វ៉ាក់សាំង បង្ការជំងឺកូវីដ ហើយ​និងមន្ទីរពិសោធន៍​ដែល​កំពុង​អភិវឌ្ឍ​រកវ៉ាក់សាំង បង្ការជំងឺកូវីដ។ តាមអនុប្រធាន ក្រុមហ៊ុន​Microsoft នៅពេល​ក្រុមចោររុស្ស៊ី ប្រើកម្លាំងបាយ ដោយព្យាយាម ប្រើកូដសម្ងាត់ ដល់​ទៅរាប់លាន​ដង ដើម្បី ចូល​គណនី កុំព្យូទ័រ របស់​ក្រុមហ៊ុន​ផលិតឱសថ ពួកចោរ​អ៊ីនធ័រនែត​កូរ៉េខាងជើង ឯណោះវិញ  បានផ្ញើមែល បន្លំ តាំង​ខ្លួន​ជា​មន្រ្តី អង្គការ​សុខភាពពិភពលោក ដើម្បី សុំ​លេខកូដ​ចូលកុំព្យូរទ័រ​របស់​មន្ទីរពិសោធន៍​ស្រាវជ្រាវ​វ៉ាក់សាំង។

តាម​Microsoft ការប៉ុនប៉ង​ភាគច្រើន​របស់​ចោរអ៊ីនធ័រនែត​បាន​បរាជ័យ ប៉ុន្តែ មិនទាំងអស់​នោះទេ។ Microsoft មិនបាន​បញ្ជាក់​ឈ្មោះ ក្រុមហ៊ុន​ដែល​បានរងការវាយប្រហារ​របស់​ចោរអ៊ីនធ័រនែត​នោះទេ ប៉ុន្តែ បាន​អំពាវនាវ​ឲ្យមេដឹកនាំ​ក្នុង​ពិភពលោក ពង្រឹងច្បាប់ ដើម្បី​ការពារ ក្រុមហ៊ុន និង​ស្ថាប័ន​ធ្វើការ​ផ្នែក​សុខភាព ពីការវាយប្រហារ​របស់​ចោរអ៊ីនធ័រនែត ដែល​មួយចំនួនធំ មាន​រដ្ឋអំណាច នៅការពារ​ពីក្រោយ។

ជាក់ស្តែង ចោរអ៊ីនធ័រនែត រុស្ស៊ី Strontium គឺ​ជា​ក្រុមតែមួយ​ដែល​គេ​ធ្លាប់​ស្គាល់​ឈ្មោះថា Fancy Bear ឬ APT28​ដែល​ធ្លាប់​បើកការវាយប្រហារ​ទៅលើ​អង្គការ និង​ក្រុមឃោសនា​បោះឆ្នោត​ប្រធានាធិបតី អាមេរិក កាលពី ឆ្នាំ ២០១៦។

សម្រាប់​អនុប្រធាន​ក្រុមហ៊ុន​Microsoft គេ​មិនអាច​អនុគ្រោះ យោគយល់​សកម្មភាព​ឧក្រិដ្ឋបែប​នេះ​ទេ។ គេត្រូវ​ពង្រឹង​ច្បាប់ បន្ថែមទៀត ព្រោះថា ក្រៅតែ​ពី​អាច​មាន​ការវាយប្រហារ​អ៊ីនធ័រនែត ដែល​រៀបចំ​រដ្ឋាភិបាល ក៏មានផងដែរ ក្រុមឧក្រិដ្ឋជន ចោរអ៊ីនធ័រនែត ដែល​បានទទួល​ការជួយសម្រួល ការពារ ពី​រដ្ឋាភិបាល​ក្នុង​ស្រុក ឲ្យ​ធ្វើ​សកម្មភាព​វាយប្រហារ តាមអ៊ីនធ័រនែត លើ​ផលប្រយោជន៍​របស់​ប្រទេស​ដទៃ នៅទឹកដី​បរទេស៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ