សហរដ្ឋ​អាមេរិក

លោកដូណាល់ត្រាំ ប្រារព្វ​ពិធី​លា​តំណែង ​និង​ជូន​ពរ​រដ្ឋាភិបាល​ថ្មី​​ តាម​សារ​វីដេអូ

លោកដូណាល់ត្រាំ ជូនពរ​រដ្ឋាភិបាល​ថ្មី​ មាន​សំណាង​ល្អ និង​ជោគជ័យ​
លោកដូណាល់ត្រាំ ជូនពរ​រដ្ឋាភិបាល​ថ្មី​ មាន​សំណាង​ល្អ និង​ជោគជ័យ​ REUTERS - CARLOS BARRIA
ដោយ៖ អៀង សុខម៉ិញ
១៦ នាទី

លោក ដូណាល់ ត្រាំ ប្រធានាធិបតី​ទី​៤៥​របស់សហរដ្ឋអាមេរិក​ត្រូវបញ្ចប់​អាណត្តិ​ នៅ​ថ្ងៃ​ពុធ​ទី ២០មករា ២០២១ ត្រឹម​វេលា​ម៉ោង​១២​ថ្ងៃ​ត្រង់​ម៉ោង​នៅអាមេរិក។ ពិធី​លា​ចេញ​ពីតំណែង​បាន​ប្រព្រឹត្ត​ទៅ​យ៉ាង​អធិកអធម ហើយ​នៅក្នុង​សារ​លា លោក​ដូណាល់​ ត្រាំ បាន​ជូនពរ​រដ្ឋាភិបាល​ថ្មី​​ ឱ្យ​សម្រេច “ជោគជ័យ ក្នុង​ការ​រក្សា​សន្តិសុខ​ និង​ ភាព​រុងរឿង​របស់​អាមេរិក”។

ផ្សាយពាណិជ្ជកម្ម

ពិធី​បញ្ចប់​តំណែង​បាន​ប្រារព្ធ​ធ្វើ​នៅ​មូលដ្ឋានទ័ព Andrews ក្នុង​រដ្ឋ Maryland ដែលក៏​​ជា​កន្លែងចុះ​ចតយន្តហោះ Air Force One។ យន្តហោះ​ប្រធានាធិបតី​ដែល​លោក​ដូណាល់ត្រាំ ជិះ​ជា​លើក​ចុងក្រោយ​ (មុន​នឹង​​អស់​សិទ្ធិ​នៅ​​វេលា​ម៉ោង ១២​ថ្ងៃ​ត្រង់) សំដៅ​ទៅលំនៅដ្ឋាន​របស់​លោកនៅ​ Floride។ លោកប្រធានាធិបតី​ផុត​អាណត្តិ​ត្រូវ​ចាកចេញពីសេតវិមាន​នៅ​ព្រឹក​ថ្ងៃ​ពុធ​ទី ២០​មករា​នេះ ដោយ​មិន​នៅជួប​ធ្វើ​គារកិច្ច និង​​ចូល​រួម​ក្នុងកម្មវិធី​​ស្បថ​ចូល​កាន់​តំណែងរបស់ប្រធានាធិបតីថ្មី លោក​ ចូ បៃដិន ដូច​ទម្លាប់​អាមេរិក​តាំង​ពី​១៥០ឆ្នាំ​​មក​ទេ។

​ប៉ុន្តែ​នៅ​ក្នុងសារ​លា ជា​ផ្លូវការ លោក ដូណាល់ត្រាំ បាន​ជូន​ពរនិង​បន់ស្រន់ ឱ្យ​​រដ្ឋាភិបាល​ថ្មី​​ជួប​តែ​នឹងសំណាង​ល្អ មាន​ជោគជ័យ​ក្នុង​ការ​ធានា​​សន្តិសុខ​និង​ភាព​រុងរឿងជូន​​សហរដ្ឋ​អាមេរិក។ សារ​​វីដេអូ ថត​ទុក​មុន ផ្ញើ​ជូន​ពលរដ្ឋ​​ មានទម្រង់​ជា​សុន្ទរកថា​ទៅ​កាន់​ប្រជា​ជាតិ សក្តិសម​ជា​ប្រធានាធិបតី​អាមេរិក​ណាស់ ​​ប៉ុន្តែ​ជា​ថ្មីម្តង​ទៀត លោក ដូណាល់ ត្រាំ ​នៅ​តែមិនអបអរ​ជោគជ័យរបស់​​​ប្រធានាធិបតី​ជាប់​ឆ្នោត​ថ្មី និង​​មិន​បញ្ចេញ​ឈ្មោះ​លោក ចូ បៃដិន សោះ។

ដោយ​​សាកល្បង​បង្ហាញ​តុល្យការ​ការងារ​បួន​ឆ្នាំ លោកប្រធានាធិបតី​ផុត​អាណត្តិ​បាន​លើក​សរសើរ​ស្នាដៃ​ខ្លួន​ឯង ថា​ជាលោក​បានធ្វើ​សេចក្តី​សម្រេច​ចិត្ត​លំបាកៗ ​ប្រឈម​នឹង​សំណុំ​រឿង​ស្មុគស្មាញ​ខ្លាំង និង​បាន​នាំ​ពិភពលោក​ឱ្យតតាំង​នឹង​មហិច្ឆតា​ចិន​ជាង​ពេលណាៗ​ទាំង​អស់ ជា​ពិសេស​លោក​គឺ​ជា​​ប្រធានាធិបតី​អាមេរិក​ដំបូង​គេ ដែល​មិន​បង្ក​សង្គ្រាមប្រដាប់​អាវុធ​​ថ្មី។ ចំពោះ​ព្រឹត្តិការណ៍​ថ្ងៃទី ៦ មករា នៅ​វិមាន​រដ្ឋ​សភា​វិញ លោក​ដូណាល់ ត្រាំ បាន​អំពាវនាវ​ឱ្យ​ពលរដ្ឋ​អាមេរិក​រួបរួម​គ្នា​ការពារ​លទ្ធិប្រជាធិបតេយ្យ​ ដោយ​មិន​អនុគ្រោះ​ដល់​អំពើ​ហិង្សា​ទេ។

នៅ​ក្នុង​សុន្ទរកថា​លា លោក ដូណាល់​ត្រាំ ក៏​បាន​លើក​ឡើង​អំពី​ជំងឺ​រាតត្បាត​កូវីដ១៩ ថា​រដ្ឋបាល​លោក បាន​សម្រេច​ឱ្យ​មាន​ថ្នាំបង្ការ​​ក្នុង​រយៈពេល​តែ​៩​ខែ តែបើ​ជា​​រដ្ឋបាលផ្សេង​វិញ​ប្រហែល​ត្រូវ​ប្រើ​ពេល​យូរ ពីរបី​ឆ្នាំ​ឬ​រហូត​ដល់​១០​ផង។

មិន​ចាំ​ជួប​ប្រធានាធិបតី​ថ្មី​ហើយ សារ​​លារបស់​ប្រធានាធិបតី​ផុតអាណត្តិ​ ត្រូវ​បាន​​បង្ហោះផ្សាយ​នៅ​រសៀល​ថ្ងៃ​អង្គារ​ទី ១៩​មករា ម្សិលមិញ ចំពេល​ដែល​ប្រធានាធិបតី​ជាប់​ឆ្នោត​ថ្មី​ ចូ បៃដិន ​មក​ដល់ក្រុង​វ៉ាស៊ីនតោន​ ​តាម​យន្តហោះ​ឯកជន​​ (មិនមែន​យន្តហោះ​ប្រធានាធិបតី​ ដូច​អ្វី​ដែល​លោក​បារ៉ាក់អូបាម៉ា ធ្លាប់​​បាន​ទទួល​ស្វាគមន៍លោកកាលពី​បួន​ឆ្នាំមុន​ទេ) ដើម្បី​ត្រៀម​លក្ខណៈ​ចូល​កាន់​តំណែង​។ ប្រធានាធិបតី​-អនុប្រធានាធិបតី​ថ្មី ដែល​គ្រាន់​មក​ដល់រដ្ឋធានីភ្លាម​បាន​អញ្ជើញទៅ​គោរព​វិញ្ញាណក្ខន្ធ​ជន​រងគ្រោះ​បាត់​បង់​ជីវិត​ដោយ​កូវីដ​១៩ ដែល​បាន​ឡើង​ដល់​៤សែន​នាក់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI