សហរដ្ឋ​អាមេរិក-ហុងកុង

អាមេរិក​ដាក់ទណ្ឌកម្ម​​​ជា​ថ្មី​ប្រឆាំង​ចិន ​ក្រោយ​ការ​ចាប់ខ្លួន​សកម្មជន​ប្រជាធិបតេយ្យហុងកុង

Le secrétaire d'Etat américain, Mike Pompeo, a estimé mercredi 27 mai 2020 que Hong Kong ne jouissait plus de l'autonomie qui lui permettait de bénéficier de privilèges commerciaux avec les Etats-Unis.
Le secrétaire d'Etat américain, Mike Pompeo, a estimé mercredi 27 mai 2020 que Hong Kong ne jouissait plus de l'autonomie qui lui permettait de bénéficier de privilèges commerciaux avec les Etats-Unis. © Nicholas Kamm, pool, AFP
ដោយ៖ អៀង សុខម៉ិញ
១៤ នាទី

នៅ​៥​ថ្ងៃ​មុន​បញ្ចប់​អាណត្តិ រដ្ឋបាល​លោក​ដូណាល់ ត្រាំ​បាន​មិន​បន្ធូរ​ដៃ​ទេ។ សហរដ្ឋ​អាមេរិក​បាន​ប្រកាស នៅ​ថ្ងៃ​សុក្រ​ទី ១៥​មករា ២០២១ ​ដាក់​ទណ្ឌកម្មប្រឆាំង​នឹងអ្នក​ទទួល​ខុស​ត្រូវ​​ចិន​ និង​ហុងកុង​ ចំនួន ៦​នាក់។ ជា​ទណ្ឌកម្មឆ្លើយ​តប​ទៅ​នឹង​​ហេតុការណ៍​ចាប់​ខ្លួន​សកម្មជន​ប្រជាធិបតេយ្យ​​ និង​អតីត​តំណាង​រាស្ត្រ​បក្ស​ប្រជាធិបតេយ្យ​នៅហុងកុង​ ជាង​៥០នាក់ កាលពី​សប្តាហ៍​មុន។

ផ្សាយពាណិជ្ជកម្ម

​អ្នក​ទទួល​ខុស​ត្រូវ​ចិនឬ​ហុងកុង​៦​នាក់​ដែល​ជាប់​ទណ្ឌកម្ម​ថ្មី​របស់​អាមេរិក​នេះ មានអាទិ៍​ លោក​ Tam Yiu-Chung តាំម យៀវជុង តំណាងតែម្នាក់​គត់​របស់​ហុងកុង​អតីតដែនដី​ក្រោមអាណានិគមអង់គ្លេស​ នៅ​ក្នុង​គណៈកម្មការអចិន្ត្រៃយ៍​សភា​ចិន​ និង​អ្នក​ទទួលខុសត្រូវ​ផ្សេង ​នៅ​ក្នុង​ជួរ​ប៉ូលិសហុងកុង​ ផ្នែក​សន្តិសុខ​ជាតិ។

នៅក្នុង​សេចក្តី​ថ្លែងការណ៍​ លោករដ្ឋមន្ត្រីការបរទេស​អាមេរិក ប៉ុមប៉េអូ បាន​អំពាវនាវឱ្យ​ប៉េកាំង និង​ហុងកុង ដោះលែង​ជា​បន្ទាន់ នូវ​រាល់​ជន​ដែលដោយ​គ្រាន់តែប្រើ​​សិទ្ធិ​ និង​សេរីភាព​របស់ខ្លួនបែរ​ជា​​ត្រូវ​​រង​ការ​ចាប់​ខ្លួន​ តាមរយៈ​​ច្បាប់​សន្តិសុខ​ជាតិ​​ ឬ​ច្បាប់​ផ្សេង​ទៀត។ នៅ​៥​ថ្ងៃមុន​ផុត​អាណត្តិ លោកប្រមុខ​ការ​ទូត​អាមេរិក បាន​ថ្កោល​ទោស​ទង្វើ​របស់​សាធារណរដ្ឋ​ប្រជាមានិតចិន ដែលចង់ចិញ្ចាំ​​សេរីភាព​និង​ដំណើរការ​ប្រជាធិបតេយ្យ​នៅ​ហុងកុង​ និង​បាន​សន្យា​ប្រើ​គ្រប់​មធ្យោបាយ​ដែលអាមេរិកមាន​ដើម្បី​ព្រមាន​ចិន។

ដោយ​គ្មានបង្អង់ រដ្ឋាភិបាល​ហុងកុង បាន​ចេញសេចក្តី​ថ្លែងការណ៍​រិះគន់វិញ ​ដោយ​ចាត់​ទុក​ទណ្ឌកម្ម​អាមេរិក​ថា ល្ងង់ គួរ​ឱ្យ​អៀន​ខ្មាស ​និង​បែប​មើលងាយ។ រដ្ឋាភិបាល​ហុងកុង​បានសម្តែង​ការ​ខឹង​សម្បារ​យ៉ាង​ខ្លាំង និងបាន​បរិហារថា​អាមេរិក​កំពុង​ប្រើវិធានការបង្ខំ​ដែលជាការ​ប៉ុនប៉ង​​ជា​លើក​ចុងក្រោយ​ លូក​ដៃ​ចូលក្នុង​កិច្ចការ​ផ្ទៃ​ក្នុង​របស់​ចិន។

សូម​បញ្ជាក់​ថា​ ទណ្ឌកម្មរបស់​អាមេរិកនេះ​ ជា​ចម្លើយ​តប​ទៅ​នឹង​យុទ្ធនាការ​ចាប់​ខ្លួនសកម្មជន​ប្រជាធិបតេយ្យ​ និង​អតីត​អ្នកតំណាងរាស្ត្រ​ហុងកុង ជាង​៥០​នាក់ ក្នុង​នោះ​មានម្នាក់​ជាមេធាវី​ជាតិ​​អាមេរិកផង កាលពី​ថ្ងៃ​ទី ៦ មករា ២០២១ ស្រប​តាម​ច្បាប់​សន្តិសុខ​ជាតិ​ហុងកុងថ្មី។ ​ក្រោយប្រតិបត្តិការចាប់​ខ្លួន​ មាន​​សកម្មជន​ប្រជាធិបតេយ្យ​៥​នាក់​រត់​គេច​ខ្លួនរួច​ទៅ​ដល់​​សហសរដ្ឋអាមេរិក នៅ​សប្តាហ៍​នេះ និង​បានសុំសិទ្ធិ​ជ្រកកោន​នយោបាយ​នៅ​ទីនោះ។

ច្បាប់​សន្តិសុខ​ជាតិហុងកុង​ ដែល​តាក់តែង​ឡើង​ដោយ​ប៉េកាំង ត្រូវ​បាន​ក្រុម​បស្ចិមលោក​ចាត់ទុក​បញ្ចប់​ស្វយ័ភាព​ហុងកុង និងបាន​ធ្វើ​ឱ្យ​សម្ពាធ​តានតឹង​ស្រាប់​រវាង​អាមេរិក​និង​ចិន ធ្លាក់​ដុនដាប​កាន់​តែខ្លាំង៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI