អានតួអត្ថបទ
ចិន-ហុងកុង

ចិន​សម្ពោធ​បើក​ការិយាល័យ​ការពារ​សន្តិសុខ​ជាតិ​នៅ​ហុងកុង

ពិធី​សម្ពោធ​បើក​ការិយាល័យ​ការពារ​សន្តិសុខ​ជាតិ​ នៅ​ហុងកុង ថ្ងៃទី ៨​កក្កដា ២០២០
ពិធី​សម្ពោធ​បើក​ការិយាល័យ​ការពារ​សន្តិសុខ​ជាតិ​ នៅ​ហុងកុង ថ្ងៃទី ៨​កក្កដា ២០២០ © 中联办官网
ដោយ៖ អៀង សុខម៉ិញ
1 នាទី

មួយសប្តាហ៍​ក្រោយ​ពី​ច្បាប់​សន្តិសុខ​ជាតិ​ហុងកុង​ចូល​ជាធរមាន ចិន​បាន​បើក​សម្ពោធ​នៅព្រឹក​​ថ្ងៃពុធ​ទី ៨ កក្កដា ២០២០ ស្ថាប័ន​សន្តិសុខ​ជាតិ​នៃ​រដ្ឋាភិបាល​មជ្ឈិមក្នុង​តំបន់​រដ្ឋបាល​ពិសេស​ហុងកុង នៅកណ្តា​ល​ទីក្រុង​ហុងកុង។ ការិយាល័យ​ការពារ​សន្តិសុខ​ជាតិ​បើក មាន​ន័យ​ថា ជា​លើក​ទី​មួយ​ក្នុង​ប្រវត្តិសាស្ត្រ​ ភ្នាក់ងារ​ចារកិច្ច​ចិន​ អាច​ចាប់​ផ្តើម​ប្រតិបត្តិការ​ យ៉ាង​ចំហ​ នៅ​លើ​ទឹក​ដី​ហុងកុង។

ផ្សាយពាណិជ្ជកម្ម

ពិធី​​សម្ពោធ​ បើក​ការិយាល័យ​ការពារ​សន្តិសុខ​ជាតិ​ ដែល​ជានិម្មិត្ត​រូប​​នៃ​ការ​ពង្រីក​អំណាច​ ​ចិន​លើ​ទឹក​ដី​ហុងកុង​ ប្រព្រឹត្ត​ទៅយ៉ាង​អធឹកអធម។ ប៉ូលិស​បានបិទ​ខ្ទប់​ផ្លូវ និង​ពង្រាយ​កង​កម្លាំង​សន្តិសុខ​យ៉ាង​សន្ធឹកសន្ធាប់​នាឱកាស​នេះ។

ផ្លាកឈ្មោះ​ស្ថាប័ន និង​ទង់ជាតិ​ចិន​​បាន​បក់​រវិចៗ​នៅ​មុខសណ្ឋាគារ​ Metropark ដែល​ពេលនេះ​​បាន​ក្លាយ​​ជា​​ការិយាល័យរបស់​ភ្នាក់ងារ​​ការពារ​សន្តិសុខ​ជាតិ​។ ជា​ជម្រើស ​​​ប្រកប​ដោយ​យុទ្ធសាស្ត្រ​  ព្រោះទីតាំង​​នេះ​ស្ថិត​នៅ​ចំ​ពី​មុខ​ឧទ្យាន​ Victoria ដែល​ជា​កន្លែងប្រមូល​ផ្តុំ​គ្នា​ធ្វើ​​បាតុកម្ម​ ​របស់​​សកម្មជន​ប្រជាធិបតេយ្យ​​ តាំង​ពី​ជា​ច្រើន​ឆ្នាំ​កន្លង​មក។

លោក Zhang Yanxiong  ស្ហង់ យ៉ង់ស្យុង ប្រធាន​ការិយាល័យ​ និង​លោកស្រី ការី ឡាំ បាន​មក​ធ្វើ​ជាអធិបតី​ក្នុង​ពិធី​បើក​សម្ពោធ​ការិយាល័យ​ បាន​ប្រកាស​ថា ថ្ងៃ​នេះ​ជាថ្ងៃ​​ប្រវត្តិសាស្ត្រ​ ហុងកុង​បាន​បោះជំហាន​ចូល​ដំណាក់កាល​ថ្មីដែល​មាន​ប្រព័ន្ធ​តុលាការ​និង​យន្តការ​ធានា​សន្តិសុខ​ជាតិ​។ ស្ថាប័ន​ការពារ​សន្តិសុខ​ជាតិ​ចិន ជា​ដៃគូ​ដ៏​សំខាន់​​ក្នុង​ជួយ​ការពារ​សន្តិសុខជាតិ​ហុងកុង។ នេះ​ជា​ប្រសាសន៍​របស់​លោកស្រី​ ការី ឡាំ ដែល​ក្រុម​បក្ស​ប្រឆាំង​ចាត់​ទុក​ជា​អាយ៉ង​របស់​ប៉េកាំង។

បេសកកម្ម​របស់​ការិយាល័យ​ការពារ​សន្តិសុខ​ជាតិ គឺ​ត្រួត​ពិនិត្យ​និង​ធានា​ការ​អនុវត្ត​ច្បាប់​សន្តិសុខ​ជាតិ​ថ្មីនៅ​ហុងកុង​ ដែល​ប៉េកាំង​ទើប​សម្រេច​អនុម័ត​កាលពី​សប្តាហ៍​មុន។ ការិយាល័យ​នេះ​ ជា​ទីបញ្ជាការ​ដ្ឋាន​របស់​ភ្នាក់​ចារកិច្ច​ចិន​ដែល​មាន​បន្ទុក​អង្កេត​​និង​តាម​ដាន​ជន​ជាប់​ចោទ​ប្រព្រឹត្ត​ទង្វើ​ប៉ះពាល់​ដល់​សន្តិសុខ​ហុងកុង។ ពោល​គឺ​អំណើះ​ទៅ​ ​ភ្នាក់ងារ​ចារកិច្ច​ចិន​​អាច​បំពេញ​ប្រតិបត្តិការ​ ដោយ​ចំហ​ និង​ដោយ​ពេញ​មុខនៅ​លើ​ទឹក​ដី​ហុងកុង៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ