អានតួអត្ថបទ

កូរ៉េខាងត្បូងបោះឆ្នោតសភា ក្នុង​បរិយាកាស​ការពារ​សុខភាព​តឺង​តែង​ប្រឈម​នឹងវិបត្តិកូវីដ១៩

សកម្មជននយោបាយ​កូរ៉េខាង​ត្បូង ក្នុង​សម្លៀកបំពាក់​ការពារ​កូវីដ១៩ ពីរបី​ថ្ងៃ​​មុន​ការ​បោះឆ្នោត​សភា
សកម្មជននយោបាយ​កូរ៉េខាង​ត្បូង ក្នុង​សម្លៀកបំពាក់​ការពារ​កូវីដ១៩ ពីរបី​ថ្ងៃ​​មុន​ការ​បោះឆ្នោត​សភា Stéphane Lagarde/RFI
ដោយ៖ អៀង សុខម៉ិញ
4 នាទី

ក្នុង​ពេល​ដែល​ប្រជាជន​ជិត​កន្លះ​ផែនដី កំពុង​ជាប់​បម្រាម​នៅ​តែក្នុង​ផ្ទះ​ដើម្បី​ទប់​ស្កាត់​ការ​រាតត្បាត​នៃ​កូវីដ១៩ នៅ​ប្រទេស​កូរ៉េខា​ង​ត្បូង​វិញ ប្រជាពលរដ្ឋ​ជិត​៤៤​លាននាក់ ត្រូវ​ចេញ​ទៅ​បោះឆ្នោត​សភា​ នៅ​ថ្ងៃពុធ ទី ១៥​មេសា ២០២០ ដើម្បី​ជ្រើសរើស​តំណាងរាស្ត្រថ្មី​ ចំនួន​៣០០​អសនៈ។ ជាប្រទេស​រងគ្រោះ ខ្លាំង​ដំបូង​គេ​ទីពីរ​បន្ទាប់​ចិន ​​​កូរ៉េខាងត្បូង បាន​​ចាត់​វិធានការ​ការ​ពារ​សុខភាព​ដ៏​តឹង​តែង​បំផុត​ក្នុង​អំឡុង​ពេល​បោះឆ្នោត​នេះ។ ​គណបក្សកាន់​អំណាច​របស់​លោក​ប្រធានាធិបតី​មូន ចែអ៊ីន សង្ឃឹម​ថានយោបាយ​​ទប់​ស្កាត់​ការ​រាតត្បាតរបស់​កូវីដ១៩​ ​​ជា​ការនាំ​ជោគជ័យ​ឱ្យបក្ស។

ផ្សាយពាណិជ្ជកម្ម

ត្រូវ​​ពាក់​ម៉ាស់ជា​ដាច់​ខាត វាស់កម្តៅសីតុណ្ហភាពជា​ស្វ័យប្រវត្តិ លាង​ដៃនឹងល្បាយ​អាល់កុល​មុន​ពាក់​ស្រោមដៃប្លាស្ទិកទើប​អាច​​ចូល​ក្នុងការិយាល័យ​បោះឆ្នោតបាន ​ត្រូវ​រក្សា​គម្លាត​សុវត្ថិភាព​យ៉ាង​ហោច​មួយ​ម៉ែត្រ​ពី​មនុស្ស​ម្នាក់​ទៅ​មនុស្សម្នាក់។ អ្នក​មាន​សញ្ញា​ក្តៅ​ខ្លួន ត្រូវ​ចូល​បន្ទប់​បោះឆ្នោត​ពិសេស​ដែល​នឹង​ត្រូវ​សម្អាត​ដោយ​ថ្នាំ​សម្លាប់មេរោគតាម​​ក្រោយភ្លាម។ ពលរដ្ឋ​ជាង​៥ម៉ឺននាក់​ដែល​ត្រូវ​បាន​ដាក់​ឱ្យ​នៅ​ដាច់​ដោយ​ឡែកពី​គេ ព្រោះ​សង្ស័យ​ខ្លាច​មានរោគ​កូវីដ១៩ ក៏​អាច​ចេញ​មក​បោះឆ្នោត​បានដែរ បើ​គ្មាន​រោគសញ្ញា ដោយត្រូវ​ចេញ​ទៅ​ការិយាល័យ​បោះឆ្នោតទូទៅ​បិទ ​នៅ​វេលាម៉ោង​៦ល្ងាច និង​ត្រូវ​ត្រលប់​ចូល​ផ្ទះវិញ​យ៉ាង​យូរ​នៅ​​ម៉ោង​៧​ល្ងាច។

តាមការ​ពិត វិធានការ​ការពារ​សុខភាព​ដ៏​តឹងតែង​នេះ ជា​នយោបាយ​ប្រយុទ្ធប្រឆាំង​នឹងកូវីដ​១៩ដែល​រដ្ឋាភិបាល​កូរ៉េខាង​ត្បូង​បាន​ប្រកាន់​យក និង​ដែល​បាន​ទប់​ស្កាត់​មេរោគកូរ៉ូណា​ថ្មី មិន​ឱ្យ​រីករាលដាល​ខ្លាំង​នៅ​ក្នុង​ប្រទេស។ គិត​ត្រឹមថ្ងៃ​ព្រឹក​ថ្ងៃពុធ​ទី ១៥​មេសានេះ កូរ៉េខាង​ត្បូង​មានអ្នក​ផ្ទុក​មេរោគ​កូវីដ​១៩ ១ម៉ឺន​មួយ​ពាន់​នាក់ ក្នុងនោះ​២២៥​នាក់​ស្លាប់។ តាំង​ពី​៧​ថ្ងៃ​ជាប់​គ្នា​មកនេះ ចំនួនអ្នក​ឆ្លងថ្មី បាន​ថយ​ចុះ​លំដាប់ ដោយ​រាប់​ឃើញ​មាន​អ្នក​វិជ្ជមាន​ថ្មី​មិន​ដល់​៤០​នាក់​ទេ​ក្នុង​មួយ​ថ្ងៃៗ។

តែ​កូវីដ​១៩ បាន​រំខាន​ខ្លាំងដល់​យុទ្ធនាការ​ឃោសនា​បោះឆ្នោត។ គ្មានការចុះ​ជួប​ប្រជាពលរដ្ឋ​ចាប់​ដៃ ឬចែក​ចាយ​សារនយោបាយ​។ បេក្ខជន​នីមួយៗ​​​រំពឹង​តែ​លើ​ប្រព័ន្ធ​សង្គ​ម។ ជា​ការ​បោះឆ្នោត​​ខុស​ប្លែក​ពី​ប្រក្រតី ប៉ុន្តែ​បើ​តាម​ការ​ស្ទង់​មតិ មាន​ប្រជាពលរដ្ឋ​កូរ៉េខាង​ត្បូង តែ​ប្រមាណ​២៧%​ ដែល​មិន​ចង់​ចូល​រួម​បោះឆ្នោត​ដោយ​ខ្លាច​កូវីដ​១៩ និង៧២%មិន​បារម្ភ​សោះ។ ដូច្នេះ​អត្រា​អ្នក​ទៅ​បោះឆ្នោតនឹង​ខ្ពស់​ខ្លាំង។ ការបោះឆ្នោត​មួយ​វគ្គ​មុន សម្រាប់​ពលរដ្ឋ​ជិត​១២លាន ​កាលពី​ថ្ងៃទី ១០-១១​មេសា ជាភស្តុតាង​ដ៏​ជាក់ស្តែង។

ការ​បោះឆ្នោត​សភា​ជាតិ ត្រូវ​បានកូរ៉េខាង​ត្បូង​ចាត់​ទុក​ជា​ប្រជាមតិ​​វាស់​វែង​ពី​សកម្មភាពរបស់​ប្រធានាធិបតី ប៉ុន្តែ​នៅ​ឆ្នាំ​នេះ លោក​ប្រធានាធិបតី​ មូន ចែអ៊ីន ទំនង​ជាង​នឹង​អាច​ឈ្នះ​ ប្រមូល​អសនៈ​បាន​កាន់​តែ​ច្រើន​សភា​ចប់​អាណត្តិ​ទៅ​ទៀត។ ដោយ​សារ​ចំណាត់ការ​ល្អ​ក្នុង​វិបត្តិ​កូវីដ១៩ លោក​មូន​ បានឡើង​ប្រជាប្រិយភាព​​ខ្លាំង ដល់​ទៅ ៥៧% កាលពី​សប្តាហ៍​មុន ទល់​នឹង​៤១%​កាលពី​ចុង​ខែមករា ដែល កាលណោះ​រដ្ឋាភិបាល​រង​ការ​រិះគន់​ខ្លាំង​ ដោយ​ហេតុ​តែ​សេដ្ឋកិច្ច​មាន​កំណើន​យឺត ការចរចា​ជាមួយ​កូរ៉េខាង​ជើង​មិន​ទៅ​មុខ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ