អានតួអត្ថបទ

អង់គ្លេស​ផ្តើម​លក់​អាវុធ​ជាថ្មី​ឱ្យ​អារ៉ាប់ប៊ីសាអូឌីត

លោកស្រី លីស ត្រាស់ ( Liz Truss) រដ្ឋមន្ត្រី​ក្រសួង​ពាណិជ្ជកម្មអន្តរជាតិ​ របស់​អង់គ្លេស​។​
លោកស្រី លីស ត្រាស់ ( Liz Truss) រដ្ឋមន្ត្រី​ក្រសួង​ពាណិជ្ជកម្មអន្តរជាតិ​ របស់​អង់គ្លេស​។​ 10 Downing Street/AFP
ដោយ៖ ហេង ឧត្តម
1 នាទី

ក្នុងសប្តាហ៍​​នេះ អង់គ្លេស បាន​ប្រកាស​ដ៏​គួរ​ឱ្យ​ភ្ញាក់ផ្អើល​ពីការ​ចាប់ផ្តើម​លក់​គ្រឿង​សព្វាវុធ​ជាថ្មី ឱ្យ​ទៅ​ប្រទេស​អារ៉ាប់​ប៊ី​សាអូឌីត​។ សេចក្តីប្រកាស​នេះ ធ្វើឡើង​ដោយលោកស្រី លីស ត្រាស់ ( Liz Truss) រដ្ឋមន្ត្រី​ក្រសួង​ពាណិជ្ជកម្មអន្តរជាតិ​ របស់​អង់គ្លេស​។​

ផ្សាយពាណិជ្ជកម្ម

អង់គ្លេស​បាន​​ផ្អាកលក់អាវុធ​ឱ្យអារ៉ាប់ប៊ីសាអូឌីត​ជាង​មួយ​ឆ្នាំហើយ​ ដោយសារតែប្រទេស​អារ៉ាប់ប៊ីសាអូឌីតនេះ ជាប់​ផុង​ជាមេខ្លោង​បង្ក​សង្គ្រាម​អមនុស្ស​ជាតិ​នៅ​ប្រទេស​យេម៉ែន។ តែពេល​នេះ រដ្ឋមន្ត្រីក្រសួងពាណិជ្ជកម្មអន្តរជាតិអង់គ្លេស​ គូស​បង្ហាញពីការ​យល់ឃើញ​របស់​រាជ​រដ្ឋាភិបាល​អង់គ្លេស​ថា អារ៉ាប់ប៊ីសាអូឌីត ពេល​នេះ​ មាន​ចេតនាស្មោះ​និង​មាន​សមត្ថភាព​គោរព​​ច្បាប់​មនុស្សធម៌​អន្តរជាតិ។ បើតាម​លោកស្រីរដ្ឋមន្ត្រី​ លីស ត្រាស់ ( Liz Truss) គឺវាគ្មាន​គ្រោះថ្នាក់ជាក់​ស្តែង​​អ្វីឡើយ​ក្នុង​ការ​នាំចេញ​អាវុធ​និងគ្រឿង​ចម្បាំង​យោធា ទៅលក់​ឱ្យ​​អារ៉ាប់ប៊ីសាអូឌីត​។

សេចក្តីប្រកាស​របស់​រដ្ឋមន្ត្រីអង់គ្លេស​នេះ គឺ​ធ្លាក់​មក​បន្ទាប់តែពីប៉ុន្មាន​ថ្ងៃប៉ុណ្ណោះ​ដែល​អង់គ្លេស​បាន​ដាក់​ទោស​ទណ្ឌកម្ម​ចំពោះ​មនុស្ស​២០នាក់ ជា​ជនជាតិ​​អារ៉ាប់ប៊ីសាអូឌីត ដែល​ជាប់ពាក់ព័ន្ធ​រួម​គំនិត​គប់គិត​នឹង​ឃាតកម្ម​សម្លាប់​អ្នក​កាសែត​ Jamal Khashoggi  ដោយ​កាត់ខ្លួន​កងៗ នៅ​ក្រុង Istanbul​។

គួររម្លឹក​ជូនថា អារ៉ាប់ប៊ីសាអូឌីត​ បាន​ផ្តើម​លូក​ដៃ​ចូល​ក្នុង​សង្គ្រាម​នៅ​ប្រទេស​យេម៉ែន​នៅ​ឆ្នាំ​២០១៥ ដែល​បណ្តាល​ឱ្យ​មនុស្ស​រាប់​ពាន់​នាក់​បាត់បង់​ជីវិត ហើយ​អង្គការ​សហប្រជាជាតិ​ បាន​ក​ត់​សម្គាល់ថា សង្គ្រាម​យេម៉ែន​នេះ គឺ​ជា​វិបត្តិ​យ៉ាងធ្ងន់ធ្ងរ​​ចំពោះ​មនុស្ស​ជាតិ។​ ចាប់ពី​២០១៥មក អង់គ្លេស​បាន​លក់​អាវុធឱ្យ​​អារ៉ាប់ប៊ីសាអូឌីត​ និង​បាន​ចំណេញ​ទឹកប្រាក់ ប្រមាណ​ ​៥ពាន់​លាន​លីវ្រ (ប្រហែល​ជាង​៥.៦ពាន់​លាន​អឺរ៉ូ)។ តែទីបំផុត​  រដ្ឋាភិបាល​អង់គ្លេស បាន​ត្រូវ​តុលាការ​របស់ខ្លួន​ ចេញសេចក្តី​សម្រេច​ឱ្យ​ផ្អាក​លក់​អាវុធ​ឱ្យ​អារ៉ាប់ប៊ីសាអូឌីត​ កាលពី​ខែ​មិថុនា​២០១៩ ឆ្នាំមុន​​ ដោយសារតែ​មើលឃើញ​ពី​ករណី​វិបត្តិ​មនុស្ស​ជាតិ​និងអមនុស្សធម៌​ បង្កចេញពី​សង្គ្រាម​​នេះ​។​

នៅ​ពេល​នេះ អង្គការ​សមាគម​ដែល​ប្រឆាំង​នឹងការ​លក់អាវុធ​​ ដូចជាអង្គការ CAAT ក៏​បាន​ថ្កោលទោស​អង់គ្លេស និងថា ជាការ​សម្រេច​ចិត្ត​ដ៏​គួរ​ឱ្យ​អាម៉ាស់ និង​អសីលធម៌​បំផុត ​ដែលអង់គ្លេស​​សម្រេច​ផ្តើម​លក់​គ្រឿង​ចម្បាំងជាថ្មី​​​ឱ្យ​អារ៉ាប់ប៊ីសាអូឌីត។​ តាម​អង្គការ​ដដែល នៅពេល​ដែល​ឃើញ​គ្រាប់​បែកសម្លាប់​មនុស្ស​របស់​​អង់គ្លេស ​ទម្លាក់​នៅមូលដ្ឋានសឹក​​សង្គ្រាម​យេម៉ែន គឺ​ដូចជា ​អង់គ្លេស​ដើរតួ​បង្កការ​ទម្លាក់​គ្រាប់​ដោយ​ផ្ទាល់ដូច្នោះ​ដែរ៕​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ