សហរដ្ឋអាមេរិក-នយោបាយ

ក្នុងពិធីស្បថចូលកាន់តំណែងជាប្រធានាធិបតី លោក ចូ បៃដិន ប្ដេជ្ញាបង្រួបបង្រួមសហរដ្ឋអាមេរិកឡើងវិញ

ប្រធានាធិបតីចូបៃដិនថ្លែងទៅកាន់ប្រជាជាតិនៅឯវិមានអនុស្សាវរីយ៍លីនខុននៅទីក្រុងវ៉ាស៊ីនតោន ថ្ងៃពុធ ទី២០ ខែមករា ឆ្នាំ២០២១ បន្ទាប់ពីការចូលកាន់តំណែងរបស់លោក។
ប្រធានាធិបតីចូបៃដិនថ្លែងទៅកាន់ប្រជាជាតិនៅឯវិមានអនុស្សាវរីយ៍លីនខុននៅទីក្រុងវ៉ាស៊ីនតោន ថ្ងៃពុធ ទី២០ ខែមករា ឆ្នាំ២០២១ បន្ទាប់ពីការចូលកាន់តំណែងរបស់លោក។ AP - Joshua Roberts
ដោយ៖ អ៊ឹម រចនា
១៦ នាទី

លោក ចូ បៃដិន បាន​ក្លាយ​ជា​ប្រធានាធិបតី​អាមេរិក​ទី​៤៦​ជា​ផ្លូវ​ការ​ហើយ បន្ទាប់ពី​បាន​ស្បថ​ចូល​កាន់​តំណែង​នៅ​ថ្ងៃ​ពុធ​ទី​២០​​មករា​ម្សិលមិញ​។ នៅ​ក្នុង​សុន្ទរកថា​ដំបូង​ក្នុង​នាម​ជា​ប្រធានាធិបតី​អាមេរិក លោក​ ចូ បៃដិន បានប្ដេជ្ញា​បង្រួប​បង្រួមប្រជាជន​និង​ប្រជាជាតិ​​អាមេរិក​ដែល​ប្រេះ​ឆា​ឡើង​វិញ​។ សម្រាប់​លោក ចូ បៃដិន ឯកភាព​ជាតិ​គឺ​ជា​មាគ៌ា​ឆ្ពោះ​ទៅ​មុខ ដើម្បី​ជំនះ​នូវ​​​បញ្ហា​ប្រឈម​និង​វិបត្តិ​ទាំង​ឡាយ​ដែល​នៅ​ចំពោះ​មុខ​សហរដ្ឋ​អាមេរិក​។

ផ្សាយពាណិជ្ជកម្ម

ពិធី​ស្បថ​ចូល​កាន់​តំណែង​របស់​លោក ចូ បៃដិន បាន​ប្រព្រឹត្ត​ទៅ​តាម​ការ​គ្រោង​ទុក នៅ​ថ្ងៃ​ពុធ​ទី​២០​មករា នៅ​រាន​ហាល​នៃ​​វិមាន​កាពីតូល កណ្ដាល​ក្រុង​វ៉ាស៊ីនតោន​។ ក្រោម​វត្តមាន​ភ្ញៀវ​កិត្តិយស​ដែល​ជា​មន្ដ្រី​ជាន់​ខ្ពស់ និង​សមាជិក​សភា​នៃ​សហរដ្ឋ​អាមេរិក លោក ចូ បៃដិន បាន​ធ្វើ​សច្ចាប្រណិធាន​នៅ​ចំពោះ​មុខ​ប្រធាន​តុលាការ​កំពូល​ថា នឹង​គោរព​តាម​រដ្ឋធម្មនុញ្ញ​នៃ​សហរដ្ឋ​អាមេរិក ព្រម​ទាំង​ប្ដេជ្ញា​ការពារ​សហរដ្ឋ​អាមេរិក​ពី​សត្រូវ​ទាំង​ក្នុង​និង​ក្រៅប្រទេស​។

ក្រោយ​បញ្ចប់​ការ​ធ្វើ​សច្ចាប្រណិធាន ប្រធានាធិបតី​ទី​៤៦​របស់​អាមេរិក លោក ចូ បៃដិន បាន​ថ្លែង​សុន្ទរកថា​ដំបូង​របស់​ខ្លួន ដោយ​សង្កត់​ធ្ងន់​អំពី​លទ្ធិ​ប្រជាធិបតេយ្យ​។ លោក​ថា លទ្ធិ​ប្រជាធិបតេយ្យ​មាន​តម្លៃ ប៉ុន្តែ​លទ្ធិ​ប្រជាធិបតេយ្យ​ក៏​មាន​ភាព​ផុយស្រួយ​ផង​ដែរ​។ យ៉ាង​ណា​ក៏​ដោយ នៅវេលា​​នេះ លទ្ធិ​ប្រជាធិបតេយ្យ​ទទួល​បាន​ជ័យ​ជំនះ​ហើយ​។ លោក ចូ បៃដិន ចាត់​ទុក​ថ្ងៃ​ឡើង​កាន់​តំណែង​ជា​ប្រធានាធិបតី ថ្ងៃ​ទី​២០​មករា ថា​ជា​ថ្ងៃ​នៃ​លទ្ធិ​ប្រជាធិបតេយ្យ​ ជា​ថ្ងៃ​ប្រវត្តិសាស្ត្រ​និង​ក្ដី​សង្ឃឹម។ ​លោកបាន​ប្ដេជ្ញា​បង្រួប​បង្រួមប្រជាជន​និង​ប្រជាជាតិ​​អាមេរិក​ដែល​ប្រេះ​ឆា​ឡើង​វិញ​ ព្រោះ​សម្រាប់​លោក ចូ បៃដិន ឯកភាព​ជាតិ​គឺ​ជា​មាគ៌ា​ឆ្ពោះ​ទៅ​មុខ ដើម្បី​ជំនះ​នូវ​​​បញ្ហា​ប្រឈម​និង​វិបត្តិ​ទាំង​ឡាយ​ដែល​នៅ​ចំពោះ​មុខ​សហរដ្ឋ​អាមេរិក​។

ជា​ការ​កត់​សម្គាល់ ពិធី​ស្បថ​ចូល​កាន់​តំណែង​របស់​លោក ចូ បៃដិន នា​ថ្ងៃ​ទី​២០​មករា​ ដ្បិត​តែ​មិន​មាន​ការ​ចូល​រួម​ពី​លោក​ប្រធានាធិបតី​ផុត​អាណត្តិ ដូណាល់ ត្រាំ ក៏​ពិត​មែន ប៉ុន្តែ​គេ​សង្កេត​ឃើញ​មាន​វត្តមាន​អតីត​ប្រធានាធិបតី​សហរដ្ឋ​អាមេរិក​ចំនួន​៣​រូប​ចូល​រួម គឺ​លោក Barack Obama លោក George W. Bush និង​លោក Bill Clinton។ យ៉ាង​ណា​ក៏​ដោយ លោក បៃដិន បាន​បង្ហើប​ឲ្យ​ដឹង​ថា លោក ដូណាល់ ត្រាំ បាន​បន្សល់​ទុក​នូវ​លិខិត​មួយ​ច្បាប់​ជូន​រូប​លោក​​នៅ​​ឯ​សេតវិមាន​។

គួរ​ជម្រាប​​ដែរ​ថា ភ្លាមៗ​ក្រោយ​ពិធី​ស្បថ​ចូល​កាន់​តំណែង​បិទ​បញ្ចប់ លោក ចូ បៃដិន បាន​ចាប់​ផ្ដើម​ធ្វើការ​ភ្លាម​ៗ ដោយ​ចុះ​ហត្ថលេខា​លើ​ក្រឹត្យ​ច្បាប់និង​បទ​បញ្ជាក្នុង​សំណុំ​រឿង​​​សំខាន់​ៗ​ជា​ច្រើន ក្នុង​នោះ​រួម​មាន​ការ​នាំ​សហរដ្ឋ​អាមេរិក​ត្រឡប់​ចូល​រួម​ក្នុង​កិច្ច​ព្រមព្រៀង​ទីក្រុង​ប៉ារីស​ស្ដី​ពីអាកាសធាតុ​ បញ្ហា​អន្តោប្រវេសន៍ និង​បញ្ហា​ជំងឺ​ឆ្លង​កូវីដ​១៩​ជា​ដើម​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI