សហរដ្ឋអាមេរិក

​លោកដូណាល់ ត្រាំ គ្រោង​​​លើកលែង​ទោស​មនុស្ស​​ចំនួន​​ជាង​​១០០នាក់ មុននឹង​ចាកចេញ​​ពី​​សេតវិមាន

លោកដូណាល់ ត្រាំ និង​លោក មៃឃ៍ ភែនស៍ នៅសេតវិមាន ខែកក្កដា ឆ្នាំ២០១៧។
លោកដូណាល់ ត្រាំ និង​លោក មៃឃ៍ ភែនស៍ នៅសេតវិមាន ខែកក្កដា ឆ្នាំ២០១៧។ REUTERS - Carlos Barria
ដោយ៖ ម៉ម ពិសី
១៦ នាទី

នៅសល់តែមួយថ្ងៃទៀតប៉ុណ្ណោះ លោក​ដូណាល់ ត្រាំ នឹងត្រូវ​បញ្ចប់អាណត្តិប្រធានាធិបតី ហើយចាកចេញ​ពីសេតវិមាន។ យោងតាម​បណ្តាញ​ព័ត៌មាន​ធំនៅសហរដ្ឋអាមេរិក បានចុះផ្សាយ​ថា លោកដូណាល់ ត្រាំ មានគម្រោង​ចេញលិខិត​ប្រកាសលើកលែងទោស មនុស្ស​ប្រមាណ​ជាង​១០០នាក់ មុននឹង​អស់អំណាចជាប្រធានាធិបតី។ ក្នុងចំណោម​មនុស្សដែលលោកដូណាល់ ត្រាំ គ្រោង​នឹងលើកលែងទោស គឺអាចមាន សមាជិក​ក្រុមគ្រួសារ និង​​មិត្តភ័ក្តរបស់លោក ព្រមទាំង​ អ្នកគាំទ្រលោកផង​ដែរ​។

ផ្សាយពាណិជ្ជកម្ម

មុននឹងចាកចេញពីសេតវិមាន លោកដូណាល់ ត្រាំ មានគំរោង​លើកលែងទោស មនុស្ស​ជាច្រើននាក់ ដែលត្រូវ​បាន​តុលាការចោទប្រកាន់ ឬសម្រេច​​ផ្តន្ទាទោស។ ពាក្យ​ចចាមអារ៉ាម កាលពី​ប៉ុន្មាន​សប្តាហ៍មុន បាន​លើកឡើងថា លោកដូណាល់ ត្រាំ ប្រហែលជាចង់លើកលែងទោស ឲ្យខ្លួនឯងផ្ទាល់ និងចំពោះ​សមាជិក​គ្រួសារខ្លួនថែមទៀតផង។ លោកស្រី Nancy Pelosi បានថ្លែងបារម្ភថា លោកត្រាំ អាចនឹងលើកលែងទោស ឲ្យ​ក្រុម​មនុស្ស​ដែលជាប់ចោទ ក្នុងសំណុំរឿងហិង្សាសម្រុកចូលក្នុង​វិមានកាពីតូល។ នៅលើកញ្ចក់ទូរទស្សន៍ Fox News លោក Lindsey Graham សមាជិក​ព្រឹទ្ធសភា ​និងជាអ្នកជិតដិតនឹងលោកត្រាំ បានអះអាងថា បើ​លោកត្រាំធ្វើបែបនោះមែន​ គឺវាជារឿងមិនល្អទេ។

យ៉ាងណាក៏ដោយ យោងតាមការចុះផ្សាយ​របស់​បណ្តាញ​ព័ត៌មានអាេមរិក នៅថ្ងៃចន្ទទី​១៨មករា ដោយ​ស្រង់ប្រភព​ពីមនុស្ស​២នាក់ ដែល​ស្និទ្ធ​នឹងសេតវិមាន បាន​ឲ្យ​ដឹងក្រុម​អ្នកទីប្រឹក្សា​លោកដូណាល់ ត្រាំ ជាច្រើននាក់ បាន​និយាយពន្យល់ កុំឲ្យ​លោកដូណាល់ ត្រាំ លើកលែងទោសឲ្យ​ខ្លួន​ឯង និងសមាជិក​គ្រួសាររបស់​លោកឲ្យសោះ ព្រោះជារឿងមិនសមរម្យ និងអាចចោទជាចំណោទគតិយុត្តិ​។ ប្រភពខាងលើ​បញ្ជាក់ថា លោក Rudy Giuliani ដែលជាមេធាវី​ផ្ទាល់ខ្លួន របស់​លោក​ដូណាល់ត្រាំ និង​លោក Steve Bannon ដែលជាមិត្តនិងជាអតីត​ទីប្រឹក្សាពិសេសរបស់​លោកត្រាំ មិនមានឈ្មោះ​នៅក្នុង​ចំណោម​អ្នក​ដែល​លោកត្រាំ គ្រោង​លើកលែងទោសទេ។

ប្រភពដដែលអះអាងថា ក្នុងចំណោមមនុស្ស​ជាង​១០០នាក់ ដែល​លោកដូណាល់ ត្រាំ គ្រោង​នឹង​លើកលែងទោសនោះ គឺអាចមាន​អ្នកចំរៀងរែបម្នាក់ ឈ្មោះ Lil Wayne ដែលកំពុងប្រឈមទោស​ជាប់ពន្ធនាគារ១០ឆ្នាំ ពីបទប្រើប្រាស់អាវុធខុសច្បាប់។ អ្នកចំរៀងស្បែកខ្មៅ​រូបនេះ ធ្លាប់ត្រូវបាន​គេ​ស្គាល់ថាជាអ្នកគាំទ្រលោកដូណាល់ ត្រាំ កាលពីអំឡុងពេល​បោះឆ្នោត​ឆ្នាំ​២០១៦។ ចំណែកប្រភព​​ខ្លះទៀត លើកឡើងថា លោក Julian Assange ស្ថាបនិក Wikileaks ក៏​ប្រហែលជាមាន​ឈ្មោះ​ក្នុង​នោះ​ដែរ។

​កាសែត​ New York Times ចុះផ្សាយ​ថា លោកដូណាល់​ ត្រាំនឹង​លើកលែង​ទោស​​​ឲ្យ​លោក Sheldon Silver អតីតប្រធានសភាជាន់ទាបនៅរដ្ឋញូយ៉ក ដែលត្រូវ​បាន​ផ្តន្ទាទោស​ពីបទពុក​រលួយ​ កាលពីឆ្នាំ​២០១៥។ មានអាយុ​៧៦ឆ្នាំ លោកម្នាក់នេះ​គឺជាមិត្តស្និទ្ធស្នាល នឹងលោក​ដូណាល់ ត្រាំ។

គួររំលឹកថា ប៉ុន្មានខែចុងក្រោយ​នេះ លោក​ដូណាល់ ត្រាំ បាន​ចេញលិខិតលើកលែងទោសមនុស្ស​ជាច្រើននាក់ ដែលសុទ្ធតែ​ជាមិត្តភ័ក្ត អ្នកគាំទ្រ ឬអ្នកធ្លាប់ធ្វើការឲ្យ​លោក។ ជាក់ស្តែង កាលពី​ខែ​វិច្ឆិកា លោកត្រាំ បានលើកលែងទោស​ឲ្យ​លោក Michael Flynn អតីតទីប្រឹក្សាផ្នែកសន​្តិសុខផ្ទៃក្នុង ដែល​ជាប់ទោសពីបទកុហក FBI ក្នុងសំណុំរឿងរុស្ស៊ី​លូកដៃក្នុងការបោះឆ្នោត​ឆ្នាំ​២០១៦៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI