អានតួអត្ថបទ
អ.ស.ប.ជំនួយមនុស្សធម៌

អ.ស.ប.៖ជំងឺកូវីដ១៩ បានរុញមនុស្សជាច្រើនលាននាក់ឲ្យធ្លាក់ក្នុងភាពក្រីក្រ និងគ្រោះទុរ្ភិក្ស

លោក Mark Lowcock អ្នកទទួលខុសត្រូវកិច្ចការមនុស្សធម៌របស់ អ.ស.ប.
លោក Mark Lowcock អ្នកទទួលខុសត្រូវកិច្ចការមនុស្សធម៌របស់ អ.ស.ប. AP - Salvatore Di Nolfi
១៨ នាទី

នៅ​ថ្ងៃ​អង្គារ ទី១ ធ្នូ អង្គការ​សហប្រជាជាតិ​បាន​អំពាវនាវ​រក​ជំនួយ​មនុស្សធម៌​ក្នុង​ទឹកប្រាក់​ដល់​ទៅ ៣៥ ០០០លានដុល្លារ​សម្រាប់​ឆ្នាំ ២០២១។ តម្រូវ​ទឹកប្រាក់​ដ៏​ច្រើន​សម្បើម​មិន​ធ្លាប់​មាន​នេះ​ក៏​មក​ពី​មាន​មនុស្ស​ជា​ច្រើន​លាននាក់​បាន​ធ្លាក់​ក្នុង​ភាព​ក្រីក្រ និង​គ្រោះទុរ្ភិក្ស​ដោយសារ​វិបត្តិ​នៃ​ជំងឺ​កូវីដ១៩។ តាម​អង្គការ​សហប្រជាជាតិ ចំនួន​មនុស្ស​ដែល​ត្រូវ​ការ​ជំនួយ​មនុស្សធម៌​នឹង​មាន​ដល់​ទៅ ២៣៥លាននាក់ ពោល​មាន​ការ​កើន​ឡើង ៤០% ក្នុង​រយៈពេល ១ឆ្នាំ។ ប្រសិន​បើ​មនុស្ស​ដែល​ត្រូវ​ការ​ជំនួយ​មនុស្សធម៌ទាំង ២៣៥លាននាក់​រស់នៅ​ក្នុង​ប្រទេស​តែ​មួយ នោះ​វា​ជា​ប្រទេស​ដែល​មាន​ចំនួន​ប្រជាជន​ច្រើន​ទី៥ ក្នុង​លោក នេះ​ជា​ការ​មើល​ឃើញ​របស់​អង្គការ​សហប្រជាជាតិ។

ផ្សាយពាណិជ្ជកម្ម

ថវិកា​ដែល​ស្នើ​ឡើង​ដោយ​អ.ស.ប. និង​ក្រុម​ដៃគូរ​មាន​គោលដៅ​ជួយ​ប្រទេស​ចំនួន ៥៦ប្រទេស​ដែល​គិត​ជា​ចំនួន​ពលរដ្ឋ​មាន​ប្រមាណ ១៦០លាននាក់​លើ​ចំនួន​ពលរដ្ឋ​ទាំង ២៣៥លាននាក់​ដែល​ត្រូវ​ការ​ជំនួយ​មនុស្សធម៌។ ពលរដ្ឋ​ងាយ​រងគ្រោះ​ទាំង​នេះ​កំពុង​ប្រឈម​នឹង​ភាព​អត់ឃ្លាន ជម្លោះ បម្លាស់ទី និង​ផលវិបាក​កើត​ចេញ​ពី​បម្រែបម្រួល​អាកាសធាតុ និង​ជំងឺ​ឆ្លង។ លោក Mark Lowcock អ្នក​ទទួល​ខុសត្រូវ​កិច្ចការ​មនុស្សធម៌​របស់ អ.ស.ប. បាន​គូសបញ្ជាក់​នៅ​ក្នុង​សន្និសីទកាសែត​ថា កំណើន​ចំនួន​អ្នក​ត្រូវ​ការ​ជំនួយ​មនុស្សធម៌​ស្ទើរ​ទាំង​អស់​ក្នុង​ឆ្នាំ ២០២០ កើត​ចេញ​ពី​វិបត្តិ​កូវីដ១៩។

តាម​អ.ស.ប.ជំងឺ​កូវីដ១៩ បាន​ផ្លាស់ប្តូរ​ជីវិត​មនុស្ស​គ្រប់​រូប និង​នៅ​គ្រប់​ជ្រុងជ្រោយ​នៃ​ភពផែនដី។ ក្រុម​មនុស្ស​ដែល​មាន​ជីវភាព​យ៉ាប់យឺន​ស្រាប់​បាន​រងគ្រោះ​កាន់​តែ​ខ្លាំង​នៅ​ក្នុង​សម័យ​កូវីដ១៩ ជាមួយ​នឹង​ការ​បាត់បង់​ចំណូល តម្លៃ​ទំនិញ​ឡើង​ថ្លៃ ការ​បិទសាលារៀន និង​ការ​ផ្អាក​កម្មវីធី​ចាក់​វ៉ាក់សាំង​បង្ការ​ជំងឺ​ផ្សេងៗ។ ជា​លើកទី១ គិត​តាំង​ពី​ដំណាច់​ទសវត្ស ៩០ ដែល​ភាព​ក្រីក្រ​ខ្លាំង​បាន​កើន​ឡើង ហើយ​ចំនួន​អ្នក​ស្លាប់​ប្រចាំ​ឆ្នាំ​ដោយ​ជំងឺ​អេដស៍ ជំងឺ​របេង និង​ជំងឺ​គ្រុនចាញ់​អាច​កើន​ឡើង​ទ្វេដង។

អ្នក​ទទួល​ខុសត្រូវ​កិច្ចការ​មនុស្សធម៌​របស់ អ.ស.ប លោក Mark Lowcock បាន​ព្រមាន និង​ទាញ​សញ្ញាអាសន្ន​ថា​ពី​ពេល​នេះ​ទៅ​ដំណាច់​ឆ្នាំ ២០២០ មនុស្ស​ចំនួន ២៧០លាននាក់​អាច​ជួប​នឹង​វិបត្តិ​អសន្តិសុខ​ស្បៀងអាហារ ពោល​មាន​ចំនួន ៨២% ច្រើន​ជាង​នៅ​មុន​ផ្ទុះ​វិបត្តិ​កូវីដ១៩។ តាម​លោក Lowcock ពលរដ្ឋ​រស់​ក្នុង​ប្រទេស​យេម៉ែន ស៊ូដង់ខាងត្បូង បួគីណាហ្វាសូ និង​ប៉ែក​ឦសាន​ប្រទេស​នីហ្សរីយ៉ា​កំពុង​ស្ថិត​មាត់ជ្រោះ​នៃ​គ្រោះទុរ្ភិក្ស។ ចំណែក​តំបន់ និង​ប្រទេស​ផ្សេង​ទៀត ដូច​យ៉ាង​តំបន់​សាហ៊ែល និង​ប្រទេស​អាហ្វហ្កានីស្ថាន​កំពុង​ប្រឈម​នឹង​ភាព​ងាយ​រងគ្រោះ​ខ្លាំង។

លោក Lowcock បាន​បន្ថែម​ដោយ​សង្ឃឹម​ថា បើ​គេ​អាច​ជួយ​ពិភពលោក​ឲ្យ​ឆ្លង​ផុត​ឆ្នាំ ២០២១ ដោយ​គ្មាន​គ្រោះ​ទុរ្ភិក្ស​ធ្ងន់ធ្ងរ វា​ពិត​ជា​ជោគជ័យ​មួយ​ធំធេង​ណាស់។ ចំណែក​អគ្គលេខាធិការ​អង្គការសហប្រជាជាតិ​លោក Antonio Guterres បាន​សរសើរ​ពី​ការងារ​មនុស្សធម៌​របស់​អ.ស.ប. ក្នុង​ឆ្នាំ ២០២០ ដោយ​បាន​ផ្តល់​ជំនួយ​ជា​ម្ហូបអាហារ ថ្នាំពេទ្យ ជម្រក ការ​អប់រំ និង​ផលិតផល​ចាំ​បាច់​ផ្សេង​ទៀត​ដល់​មនុស្ស​ជា​ច្រើន​លាននាក់។ តែ​លោក Guterres បាន​ទទួល​ស្គាល់​ថា វិបត្តិ​នៅ​មិន​ទាន់​ចប់​ទេ ហើយ​ថវិកា​ជំនួយមនុស្សធម៌​កំពុង​ប្រឈម​នឹង​ការ​ខ្វះខាត​យ៉ាង​ខ្លាំង​ក្នុង​ពេល​ដែល​ផលវិបាក​កើត​ចេញ​ពី​ជំងឺ​កូវីដ១៩ កំពុង​បន្ត​មាន​ធ្ងន់ធ្ងរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ