អាេមរិក-សិទ្ធិមនុស្ស-អង្គការសហប្រជាជាតិ

អាមេរិក​​នឹង​ត្រលប់​​មក​ចូល​រួម ក្នុង​ក្រុម​ប្រឹក្សា​សិទ្ធិ​មនុស្ស​​​ នៃ​អង្គការសហប្រជាជាតិ​​វិញ​

ទិដ្ឋភាព​សន្និបាតកំពូល នៃ​ក្រុម​ប្រឹក្សាសិទ្ធិមនុស្ស​​នៃអង្គការសហប្រជាជាតិ ថ្ងៃទី ៩ កញ្ញា ២០១៩
ទិដ្ឋភាព​សន្និបាតកំពូល នៃ​ក្រុម​ប្រឹក្សាសិទ្ធិមនុស្ស​​នៃអង្គការសហប្រជាជាតិ ថ្ងៃទី ៩ កញ្ញា ២០១៩ AFP - FABRICE COFFRINI

សហរដ្ឋអាេមរិក នឹងត្រលប់មកចូលរួម ឲ្យ​បានសកម្មបំផុត នៅក្នុងក្រុមប្រឹក្សាសិទ្ធិមនុស្ស នៃអង្គការសហប្រជាជាតិ។ នេះបើផ្អែកតាម​លិខិតប្រកាស របស់​លោករដ្ឋមន្ត្រីការបរទេស នៃរដ្ឋាភិបាលអាមេរិកថ្មី របស់​លោកចូ បៃដិន កាលពីថ្ងៃទី​៨កុម្ភៈ។ លិខិតនេះ លើកឡើងថា ការដែលរដ្ឋាភិបាល​​អាេម​រិក​មុន បានដកខ្លួន​ចេញពីក្រុមប្រឹក្សានេះ គឺបានធ្វើ​ឲ្យក្រុមប្រឹក្សា​នេះ​ចុះខ្សោយ ហើយ​​ប្រទេសមួយ​ចំនួន​ឆ្លៀតឱកាស រំលោភបំពានសិទ្ធិមនុស្ស​កាន់តែខ្លាំង។

ផ្សាយពាណិជ្ជកម្ម

លោកអង់តូនី ប្ល៊ីងកិន រដ្ឋមន្ត្រីការ​បរទេស​អាេមរិក បានផ្ញើលិខិតមួយ​ ទៅកាន់អង្គប្រជុំនៃក្រុមប្រឹក្សា​សិទ្ធិមនុស្ស អង្គការសហប្រជាជាតិ ដោយ​បានសរសេរលើកឡើងថា លោក​ប្រធានាធិបតី​ចូ បៃដិន បាន​ចេញបញ្ជា ឲ្យ​ក្រសួងការបរទេសអាេមរិក ត្រូវត្រលប់មក​ចូលរួម ឲ្យ​បាន​សកម្ម និងឆាប់បំផុត នៅក្នុង​ក្រុមប្រឹក្សាសិទ្ធិមនុស្ស។

លោកប្រមុខការទូតអាេមរិក សរសេរបញ្ជាក់ថា សហរដ្ឋអាេមរិក​ដឹងយ៉ាងច្បាស់ ថាក្រុមប្រឹក្សា​សិទ្ធិមនុស្ស​នៃ​អង្គការសហប្រជាជាតិ មានចំណុចខ្វះខាត​ច្រើនណាស់។ ស្ថាប័ននេះ ត្រូវទទួលបាននូវ​ការធ្វើកំណែទម្រង់ ទៅលើ​កម្មវិធីនយោបាយ ការកំណត់គោលការណ៍គ្រិះ ការរៀបចំ​សមាសភាព​ និងអាទិភាពធំៗជាដើម ។ល។ ដូច្នេះ ដើម្បី​ចូលរួម​ធ្វើការទាំងនេះ ឲ្យ​បាន​ជោគជ័យ សហរដ្ឋអាេមរិក នឹងត្រលប់​មកចូលរួម ក្នុងតុប្រជុំវិញ។

លោក អង់តូនី ប្ល៊ីងកិន បានសង្កត់បន្ថែមថា អវត្តមានរបស់​សហរដ្ឋអាេមរិកកន្លងមក គឺបាន​ធ្វើ​ឲ្យ​ក្រុមប្រឹក្សាសិទ្ធិមនុស្ស ចុះខ្សោយ​កាន់​តែខ្លាំង ហើយជាងនេះទៀត គឺបាន​ទុក​ឲ្យ​ប្រទេស​មួយ​ចំនួន​ដែល​ជំនាញ​ខាងផ្តាច់ការ រំលោភសិទ្ធិមនុស្ស​ អាចធ្វើអ្វីបានតាមចិត្ត។ ទោះប្រមុខការទូតអាមេរិក មិននិយាយឲ្យចំ តែគ្រប់គ្នា អាចកាត់យល់បាន ថាលោកសំដៅទៅដល់​ ចិន និង រុស្ស៊ី។

គួរបញ្ជាក់ថា ក្រុមប្រឹក្សាសិទ្ធិមនុស្ស នៃអង្គការសហប្រជាជាតិ មានសមាជិកចំនួន​៤៧ប្រទេស គឺជាវេទិកាកំពូល ដែលមានតួនាទី លើកកំពស់ការគោរពសិទ្ធិមនុស្ស ព្រមទាំងចេញអនុសាសន៍ ដើម្បីប្រយុទ្ធប្រឆាំងនឹងការរំលោភសិទ្ធិមនុស្ស។ តែយ៉ាងណា គឺប្រទេស​សមាជិក​មួយ​ចំនួន ​នៃក្រុមប្រឹក្សានេះឯង ដែលត្រូវបានគេចោទជាញឹកញាប់ ថាបានធ្វើ​សកម្មភាព​បំពានសិទ្ធិមនុស្ស។

រដ្ឋបាល​របស់​លោកដូណាល់ ត្រាំ ​បាន​សម្រេចដកខ្លួន​ឈប់ចូលរួមក្នុង​ក្រុម​ប្រឹក្សានេះ នៅខែមិថុនា ឆ្នាំ​២០១៨ ដោយចោទក្រុមប្រឹក្សានេះ ថាជាស្ថាប័នពុតត្បុត បោកប្រាស់​ ការពារក្រុម​មនុស្ស ឬរបបដែលរំលោភសិទ្ធិមនុស្ស។

បើតាមការបញ្ជាក់ពី​លោក អង់តូនី ប្ល៊ីងកិន សហរដ្ឋអាេមរិក នឹងត្រលប់មកចូលរួម ក្នុង​ក្រុមប្រឹក្សានេះវិញ ដោយ​ចាប់ផ្តើម ពីការធ្វើជាប្រទេសសង្កេតការណ៍។ លក្ខខន្តិកៈនេះ ​នឹងផ្តល់ឱកាសឲ្យ​អាមេរិក អាច​និយាយទៅកាន់ក្រុមប្រឹក្សាទាំងមូល ចូលរួម​ជាមួយ​ការចរចាផ្សេងៗ និង​លើកជា​អនុសាសន៍នានា។ លោកបានសម្តែងសុទិដ្ឋិនិយមថា វត្តមានរបស់អាមេរិក នឹងចូលរួម​ក្នុងន័យស្ថាបនា សហការជាមួយ​ប្រទេសដៃគូទាំងអស់ ដើម្បី​ពង្រឹងតួនាទី ការងាររបស់ក្រុមប្រឹក្សានេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI