ទស្សនៈព្រឹត្តិការណ៍ពិភពលោក

កូវីដ១៩ បាន​ធ្វើ​ឱ្យ​ក្រុមហ៊ុនប្រេង​ឥន្ធនៈ​ចិនស្គាល់​ការ​ខាតបង់​ជា​លើក​ទីមួយ

សំឡេង ០៤:០៨
ដោយហេតុកូវីដ១៩ ក្រុមហ៊ុនប្រេង​ចិន​ស្គាល់​ការខាតបង់​ជា​លើក​ទី​មួយ​
ដោយហេតុកូវីដ១៩ ក្រុមហ៊ុនប្រេង​ចិន​ស្គាល់​ការខាតបង់​ជា​លើក​ទី​មួយ​ REUTERS/Stringer

ផលវិបាក​បង្ក​ឡើង​ដោយ​វិបត្តិកូវីដ១៩ ធ្ងន់ធ្ងរ​ខ្លាំងណាស់។ គ្មាន​ក្រុមហ៊ុន​ប្រេង​ឥន្ធនៈណាមួយ​បាន​រួច​ខ្លួន​ទេ។ ដោយ​គ្មានការ​ភ្ញាក់ផ្អើល ក្រុមហ៊ុនយក្ស​ផ្នែក​ប្រេង​ឥន្ធនៈ​ មួយ​ហើយ​មួយ​ទៀត ​បាន​បង្ហាញតុល្យការ​នៃ​ការ​ខាត​បង់​ដ៏​មហិមារបស់​ខ្លួន  ជា​បន្តបន្ទាប់គ្នា។ ក្រុមហ៊ុន​ប្រេង​ឥន្ធនៈចិន​ ក៏​មិន​អស្ចារ្យ​ខុស​ប្លែក​ពី​គេ។ បន្ទាប់​ពី​ក្រុមហ៊ុន PetroChina ​ដល់​វេនក្រុមហ៊ុន​ Sinopec ដែល​ប្រកាស​ថ្ងូចថ្ងូរ ជាលើកទីមួយ គិត​ចាប់​តាំង​ពី​ជាង​២០​ឆ្នាំមក អំពី​​ការ​ខាត​បង់​ដ៏​សម្បើមរបស់​ខ្លួន។

ផ្សាយពាណិជ្ជកម្ម

​កូវីដ១៩​បាន​បង្ក​ការ​ខូចខាត​ខ្លាំង​ដល់​វិស័យ​ប្រេងឥន្ធនៈ។ កាលពី​ខែចុង​ខែ​សីហា ក្រុមហ៊ុន​តូតាល់​បារាំង បាន​ប្រកាស​ខាតបង់​អស់​៨៤០០​លាន​ដុល្លារ។ ក្រុមហ៊ុនENI​អ៊ីតាលី ជាគូប្រជែង​តូតាល់ ប្រកាសខាត៥២០០លាន​ដុល្លារ។ Shell ក្រុមហ៊ុន​កូនកាត់​អង់គ្លេសហូឡង់ខាតខ្លាំង​ជាង​គេ​បំផុត (១៨១០០០លាន​ដុល្លារ) នៅ​ត្រីមាស​ទីពីរ​នៃ​ឆ្នាំ​២០២០។ ការ​ខាតបង់​ដ៏​ធំធេង​ខ្លាំង​របស់​ក្រុមហ៊ុន​ឥន្ធនៈ​យក្ស​ទាំងបី គឺ​បណ្តាលមក​ពី​​ការ​បាត់​បង់​តម្លៃ​ភាគ​ហ៊ុន​នៅលើ​ទីផ្សារមូលប័ត្រ។

ចុះក្រុមហ៊ុន​ប្រេង​ឥន្ធនៈ​ចិន តើ​យ៉ាងណាដែរ ? ប្រទេសចិន​បាន​ងើប​ចេញ​ពី​វិបត្តិកូវីដ​១៩​មុន​គេ​ ប៉ុន្តែ​កូរ៉ូណាវីរុស​ ក៏​​បាន​ពង្រាប​ក្រុមហ៊ុនយក្ស​​របស់ចិន មិន​ខុស​ពី​គូប្រជែងអន្តរជាតិ​ផ្សេងៗ​ទៀត​ឡើយ។ គិត​ចាប់តាំង​ពីបាន​ចូល​​ក្នុង​ទីផ្សារមូលប័ត្រ​ហុងកុង មានលក់ភាគហ៊ុន ​នៅ​ឆ្នាំ​២០០០មក ​ក្រុមហ៊ុនSinopec ​បាន​ស្គាល់​ការ​​ខាត​បង់​ ជាលើក​ទីមួយ អស់​២២ពាន់​លានយ័ន (៣២០០លាន​ដុល្លារ)។ ដោយ​ហេតុ​តែតម្រូវការ​ពិភពលោកខ្យោយ ក្រុមហ៊ុន​ Sinopec ឬ​ PetroChina ដែល​បើទោះ​បី​ជា​ជាប់ឈ្មោះ​ជា​ក្រុមហ៊ុន​ចម្រាញ់​ប្រេង​លំដាប់​ទីមួយ​ នៅ​​អាស៊ី​ក្តី ក៏​ក្រុមហ៊ុន​អាចចម្រាញ់ប្រេង​ឆៅ​បាន​តែ ១១១លានតោន​ តែ​ប៉ុណ្ណោះ​ នៅ​ចន្លោះ​ពី​ខែ​មករា​ដល់​ខែ​មិថុនា​២០២០ ពោល​គឺ​១០%​តិច​ជាង​កាលពីឆ្នាំ​២០១៩។

តុល្យការ​របស់​ក្រុមហ៊ុន​ផលិត​ប្រេង​លំដាប់​ទីមូយរបស់​ចិន​ PetroChina ដែល​ទើប​បាន​ផ្សព្វផ្សាយកាលពី​ពីរបីថ្ងៃមុន កាន់​តែ​អាក្រក់​ខ្លាំង​ទៅ​ទៀត​ដោយ​ក្រុមហ៊ុន​បាន​ខាតបង់​ អស់ ៣០ពាន់​លាន​យ័ន (​៤៤០០លាន​ដុល្លារ) នៅក្នុង​ឆមាស​ទីមួយ​នៃ​ឆ្នាំ​២០២០។ ដូច​ក្រុមហ៊ុន​ប្រេង​អឺរ៉ុប​ដែរ PetroChina រង​គ្រោះខ្លាំង​ ដោយ​ហេតុ​តែ​​តម្លៃ​ប្រេង​លើ​ទីផ្សារបាន​ដាំក្បាលចុះ​ផង តម្រូវការ​ក្នុង​ស្រុក និង​ពិភពលោក​ ទុច​ងក់​ផង។ នៅលើ​ទីផ្សារ​ភាគហ៊ុន​ ​ក្រុមហ៊ុន​ខាត​បង់​អស់​១២០០លានដុល្លារ។ ជា​ចុងក្រោយ​ ក្រុមហ៊ុនរដ្ឋ​ចិន CNOOC, China National Offshore Oil Corp ដែល​មានជំនាញ​នាំ​ចេញ​ប្រេង​ទៅបរទេស​ច្រើន​ជាងគេ​វិញ​ មាន​ស្ថានភាព​ល្អ​ប្រសើរ​ជាង​គេ​មិនខាតបង់​មែន តែ​ប្រាក់​ចំណេញ​បានរួម​តូច​អស់​ពីរ​ភាគ​បី។

​ទន្ទឹម​​គ្នា​នោះ ក្រុមហ៊ុន​សាធារណៈ​គ្រាក់ៗ​​​របស់​ចិនទាំង​បី​ នៅ​តែ​បន្ត​ផលិតកម្ម​​ប្រេង​ យ៉ាង​ពេញ​ទំហឹង​ដដែល។ នៅ​ឆមាស​ទីមួយ ផលិតផល​របស់​ក្រុមហ៊ុន Sinopec ចុះថយ​តែ​០,៤%​ ឯ​ក្រុមហ៊ុនCNOOC ​ឡើង​៦% PetroChinaឡើង​៧%។

ប៉ុន្តែ​ស្ថានភាព​៦​ខែខាងមុខ មិន​ច្បាស់លាស់​ទេ។ ChinaCorp ត្រៀមប្រឈម​នឹង​ការ​លំបាក​ខ្លាំង ដោយ​តាំង​ពី​ថ្មីៗ​មក​មានក្រុមហ៊ុន​ប្រេង​បរទេសច្រើន​អាច​​ចូល​មក​ប្រជែង​នៅ​លើ​ទឹកដី​ចិន។ Sinopec គិតថា​សេចក្តី​ត្រូវការ​ផ្នែក​ប្រេង នឹង​ស្ទុះឡើង​វិញ​ តែតម្លៃប្រេងឆៅ​នឹង​នៅ​តែទាបដដែល​ ព្រោះ​សេដ្ឋកិច្ចពិភពលោក​​គ្មានស្ថិរភាព​ និង​មិន​ប្រាកដ​ថាមានកំណើន​ឡើងវិញទេ។​

​កូវីដ១៩ ​​បានធ្វើ​ឱ្យ​សេដ្ឋកិច្ចពិភពលោក​​ គាំង​លែង​ដំណើរ​ការ​​ មួយ​រយៈ។ ​សេដ្ឋកិច្ចគាំង ​សេចក្តីត្រូវ​ការ​ផ្នែក​ប្រេង​ឥន្ធនៈ​ក៏​ថយ​ចុះ ហើយ​អូស​តម្លៃប្រេង និង​ភាគហ៊ុន​​ឱ្យ​ធ្លាក់​ចុះ​ទៅ​តាមនោះ​ដែរ។ ប្រេងបាន​ចុះ​ថ្លៃស្ទើរ​ដល់​ក្រោម​សូន្យ​ផង ក្នុង​អំឡុង​ខែមីនា និង​ទើប​រើប​ឡើង​វិញ​បន្តិច​នៅ​ខែ​មេសា​ប៉ុណ្ណោះ។ ​ពេល​នេះ​តម្លៃប្រេង​បាន​ឡើង​ដល់​ម្តុំ​៤០​ដុល្លារ​ក្នុង​មួយ​ធុង​បារីល​វិញ តែ​ជា​តម្លៃទាប​ជាង​កាលពី​ឆ្នាំទៅ​បើ​ប្រៀបធៀប​នៅ​នឹងពេល​វេលា​ដូច​គ្នា។ តម្លៃ​នៅ​ទាប តម្រូវការផ្នែក​ប្រេងឥន្ធនៈ​អាច​នឹង​​ត្រូវ​នៅ​ទន់​ខ្សោយ​ខ្លាំងនិង​​យូរពេល​​ទៀត ព្រោះ​កូវី១៩​មិន​ទាន់​អស់​អំណាច​រាតត្បាត​របស់​ខ្លួន ហើយ​សន្ទទស្សន៍​សេដ្ឋកិច្ច​នៅតាមបណ្តាប្រទេសជឿនលឿនដែល​ជា​អ្នក​​ត្រូវ​ការ​ប្រេង​ខ្លាំង មិន​ទាន់​បាន​ប្រសើរ​នៅ​ឡើយ​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI