សហរដ្ឋ​អាមេរិក

សហរដ្ឋ​អាមេរិក ៖ រដ្ឋបាល​បៃដិន មានបទ​ពិសោធន៍​ ចម្រុះ​ពណ៌និង​មានសមភាព

ពីលើទៅក្រោម ពីឆ្វេងទៅ​ស្តាំ ៖ លោកស្រី​ Linda Thomas-Greenfield,លោកស្រី Janet Yellen ,លោកស្រី Avril Haines, លោកAlejandro Mayorkas, លោកAntony Blinken, និង​លោក John Kerry
ពីលើទៅក្រោម ពីឆ្វេងទៅ​ស្តាំ ៖ លោកស្រី​ Linda Thomas-Greenfield,លោកស្រី Janet Yellen ,លោកស្រី Avril Haines, លោកAlejandro Mayorkas, លោកAntony Blinken, និង​លោក John Kerry AFP - THOS ROBINSON,DANIEL ROLAND,WIN MCNAMEE,BRAD BARKET,STEPHANE DE SAKUTIN,BERTRAND GUAY
ដោយ៖ អៀង សុខម៉ិញ
១៤ នាទី

ក្លាយ​ជា​ប្រធានាធិបតី​អាមេរិកថ្មី និងចូលកាន់​តំណែង​ជា​ផ្លូវការ​នៅ​ថ្ងៃទី​២០​មករា ២០២១​នេះ លោក ចូ បៃដិន បាន​សន្យាចាប់​ផ្តើមការងារ​ភ្លាម​ ដោយ​មាន​អាទិភាព​ដំបូង​គេ​គឺ​ការ​ប្រយុទ្ធ​ប្រឆាំង​នឹង​ជំងឺ​កូវីដ​១៩ និង​ផ្តល់​សន្ទុះដល់​សេដ្ឋកិច្ច។ ដើម្បី​អាច​សម្រេច​កម្មវត្ថុ​នេះ​បាន លោក​បាន​បង្កើត​រដ្ឋាភិបាល​ ដែល​ផ្តុំ​ទៅ​ដោយ​ឥស្សរជន​មាន​បទពិសោធន៍​ខ្ពស់ស្រាប់​ផង មាន​សមាសភាព​ចម្រុះ​ពណ៌សម្បុរ​ជាតិ​សាសន៍ផង និង​មាន​សមភាព​រវាង​ស្ត្រី​និង​បុរស​ទៀត។

ផ្សាយពាណិជ្ជកម្ម

ក្រៅ​អំពី​ ​លោក​ស្រី កាម៉ាឡា ហារី ​Kamala Harris ​​អនុប្រធានាធិបតី​​សហរដ្ឋ​អាមេរិក​​ដំបូង គេ​បង្អស់​ដែល​មាន​ភេទស្រី ស្បែក​ខ្មៅកាត់​លឿង សមាសភាព​រដ្ឋាភិបាល​របស់ ​​លោក ចូ បៃដិន មាន​​ស្ត្រី​ ជា​ច្រើនរូប​​ផ្សេង​។ ក្នុង​ចំណោម​សមាសភាព​រដ្ឋាភិបាល២៤រូប ដែល​កំពុង​រង់ចាំ​ការ​អនុម័តផ្តល់​ទំនុក​ចិត្ត​​ពី​ព្រឹទ្ធសភា ​​ពាក់​កណ្តាល​ជា​ស្ត្រី។

តួនាទី​ដឹកនាំ​សំខាន់​ៗ​លើ​ផ្នែក​សេដ្ឋកិច្ច ត្រូវ​ប្រគល់​ទៅ​​ស្ត្រី​ស្ទើរ​ទាំង​អស់ ៖ លោកស្រី ចានែត យេលែន Janet Yellen អាយុ​៧៤​ឆ្នាំ ជា​រដ្ឋមន្ត្រី​ក្រសួង​ហិរញ្ញវត្ថុ។ លោកស្រី​មាន​បទ​ពិសោធន៍​ការងារ​ខ្ពស់​ព្រោះ​ធ្លាប់​ជា​អតីត​ប្រធាន​ធនាគារកណ្តាល​អាមេរិក ត្រូវបាន​ទទួល​ទំនុក​ចិត្ត​ពី​លោក ចូបៃដិន ក្នុង​ការ​លើក​ស្ទួយ​សេដ្ឋកិច្ច​ជាតិ​ដែល​កំពុង​ធ្លាក់​ដុនដាប​ខ្លាំង​មិនធ្លាប់​មាន​គិត​ចាប់​តាំង​ពី​ឆ្នាំ​១៩៣០មក។ ក្រសួង​ពាណិជ្ជកម្ម​ត្រូវ​ប្រគល់​ទៅ​ឱ្យ​លោកស្រី ជីណា រេម៉ុនដូ Gina Remondo និងលោកស្រី Isabel Guzman ទទួល​បន្ទុកគ្រប់គ្រង​​ក្រុមហ៊ុន​ខ្នាត​តូច ។

ជា​និម្មិត្ត​ខ្លាំងមួយ​ទៀត គឺ​ការ​ជ្រើសរើស​តែង​តាំង​លោកស្រី​ ដិប ហាលែនដ៍ Deb Haalandអាយុ​៦០​ឆ្នាំ ជា​រដ្ឋមន្ត្រី​ក្រសួង​មហាផ្ទៃ។ លោកស្រីជា​ជនជាតិ​ដើមអាមេរិក​ស្បែកក្រហម​ ​ដំបូង​គេ​ដែល​បាន​ឡើង​កាន់​តំណែង​ក្នុង​រដ្ឋាភិបាល។ កន្លង​មក​លោកស្រី​ ​ជា​តំណាង​ម៉ិចស៊ិក​នៅ​ក្នុង​ព្រឹទ្ធសភា​។ នាយិកា​ផ្នែកចារកិច្ច​ក៏​ជា​ស្ត្រី គឺ​លោកស្រី​ អាវ្រីល ហេនស៍ Avril Haines អតីត​អនុប្រធាន​ភ្នាក់ងារ​ចារកិច្ច CIA និង​ជា​អតីតអនុប្រធាន​ក្រុម​ប្រឹក្សា​សន្តិសុខ​ជាតិ​សម័យ​លោកអូបាម៉ា។

ជា​ចុងក្រោយ​ លោកប្រធានាធិបតី​ចូ បៃដិន បាន​ជ្រើសរើស​តាំង​លោកស្រី លីនដា ថូម៉ាស់គ្រីនហ្វៀលដ៍ ​ដើម​កំណើត​អាហ្វ្រិក​ ដែល​មាន​បទ​ពិសោធន៍​ការទូត​ជា​ច្រើន​ឆ្នាំ​មក​ហើយ ជា​ឯកអគ្គរដ្ឋ​ទូត​អាមេរិក​ប្រចាំ​អង្គការ​សហប្រជាជាតិ។

ក្រៅអំពី​សមភាព​ស្ត្រីនិង​បុរស រដ្ឋមន្ត្រី​ក្នុង​ជួរ​រដ្ឋាភិបាល​ថ្មី​របស់​លោកចូ​ បៃដិន សុទ្ធ​សឹង​ជា​ឥស្សរជន​ដែល​មាន​បទ​ពិសោធន៍ និង​ធ្លាប់​កាន់តួនាទី​ដឹកនាំរដ្ឋាភិបាល​កន្លង​មក មាន​ជា​អាទិ៍ លោក ចន ឃែរី ឬ​លោក​ អង់តូនី ប្ល៊ីងកិន (Antony Blinken) រដ្ឋមន្ត្រី​ក្រសួង​ការបរទេស​ជា​ដើម។ល។

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI