អាមេរិក-វ៉ាក់សាំង

អាមេរិក​នឹង​ចែក​រំលែក វ៉ាក់សាំង AstraZeneca ៦០លានដូស ជាមួយប្រទេស​ដទៃ

ឱសថការី​នៅ ប្រទេស​បែលហ្ស៊ិកត្រៀមចាក់វ៉ាក់សាំង​Astrazeneca នៅ ខែ​កុម្ភៈ ឆ្នាំ ២០២១។
ឱសថការី​នៅ ប្រទេស​បែលហ្ស៊ិកត្រៀមចាក់វ៉ាក់សាំង​Astrazeneca នៅ ខែ​កុម្ភៈ ឆ្នាំ ២០២១។ AP - Virginia Mayo

អាមេរិក​នឹង​ចែករំលែក​វ៉ាក់សាំង AstraZeneca ជាមួយ​ប្រទេស​ដែល​ត្រូវការ​ចាំបាច់​ខ្លាំង​វ៉ាក់សាំង សម្រាប់​ប្រឆាំង​ជំងឺរាតត្បាតកូវីដ​១៩។ នេះ​បើតាម​ការប្រកាស​របស់​សេតវិមាន​កាលពីថ្ងៃ​ចន្ទ​ទី ២៦ មេសា ២០២១។ អាមេរិក​ធ្លាប់​រងការរិះគន់​ខ្លាំងៗ​ថា បាន​ស្តុកទុក មិនប្រើប្រាស់ វ៉ាក់សាំង AstraZeneca​រាប់លានដូស នៅខណៈពេល​ដែល​ប្រទេស​ជា​ច្រើន ក្នុង​ពិភពលោក កំពុង​ខ្វះខាត គ្មាន​វ៉ាក់សាំងបង្ការកូវីដ សម្រាប់​ចាក់​ឲ្យ​ប្រជាជន។

ផ្សាយពាណិជ្ជកម្ម

សម្ពាធ​រិះគន់​អាមេរិក មាន​កាន់តែ​ខ្លាំង នៅប៉ុន្មាន​ថ្ងៃ​ចុងក្រោយនេះ នៅក្នុង​បរិបទ ដែល​ឥណ្ឌា​កំពុង​ជួប​គ្រោះអាសន្នធំ ដោយសារ​តែ​ករណី​ឆ្លងរាតត្បាតជំងឺកូវីដ កើនឡើង​ក្នុង​សន្ទុះមួយ ដ៏គួរ​ឲ្យ​ភ័យខ្លាច។

នៅ​ថ្ងៃ​ចន្ទ គឺ ទីប្រឹក្សា​របស់​សេតវិមាន ទទួល​បន្ទុក​ការប្រយុទ្ធប្រឆាំង​ជំងឺកូវីដ លោក Andy Slavitt ដែល​បាន​សរសេរ​សារ​ទ្វីត​ថា អាមេរិក​នឹង​បញ្ចេញ វ៉ាក់សាំង AstraZeneca​ចំនួន ៦០លាន​ដូស ទៅកាន់​ប្រទេស​ដែលត្រូវការ​ចាំបាច់។ ដោយ​ទាត់ចោល ពាក្យ​រិះគន់ថា អាមេរិក​ស្តុកទុក​វ៉ាក់សាំង AstraZeneca ដែល​ខ្លួន​មិនត្រូវការប្រើ​ផងនោះ ទីប្រឹក្សា​របស់​សេតវិមានរូបនេះ អះអាងថា បច្ចុប្បន្ននេះ អាមេរិក​មានស្តុក​វ៉ាក់សាំង​ AstraZeneca មិនច្រើន​នោះទេ។

សម្រាប់​អ្នកនាំពាក្យ​របស់​សេតវិមាន លោកស្រី Jen Psaki នៅ ប៉ុន្មាន​ថ្ងៃ​ខាងមុខ រដ្ឋបាល​អាមេរិក​នឹង​ប្រកាសលម្អិត​វិធានការ ដែលនៅក្នុងនោះ គេនឹង​ដឹងថា តើ​ប្រទេស​ណា ដែល​ត្រូវ​ទទួលបាន​វ៉ាក់សាំង AstraZeneca។ ទាក់ទង​នឹង​កាលបរិច្ឆេទ នៃ​ការនាំចេញ​វ៉ាក់សាំង AstraZeneca អ្នកនាំពាក្យ​របស់​សេតវិមាន លោកស្រី Psaki បាន​បន្ថែមថា ដំណាក់កាល​ចែកចាយ​វ៉ាក់សាំង ចំនួន​១០​លានដូស នឹង​អាច​ធ្វើឡើង​នៅ ប៉ុន្មាន​សប្តាហ៍​ខាងមុខ ចំណែក វ៉ាក់សាំង ៥០លានដូស​ផ្សេងទៀតដែលកំពុង​ស្ថិតក្នុង​ដំណាក់កាល​ផលិត  នឹង​ធ្វើឡើង ជា​បន្តបន្ទាប់ នៅ ខែ ឧសភា និង​ខែ​មិថុនាជាដើម។

តាម​អ្នកនាំពាក្យ​របស់​សេតវិមាន ​វ៉ាក់សាំង AstraZeneca​អាច​នាំចេញ​បាន​ពី​ទឹកដី​អាមេរិក នៅពេលណា ដែល​ទីភ្នាក់ងារ​ឱសថ​អាមេរិក អាច​បញ្ជាក់​ថា វ៉ាក់សាំងមាន​គុណភាព ឆ្លើយតប​តាម​គោលកាណ៍​កំណត់​របស់​ទីភ្នាក់ងារ​ឱសថ​អាមេរិក។

សព្វថ្ងៃនេះ ទីភ្នាក់ងារ​ឱសថ​អាមេរិក​បាន​ផ្តល់​ភ្លើងខៀវ​អនុញ្ញាត​ឲ្យ​ប្រើប្រាស់​វ៉ាក់សាំង​តែ ៣​ប៉ុណ្ណោះ នៅ​ទឹកដី​អាមេរិក គឺ​វ៉ាក់សាំងPfizer Moderna និង​Johnson & Johnson។ ចំណែក​វ៉ាក់សាំង AstraZeneca​ដែលផលិត​នៅប្រទេស​អាមេរិក​ដែរនោះ គឺ​នៅមិនទាន់​បាន​ការអនុញ្ញាត​ឲ្យ​ប្រើប្រាស់​ក្នុង​ទឹកដី​អាមេរិកនោះទេ។ នៅត្រង់ចំណុចនេះ ហើយ​ដែល​ធ្វើ​ឲ្យ​រដ្ឋបាល​លោក​ចូ បៃដិន រងការរិះគន់​ខ្លាំង ព្រោះថា អាមេរិក​បាន​ស្តុក បិទខ្ទប់​មិន​ឲ្យ​គេ​នាំចេញ​វ៉ាក់សាំង AstraZeneca ទាំង​អាមេរិក​ខ្លួនឯង មិនត្រូវការប្រើប្រាស់ផងនោះ។

សម្រាប់អ្នកជំនាញ រដ្ឋបាល​អាមេរិក​សម្រេច​បញ្ចេញ​វ៉ាក់សាំង AstraZeneca​នៅពេលនេះ ក៏ព្រោះ​រដ្ឋបាល​មួយនេះ ទំនងប្រាកដ​ក្នុង​ចិត្ត​ថា អាមេរិក ដែល​មានក្រុមហ៊ុន​ផលិត​វ៉ាក់សាំង ក្នុង​ស្រុក ដល់ទៅ ៣​ គ្មាន​ខ្វះខាត​វ៉ាក់សាំង សម្រាប់​ចាក់​ឲ្យ​ប្រជាជន​អាមេរិក។ គេ​អាច​យល់ដែរថា តាមរយៈ ការសន្យា ចែករំលែក​វ៉ាក់សាំង AstraZeneca​ជាច្រើន​លានដូសលើកនេះ រដ្ឋបាល​អាមេរិក​ទំនង​ចង់​ប្រើ​នយោបាយការទូត​វ៉ាក់សាំង​ផងដែរ ដោយ​មិន​ឲ្យ​ចាញ់​ប្រទេស​ចិន​នោះទេ។ នៅ ខែ មុន អាមេរិក​ធ្លាប់​បាន​ចុះ​កិច្ចព្រមព្រៀង​ផ្តល់​វ៉ាក់សាំង AstraZeneca​ប្រមាណ ៤លានដូស សម្រាប់​ប្រទេស​ជិតខាង ម៉ិចស៊ិក និង​កាណាដា ដែល​កំពុង​រងគ្រោះខ្លាំង ដោយសារ​ជំងឺឆ្លងរាតត្បាតកូវីដ ១៩។

នៅថ្ងៃ​ចន្ទ​ម្សិលមិញ នៅក្នុង​កិច្ចសន្ទនា​តាមទូរស័ព្ទ ជាមួយ​នាយករដ្ឋមន្រ្តី ឥណ្ឌា ក្រៅតែ​ពី សន្យា​ជួយ​ឥណ្ឌា​ក្នុងស្ថានភាព ទុក្ខលំបាក លើកនេះ លោក​ប្រធានាធិបតី ​ចូ បៃដិន​បាន​សន្យា​ផងដែរ​ថា អាមេរិក​នឹង​ផ្គត់ផ្គង់ សំភារៈ វត្ថុធាតុ​ដើម ដើម្បី​ជួយ​ឥណ្ឌា ឲ្យអាច​ផលិត​វ៉ាក់សាំង សម្រាប់ ការប្រើប្រាស់​នៅ​តំបន់​អាស៊ី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI