អានតួអត្ថបទ
ថៃ-នយោបាយ

ថៃ៖ អ្នកប្រជាធិបតេយ្យ​ធ្វើ​បាតុកម្ម ថ្ងៃខួបទី៨៨ ​នៃ​​ការ​ដួល​រលំ​របប​រាជានិយម​ផ្តាច់ការ​ឆ្នាំ​​១៩៣២

បាតុករម្នាក់ តែងខ្លួន​តាម​បែបកងទ័ពសម័យ​មុន ឈរអាន​​សារ ទាមទារឲ្យ​កែប្រែរដ្ឋធម្មនុញ្ញ នៅក្បែរស្តូបនិម្មិតរូបនៃការដួលរលំរបបរាជានិយមថៃ ថ្ងៃទី​២៤ មិថុនា ១៩៣២។ បាងកក ថ្ងៃទី​ ២៤ មិថនា ២០២០
បាតុករម្នាក់ តែងខ្លួន​តាម​បែបកងទ័ពសម័យ​មុន ឈរអាន​​សារ ទាមទារឲ្យ​កែប្រែរដ្ឋធម្មនុញ្ញ នៅក្បែរស្តូបនិម្មិតរូបនៃការដួលរលំរបបរាជានិយមថៃ ថ្ងៃទី​២៤ មិថុនា ១៩៣២។ បាងកក ថ្ងៃទី​ ២៤ មិថនា ២០២០ REUTERS - ATHIT PERAWONGMETHA
ដោយ៖ ម៉ម ពិសី
១៨ នាទី

នៅទីក្រុងបាងកក កាលពីថ្ងៃពុធ ទី២៤មិថុនា ក្រុមសកម្មជនប្រជាធិបតេយ្យមួយក្រុម បានជួបជុំគ្នានៅក្បែរវិមានរដ្ឋសភាថៃ ដើម្បីរំលឹកខួបនៃការដួលរលំ របបរាជានិយមផ្តាច់ការថៃ ថ្ងៃទី២៤ មិថុនា ឆ្នាំ១៩៣២។ ការជួបជុំរំលឹកខួបនេះ ក៏ជាឱកាសផងដែរ ឲ្យពួកគេអាចបរិហាររិះគន់ ចំពោះរបបដឹកនាំថៃបច្ចុប្បន្ន ដែលពួកគេយល់ថា អំណាចទាំងស្រុង ស្ថិតនៅក្នុងកណ្តាប់របស់ក្រុមយោធា និងស្ថាប័នព្រះមហាក្សត្រ ហើយដែលវាមានលក្ខណៈកាន់តែផ្តាច់ការ ខ្លាំង នៅក្រោយការធ្វើរដ្ឋប្រហារយោធា នៅឆ្នាំ២០១៤។

ផ្សាយពាណិជ្ជកម្ម

មនុស្សប្រមាណជាង១០០នាក់ បានមកជួបជុំគ្នា នៅទីលានមួយ​ក្បែរវិមានរដ្ឋសភាថៃ នៅថ្ងៃទី​២៤មិថុនា ដើម្បីរំលឹក​ខួប​ នៃការដួលរលំរបបរាជានិយមផ្តាច់ការ ថ្ងៃទី​២៤មិថុនា១៩៣២។ អ្នកខ្លះមានកាន់បដា ដែលមានសរសេរថា “ត្រូវតែ​រំលាយរដ្ឋធម្មនុញ្ញដែលការពាររបបយោធា”។ បដាខ្លះសរសេរថា “ប្រទេសនេះ ជារបស់ប្រជាពលរដ្ឋថៃទាំងអស់”។ ចំណែកនៅព្រឹកព្រលឹមស្រាងៗ មានសកម្មជនប្រជាធិបតេយ្យមួយក្រុមទៀត បានជួបជុំគ្នា នៅក្បែរវិមានប្រជាធិបតេយ្យ​ថៃ ដែលស្ថិតនៅមិនឆ្ងាយប៉ុន្មាន ពីទីតាំងស្តូបនិម្មិតរូប រំលឹកការដួលរលំនូវរបបរាជានិយមផ្តាច់ការ។

សកម្មជនម្នាក់ឈ្មោះ Pachanee Kamnak បានថ្លែងប្រាប់អ្នកកាសែតថា៖ "រដ្ឋាភិបាលបច្ចុប្បន្ននេះ កំពុងតែព្យាយាម​​កាត់បន្ថយសិទ្ធិអំណាចរបស់ប្រជាពលរដ្ឋ"។ ស្ត្រីសកម្មជនម្នាក់ទៀត បានលើកឡើងថា៖ "រដ្ឋធម្មនុញ្ញ ត្រូវតែត្រូវបាន​តាក់តែងឡើង​ដោយប្រជាពលរដ្ឋ និងដើម្បីបំរើប្រយោជន៍ប្រជាពលរដ្ឋ មិនមែនដើម្បីការពារអំណាច របស់ក្រុមបក្សពួកណាមួយឡើយ"។ សំដីរបស់ស្ត្រីរូបនេះ គឺបានសំដៅទៅដល់ ការធ្វើកំណែទម្រង់​រដ្ឋធម្មនុញ្ញ នៅឆ្នាំ២០១៧ ធ្វើឡើង​ដោយរបបសិកថៃ ដឹកនាំដោយលោក ប្រាយុទ្ធ ចានអូចា។

គួរកត់សំគាល់ថា ថ្វីបើថៃមានរបបរាជានិយមអាស្រ័យរដ្ឋធម្មនុញ្ញមែន ក៏ប៉ុន្តែស្ថាប័នព្រះមហាក្សត្រថៃ នៅតែរក្សាអានុភាពអំណាចដ៏ធំ នៅក្នុង​វិស័យនយោបាយ និងកងទ័ព​។ ជាងនេះទៀត កងទ័ពថៃ ក្រោមការដឹកនាំរបស់បក្សពួក លោក​ប្រាយុទ្ធ ចាន់អូចា បានបង្កើន​ឥទ្ធិពល​កាន់តែខ្លាំង ក្នុងការក្តោបក្តាប់អំណាច​ និងការពាររាជបាល្ល័ង្គ។

គួរកត់សំគាល់ដែរថា ជាមួយនឹងកាលៈទេសៈសេដ្ឋកិច្ចរាំងស្ទះ មនុស្សបាត់បង់ការងារ ដោយសារតែ​កូវីដ១៩ នាពេលបច្ចុប្បន្ន បានធ្វើឲ្យ​សម្លេងរិះគន់កាន់តែច្រើន ទៅលើ​រដ្ឋាភិបាលដឹកនាំ​ដោយ​​លោក​ប្រាយុទ្ធ។ ជាងនេះទៀត ករណីសកម្មជន​ប្រឆាំងម្នាក់ ដែលបានបាត់ខ្លួន​យ៉ាងសំងាត់ នៅទីក្រុងភ្នំពេញកាលពី​ដើមខែមិថុនានេះ បានធ្វើឲ្យ​ក្រុមប្រជាធិបតេយ្យថៃ បន្ថែមការចោទប្រកាន់ ទៅលើរដ្ឋាភិបាល​លោក​ប្រាយុទ្ធ ចាន់អូចា។ ដំណឹងស្តីពីការភៀសព្រះកាយរបស់ស្តេចថៃ ទៅសោយសុខនៅឯប្រទេសអាល្លឺម៉ង់ ជាមួយស្រីស្នំជាច្រើននាក់ ក្នុងខណៈដែលប្រជាជនថៃ​ទូទាំងប្រទេ​ស ជួបការលំបាក ដោយសារកូវីដ១៩ ក៏បានធ្វើឲ្យ​មានការខឹងសម្បារផងដែរ។

នៅថៃ ទោសប្រមាថព្រះជេស្តា ព្រះមហាក្សត្រ និងគ្រួសាររាជវង្ស អាចប្រឈមនឹងទោសជាប់ពន្ធនាគារ រយៈពេល​១៥ឆ្នាំ។ តែលោកប្រាយុទ្ធ ចាន់អូចា បាន​អះអាងថា ព្រះមហាក្សត្រថ្មី បានសំណូម​ពរ ឲ្យ​រដ្ឋាភិបាល​ឈប់​អនុវត្តច្បាប់នេះ ទៅលើប្រជាពលរដ្ឋ។ ក៏ប៉ុន្តែក្រុមសកម្មជនសិទ្ធិមនុស្ស​នៅថៃ បានលើកឡើងថា ថ្វីបើគេឈប់ប្រើច្បាប់នេះមែន តែគេបានបង្កើតច្បាប់ថ្មី គឺច្បាប់គ្រប់គ្រងបទល្មើសតាមបណ្តាញអ៊ីនធ័រណិត។ អ្នករិះគន់ រដ្ឋាភិបាល ឬស្ថាប័នព្រះមហាក្សត្រ តាមបណ្តាញអ៊ីនធ័រណិត អាចប្រឈមនឹងទោស​ជាប់ពន្ធនាគាររហូតដល់៥ឆ្នាំ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ