យន្តការកូវ៉ាក់របស់​អង្គការ​សុខភាពពិភពលោក

យន្តការ​Covax របស់WHOនៅតែគ្មាន​វ៉ាក់សាំងសូម្បីមួយដូស​សម្រាប់​ចែកទៅប្រទេស​ក្រីក្រ

វេជ្ជបណ្ឌិត Dr. Anthony Fauci ប្រធាន​ក្រុមប្រឹក្សា​សុខាភិបាល​របស់​ប្រធានាធិបតី ចូបៃដិន​ ចូលរួម​ក្នុង​ កិច្ចប្រជុំ​របស់ក្រុមប្រឹក្សាភិបាល​របស់​អង្គការ​សុខភាព​ពិភពលោក បន្ទាប់​ពីអាមេរិក​ប្រកាស​ត្រលប់​មកចូល​ជាសមាជិក​សាជាថ្មី នៅ​ថ្ងៃ​ព្រហស្បតិ៍ទី ២១ មករា ២០២១
វេជ្ជបណ្ឌិត Dr. Anthony Fauci ប្រធាន​ក្រុមប្រឹក្សា​សុខាភិបាល​របស់​ប្រធានាធិបតី ចូបៃដិន​ ចូលរួម​ក្នុង​ កិច្ចប្រជុំ​របស់ក្រុមប្រឹក្សាភិបាល​របស់​អង្គការ​សុខភាព​ពិភពលោក បន្ទាប់​ពីអាមេរិក​ប្រកាស​ត្រលប់​មកចូល​ជាសមាជិក​សាជាថ្មី នៅ​ថ្ងៃ​ព្រហស្បតិ៍ទី ២១ មករា ២០២១ via REUTERS - Christopher Black/WHO
ដោយ៖ ឈាង បុប្ផា
២១ នាទី

អាមេរិក​ក្រោមអាណត្តិ​ដឹកនាំ​របស់​លោក​ប្រធានាធិបតី​ចូ បៃដិន បាន​ត្រលប់​មក​ចូលរួម​សាជាថ្មី ជាមួយ អង្គការ​សុខភាព​ពិភពលោក បន្ទាប់ពី​ដកខ្លួន ក្រោមអំណាច​របស់​រដ្ឋបាល​ចាស់ របស់​លោក​ដូណាល់ ត្រាំ។ ការវិលត្រលប់​របស់​អាមេរិក មាន​ន័យ​ពិសេស នាំយក​ហិរញ្ញវត្ថុ​សម្រាប់​ស្ថាប័ន​សុខភាព​របស់​អង្គការ​សហប្រជាជាតិ។ ថ្វីបើ​មាន​កម្លាំង​ជំរុញ​ពីអាមេរិក ប៉ុន្តែ អង្គការ​សុខភាព ពិភពលោក​នៅតែ​ប្រឈម​នឹង​ឧបសគ្គ​រាប់ជំពូក នៅក្នុង​បេសកកម្ម​ចែកចាយ​វ៉ាក់សាំង បង្ការ​កូវីដ ១៩ នៅទូទាំង​ពិភពលោក តាមរយៈ យន្តការ​Covax។ 

ផ្សាយពាណិជ្ជកម្ម

នៅមួយថ្ងៃ​ក្រោយ លោក​ចូ បៃដិន ស្បថចូលកាន់តំណែង​ជា​ប្រធានាធិបតី អាមេរិក លោក​Anthony Fauci ប្រធាន​ក្រុមប្រឹក្សា​សុខភាព​របស់ប្រធានាធិបតី បាន​ជូនដំណឹង​ភ្លាម ទៅ​អគ្គនាយក​របស់​អង្គការ​សុខភាពពិភពលោក​ថា អាមេរិក​វិលត្រលប់ មក​ចូល​ជា​សមាជិក សាជាថ្មី។ នេះជា​ដំណឹង​ល្អ​បំផុត​សម្រាប់​អង្គការសុខភាព​ពិភពលោក ទាំង​ខាងផ្នែក​ហិរញ្ញវត្ថុ ហើយនិង​មុខមាត់ បន្ទាប់ពីត្រូវ​លោកដូណាល់ ត្រាំ ប្រមាថមើលងាយ ជិត​១ឆ្នាំ​មកនេះ។

អាមេរិក​ត្រលប់​មកចូលជា​សមាជិក ឡើងវិញ នឹង​ធ្វើ​ឲ្យ​អង្គការ​សុខភាព​ពិភពលោក លែង​សូវ​បារម្ភ​ពី​ការខ្វះថវិកា ដូចមុន ប៉ុន្តែ វា​នៅតែ​មិនទាន់​ជួយ​ដោះស្រាយបញ្ហា ធំចំបង ដែល​អង្គការ​សុខភាព​ពិភពលោក​កំពុង​ជួប​ប្រឈម​នោះទេ។

នយោបាយជាតិ​និយម ដូចជា ការសម្រុកទិញ​វ៉ាក់សាំង​របស់​ក្រុមប្រទេស​អ្នកមាន សម្រាប់​ចាក់​ឲ្យតែ​ប្រជាជន​របស់ខ្លួន ហើយនិង​ដំណើរការ​យឺតយ៉ាវរបស់​ក្រុមហ៊ុន​ផលិត​វ៉ាក់សាំង បានធ្វើ​ឲ្យ​យន្តការ Covax របស់​អង្គការ​សុខភាព​ពិភពលោក នៅជាប់គាំង​មិន​ដំណើរការ។

នៅ​ចុងឆ្នាំមុន អគ្គនាយក​របស់​អង្គការ​សុខភាព​ពិភពលោក​ធ្លាប់​បាន​អះអាងថា យន្តការ​Covax ដែល​បង្កើតឡើង​នៅ រដូវក្តៅ ឆ្នាំមុន សម្រាប់​ការទទួល​បាន​វ៉ាក់សាំង ស្មើភាពគ្នា នៅក្នុង​ពិភពលោក មាន​គោលដៅ ចែកចាយ​វ៉ាក់សាំងបង្ការកូវីដ  សម្រាប់​បណ្តាប្រទេស​ក្រីក្រ ចាប់ពីខែ មករា​នេះតទៅ។ ប៉ុន្តែ រហូតមកដល់​ថ្ងៃ​នេះ យន្តការ​Covax គ្មាន​វ៉ាក់សាំង សូម្បី មួយដូស ព្រោះថា ក្រុមប្រទេស​អ្នកមាន​បាន ចរចា​ទិញ​វ៉ាក់សាំង​ផ្តាច់មុខ ពី​ក្រុមហ៊ុន​វ៉ាក់សាំងធំៗ ដូចជា Pfizer ឬ Moderna រួចអស់ហើយ ចំណែក​វ៉ាក់សាំង​របស់​ក្រុមហ៊ុន​មួយចំនួន ផ្សេងទៀត ដែល​អង្គការ​សុខភាព​ពិភពលោក​បាន​ចរចា​ទិញ សម្រាប់​យន្តការ​Covaxដែរនោះ គឺ​នៅមិនទាន់​បញ្ចប់​ដំណើរការ​សាកល្បង នៅឡើយ ដូចជា Sanofi Johnson Johnson​ជាដើម។

រហូតមកដល់​ពេលនេះ មាន​តែ​ក្រុមហ៊ុន​ធំៗ​៤ ឬ ៥​ប៉ុណ្ណោះ ដែល​មាន​វ៉ាក់សាំង​របស់ខ្លួន​បាន​ទទួល​ការអនុញ្ញាតិ ថ្នាក់ជាតិ ដូចជា​ Pfizer Moderna AstraZeneca Sinovac Biotech របស់​ចិន ឬ​វ៉ាក់សាំង​រុស្ស៊ី Sputnik។ ប៉ុន្តែ ក្នុង​ចំណោមនោះ​មានតែ​វ៉ាក់សាំង របស់​ក្រុមហ៊ុន Pfizer ដែលលក់​ចាយចាយ​ក្នុងទ្រង់ទ្រាយ​ធំ ជាងគេ។

នៅ ថ្ងៃ​ចន្ទ អគ្គនាយក អង្គការ​សុខភាព​ពិភពលោក​ធ្លាប់​បាន​អំពាវនាវ​សុំ​ឲ្យ​ក្រុមប្រទេស​អ្នកមាន ឈប់​ចរចា ទ្វេភាគី ដើម្បី ទិញ​វ៉ាក់សាំងពី​ក្រុមហ៊ុន​ផលិតវ៉ាក់សាំង​ធំៗ​ដូចជា Pfizer AstraZeneca ដើម្បី ផ្តល់​អាទិភាព ទុក​ឱកាស ឲ្យ​យន្តការ​Covax អាច ទិញ វ៉ាក់សាំង​ក្នុង​តម្លៃ​សមរម្យ សម្រាប់​យក​ទៅ ជួយ​បណ្តាប្រទេស​ក្រីក្រ។

អង្គការ​សុខភាព​ពិភពលោក​បាន​ចុះ​កិច្ចព្រមព្រៀងទិញ​វ៉ាក់សាំង ប្រមាណ ២ពាន់​លាន​ដូស ពី​ក្រុមហ៊ុន​ផលិត​វ៉ាក់សាំង ដែល​ភាគច្រើន​កំពុង​ស្ថិត​ក្នុង​ដំណាក់កាល​សាកល្បង​ទី ៣ប៉ុន្តែ ដែល​បាន​សន្យា​ផ្គត់ផ្គង់​វ៉ាក់សាំង ប្រមាណ ១ពាន់​លាន​ដូស សម្រាប់​ឆ្នាំ ២០២១នេះ។

អង្គការ​សុខភាព​ពិភពលោក​បាន​ចរចា​ទិញ​វ៉ាក់សាំង​ពី ក្រុមហ៊ុន​Pfizer និង​Moderna ដែល​បាន​ទទួល​ការអនុញ្ញាត​ថ្នាក់ជាតិ រួចហើយនោះ សម្រាប់​ចែកចាយ នៅ​ខែ​កុម្ភៈ​ខាងមុខ ទៅ កាន់​ប្រទេស​សមាជិក ចំនួន ៩២ ដែល​ក្រីក្រ គ្មាន​សមត្ថភាព​ទិញ​វ៉ាក់សាំង។ ប៉ុន្តែ គម្រោងការ​របស់​អង្គការ​សុខភាព​ពិភពលោក​នឹង​អាច​បរាជ័យ​ធ្លាក់ទឹក​ម្តងទៀត ព្រោះថា ក្រុមហ៊ុន​អាមេរិកាំង​Pfizer ជាដើម កំពុង​រង​ការដាក់សម្ពាធ ខ្លាំង​ពី​ក្រុមប្រទេស​អ្នកមាន នៅអឺរ៉ុប​ដែលទាមទារ​ចង់បាន​វ៉ាក់សាំង នៅក្នុង​កាលៈទេសៈ ដែល​ខ្លួន​កំពុង​ប្រឈម​នឹង​ការឆ្លងរីករាលដាល​នៃ​មេរោគបំប្លែងខ្លួន​ថ្មី៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI