អានតួអត្ថបទ
ម៉ាឡេស៊ី

ប៉ូលិស​ម៉ាឡេស៊ី​ហៅ​អ្នក​កាសែត​របស់​ទូរទស្សន៍Al Jareera​ទៅ​សួរ​ចម្លើយ

ទូរទស្សន៍​ Al Jazeera
ទូរទស្សន៍​ Al Jazeera livestation.com/en/aljazeera-mubasher-misr
ដោយ៖ អៀង សុខម៉ិញ
1 នាទី

នៅ​ថ្ងៃ​សុក្រ​ទី ១០ កក្កដា ២០២០​នេះ ប៉ូលិស​ម៉ាឡេស៊ី បាន​កោះ​ហៅ​អ្នក​កាសែត​​របស់​ទូរទស្សន៍​ អាល់ហ្សាហ្សេរ៉ាAl Jareera ៦​នាក់ ក្នុង​នោះ​៥​នាក់​ជា​ជនជាតិ​អូស្ត្រាលី ទៅ​សួរ​​ចម្លើយ ជុំ​វិញ​ការ​ផ្សាយ​ឯកសារ​មួយ​ទាក់ទង​នឹង​ជន​អន្តោប្រវេសន៍។ ​ បទ​យក​ការណ៍​របស់​ទូរទស្សន៍​ បានធ្វើ​ឱ្យ​​អាជ្ញាធរ​ម៉ាឡេស៊ី ខឹង​សម្បារ​យ៉ាង​ខ្លាំង។ មាន​ទីស្នាក់ការ​គ្រប់គ្រង​ការ​ផ្សាយ​ប្រចាំ​តំបន់​អាស៊ី​នៅ​កូឡាឡាំពួ ​ទូរទស្សន៍​កាតា បាន​សម្តែង​ការ​ហួស​​ចិត្ត​ខ្លាំង​នឹង​ឥរិយាបថ​​របស់​អាជ្ញាធរ​ម៉ាឡេស៊ី​។

ផ្សាយពាណិជ្ជកម្ម

កាលពី​សប្តាហ៍មុន ទូរទស្សន៍​ Al Jareera ​បានចាក់​ផ្សាយ​បទ​យកការណ៍​មួយ​ មាន​ចំណង​ជើង​ថា “ចាប់ខ្លួន ​​ពេល​​ម៉ាឡេស៊ីបិទខ្ទប់ប្រទេស”។ ជា​ឯកសារ​ ​រៀប​រាប់​អំពី​សកម្មភាព​ចាប់​ខ្លួន​ជន​អន្តោប្រវេសន៍​ខុស​ច្បាប់​ ជា​ច្រើន​រយ​នាក់​ នៅ​តាម​តំបន់​បិទ​ខ្ទប់​ រួច​បញ្ជូន​ទៅ​ ​ឃុំ​ឃាំង។ ផ្សាយ​ចប់​​ ប្រតិកម្ម​មាន​ផ្ទុះ​ឡើង​ជា​ហូរ​ហែ​ក្នុង​អ៊ីនធ័រនែត។ រដ្ឋមន្ត្រី​ក្រសួង​ការពារ​ជាតិ​​ម៉ាឡេស៊ី​បាន​ថែម​ទាំង​ស្នើ​សុំ​ឱ្យ​ទូរទស្សន៍​ធ្វើ​ការ​សុំ​ទោស​ផង។

​រដ្ឋាភិបាល​ម៉ាឡេស៊ី​យល់​ថា ព័ត៌មាន​ទាំង​នោះ​មាន​ទំនោរ និង​មិន​ពិត​ ទើបឱ្យ​​ប៉ូលិស​បើក​អង្កេតថា​តើ​​ ទូរទស្សន៍ពិត​ជា​បាន​​រំលោភ​ច្បាប់​​ប្រឆាំ​ងនឹង​ការ​បះបោរ បរិហារកេរ្ត៍ និង​ផ្សព្វផ្សាយ​ព័ត៌មាន​ប្រមាថផង​ ​និង​ដើម្បីផ្តល់​ឱកាស​ឱ្យ​អ្នកកាសែត​បានពន្យល់​​បំភ្លឺ​​ផង។

​នៅ​ក្នុង​ចំណោម​អ្នក​កាសែត​Al Jareeraទាំង​៦​នាក់​ ​ ​មាន​៥​នាក់​ជា​ជន​ជាតិ​អូស្ត្រាលី  និងម្នាក់​ជា​ប្រធានការិយាល័យ​ ​ដែល​ត្រូវ​បាន​ប៉ូលិស​ក្រុង​កូឡាឡាំពួរ ហៅ​យក​​ទៅ​​សួរ​ចម្លើយ នៅ​ថ្ងៃ​សុក្រ​ទី​១០​កក្កដា ​រយៈ​ពេល​៥​ម៉ោង​។ ជា​ការ​សួរ​ចម្លើយ​ក្នុង​នាម​ជា​សាក្សី មិន​មែន​ក្នុង​នាម​ជា​ជន​សង្ស័យ​ទេ នេះ​ជា​ការ​គូស​បញ្ជាក់​របស់​ប៉ូលិ​ស​កំពុង​តាម​ស្វែង​រក​ចាប់​ជនជាតិ​បង់ក្លាដែស​ ដែល​បង្ហាញ​មុខ​នៅ​ក្នុង​បទ​យកការណ៍។

សម្រាប់​រដ្ឋាភិបាល​ម៉ាឡេស៊ី ​ការ​ចាប់ខ្លួន​ក្នុង​ចំណោម​​ជន​អន្តោប្រវេសន៍​ខុស​ច្បាប់​កាលពី​ខែ​ឧសភា​កន្លង​មក​នេះ ជា​​វិធានការ​ការពារ​សុខភាព​សាធារណៈទល់​នឹង​កា​ររាតត្បាត​របស់​កូវីដ១៩​​តែ​ប៉ុណ្ណោះ។ ប៉ុន្តែ​បើ​តាម​សមាគម​ការពារ​សិទ្ធិមនុស្ស ការ​​ឃុំ​ឃាំង​​បង្កើន​គ្រោះ​ឆ្លង​កូរ៉ូណាវីរុស​ទៅ​វិញ​ទេ។ ជនអន្តោប្រវេសន៍​ខុស​ច្បាប់​ទាំង​នោះ​ភាគច្រើន​ជា​ជនជាតិ​ឥណ្ឌូណេស៊ី បង់ក្លាដែស និង​ភូមា។

​អង្គការ​ការពារ​សិទ្ធិមនុស្ស​ក៏​បាន​បរិហារ​ដែរ ថា​សេរីភាព​នៃ​ការ​បញ្ចេញ​មតិ​កំពុង​រួម​តូច​ទៅៗ។ ការ​ចាប់ខ្លួន​អ្នក​កាសែត​ និងសកម្មជន​សិទ្ធិមនុស្ស​មាន​កាន់​តែ​ច្រើនឡើងៗ​នា​រយៈ​ពេល​ប៉ុន្មាន​ខែ​ចុងក្រោយ​នេះ ពោល​គឺ​តាំ​ងពី​រដ្ឋាភិបាល​កំណែទម្រង់​និយម​របស់​លោក​ មហាធៀរ មហាម៉ាត់​ បាន​ធ្លាក់​រដ្ឋាភិបាល​របស់​ក្រុម​អង្គការ​បង្រួម​បង្រួម​ជាតិ​ម៉ាឡេស៊ី ឡើង​កាន់​អំណាច​នៅ​ខែ​កុម្ភៈ​មក។ អ្នក​ទទួល​ខុស​ត្រូវ​វេបសាយ​ព័ត៌មាន​ដ៏​ល្បី​មួយ ត្រូវ​ប្រឈម​នឹង​តុលាការ​នៅ​សប្តាហ៍​ក្រោយ ​ពី​បទ​បាន​ផ្សព្វផ្សាយ​ពាក្យ​​រិះគន់​ប្រព័ន្ធ​តុលាការ​ជាតិ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ