អានតួអត្ថបទ

​មន្រ្តី​សន្តិសុខប្រព័ន្ធ​អ៊ីនធ័រនែត​ដែល​​ថាគ្មានការ​លួចបន្លំសន្លឹកឆ្នោត ត្រូវ​លោក ​ត្រាំ ​ដក​តំណែង

លោក គ្រីស្តូហ្វ័រ គ្រើបស៍ ជាមន្រ្តីក្រសួងសន្តិសុខជាតិទទួលបន្ទុកសន្តិសុខអ៊ីនធ័រនែត ហើយក៏ទទួលខុសត្រូវលើសន្តិសុខប្រព័ន្ធបោះឆ្នោតប្រធានាធិបតី ប្រព្រឹត្តិទៅថ្មីៗនេះដែរ។ លោកសរសេរថា«លោកមានកិត្តិយសណាស់ដែលបានបម្រើសហរដ្ឋអាមេរិក»។
លោក គ្រីស្តូហ្វ័រ គ្រើបស៍ ជាមន្រ្តីក្រសួងសន្តិសុខជាតិទទួលបន្ទុកសន្តិសុខអ៊ីនធ័រនែត ហើយក៏ទទួលខុសត្រូវលើសន្តិសុខប្រព័ន្ធបោះឆ្នោតប្រធានាធិបតី ប្រព្រឹត្តិទៅថ្មីៗនេះដែរ។ លោកសរសេរថា«លោកមានកិត្តិយសណាស់ដែលបានបម្រើសហរដ្ឋអាមេរិក»។ AP Photo/Carolyn Kaster, File
ដោយ៖ ហេង ឧត្តម
១៥ នាទី

ថ្ងៃអង្គារ​ ទី​១៧វិច្ឆិកា ប្រធានាធិបតីជិត​ផុតអាណត្តិ ដូណាល់ ត្រាំ បាន​សម្រេច​ប្រកាស​ដក​តំណែង​មន្រ្តីជាន់ខ្ពស់​មួយ​រូប ទទួលបន្ទុកសន្តិសុខប្រព័ន្ធអ៊ីនធ័រនែត ក្រោយពីមន្រ្តីរូបនេះ បានអះអាងផ្ទុយពីការលើកឡើងរបស់ លោក ដូណាល់ ត្រាំ ដែលថា មានការលួចបន្លំសន្លឹកឆ្នោត។ លោក គ្រីស្តូហ្វ័រ គ្រើបស៍ (Christopher Krebs)  ជា​មន្រ្តីក្រសួងសន្តិសុខជាតិទទួលបន្ទុកសន្តិសុខអ៊ីនធ័រនែត ហើយ​ក៏​​ទទួល​ខុសត្រូវ​​លើ​​សន្តិសុខប្រព័ន្ធបោះឆ្នោតប្រធានាធិបតី​ ប្រព្រឹត្តិទៅថ្មីៗ​នេះដែរ​។ ក្រោយ​ទទួល​ដំណឹង​ដក​តំណែង លោក ​ Christopher Krebs បាន​សរសេរ​សារបង្ហោះ​តាម​ធ្វីតធ័រ ថា«​លោក​មាន​កិត្តិយសណាស់​ដែលបាន​បម្រើ​សហរដ្ឋអាមេរិក»។​

ផ្សាយពាណិជ្ជកម្ម

ដើមហេតុ​នៃការ​ដកតំណែងនេះ ព្រោះតែ ស្ថាប័ន​​សន្តិសុខជាតិទទួលបន្ទុកសន្តិសុខអ៊ីនធ័រនែត (CISA) ក្រោម​ការដឹកនាំ​របស់​លោក គ្រីស្តូហ្វ័រ គ្រើបស៍ (Christopher Krebs)  បាន​ប្រកាសថា «ការបោះឆ្នោតប្រធានាធិបតី ថ្ងៃ​ទី​៣ វិច្ឆិកា ឆ្នាំ​២០២០នេះ ជាការបោះឆ្នោត​ដ៏​មាន​សុវត្ថិភាពបំផុត​ ក្នុង​ប្រវត្តិសាស្ត្រ​សហរដ្ឋ​អាមេរិក​​ ហើយ​គ្មាន​ភស្តុតាង​ណាមួយ​ដែល​បញ្ជាក់​ពីការ​លួច​បន្លំ​សន្លឹកឆ្នោត ឬ​ប្រព័ន្ធបោះឆ្នោត​ត្រូវ​គេ​លួច​ប្តូរ​ទិន្នន័យ​ ក៏ទេ​ដែរ។ »

ក៏​ប៉ុន្តែ​ ការប្រកាសដូច្នេះ ត្រូវលោក ដូណាល់ ត្រាំ ទាត់​ចោល​។ ​ លោក ត្រាំ សរសេរ​ប្រតិកម្ម​ភ្លាម​ តាមធ្វីតធ័រ​របស់ខ្លួន ​​ថាសេចក្តីប្រកាស​របស់​លោក គ្រីស្តូហ្វ័រ គ្រើបស៍ ស្តីពី​សុវត្ថិ​ភាព​នៃការបោះឆ្នោត​ប្រធានាធិបតី​ឆ្នាំ​២០២០​ គឺ​មិនពិត​ទាល់តែសោះ​។​ ក្នុងសារធ្វីត​ដដែល​ លោក ដូណាល់ ត្រាំ ដែល​មិនព្រមទទួល​យក​បរាជ័យ ហើយ​នៅតែ​ប្រកាន់ជំហរ​អះអាងថា​ខ្លួនឈ្នះ បាន​បន្ត​​ចោទប្រកាន់​ពី«​​ភាព​មិន​ប្រក្រតី​ក្នុង​ការ​បោះឆ្នោត»​ ថា​មាន​«លួច​បន្លំ​សន្លឹកឆ្នោតដ៏​ច្រើន​សម្បើម»​ ហើយ«​​ម៉ាស៊ីន​រាប់​សន្លឹកឆ្នោត ត្រូវ​គេរៀបចំ​ប្រព័ន្ធ​ប្តូរសន្លឹកឆ្នោត​» គឺ«​ប្តូរសន្លឹកឆ្នោត​បោះឱ្យ​លោក ត្រាំ ទៅជាបោះឱ្យ​ បៃដិន» ទៅ​វិញ។​ តាមរយៈ​សារនេះដែរ​ លោក​ប្រធានាធិបតី ដូណាល់  ត្រាំ ប្រកាស​ដកតំណែង​ គ្រីស្តូហ្វ័រ គ្រើបស៍ យ៉ាង​ទាន់​ហន់​។

ទង្វើរបស់​លោក ដូណាល់​ ត្រាំ​ យ៉ាង​ដូច្នេះ​ ត្រូវរង​ការ​រិះគន់​យ៉ាងខ្លាំង​ពី​សំណាក់​​អ្នក​នយោបាយ​បក្ស​ប្រឆាំង​។ អតីត​បេក្ខនារីប្រធានាធិបតី​ និងជា​ព្រឹទ្ធសមាជិកា លោកស្រី ​Elizabeth Warren  បានចាត់ទុកការដកតំណែងនេះ ថាជា​ការ«​រំលោភអំណាច» ធ្វើឡើង​ដោយ​ប្រធានាធិបតីមួយ​រូប​ដែល «ទន់​ខ្សោយ និងដែល​កំពុងតែ​អស់​សង្ឃឹម»។

អ្នក​តំណាងរាស្ត្រ​បក្សប្រជាធិតេយ្យ​មួយ​រូបទៀត គឺ​លោក Adam Schiff បាន​សម្តែង​ក្តីអាណិត​អាសូរ​ចំពោះ​មន្ត្រីជាន់​ខ្ពស់​ដែលត្រូវ​លោក​ ត្រាំ​ ដកតំណែង ហើយ​លោកយល់ថា «​ការបណ្តេញចេញពីតួនាទី​នេះ ព្រោះថា​លោក​ Christopher Krebs ថែរក្សា​និង​ការពារ​ប្រជាធិតេយ្យ​អាមេរិក»៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ