អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

សហភាព​អឺរ៉ុប​និង​ចិន​បើក​ជំនួប​កំពូល​ ក្រោម​សម្ពាធនយោបាយ​ដ៏​តាន​តឹង

សំឡេង ០៦:៥៦
នាយករដ្ឋមន្ត្រី​ចិន​ ក្នុង​ជំនួប​ជាមួយសហភាព​អឺរ៉ុប
នាយករដ្ឋមន្ត្រី​ចិន​ ក្នុង​ជំនួប​ជាមួយសហភាព​អឺរ៉ុប AFP/File
ដោយ៖ អៀង សុខម៉ិញ
៣៣ នាទី

ជំនួប​កំពូល​សហភាអឺរ៉ុប​-ចិន លើក​ទី​២២​ ត្រូវ​ប្រព្រឹត្ត​ទៅ​​ នៅ​ថ្ងៃ​ចន្ទទី ២២ មិថុនា ២០២០​នេះ។ តាម​គម្រោង​ជំនួប​ពិភាក្សាថ្ងៃ​នេះ​ជា​កិច្ច​ប្រជុំ​ត្រៀម​មុន​នឹង​ឈាន​ដល់​ជំនួប​កំពូល​វិសាមញ្ញ​ខែ​កញ្ញា​​រវាង​ប្រមុខ​ដឹកនាំ​ប្រទេស​សមាជិក​សហភាព​អឺរ៉ុប​ទាំង​អស់​ជា​មួយ​សមភាគី​ចិន​នៅអាល្លឺម៉ង់។ ប៉ុន្តែដោយសារ​វិបត្តិ​កូវីដ១៩ ជំនួប​​​ថ្ងៃ​នេះ​  ជា​ឱកាស​មួយ​ដែល​អឺរ៉ុប​ត្រូវ​បង្ហាញ​ជំហរ​ការពារអធិបតេយ្យភាព​ និង​ការ​ពារ​វិស័យ​យុទ្ធសាស្ត្រ​របស់​ខ្លួន​នៅ​ចំពោះ​មុខ​ចិន។

ផ្សាយពាណិជ្ជកម្ម

ខាង​ភាគី​ចិន ​បាន​ការ​ចូល​ពី​សំណាក់​ប្រធានាធិបតី​ចិន លោក ស៊ី ជីនពីង ផ្ទាល់​តែ​ម្តង​ផង ជាមួយ​នាយករដ្ឋមន្ត្រី លី ខឺឈាំង​ទៀត។ ខាង​អឺរ៉ុប​វិញ មាន​​ប្រធាន​ក្រុមប្រឹក្សា​​សហភាព​អឺរ៉ុប លោក ឆាល មីឆែល ប្រធាន​គណៈកម្មការ​អឺរ៉ុប​ លោកស្រី Ursula von der Leyen ដែល​ជា​មេដឹកនាំ​សហភាព​អឺរ៉ុប​ថ្មី។ ​នេះ​​ជា​លើក​ទី​មួយ​​ ដែល​ប្រធានាធិបតី​​ចិន​ ជួបតទល់​ជាមួយ​មេដឹកនាំ​សហភាព​អឺរ៉ុប​ថ្មី។

ជំនួបកំពូល​ដែល​ខកខាន​បង្អូស​ពេល​ទើប​មក​ធ្វើ​នៅ​ថ្ងៃ​​នេះ តាម​ធម្មតា​ត្រូវ​ជា​​ឱកាស​មួយ​នៃ​ការ​អបអរ​សាទរ​​ការ​ផ្សារភ្ជាប់​ទំនាក់ទំនងអឺរ៉ុប-ចិន គម្រប់​ខួប​៤៥​ឆ្នាំ​គត់​ឆ្នាំនេះ​ផង និង​ជា​ឱកាស​ដែល​ភាគីទាំង​ពីរ ត្រូវ​សម្រេច​កិច្ចព្រមព្រៀង​វិនិយោគ​ទូទៅ​​ដ៏ធំ​មួយ​ផង។ ការ​ចរចាបានចាប់​ផ្តើម​ តាំង​ពី​៧​ឆ្នាំ ហើយត្រូវ​សម្រេច​បង្ហើយ​ចេញ​ជា​រូប​រាង​នៅ​ឆ្នាំ​នេះ​។

ប៉ុន្តែ​កូរ៉ូណាវីរុស​បាន​មក​ចូល​កាត់ ធ្វើ​ឱ្យ​អ្វីៗ​ត្រូវ​យឺត​យ៉ាវ​ទាំង​អស់ និង​ជាពិសេស​បាន​បង្កើត​ឱ្យ​មាន​ភាព​មិន​ទុក​ចិត្ត​កាន់​តែ​ខ្លាំង។ ជំនួប​ថ្ងៃ​នេះ​ជាពេលវេលា​ដែល​អឺរ៉ុប​ត្រូវ​បញ្ជាក់​បង្ហាញ​ជំហរ​ដ៏​រឹង​មាំ​ ការពារ​អធិបតេយ្យភាព​របស់​ខ្លួន មិនមែន​ត្រឹម​តែ​មក​ជួប​ពិភាក្សា​ ​ញញឹមដាក់​គ្នា​​ និង ​និយាយ​ពី​អភិវឌ្ឍ​ការ​ផ្តោះប្តូរ​​ពាណិជ្ជកម្ម​ជាមួយ​មហាយក្ស​ចិន​​ទៀត​ទេ។

អឺរ៉ុប​ភ្ញាក់​​ខ្លួន ពេលមានវិបត្តិកូវីដ១៩

ពេល​​កូវីដ​១៩​ចូល​រាតត្បាត អឺរ៉ុបជួប​គ្រោះ​​ខ្វះ​ខាត​ផ្នែក​សម្ភារៈ​បរិក្ខាពេទ្យ ៖ ម៉ាស់ ថ្នាំ​សង្កូវ ​យ៉ាង​ខ្លាំង ទើប​អឺរ៉ុប​មើល​ឃើញ​ចំណុច​ខ្សោយ​របស់​ខ្លួន​ ដែល​រំពឹង​ខ្លាំង​លើ​ចិន។ អឺរ៉ុបចាប់ភ្ញាក់​ខ្លួន​ ​ផ្តើម​ពិចារណា​នាំ​ប្រព័ន្ធ​ផ្គត់ផ្គង់ គ្រប់​​​ផ្នែក​សុខាភិបាល ឧស្សាហកម្ម​ បច្ចេកវិទ្យា​ និងអវកាស ​​ចូល​ស្រុក​វិញ។ ប្រទេស​​គាំទ្រ​ការ​ផ្តោះប្តូរ​សេរី​បំផុត​នោះ​ក៏​ចង់​​ពង្រឹងវិធានការ​ដែរ​។

វិបត្តិកូវីដ​កាន់​តែ​រីក​ធំ អាមេរិក​និង​ចិន​ប្រឈម​គ្នាកាន់​តែ​ខ្លាំង​ ជាង​ពេល​ណាៗ​ទាំងអស់​ ក្លាយ​ជា​​​សម្ពាធដ៏​ធ្ងន់​។ ទើប​អឺរ៉ុប​​ ភ្ញាក់​ស្មារតី​ថា​ត្រូវ​ដើរ​ចេញ​ពី​គន្លង​ ជម្លោះពាណិជ្ជកម្ម​សុទ្ធ​សាធ​មួយ​នេះ ដោយ​ត្រូវ​ជ្រើ​សរើស​ដើរ​ តាម​ផ្លូវ​មួយជា​របស់​ខ្លួន ដើម្បី​ការពារ​អធិបតេយ្យ​អឺរ៉ុប។

ផ្លូវ​ដែល​អឺរ៉ុប​ត្រូវ​ដើរ​ ត្រូវ​បង្ហាញ​តាម​រយៈ​ជំនួ​បកំពូល​លើក​ទី​២២​នេះហើយ។ ជំនួប​ថ្ងៃ​នេះ ដំបូង​ឡើយ​គឺជា​ការ​ប្រជុំ​ពិភាក្សា​ត្រៀម​សម្រាប់​ជំនួប​វិសាមញ្ញ​នៅ​ខែ​កញ្ញា​នៅ​ប្រទេស​អាល្លឺម៉ង់​ទេ។ ប៉ុន្តែ​អាល្លឺម៉ង់​បាន​ប្រកាស​លុប​ចោ​លជំនួប​វិសាមញ្ញ​នោះទៅ​វិញ​ ​ក្រោម​ហេតុផល​ជា​ផ្លូវ​ការ​ថា​មាន​វិបត្តិ​កូវីដ១៩។ តែ​តាមការពិត​គឺ​មក​ពី​ការ​ជួប​ប្រជុំ​នោះ​នឹង​គ្មាន​ផ្តល់​ផល​ប្រយោជន៍​ដូច​អ្វី​ដែល​អឺរ៉ុប​ចង់​បាន​។ អឺរ៉ុប​ចង់​កំណត់​ជម្រើស​នយោបាយ​របស់​ខ្លួន​សិន​មុន​នឹង​ត្រលប់​ទៅ​ចរចា​​ជាមួយ​ចិន។ អឺរ៉ុប​ត្រូវ​ការ​ស្តារ​កម្លាំង​​របស់​ខ្លួន​ធ្វើ​យ៉ាង​ណា​ឱ្យមាន​ប្រៀប​លើ​ចិន​វិញ​សិន​។

តាំង​ពី​ប៉ុន្មាន​សប្តាហ៍​មក​នេះ អឺរ៉ុប​ចាប់​ផ្តើម​គូសវាស​បន្ទាត់​នយោបាយ​របស់ខ្លួន។ កាលពី​សប្តាហ៍​មុន ត្រូវ​ជា​ថ្ងៃទី ១៧​មិថុនា គណៈកម្មការ​អឺរ៉ុប​បាន​បង្ហាញ​សៀវភៅ​ស​ ចែង​កំណត់​អំពី​បន្ទាត់​នយោបាយ​ការពារ​ក្រុមហ៊ុន​អឺរ៉ុប​ ប្រឈម​នឹង​ការ​ប្រកួត​ប្រជែង​មិន​ស្រប​ច្បាប់​របស់​ក្រុមហ៊ុន​បរទេស​ដែល​ជួយឧបត្ថម្ភ​ដោយ​រដ្ឋ។ អឺរ៉ុប​គ្រោង​នឹង​ដាក់​ពិន័យ​ និង​បិទ​ខ្ទប់​សកម្មភាព​របស់​ក្រុមហ៊ុន​បរទេស​នោះផង។ អឺរ៉ុប​មិន​ដៅ​ឈ្មោះ​ប្រទេស​ចិន​ដោយ​ចំៗ​ទេ តែ​ប៉េកាំង​យល់​ថា​ចង់​សំដៅ​មក​លើ​ខ្លួន​។

សហភាព​អឺរ៉ុបក៏​បាន​ដាក់​គំនាប ​​ឱ្យ​ចិន​បើ​ក​ទីផ្សារ​របស់​ខ្លួន​ទទួល​ក្រុម​ហ៊ុន​អឺរ៉ុប​ឱ្យ​បាន​ធំ​ជាង​មុន។ បើ​តាម​ការសិក្សារបស់​ភ្នាក់ងា​រពាណិជ្ជកម្ម​អឺរ៉ុប នៅ​ចិន មាន​ក្រុមហ៊ុន​អឺរ៉ុប​ឈរ​ជើង​នៅ​ចិន​ចំនួន​១១%​ចង់​បង្វិល​វិនិយោគ​របស់​ខ្លួន​ត្រលប់​ចូល​ស្រុក​វិញ។ ៦០%​ ចង់​បន្ត​នៅ​តែ​គិត​ចង់​ដាក់​គំនាប​លើ​រដ្ឋាភិបាល​ដើម្បី​បាន​ប្រកួត​ប្រជែង​ស្មើ​ភាព​ជាមួយ​ក្រុមហ៊ុន​ក្នុង​ស្រុក។​

បរិបទ​នយោបាយឡើង​​តាន​តឹង​

តាំង​ពី​កូវីដ​បាន​ផ្ទុះ​ឡើង ចិន​បាន​ប្តូរ​វិធីសាស្ត្រ​ផ្នែក​ទំនាក់ទំនង​ ដោយ​ងា​ក​ទៅ​ប្រើ​នយោបាយ​ការ​ទូត​បែប​វាយលុក​ និង​ឃោសនា​បំប៉ោង​​បែប​កំណាច មិនមែន​ត្រឹម​តែ​ដើម្បីការពារ​សកម្មភាព​របស់​ខ្លួន​ទេ តែ​ក្នុង​ន័យ​​បំបែក​និង​បំបាក់​អឺរ៉ុប​ខ្លាំង​ណាស់។

​ខាង​អឺរ៉ុប សភា​ទើប​បោះឆ្នោត​អនុម័ត​សេចក្តី​សម្រេច​ចិត្ត​មួយ​កាលពី​ថ្ងៃ​សប្តាហ៍​មុន​អំពាវនាវ​ឱ្យ​រដ្ឋាភិបាល​ប្រទេស​ជា​សមាជិក​អឺរ៉ុប​ទាំងអស់ ដំឡើង​សំឡេង​ដាក់​ទណ្ឌកម្ម​ចិន រឿង​ប៉េកាំង​បង្កើត​ច្បាប់​​សន្តិសុខ​ជាតិ​នៅ ហុងកុង ភ្ជាប់​ជាមួយ​នឹង​ការ​ចរចា​ពណិជ្ជកម្ម។

​អាមេរិក ​ដែល​មាន​ជម្លោះ​ពាណិជ្ជកម្ម​យ៉ាង​ខ្លាំង​ជាមួយ​ចិន ក៏​ដាក់​សម្ពាធ​លើ​​​អឺរ៉ុប ដោយ​ចង់​ឃើញ​អឺរ៉ុប​​ប្រកាន់​ជំហរ​ប្រឆាំង​ដាច់​ខាត​ជាមួយ​ចិន លើ​គ្រប់​សំណុំរឿង​ទាំង​អស់។ ប្រមុខ​ការ​ទូត​អាមេរិក​បាន​ស្នើ​សុំ​ដោយ​ចំៗ​ឱ្យ​អឺរ៉ុប​ជ្រើសរើស​នៅ​ខាង​​អាមេរិក ជា​សម្ព័ន្ធមិត្ត និង​មាន​គោលនយោបាយ​ដូច​គ្នា​។ ប៉ុន្តែដើម្បីរក្សា​ប្រយោជន៍​សេដ្ឋកិច្ច ពាណិជ្ជកម្ម​​ដែល​រង​ផល​ប៉ះពាល់​​ដោយ​សារ​កូវីដ១៩ អឺរ៉ុប​ត្រូវ​ការ​ត្រូវ​រ៉ូវ​ជាមួយ​ចិន។ ស្តី​​អំពី​សំណុំ​រឿង​សំខាន់ៗ​បែប​ពហុជាតិ​ ដូច​ជា​ បញ្ហា​អាកាសធាតុ សុខភាព​ និង​ការ​គាំទ្រ​សេដ្ឋកិច្ច​បំណុល​-ដោះស្រាយ​បំណុល​ក្នុង​ក្របខ័ណ្ឌ​ហ្សេ២០វិញ អឺរ៉ុបកាន់​តែ​​ចាំ​បាច់​ត្រូវ​សហការ​ជាមួយ​ចិន ប្រសិន​បើ​ចង់​​​ដោះស្រាយ​ប្រកប​ដោយ​ប្រសិទ្ធភាព៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ