ឥណ្ឌា-ចិន

ឥណ្ឌា និងចិន បើកជំនួបពិភាក្សាយោធាជាន់ខ្ពស់ ដើម្បីបន្ធូរសម្ពាធនៅព្រំដែន

តំបន់​ Ladakh ឥណ្ឌា ជាប់ព្រំដែន​ចិន​
តំបន់​ Ladakh ឥណ្ឌា ជាប់ព្រំដែន​ចិន​ AFP/Archivos

តំណាង​យោធា​ជាន់​ខ្ពស់​ឥណ្ឌា​និង​ចិន ដែល​ជា​​ប្រទេស​ពីរ ​មានកម្លាំង​​ទាហាន​ច្រើន​ជាង​គេបំផុត​នៅអាស៊ី បាន​ជួប​ពិភាក្សា​គ្នា​ នៅ​ល្ងាច​សៅរ៍​ទី ៦​មិថុនា រហូត​ដល់​យប់​ជ្រៅ ដើម្បី​សាកល្បង​រក​ដំណោះស្រាយ​ឱ្យ​វិបត្តិ​ព្រំដែនដ៏​រ៉ាំរ៉ៃ។ ជា​លទ្ធផល ឥណ្ឌា​និង​ចិន បាន​ឯកភាព​លើ​ភាព​ចាំ​បាច់​នៃ​ការ​ដោះស្រាយ​ជម្លោះព្រំដែន​ដោយ​សន្តិវិធី។ នេះ​បើ​តាមការ​ប្រកាស​របស់​ញូវដេលី​នៅ​ព្រឹក​ថ្ងៃអាទិត្យ​ទី ៧ មិថុនា។

ផ្សាយពាណិជ្ជកម្ម

ឥណ្ឌា​និង​ចិន​មាន​ជម្លោះ​ព្រំដែននឹង​គ្នា តាំង​ពី យូរលង់ និង​ជា​ច្រើន​ចំណុច ៖ នៅឡាដា Ladakh  នៃ​​តំបន់​​កាស្មៀ ភាគ​ខាង​ជើង​ឥណ្ឌា និង​តំបន់​ អារុណាចាល ប្រាដេស Arunachal Pradesh នៅ​ភាគ​ខាងកើតប្រទេស។ ប្រវែង​ព្រំដែន​ខណ្ឌ​ចែក​ប្រទេស​ទាំង​ពីរ ក៏​មាន​តួលេខ​ខុស​គ្នាដែរ។ ឥណ្ឌា​ប្រកាស​ជា​ផ្លូវការមានព្រំដែន​៣៥០០​គីឡូម៉ែត្រ​ជា​ចិន ឯ​សារព័ត៌មានរដ្ឋចិន​វិញ ថា​មាន​តែ​២០០០គីឡូម៉ែត្រ។

ចិន​បាន​បន្ទោស​ឥណ្ឌា​ដែល​មក​សាង​សង់​ហេដ្ឋារចនា​សម្ព័ន្ធ​លើ​ទឹក​ដី​របស់​ខ្លួន។ ចំណែក​ឥណ្ឌា​វិញ​ខឹង​ចិន ដែល​ប្រមូលផ្តុំ​ទ័ព​នៅ​កៀក​ព្រំដែន។ ជា​លទ្ធផល​ ​តាំង​ពី​ដើមខែ​ឧសភា​មក ទាហាន​នៃ​មហាអំណាច​អាស៊ី​ទាំង​ពីរ បាន​តតាំង​ប្រឈម​មុខ​គ្នា ជា​ច្រើន​ដង​ នៅ​តំបន់​ខ្ពង់រាប ឡាដាក។ ទាហាន​ជាង​៥០០​នាក់​បាន​រង​របួស។ ភាព​តាន​តឹង​បាន​ប៉ោង​ឡើង​គួរ​ឱ្យ​ព្រួយ​បារម្ភ។

មួយ​ខែ​ក្រោយ នៅ​ថ្ងៃទី ៦មិថុនា ប្រទេស​ទាំង​ពីរ បាន​សម្រេច​រក​ដំណោះស្រាយ​តាម​ផ្លូវការ​ទូត។ នាយ​ឧត្តមសេនីយ៍ជាន់ខ្ពស់​របស់​ប្រទេស​បក្ខដិបក្ខ​ទាំង​ពីរ បាន​ជួប​ពិភាក្សា​គ្នា យ៉ាង​យូរ​រហូត​ដល់យប់​ជ្រៅ​ នៅ​តំបន់​ព្រំដែន​ឡាដាក។ ជា​ជំនួប​ជាន់ខ្ពស់ដែលពុំធា្លប់មាន​ពី​មុន​មកទេ និងការ​ពិភាក្សា​ប្រកប​ដោយ​លក្ខណៈ​វិជ្ជមាន ប៉ុន្តែ​ពុំទទួល​បាន​លទ្ធផលច្បាស់​លាស់​ទេ។

បើ​តាម​សេចក្តី​ថ្លែងការណ៍​របស់​ក្រសួង​ការបរទេស​ឥណ្ឌា ភាគីទាំងពីរ​បានព្រមព្រៀង​គ្នា​ដោះស្រាយ​ដោយ​សន្តិវិធី​ ធ្វើ​យ៉ាង​ណា​រក្សា​ស្ថានភាព​នៅ​តំបន់​ព្រំដែន​ តាម​កិច្ចព្រមព្រៀង​​​ដែល​មានពី​មុន (statu quo )។ ដោយ​យល់​អំពី​ភាព​ចាំបាច់​នៃ​កា​រ​ស្វែងរក​ដំណោះស្រាយ​ឱ្យ​បាន​ឆាប់​រហ័ស ដើម្បី​រក្សា​ទំនាក់ទំនង​ទ្វេភាគី​ ក្រុមយោធា​ទាំង​ពី​រក្រុម​នឹង​បន្ត​ជួប​ផ្តោះប្តូរ​យោបល់ និង​មាន​ជំនួប​ការ​ទូត​ ដើម្បី​ឈាន​ទៅ​ដោះស្រាយ​ស្ថានការណ៍​និង​រកសន្តិភាព​និង​ស្ថិរភាព​តំបន់​ព្រំដែន​។ នេះ​បើ​តាម​​ក្រសួង​ការបរទេស​ឥណ្ឌា​ដដែល។ សូម​បញ្ជាក់​ថា ឥណ្ឌា​និង​ចិន​ធ្លាប់​មានជំនួប​ចរចា​នឹង​គ្នា​ជា​ច្រើន​លើក​ច្រើន​សាមក​ហើយ ប៉ុន្តែ​ពុំ​អាច​​នាំ​ភាព​ធូរស្បើយ​ជានិរន្តបាន​សោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI