សហរដ្ឋ​អាមេរិក

បាតុករ​គាំទ្រ​លោក​ត្រាំ សម្រុកចូល​វិមានកាពីតូលរំខាន​ការ​បញ្ជាក់​ជោគជ័យ​របស់លោក​ចូបៃដិន

បាតុករ​គាំទ្រ​លោកដូណាល់ ត្រាំ សម្រុក​ចូល​វិមាន​កាពីតូល នៅ​ថ្ងៃទី ៦ មករា ២០២១
បាតុករ​គាំទ្រ​លោកដូណាល់ ត្រាំ សម្រុក​ចូល​វិមាន​កាពីតូល នៅ​ថ្ងៃទី ៦ មករា ២០២១ REUTERS - LEAH MILLIS
ដោយ៖ អៀង សុខម៉ិញ
១៥ នាទី

លោក ចូ បៃដិន ជា​ប្រធានាធិបតី​សហរដ្ឋ​អាមេរិក​​ទី ៤៦ ​! សមាជិក​សភា និង​ព្រឹទ្ធសភា​អាមេរិក ទើប​បានប្រកាស​ជា​ផ្លូវការ​អំពី​ជោគជ័យ​របស់​លោក ចូបៃដិន នៅ​ថ្ងៃព្រហស្បតិ៍​ទី ៧ មករា ២០២១។ មិនមែន​នៅ​ថ្ងៃ​ទី ៦​មករា ដូចការ​គ្រោងទុក និង​​ទម្លាប់​ជា​ប្រពៃណីអាមេរិក​ទេ។ ​ មូលហេតុ​បណ្តាល​មក​ពី​ ពិធី​បញ្ជាក់​ជោគជ័យ​របស់​ប្រធានាធិបតីថ្មី ត្រូវ​រង​ការរំខាន ពី​សំណាក់​ក្រុមបាតុករ​ដែល​គាំទ្រ​លោក​ដូណាល់ ត្រាំ។ បាតុករ​បានសម្រុក​ចូលក្នុង​វិមាន រដ្ឋ​សភា និង​ព្រឹទ្ធសភា ​កាពីតូល បង្ក​ឱ្យ​មាន​ការ​ប៉ះទង្គិច ហិង្សា​ស្លាប់​មនុស្ស​បួននាក់។ ​រូបភាព​ហិង្សា​នៅ​មុខ និង​ក្នុង វិមាន​កាពីតូល ដែល​ជា​និម្មិត្តរូប​នៃ​លទ្ធិប្រជាធិបតេយ្យ​អាមេរិក បាន​បង្ក​ការ​ភ្ញាក់ផ្អើល​យ៉ាង​ខ្លាំង​ទូទាំងពិភពលោក និងដោយ​​គ្មាន​នរណា​នឹងស្មាន​ដល់សោះ។

ផ្សាយពាណិជ្ជកម្ម

នា​ថ្ងៃទី ៦​មករា ២០២១ ក្នុង​ពេល​ដែល​សមាជិក​សភា និងព្រឹទ្ធសភាអាមេរិក ​ចាប់​ផ្តើម​ប្រជុំការងារ​ដើម្បី​បញ្ជាក់​អំពី​ជ័យ​ជំនះ​របស់​លោក ចូ បៃដិន ជា​ប្រធានាធិបតី​សហរដ្ឋ​អាមេរិក​ទី ៤៦ ក្រុម​បាតុករ​​មួក​ក្រហម​ ក៏​បាន​​ប្រមូល​ផ្តុំ​គ្នាដែរ​នៅ​មុខ​សេតវិមាន ដើម្បីសម្តែង​ការ​​គាំទ្រ​​​ដល់ប្រធានាធិបតីផុត​អាណត្តិ។ គ្រាន់​តែ​ចប់​សារ​របស់​​លោក​ដូណាល់​ត្រាំ ដែល​នៅ​តែ​បន្ត​អះអាង​ការបោះឆ្នោត​ប្រធានាធិបតី​ថ្ងៃទី ៣​វិច្ឆិកា មានការលួច​បន្លំ​ភ្លាម ក្រុម​បាតុករ​រាប់ពាន​នាក់​បាន​តម្រង់​ទិស​ទៅ​វិមានកាពីតូល​ និង​នាំ​គ្នា​សម្រុក​ចូល​ក្នុង​វិមានរដ្ឋ​សភា និង​ព្រឹទ្ធសភា។

ទោះ​បី​មានការ​កងកម្លាំងការពារ​ខ្លាំង តែ​បាតុករនៅ​តែ​អាច​សម្រុក​ចូល​បាន ដោយ​ខ្លះចូលតាមទ្វារ ខ្លះ​​​វាយ​បំបែក​កញ្ចក់បង្អួច​ចូល។ អង្គ​ប្រជុំ​ ត្រូវ​ផ្អាក សមាជិក​សភា​និង​ព្រឹទ្ធសភាត្រូវ​ជម្លៀស​ចេញ​ជាបន្ទាន់​។ មិនបានប៉ុន្មាននាទី​ផង ស្នូរ​ផ្ទុះ​អាវុធ​បាន​លាន់​ឡើង ក្នុង​វិមាន​រដ្ឋសភាកាពីតូល​។ ស្ត្រីអ្នក​​គាំទ្រលោក​ត្រាំ​​យ៉ាង​មុះមុត​ម្នាក់ បាន​ត្រូវ​គ្រាប់កាំភ្លើង​របស់​ប៉ូលិស និង​ស្លាប់​នៅ​ពេលបញ្ជូនទៅ​ដល់​មន្ទីរពេទ្យ។ ចំណែក​ជន​រងគ្រោះ​ស្លាប់​បីនាក់​ផ្សេង​ទៀត​នៅពុំ​ទាន់​ដឹង​អត្តសញ្ញាណ​ទេ។ តែ​ជា​លើក​ទីមួយ មាន​ដំណាក់​ឈាម​ហូរ​នៅ​វិមានកាពីតូល បេះ​ដូង​របស់​សហរដ្ឋ​អាមេរិក។

ហេតុការណ៍​ប៉ះទង្គិច​ហិង្សា និង​ការ​ចូល​កាន់​កាប់​ក្នុង​វិមានរដ្ឋ​សភា ​បាន​បិទ​បញ្ចប់​ ក្រោយ​ពី​អាជ្ញាធរ​វ៉ាស៊ីងតោន បាន​បញ្ជូនទាហាន​​ឆ្មាំជាតិ​មកជា​ជំនួយ​បន្ថែម និង​ចេញ​បម្រាមគោចរ ពី​ម៉ោង​៦ល្ងាចដល់​ម៉ោង​៦ព្រឹក ម៉ោង​នៅ​សហរដ្ឋ​អាមេរិក។ ក្រោយ​សេចក្តី​ថ្លែងការណ៍ ​របស់​លោក ចូ បៃដិន ​អំពាវនាវ​ឱ្យ​បាតុករ​បញ្ឈប់​សកម្មភាព​បះបោរ លោកត្រាំ​ក៏​បាន​បង្ហោះ​សារទ្វីត ឱ្យ​បាតុករ​ត្រលប់​ទៅផ្ទះ​វិញ។ ប៉ូលិស​អាច​គ្រប់គ្រងស្ថានការណ៍​នៅវិមានកាពីតូល​បាន​ឡើង​នៅ​ជិត​បួនម៉ោងក្រោយ និង​បាន​ចាប់​ខ្លួន​មនុស្ស​ជាង៥០នាក់។

សមាជិកសភានិង​ព្រឹទ្ធសភា អាច​ត្រលប់​ចូល​ទៅ​កាន់​អង្គប្រជុំ​វិញ ទាំង​យប់ និង​ទី​បំផុត ក៏​បានបញ្ជាក់​និងប្រកាស​ជា​ផ្លូវការ​ជ័យ​ជំនះ​របស់​លោកចូបៃដិន ជា​ប្រធានាធិបតី​​សហរដ្ឋ​អាមេរិក​ទី ៤៦ នៅ​ព្រលឹម​ថ្ងៃ​ព្រហស្បតិ៍​ទី ៧​មករា។ បន្តិចក្រោយ​មក លោកដូណាល់ ត្រាំ​ ក៏​បានចេញសេចក្តីថ្លែងការណ៍​ ទទួលស្គាល់​ការ​បញ្ចប់អាណត្តិ​​របស់​លោក និង​សន្យា​ផ្ទេរ​អំណាចដោយ​សន្តិវិធី​ តែ​លោក​ជំទាស់​នឹង​លទ្ធផល​បោះឆ្នោតដដែល៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI