អាមេរិក-កូវីដ១៩

សហរដ្ឋអាមេរិក៖ហេតុអ្វីបានជាយុទ្ធនាការចាក់វ៉ាក់សាំងបង្ការកូវីដ១៩មានភាពយឺតយ៉ាវជាងការរំពឹងទុក?

នៅសហរដ្ឋអាមេរិក យុទ្ធនាការចាក់វ៉ាក់សាំងបង្ការកូវីដ១៩មានភាពយឺតយ៉ាវជាងការរំពឹងទុក។
នៅសហរដ្ឋអាមេរិក យុទ្ធនាការចាក់វ៉ាក់សាំងបង្ការកូវីដ១៩មានភាពយឺតយ៉ាវជាងការរំពឹងទុក។ AP - Marco Ugarte
១៣ នាទី

នៅ​សហរដ្ឋអាមេរិក គិត​តាំង​ពី​ថ្ងៃ​ដំបូង​មក​ដល់​ថ្ងៃទី១ មករា ឆ្នាំ ២០២១ ចំនួន​ករណី​វិជ្ជមាន​ជំងឺ​កូវីដ១៩ មាន​ជាង ២០លានករណី។ ចំណែក​ចំនួន​អ្នក​ស្លាប់​ដោយ​កូវីដ១៩​មាន​ជាង ៣៤៧ ៥០០នាក់។ តួលេខ​នៃ​ចំនួន​ករណី​ឆ្លង និង​ចំនួន​អ្នក​ស្លាប់​នេះ​បាន​ធ្វើ​ឲ្យ​សហរដ្ឋអាមេរិក​បន្ត​ជា​ប្រទេស​ដែល​កំពុង​រងគ្រោះ​ខ្លាំង​ជាង​គេ​ដោយ​ជំងឺ​កូវីដ១៩។ ដោយឡែក យុទ្ធនាការ​ចាក់​វ៉ាក់សាំង​បង្ការ​កូវីដ១៩ ដែល​រដ្ឋបាល​របស់​លោក​ដូណាល់ ត្រាំ​គ្រោង​ចាក់​ពលរដ្ឋ​អាមេរិក​ឲ្យ​បាន ២០លាននាក់​ក្នុង​ខែ​ធ្នូ​កន្លង​ទៅ​មាន​ភាព​យឺតយ៉ាវ​យ៉ាង​ខ្លាំង។ គិត​មក​ទល់​ពេល​នេះ មាន​ពលរដ្ឋ​អាមេរិក​តែ ២ ៨០០ ០០០នាក់​ប៉ុណ្ណោះ​ដែល​បាន​ចាក់​វ៉ាក់សាំង។

ផ្សាយពាណិជ្ជកម្ម

នៅ​សហរដ្ឋអាមេរិក​ក៏​ដូច​ជា​នៅ​ក្នុង​បណ្តា​ប្រទេស​មួយ​ចំនួន​ដែរ ក្រុម​បុគ្គលិក​ពេទ្យ​ជា​ក្រុម​មនុស្ស​អាទិភាព​ដែល​ត្រូវ​ទទួល​ការ​ចាក់​វ៉ាក់សាំង​មុន​គេ។ តែ​ខុស​ពី​ក្តី​រំពឹង​ទុក​របស់​រដ្ឋបាល​លោក​ដូណាល់ ត្រាំ យុទ្ធនាការ​ចាក់​វ៉ាក់សាំង​នេះ​ហាក់​មាន​ភាព​យឺតយ៉ាវ​គួរ​ឲ្យ​កត់សម្គាល់​ទៅ​វិញ។ មូលហេតុ​ត្រូវ​បាន​មជ្ឈមណ្ឌលបង្ការ និង​គ្រប់គ្រង​ជំងឺ​ឆ្លង​បញ្ជាក់​ថា គឺ​មក​ពី​ការ​ចែកចាយ​វ៉ាក់សាំង​នៅ​តាម​រដ្ឋ​នីមួយៗ​មាន​ភាព​យឺតយ៉ាវ។ ឧទាហរណ៍​ជាក់ស្តែង​ក្នុង​ខែ​ធ្នូ​កន្លង​ទៅ វ៉ាក់សាំង​ចំនួន ២លានដូស​ដែល​បាន​ប្រគល់​ទៅ​ឲ្យ​មណ្ឌល​មនុស្ស​ចាស់​ដែល​ជា​ប្រភេទ​មនុស្ស​អាទិភាព មាន​មនុស្ស​តែ ១៧០ ០០០នាក់​ប៉ុណ្ណោះ​ដែល​បាន​ចាក់​វ៉ាក់សាំង។

គួរ​បញ្ជាក់​ថា ក្រោយ​ពី​ទទួល​ការ​អនុញ្ញាត​ឲ្យ​ប្រើ​វ៉ាក់សាំង​បាន ២សប្តាហ៍​មក សហរដ្ឋអាមេរិក​ទទួល​បាន​វ៉ាក់សាំង​ចំនួន ១៤លានដូស​ពី​មន្ទីរពិសោធន៍ Pfizer និង​មន្ទីរពិសោធន៍ Moderna ដើម្បី​ចាក់​ទៅ​លើ​ក្រុម​បុគ្គលិក​ពេទ្យ​ចំនួន ២៤លាននាក់។ ក្នុង​ខែ​មករា រដ្ឋបាល​អាមេរិក​នឹង​ទទួល​បាន ២០លានដូស​បន្ថែម​ទៀត ហើយ​គ្រោង​ស្តុក​ទុក​ក្នុង​បរិមាណ​ដូច​គ្នា​សម្រាប់​ការ​ចាក់​ដូស​ទី២។ វេជ្ជបណ្ឌិត​អង់តូនី ហ្វូស៊ី អ្នក​សិក្សា​រោគរាតត្បាត​ដែល​ទទួល​បាន​គោរព​ខ្លាំង​នៅ​សហរដ្ឋអាមេរិក​បាន​បញ្ជាក់​ថា រដ្ឋអំណាច​អាច​សម្រេច និង​ពន្លឿន​យុទ្ធនាការ​ចាក់​វ៉ាក់សាំង​ទៅ​លើ​ក្រុម​មនុស្ស​អាទិភាព​ផ្សេង​ទៀត ដូច​ជា​ក្រុម​អ្នក​ពន្លត់​អគ្គីភ័យ ឬ​ក្រុម​ប៉ូលិស។

នៅ​សហរដ្ឋអាមេរិក​ដែល​ជា​ប្រទេស​បាន​រងគ្រោះ​ខ្លាំង​ជាង​គេ​ដោយ​ជំងឺ​កូវីដ១៩ ករណី​ឆ្លង​ថ្មី និង​ចំនួន​អ្នក​ស្លាប់​ប្រចាំ​ថ្ងៃ​មាន​កម្រិត​ខ្ពស់​ខ្លាំង។ តាម​តួលេខ​ផ្តល់​ដោយ​សាកលវិទ្យាល័យ Johns Hopkins ចំនួន​អ្នក​ស្លាប់​ក្នុង​ថ្ងៃ​ពុធ ទី៣០ ធ្នូ​មាន​ជាង ៣ ៩០០នាក់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI