អានតួអត្ថបទ
អាមេរិក-វ៉ាក់សាំងកូវីដ១៩

វ៉ាក់សាំង​បង្ការ​កូវីដ​១៩ ​របស់​​ក្រុមហ៊ុន​ Moderna មាន​ប្រសិទ្ធ​ភាព​ ៩៤,៥ %

ក្រុមហ៊ុន Moderna ប្រកាសថាថ្នាំវ៉ាក់សាំងបង្ការកូវីដ១៩របស់ខ្លួនមានប្រសិទ្ធភាពរហូតដល់៩៤,៥ %។
ក្រុមហ៊ុន Moderna ប្រកាសថាថ្នាំវ៉ាក់សាំងបង្ការកូវីដ១៩របស់ខ្លួនមានប្រសិទ្ធភាពរហូតដល់៩៤,៥ %។ REUTERS - DADO RUVIC
ដោយ៖ អ៊ុង គឹមអ៊ាន់
១៨ នាទី

ក្រុមហ៊ុន​ឱសថ​របស់​អាមេរិក​ឈ្មោះ​ម៉ូឌែរណា​ (Moderna) បាន​ប្រកាស​ប្រាប់​នៅថ្ងៃ​ចន្ទ ទី​១៦​ វិច្ឆិកា ​អំពី​លទ្ធផល​ធ្វើ​តេស្ត​វ៉ាក់សាំង​បង្ការ​កូវីដ១៩​ ដែល​មាន​អត្រា​ប្រសិទ្ធភាព​ខ្ពស់​រហូត​ដល់​៩៤,៥ %​។ ​ការ​ប្រកាស​ថ្មី​នេះ​ គឺ​ដំណឹង​ដ៏​ធំទីពីរ​ហើយ​ដែល​បាន​ទៅ​អង្រួន​ ក៏ដូច​ជា​បង្កើន​នូវក្តី​សង្ឃឹមដល់​ពិភពលោក​។ ពិភពលោក​ ដែល​កំពុងត្រូវការ​​វ៉ាក់សាំង​ដើម្បី​ប្រឆាំង​ទល់​នឹង​​កូវីដ១៩ ដែលជាមេរោគ​រាតត្បាត​ដ៏​កាច​សាហាវ​ និងដែលកំពុងវាយលុក​ប្រទេស​ជាច្រើននាពេលបច្ចុប្បន្ននេះ​។

ផ្សាយពាណិជ្ជកម្ម

កាលពី​ថ្ងៃ​ចន្ទ​សប្តាហ៍​មុន​ ក្រុមហ៊ុន​ឱសថ​អាមេរិក​ Pfizer និង​អាល្លឺម៉ង់​ BioNtech បាន​ប្រកាស​អំពី​ប្រសិទ្ធភាព​នៃ​ថ្នាំវ៉ាក់សាំង​ប្រឆាំង​កូវីដ​របស់​ពួកគេ​ថាមាន​ដល់​ទៅ​៩០%​។ នៅថ្ងៃចន្ទ​ ទី១៦​ វិច្ឆិកា​នេះ​វិញ​ ក្រុមហ៊ុន​អាមេរិក​មួយទៀត​ គឺ​ក្រុមហ៊ុន​ Moderna បាន​ប្រកាស​ប្រាប់​ថា​ដែរថា​ តាម​លទ្ធផល​ធ្វើ​តេស្ត ​វ៉ាក់សាំង​ប្រឆាំង​កូវីដ​ ១៩​ របស់​ក្រុមហ៊ុន​នេះ​មាន​ប្រសិទ្ធ​ភាព​រហូត​ដល់ទៅ​ ៩៤,៥ %​ ឯណោះ​។

ដូច្នោះគិត​រហូតមកទល់នឹងពេលនេះ​ មាន​ក្រុមហ៊ុន​ឱសថ​អាមេរិក​ចំនួនពីរ​ហើយ​ដែល​បាន​ធ្វើតេស្ត​រកឃើញ​វ៉ាក់សាំង​ប្រឆាំងជំងឺ​កូវីដ​មាន​ប្រសិទ្ធភាព​ចាប់ពី​៩០% ឡើងទៅ​ និង​កំពុង​រងចាំ​ឈាន​ដល់​ដំណាក់កាល​សុំ​សិទ្ធិ​ផលិត​ និង​ធ្វើ​ចរាចរវ៉ាក់សាំង​នៅ​លើទីផ្សារ​។ ក្នុងន័យនេះ​ សហរដ្ឋអាមេរិក​ អាច​មានថ្នាំ​វ៉ាក់សាំង​ចំនួនពីរប្រភេទ ​ដែលត្រូវបាន​អនុញ្ញាត​សម្រាប់​ការ​ប្រើប្រាស់​ក្នុងករណី​បន្ទាន់ណាមួយ​ នាខែធ្នូ​ខាងមុខ​ជាមួយ​នឹង​ការ​ផលិត​វ៉ាក់សាំង​ផ្គត់ផ្គង់​ចំនួន​ ៦០ លានដូស​ក្នុង​ដំណាច់ឆ្នាំនេះ​។

មួយវិញទៀត​ នៅឆ្នាំក្រោយ​ រដ្ឋាភិបាល​អាមេរិក​អាចនឹង​ទទួលបាន​ថ្នាំ​វ៉ាក់សាំង​ចាក់​បង្ការ​ជំងឺ​កូវីដ១៩​ ចំនួនជាង​ ១ ពាន់​លានដូស​ពី​ក្រុមហ៊ុន​ឱសថអាមេរិក​ទាំងពីរ​គឺក្រុមហ៊ុន​ Moderna​ និង​ Pfizer ពោល​គឺច្រើនជាង​តម្រូវការ​ដែល​មាន​សម្រាប់​ប្រជាជនសរុប​ទាំងអស់​ប្រមាណ​ ៣៣១​ លាននាក់​នៅទូទាំង​ប្រទេសអាមេរិក​ទៅទៀត​។

គួរគូសបញ្ជាក់ជូនថា​ វ៉ាក់សាំង​របស់​ក្រុមហ៊ុន​ឱសស​អាមេរិក​ទាំងពីរនេះ​ត្រូវបាន​បង្កើត​ឡើងដោយ​ប្រើបច្ចេកវិទ្យាថ្មី​ដែល​គេស្គាល់ឈ្មោះថា​ messenger RNA (mRNA) តំណាង​ឱ្យថ្នាំ​ដ៏​មាន​ឥទ្ធិពល​ក្នុងការ​ប្រឆាំង​ទល់​នឹង​មរោគ​កូរ៉ូណា​ថ្មី​ ដែល​បាន​ឆ្លងទៅដល់​មនុស្ស​ប្រមាណ​ ៥៥ លាន​នាក់​នៅ​ទូទាំង​ពិភពលោក​ និង​បាន​សម្លាប់​មនុស្ស​ប្រមាណ​ ១លាន​ ៣ សែន​នាក់។

ព័ត៌មាន​អំពី​ប្រសិទ្ធភាព​កាន់តែខ្ពស់​របស់​ថ្នាំវ៉ាក់សាំង​នេះ​ លេចចេញ​ឡើង​ជួនចំ​ពេលដែល​ករណី​ឆ្លង​កូវីដ​កំពុង​កើនឡើងខ្លាំង​ និង​ដែល​បាន​បំបែក​កំណត់ត្រា​ថ្មី​ នៅក្នុង​សហរដ្ឋ​អាមេរិក​ និងអឺរ៉ុប​។ លោក Stephen Hoge ប្រធាន​ក្រុមហ៊ុន Moderna បាន​មានប្រសាសន៍​នៅក្នុង​បទ​សម្ភាសន៍​ថា​ “យើង​នឹង​មាន​ថ្នាំ​វ៉ាក់សាំង​ដែល​អាច​បញ្ឈប់​ការឆ្លង​រាលដាល​ជំងឺកូវីដ​១៩ បាន​”។

ការលើកឡើង​របស់​ក្រុមហ៊ុន​ Moderna​នេះ​ គឺជា​ដំណឹង​សាង​នូវ​ក្តីសង្ឃឹម​ និង​បង្កើន​នូវសុទិដ្ឋិនិយម​ថា​ គេនឹង​មាន​ជម្រើស​ថ្នាំវ៉ាក់សាំង​ដ៏ល្អជា​មិនខាន​ក្នុង​រយៈពេលប៉ុន្មាន​ខែ​ខាងមុខនេះ​។

គួររំឭកជូនថា​ សេចក្តី​ប្រកាស​ចុង​ក្រោយ​របស់ក្រុមហ៊ុន​ Moderna​ ធ្វើឡើង​ដោយ​ផ្អែក​លើការសិក្សា​ទៅលើ​មនុស្ស​ពេញវ័យ​អាមេរិក​ចំនួន​ ៣ម៉ឺន​នាក់​ រួម​បញ្ចូល​ទាំង​ក្រុម​មនុស្ស​ដែលជា​ជន​ងាយ​រងគ្រោះខ្លាំង​ពីជំងឺកូវីដមួយ​ចំនួន​ផងដែរ។​ ការណ៍នេះ​ បាន​ផ្តល់​នូវ​ទំនុកចិត្ត​បន្ថែមថា​ វ៉ាក់សាំង​ប្រឆាំងកូវីដ​ មាន​ប្រសិទ្ធភាព​ល្អ​ទាំង​ចំពោះ​ក្រុមមនុស្ស​ងាយរង​គ្រោះខ្លាំង​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ