អានតួអត្ថបទ

ចិន​គ្រោង​នឹង​បង្ហោះ​យាន​ទៅកាន់​ភពអង្គារ​នៅ​ខែ​កក្កដា

ចិន​បាញ់បង្ហោះរ៉ុកកែត ផ្ទុកយានTiangong-2 module នៅ​ឆ្នាំ ២០១៦ នៅក្នុង​គម្រោងការ​របស់ចិន ដែល​ចង់​បញ្ជូនយាន​ទៅ​ចុះចត​នៅ​ភពអង្គារ
ចិន​បាញ់បង្ហោះរ៉ុកកែត ផ្ទុកយានTiangong-2 module នៅ​ឆ្នាំ ២០១៦ នៅក្នុង​គម្រោងការ​របស់ចិន ដែល​ចង់​បញ្ជូនយាន​ទៅ​ចុះចត​នៅ​ភពអង្គារ AP - Uncredited
ដោយ៖ ឈាង បុប្ផា
១៥ នាទី

ប្រទេស​ចិន​នឹង​ចាប់ផ្តើម​បេសកកម្ម​ទៅកាន់​ភពអង្គារ នៅ​អំឡុង​ខែ​កក្កដា​ខាងមុខ។ នេះ​បើតាម​ការប្រកាស កាលពី​ថ្ងៃ​អាទិត្យ របស់​ក្រុមហ៊ុន​ចិន​ដែល​ទទួល​បន្ទុក​លើ​គម្រោងការ មួយនេះ។ ដំណឹង​នេះ កើតមានឡើង​នៅ​តែ ២០​ថ្ងៃ​ក្រោយ ដែល​ចិន​បាន​បង្ហោះ​ដោយ​ជោគជ័យ​យានអវកាស​ដែល​អាច​ដឹកមនុស្ស​ទៅកាន់​លំហអាកាស នៅក្នុង​មហិច្ឆតា​ប្រកួតប្រជែង​ជាមួយ​អាមេរិក ដើម្បី​ក្លាយជា​មហាអំណាច​អវកាស។ 

ផ្សាយពាណិជ្ជកម្ម

បេសកកម្ម​ទៅកាន់​ភពអង្គារ ត្រូវ​បាន​ទីក្រុង​ប៉េកាំង គ្រោង​នឹង​ធ្វើ​នៅ​អំឡុង​ឆ្នាំនេះ ប៉ុន្តែ ក្រុមហ៊ុន​បច្ចេកវិទ្យា និង​វិទ្យាសាស្រ្ត​អវកាស ដែល​ទទួល​បន្ទុក​លើ​គម្រោង ទើប​បញ្ជាក់​កាលពី​ថ្ងៃ​អាទិត្យ​ថា គេ​នឹង​ចាប់ផ្តើម​បេសកកម្ម ទៅកាន់ភពអង្គារ នៅ​ខែ​កក្កដា បន្ទាប់​ពី​ដំណើរការ​របស់​គម្រោង​ប្រព្រឹត្ត​ទៅ​ដោយ​រលូន ទៅតាម​ការគ្រោងទុក។

បង្ហោះចេញ​នៅ​ខែ​កក្កដា យានអវកាស​របស់​ចិន​នឹង​អាច​ទៅដល់​ភពអង្គារ នៅ​ ឆ្នាំ ២០២១ ព្រោះថា គេត្រូវការពេលវេលា​យ៉ាងហោច ៧ខែ​ដើម្បី ធ្វើដំណើរ​ទៅ​ដល់​ភពអង្គារ​ដែល​ស្ថិតនៅ​ចម្ងាយ ៥៥លាន​គីឡូម៉ែត្រ​ពី​ផែនដី។

បេសកកម្ម​ទៅកាន់​ភពអង្គារ​ជាគម្រោងការ​មួយ ក្នុង​ចំណោម​គម្រោងការ​ផ្នែកអវកាស​ជាច្រើន​របស់​ប្រទេស​ចិន ដូចជា ការបញ្ជូន មនុស្ស​ទៅ​កាន់ ឋាន​ព្រះចន្ទ ឬ​ការសាងសង់​ស្ថានីយ៍​អវកាស​ចិន នៅឆ្នាំ ២០២២។

តាម​ក្រុមហ៊ុន បច្ចេកវិទ្យា និង​វិទ្យាសាស្រ្ត​អវកាស បេសកកម្ម​ទៅកាន់ភពអង្គារ មាន​គោលដៅ បី ដែលនៅក្នុង​នោះ មាន​ការបញ្ជូន​យានអវកាស​ដែល​ឈ្មោះថា Tianwen ទៅក្នុង​គន្លងតារាវិថី របស់​ភពអង្គារ ការចុះចត​យាន​Tianwen​លើភពអង្គារ និងគោលដៅ​ចុងក្រោយ គឺ ការបញ្ចេញ​យានយន្ត រ៉ូបូ ដើម្បី​ចុះ​រុករក​លើ​ភពអង្គារ។

ប្រទេស​ចិន​ធ្លាប់​បាន​ផ្តើម​បេសកកម្ម​ស្រដៀង​គ្នានេះ ទៅកាន់​ឋានព្រះចន្ទ កាលពី​ឆ្នាំ ២០១៣ មុន​នឹង​បញ្ជូន​យាន​ឲ្យទៅរុករក និង​សិក្សា​លំអិត ផ្នែកងងឹត​របស់​ឋានព្រះចន្ទ នៅ​ដើម​ឆ្នាំ ២០១៩ ដែល​ធ្វើ​ឲ្យ​ចិន ក្លាយ​ជា​ប្រទេស​ទី១ ដែល​ចុះចត​យាន​នៅផ្នែកងងឹត​របស់​ព្រះចន្ទ។

នៅ​ប៉ុន្មាន​ឆ្នាំចុងក្រោយនេះ រដ្ឋាភិបាលចិន បាន​ចំណាយ​ប្រាក់​រាប់ពាន់​លាន​ដុល្លារ ដើម្បី​អភិវឌ្ឍន៍កម្មវិធី​អវកាស​របស់ខ្លួន ដើម្បី អាច​ប្រកួតប្រជែង ដណ្តើម​តំណែង​មហាអំណាច​អវកាស​ជាមួយ​អាមេរិក។ គម្រោងការ​បញ្ជូនយានអវកាស​របស់​ចិន អាច​ជួនចំពេល​ជាមួយ នឹង​បេសកកម្ម​ទៅភពអង្គារ​របស់​អាមេរិក។ អាមេរិក​ដែល​ធ្លាប់​បញ្ជូន យាន​ចំនួន​៤​ឲ្យ​ទៅ​សិក្សា​ភពអង្គារ គ្រោង​ផងដែរថា នឹង​បញ្ជូន​យាន​អវកាស​ទី​៥​របស់ខ្លួន ទៅ​ចុះចត ភពអង្គារ​នៅ​ចន្លោះខែ​កក្កដា និង​សីហា។ តាម​គម្រោង យានអវកាស​របស់​អាមេរិក​នឹង​អាច​ទៅដល់​ភពអង្គារ នៅ​ខែ​កុម្ភៈ​ឆ្នាំ​ក្រោយ។

នៅក្នុង​មហិច្ឆតា​ទៅកាន់​ភពអង្គារ ប្រទេស​អេមីរ៉ា អារ៉ាប់រួម គ្រោង​នឹង​បញ្ជូន​យាន​របស់ខ្លួន ជាលើកទី​១ ទៅកាន់​ភពអង្គារដែរ តាមរយៈ ការបាញ់បង្ហោះ​ពី​ប្រទេស​ជប៉ុន​នៅ ខែ​កក្កដា​ឆ្នាំ២០២០។ ផ្ទុយទៅវិញ បេសកកម្ម​រុស្ស៊ី អឺរ៉ុប​សម្រាប់​ភពអង្គារ ត្រូវ​បាន​លើកពេល​ទៅធ្វើ​នៅឆ្នាំ ២០២២ បន្ទាប់ពី​គម្រោងការ​បញ្ជូន​រ៉ូបូ ទៅកាន់ភពអង្គារ ត្រូវខកខាន ពន្យារ​ពេល ដោយសារ វិបត្តិកូវីដ ១៩៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ