អានតួអត្ថបទ
វ៉ាក់សាំងកូវីដ១៩

Pfizer ដាក់ពាក្យ​សុំ​អាជ្ញាបណ្ណ​ពី​អាជ្ញាធរ​ឱសថ​អាមេរិក ដើម្បី​ផលិត​និង​ចែកចាយ​​​វ៉ាក់សាំង​​កូវីដ​១៩

រូបតំណាង សឺរ៉ាំងចាក់ថ្នាំ នៅពីមុខ​ស្លាកសញ្ញាមន្ទីរពិសោធន៍ Biontech និង Pfizer ។
រូបតំណាង សឺរ៉ាំងចាក់ថ្នាំ នៅពីមុខ​ស្លាកសញ្ញាមន្ទីរពិសោធន៍ Biontech និង Pfizer ។ REUTERS - DADO RUVIC
ដោយ៖ ម៉ម ពិសី
១៥ នាទី

សហរដ្ឋអាមេរិក គឺជាប្រទេសដែលមានអ្នកឆ្លង និងអ្នកស្លាប់ ដោយ​ជំងឺកូវីដ១៩ ច្រើនជាងគេបំផុត។ តែយ៉ាងណា ក្តីសង្ឃឹមបាន​មានពន្លឺបន្តិចវិញ បន្ទាប់​ពី​មន្ទីរពិសោធន៍២ នៅអាមេរិក បា​ន​អះអាងថា ថ្នាំវ៉ាក់សាំងរបស់ខ្លួន ​មានប្រសិទ្ធិភាព​ជាង​៩០%។ យោងតាម​ រដ្ឋមន្ត្រី​សុខាភិបាលអាមេរិក នៅថ្ងៃសុក្រនេះ មន្ទីរពិសោធន៍ Pfizer នឹងបំពេញសំណុំបែបបទសុំអាជ្ញាបណ្ណបន្ទាន់ ដើម្បី​ផលិត​ និងចែកចាយ​ថ្នាំវ៉ាក់សាំងរបស់ខ្លួន ឲ្យ​បានឆាប់ជាទីបំផុត។

ផ្សាយពាណិជ្ជកម្ម

កាលពីថ្ងៃព្រហស្បតិ៍ទី១៩វិច្ឆិកា លោក Alex Azar រដ្ឋមន្ត្រីសុខាភិបាលអាេមរិក បានបញ្ជាក់ថា នៅថ្ងៃសុក្រនេះ មន្ទីរពិសោធន៍ Pfizer និង BioNTech ដែលបានសហការគ្នាស្រាវជ្រាវ​​វ៉ាក់សាំងកូវីដ១៩ នឹងដាក់ពាក្យសុំអាជ្ញាបណ្ណបន្ទាន់ ទៅកាន់ភ្នាក់ងារ​ឱសថអាមេរិក FDA។ លោក​បន្ថែមថា លោកសង្ឃឹម​ថា​មន្ទីរពិសោធន៍ Moderna នឹងដាក់ពាក្យ​សុំអាជ្ញាបណ្ណបន្ទាន់ ក្នុងពេល​ឆាប់ៗខាងមុខនេះដែរ ដើម្បី​ឈានទៅ​ផលិត និងចែកចាយ​វ៉ាក់សាំងកូវីដ​១៩ ឲ្យ​បានទូលំទូលាយ។

គួរបញ្ជាក់ថា នៅសហរដ្ឋអាេមរិក ការផ្តល់អាជ្ញាបណ្ណបន្ទាន់ដល់ឱសថមួយ គឺជានីតិវិធីបណ្តោះអាសន្ន ឬស្ថិតក្រោមលក្ខខណ្ឌ ដើម្បីឆ្លើយតបទៅ​នឹងស្ថានការណ៍​បន្ទាន់ណាមួយ ជាក់ស្តែងដូចជា​ករណីជំងឺឆ្លងកូវីដ​១៩នេះ។ ទីភ្នាក់ងារ​ឱសថអាមេរិក អាចព្យួរ ផ្លាប់ប្តូរ ឬលុបចោល​អាជ្ញាបណ្ណបន្ទាន់​​នេះនៅពេលក្រោយ ប្រសិនបើមានទិន្នន័យថ្មី​ណាមួយ​ មកធ្វើឲ្យ​ប្រែប្រួលស្តីពី​ប្រសិទ្ធិភាព​នៃឱសថ​ ដែលគេអនុញ្ញាត។

សូមរំលឹកថា Pfizer គឺជាសហគ្រាសផលិត​ឱសថ៏ធំមួយ​នៅសហរដ្ឋអាេមរិក ចំណែក BioNTech គឺជាមន្ទីរពិសោធន៍​គីមីវេជ្ជសាស្ត្រតូចមួយនៅអាល្លឺម៉ង់ តែត្រូវបានគេទទួលស្គាល់សមត្ថភាព​ ​កាន់តែច្រើនឡើង។ វ៉ាក់សាំងប្រឆាំងកូវីដ​១៩ ដែលមន្ទីរពិសោធន៍ទាំង២នេះ បាន​រួមគ្នា​​ស្រាវជ្រាវ គឺមានប្រសិទ្ធិភាព​ដល់ទៅ​៩៥%។ នេះបើផ្អែកតាមទិន្នន័យលទ្ធផលជាស្ថាពរ នៃការ​សាកល្បង​ទ្រង់ទ្រាយ​ធំដំណាក់កាលទី៣។ តែបញ្ហាចោទ​របស់​វ៉ាក់សាំងនេះ គឺគេ​ត្រូវការ​ ការស្តុក​ទុក​ ក្នុងទូរបង្កក ដែលមាន​កម្លាំងខ្លាំង ក្នុងសីតុណ្ហភាព​ចន្លោះពី -៦០°c ទៅ -៨០°c។

សម្រាប់ពេល​នេះ គេមិនទាន់ដឹងថា តើទី​​ភ្នាក់ងារ​ឱសថអាមេរិក ត្រូវការពេលវេលាប៉ុន្មាននោះទេ ដើម្បី​ធ្វើការវិនិច្ឆ័យ។ លក្ខខណ្ឌ២ដ៏សំខាន់ ដែលអ្នកជំនាញ​ត្រូវតែពិនិត្យ មុននឹងផ្តល់អាជ្ញាបណ្ណ គឺ ប្រសិទ្ធិភាពវ៉ាក់សាំង និង​ សន្តិសុខរបស់វា ថាតើពេលចាក់ទៅលើមនុស្ស អាចបណ្តាលឲ្យ​មានផលប៉ះពាល់អ្វីខ្លះដល់សុខភាព។ លោក Moncef Slaoui មន្ត្រីទទួលបន្ទុក​ប្រតិបត្តិការ « Warp Speed » ដែលលោក​ដូណាល់ ត្រាំ បានបង្កើតដើម្បីពន្លឿន​ការផលិតវ៉ាក់សាំង បានបញ្ជាក់​កាល​ពី​ថ្ងៃចន្ទ ដើមសប្តាហ៍នេះថា ភ្នាក់ឱសថអាេមរិកអាចនឹងអនុម័តយល់ព្រម នៅក្នុងខែ​ធ្នូ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ