នាទីសុខភាពនិងអនាម័យ

កូវីដ១៩ ៖ តើ​គួរឬមិនគួរ​ពាក់​ម៉ាស ពេល​ធ្វើ​កីឡា​ នៅ​ទី​វាល ?

សំឡេង ១០:៤៣
អ្នក​រត់​ធ្វើ​កីឡានៅប៉ារីស ថ្ងៃទី​២ មេសា ២០២០
អ្នក​រត់​ធ្វើ​កីឡានៅប៉ារីស ថ្ងៃទី​២ មេសា ២០២០ AFP/Archives

ក្នុង​សម័យកាល​កូវីដ ម៉ាស​បាន​ក្លាយ​ជា​របស់​ដ៏​ពេញ​និយម​។ ដើម្បី​សុខភាព​និង​ការពារ​ខ្លួន​ពី​គ្រោះ​ហានិភ័យ​ឆ្លង​កូរ៉ូណាវីរុស​ថ្មី គ្មាន​អ្វី​ប្រសើរ​ជាង​ការ​ពាក់​ម៉ាស់​បន្ថែម​ពីលើ​វិធានការការពារ​ ដូច​ជា​​​រក្សា​គម្លាត​សុវត្ថិភាព​និង​លាង​ដៃ​​ទេ។ ប៉ុន្តែ​នៅ​ពេល​ធ្វើ​កីឡា ហាត់​ប្រាណ​ នៅ​តាម​ទី​វាល​សាធារណៈ​ តើ​គួរ​ឬ​មិន​គួរ​ពាក់​ម៉ាស់ ?

ផ្សាយពាណិជ្ជកម្ម

ប្រឈម​នឹង​កូវីដ១៩ ម៉ាស​បាន​ក្លាយ​ជា​អាវុធ​ការពារ​ខ្លួន​ដ៏​ចាំបាច់​មួយ​របស់​មនុស្ស​ទូទៅ។ នៅ​ប្រទេស​បារាំង អាជ្ញាធរ​បាន​កំហិត​​ឱ្យ​ពលរដ្ឋ​គ្រប់​រូប​ពាក់​ម៉ាស​ជា​ទូទៅ​​ នៅ​គ្រប់​ទិសទី​ ក្នុង​ក្រុង​ធំៗ ដើម្បី​ចៀសវាង​ការឆ្លង​រាតត្បាត​ទ្រង់ទ្រាយ​ធំ​និងចៀសវាង​ការ​បិទ​ខ្ទប់​ប្រទេស​ជា​ថ្មី។ ប៉ុន្តែ​រដ្ឋាភិបាល​បារាំង​បាន​អារ​កាត់​សេចក្តី​ អនុគ្រោះ​ឱ្យ​អ្នក​ធ្វើ​កីឡា​រត់​ត្រឹកៗ និង​អ្នក​សេ្នហា​ការ​ធាក់កង់ ក្នុង​ក្រុង​ មិន​ម៉ាស​បាន។

តាមការ​ពិត សំណួរ​ស្តី​ពី​ការពាក់​ម៉ាស ឬមិនពាក់​ម៉ាស នៅ​ពេល​ធ្វើកីឡា ឬ​ហាត់ប្រាណ ដូច​ជា​ ដើរ រត់ ជិះកង់ ត្រូវ​បាន​ចោទ​សួរ​ឡើងតាំង​ពី​ជំងឺ​កូវីដ​១៩​ផ្ទុះ​ឡើង​ដំបូង​ភ្លាម​ម្ល៉េះ។ តែ​ជា​សំណួរ​គ្មាន​ចម្លើយ។ អ្នក​វិទ្យាសាស្ត្រ​ ប្រទាញ​ប្រទង់​គ្នា និង​​ពុំ​បាន​​​ផ្តល់​អនុសាសន៍​អ្វី​ឱ្យ​បាន​ច្បាស់​លាស់​ទេ​។ ប៉ុន្តែ​ការិយាល័យ​សុខភាព​នៃ​ក្រសួង​កីឡា​បារាំង បាន​បញ្ជាក់​ម្តង​ហើយ​ម្តង​ទៀត ថា​ម៉ាស​មិន​ស៊ី​ចង្វាក់​គ្នា​នឹង​សកម្ម​ភាព​ធ្វើ​កីឡា​ទេ។ ហើយ​ថ្មីៗ​នេះ​ក្រសួង​បាន​ការ​ពារ​ទស្សនៈនេះ​ជា​ថ្មី ទើប​​រដ្ឋាភិបាលបាន​​ចេញ​សេចក្តី​សម្រេច តែ​ម្តង​​កាលពីថ្ងៃ​សុក្រ​ទី ២៨ សីហា ប្រកាស​លើក​លែង​មិន​​ឱ្យ​អ្នក​ស្នេហា​​កីឡា រត់​និង​ជិះកង់ ថា​ចាំ​បាច់​ត្រូវ​តែ​ពាក់​ម៉ាស ដូចក្នុង​ពេល​​ដើរហើរ​ ​ប្រើ​មធ្យោបាយ​ដឹកជញ្ជូន​សាធារណៈ នៅ​ទីបិទជិត ឬ​ទី​ចំហ ទីធ្លា សួន​ឧទ្យាន​ ឬ​តាម​ដង​ផ្លូវ​ ដង​ទន្លេទេ។

ការ​រំខាន​

តើ​ម៉ាសពិត​ជា​មិន​ស៊ី​នឹង​ការ​ធ្វើកីឡា មែន​ឬ​យ៉ាងណា ? ​ជំនាញ​គ្រូពេទ្យផ្នែកកីឡា ផ្នែក​សុខភាព​និង​អនាម័យ ព្រមទាំងគ្រូពេទ្យឯកទេស​សួត បេះដូង យល់​ស្រប​គ្នា​ទាំងអស់​ថា ម៉ាស​មិន​មែន​ផលិត​ឡើ​ង​ដើម្បី​ពាក់​នៅ​ពេល ទៅធ្វើ​កីឡា ឬ​នៅពេល​ត្រូវ​ប្រឹង​បញ្ចេញ​កម្លាំងខ្លាំង ស្រូបខ្យល់បរិយាកាស​នៅ​ទីវាល​ទេ។ មូលហេតុ​ដំបូង​គេ​បង្អស់ គឺការ​ទើស​ទែង ៖ ម៉ាស​អាច​រអិល​ រុល​ឡើង​រុល​ចុះ រមាស់ កកិត​ស្បែក​មុខ និង​ពិសេស​បាំង​ផ្លូវ​ដង្ហើម​ មិន​ស្រូប​ខ្យល់​ចេញ​ចូល​បាន​ស្រួល​ និង​ពេញ​លេញ។

“នៅ​ពេល​រត់​ នៅ​ពេល​ធ្វើ​កីឡា​និង​ហាត់​ប្រាណ យើង​ត្រូវ​ការដក​​ដង្ហើម បឺត​ស្រូប បញ្ចេញ​​​​​​ខ្យល់​ ​និង​ខាកស្តោះ ញើសសម្បោរ​  តែ​នៅ​ពេល​ពាក់​ម៉ាស ច្បាស់​ជា​លំបាក​ខ្លាំង ? នេះ​បើ​តាម​ប្រសាសន៍​របស់​លោក​វេជ្ជបណ្ឌិត ព្រុយណូ ប៊ូរ៉ែល Bruno Burel គ្រូពេទ្យ​កីឡា និង​ជា​អនុប្រធាន​សហជីព​គ្រូពេទ្យ​កីឡាជាតិ​បារាំង។

​ម៉ាស​បង្កើន​ហានិភ័យ​​ខ្លាំង​ដល់​ការ​ដក​ដង្ហើម ជាពិសេស​នៅ​ពេល​ប្រឹង​បញ្ចេញ​កម្លាំង។ ជា​ទូទៅ​និង​ជា​មធ្យម ​មនុស្ស​ម្នាក់ៗ ​ត្រូវ​ការ​ដក​ង្ហើម​ស្រូប​ខ្យល់ ពី ៤០០​ទៅ​៥០០​លីត្រ​​ក្នុង​មួយ​ម៉ោង ពេលប្រឹង​បញ្ចេញកម្លាំង​កាយ​ ល្មមៗ ។ ហើយ​នៅពេល​ប្រឹង​ធ្វើ​កីឡា​ខ្លាំង គេ​ត្រូវ​ការ​ដក​ដង្ហើម​៥​ទៅ​១០​លើស​ធម្មតា។ នេះ​បើតាម​ការ​លម្អិត​របស់​បន្ថែម​របស់​វេជ្ជបណ្ឌិត ឯកទេស​សួត ហ្សង់​ហ្វីលីព​ សង់តូនី Jean-Philippe Santoni។

នៅ​ពេល​ធ្វើ​កីឡា យើង​ត្រូវការ​​ស្រូប​ខ្យល់​ច្រើន។ យើងនឹង​មិន​អាច​ប្រឹង​និង​បញ្ចេញ​កម្លាំង​ធ្វើ​កីឡា​បាន​ពេញមួយ​ទំហឹង​ទេនៅ​ពេល​ពាក់​ម៉ាស ព្រោះម៉ាស​បាន​មក​រំខាន​ចលនា​​ដកដង្ហើម​ដែល​ជា​កត្តា​ចាំបាច់​នៅ​ពេលធ្វើ​​កីឡា។ នេះ​ជាការ​សរុប​យ៉ាង​ខ្លី​របស់​លោក ហ្វ្រង់ស័រ​ការ៉េ François Carré គ្រូពេទ្យ​កីឡា​ជំនាញ​បេះដូង នៅ​មន្ទីរពេទ្យ​ក្រុង​រ៉ែន។

ចំណែក​លោក​វេជ្ជបណ្ឌិត​ ហ្សេរ៉េម៉ី កាឌីយូ Jérémy Cadiou នៅ មន្ទីរ​ពេទ្យ សាំងហ្ក្រេហ្គ័រSt Gregoire វិញ បាន​បញ្ជាក់​​បន្ថែម​ក្នុង​អត្ថន័យ​ដូច​គ្នា ដោយ​ប្រៀបប្រដូច​ម៉ាស​ទៅ​​នឹង​រនាំង​ចាំ​ចម្រោះ​ខ្យល់។ នៅ​ពេល​ពាក់​ម៉ាស យើង​អាច​​​ដកដង្ហើម​​ស្រូបយក​​ខ្យល់​អុកស៊ីហ្សែន បាន​ក្នុង​បរិមាណ​តិច​ជាង​នៅ​ពេល​មិន​ពាក់​ម៉ាស។ ដូច្នេះ​ការ​ស្រូប​ និង​ការ​បញ្ចេញខ្យល់​ទៅ​ចិញ្ចឹម​សួត ពិត​ជា​មិន​អាច​ប្រព្រឹត្ត​ទៅ​បាន​ដោយ​ពេញ​លេញទេ។ សកម្មភាព​កីឡា​អា​ច​នឹង​ត្រូវ​បង្អាក់​ ​យ៉ាង​ឆាប់​រហ័ស។

ម៉ាសសើម

ប្រសិន​បើ​ជា​ម៉ាសប្រភេទ អេហ្វៗប៉េ២ ម៉ាសជំពុះ​ទា​វិញ សឹង​អាច​និយាយ​បាន​ថា​ បើ​ពាក់​ហើយ​គឺមិន​បាច់​ធ្វើ​កីឡា​តែ​ម្តង ព្រោះ​បើ​គ្រាន់​ពាក់នៅ​​ស្ងៀម ក៏​រំខាន​ការ​ដក​ដង្ហើម​ទៅ​​ហើយនោះ។ នេះ​បើ​តាម​អះអាង​បន្ថែម​របស់​លោក​វេជ្ជបណ្ឌិត ព្រុយណូ​ ក្រេស្តានី Bruno Crestani ប្រធាន​ផ្នែក​ជំងឺ​សួត​នៅមន្ទីរ​ពេទ្យ​ប៊ីស្ហារ ក្រុង​ប៉ារីស និង​ជា​អនុប្រធាន​មូលនិធិដង្ហើម​ ដោយ​លម្អិត​ទៀត​ថា នៅពេល​យើង​ប្រឹង​ធ្វើ​កីឡា ដង្ហើម​យើង​កាន់តែ​​ញាប់ ប្រឹងដក​ស្រូប​ ​ខ្យល់​ទៅ​បក់បង្វិលបំពេញសួត។ ហើយនៅរាល់​ពេលយើង​ប្រឹង​ស្រូប​ដង្ហើម​ខ្លាំងចូល​​ ម៉ាសក៏​នឹង​ផឺតផត​តាម។ មក​ផ្អឹប​ប៉ះ​មាត់​តែពីរបីដង​ ម៉ាសច្បាស់​ជាត្រូវ​​សើម​ ដែល​ធ្វើ​ឱ្យ​កាន់​តែ​ស្ទះ​ខ្យល់​។ បើ​ជា​ម៉ាសដេរ​ខ្លួន​ឯង​ ប្រភេទ​​ក្រណាត់ខ្លះក្រាស់ ធ្ងន់​ ឆាប់​សើម និង​ឆាប់​ស្ទះ។ បើ​ស្ទះ​ខ្យល់​ សាច់​ដុំ​ផ្លូវដង្ហើម​ត្រូវ​ធ្វើ​ការ​កាន់​ខ្លាំង ដូច្នេះ​អ្នក​ពាក់​ម៉ាសកាន់តែ​ឆាប់​ហត់​ និង​ឆាប់​ថប់​ខ្យល់​មិន​អាចធ្វើ​កីឡា​បាន​ដោយ​សម្រួល​និង​តាម​ចំណង់​បាន​ឡើយ។ អ្នក​ធ្វើ​កីឡា​នឹង​ទាញ​ម៉ាសចេញ​ពីមុខ​ដោយ​មិន​ដឹង​ខ្លួន ប្រសិន​បើ​ពួកគេ​ចង់​រត់​បន្ត។

ក្រៅអំពី​ការ​រំខានផ្នែកដកដង្ហើម នៅពេល​ធ្វើ​កីឡា អ្នក​នឹង​ត្រូវ​ចេញ​ញើស​។ ញើស​នឹង​ទៅ ផ្អើម​ម៉ាស​ និង​ធ្វើ​ម៉ាស​​រអិល​ ឡើងបុក​​បិទភ្នែក ឬ​រអិលធ្លាក់​ចុះ ចេញ​ច្រមុះ​កណ្តាលវាល ... ពាក់​មិនត្រឹម​ត្រូវ (មិន​បិទ​ជិត​ច្រមុះ​និង​មាត់) បាន​ន័យ​ថា​​ម៉ាស​លែង​មានប្រសិទ្ធភាព​។ ម្យ៉ាង​វិញ​ទៀត បើ​ម៉ាស​រអិល​ធ្លាក់​​ខុស​កន្លែងភ្លាម យើង​ច្បាស់​ជា​យក​ដៃ​ទៅ​រុញ​ ទៅ​ប៉ះ ដាក់​ឱ្យ​ចំកន្លែងវិញ​ ដោយ​ស្វ័យប្រវត្តិ ទាំង​មិន​បាន​​គិត និង​មិន​ដឹង​ខ្លួនផង។ តែការ​យក​ដៃទៅ​ប៉ះម៉ាស ជា​ហានិភ័យ​ធំ​មួយ​នៃ​ការ​នាំ​មេរោគ​។

ការសិក្សា​ចេញ​ផ្សាយ​នៅ​ឆ្នាំ​២០១៨ តាំង​ពី​សម័យ​មុន​កូវីដ១៩ និង​ក្រៅ​ក្របខ័ណ្ឌ​កូវីដ របស់​ភ្នាក់ងារ​សន្តិសុខសុខភាព​​ចំណីអាហារ ​បរិស្ថាន និង​ការងារ ​ជាតិ​បារាំង ស្តី​អំពី ម៉ាស និង​កីឡា បាន​ផ្តល់សេចក្តី​សន្និដ្ឋាន​ថា​ អានុភាព​របស់​ម៉ាស​ ត្រូវ​ធ្លាក់ចុះ​នៅ​ពេល​អ្នកពាក់​មាន​​សកម្មភាព​ខ្លាំង​។ ការ​បញ្ចេញ​សកម្មភាព​រាងកាយ​នឹង​បង្កើន​ចង្វាក់​ដង្ហើម​។ ចង្វាក់​ដង្ហើម​ញាប់​លឿន នឹង​ធ្វើ​ឱ្យ​យើង​កាន់​តែ​បាត់​បង់​បន្ទុក​​កាន់​តែ​ខ្លាំង ហើយ​បង្ក​ឱ្យកាន់​តែ​ងាយ​​បែក​ញើស​មុខ​។

គម្លាត​សុវត្ថិភាព ១០ម៉ែត្រ

ជា​សរុប​ ក្រុមគ្រូពេទ្យ​ មិន​សូវ​គាំទ្រ​ ការ​ពាក់ម៉ាសពេលធ្វើ​កីឡាទេ។ ក្រុមគ្រូពេទ្យ​ខ្លាច​ថា​ បា​នហាត់​ប្រាណ​ពាក់​ម៉ាស នឹង​ធ្វើ​ឱ្យ​អ្នកហាត់​ប្រាណ​លេង​​កីឡា​ភ្លេច​ការពារខ្លួន ពីកូវីដ១៩ មាន​ជា​អាទិ៍​ភ្លេច​គោរពគោរព​គម្លាត​សុវត្ថិភាព។​ ​អាង​ថា​បានពាក់​ម៉ាស​ហើយ និង​អាង​តែ​រត់​ម្នាក់​តែង​ឯង អ្នក​ធ្វើ​កីឡា​ងាយ​នឹង​ភ្លេចគិត​ថា​ខ្លួន​កំពុង​ស្ថិត​នៅ​ក្នុង​ក្រុង នៅ​ទីកន្លែង​ដែល​មានមនុស្ស​ផ្សេង​ទៀត ...

ប៉ុន្តែ​ក្រុមគ្រូពេទ្យ​បាន​ព្រមព្រៀង​គ្នា​ជាឯកច្ឆ័ន្ទ​​ផ្តល់​អនុសាសន៍​ឱ្យ​គ្រប់​អ្នកស្នេហា​កីឡា​ថា​ត្រូវ​ ការរក្សា​គម្លាត​សុវត្ថិភាព និងប្រណិបត្តិ​អនាម័យ​ការពារ​ទប់​ស្កាត់​កូវីដ ជា​ប់​ជានិច្ច។ ពាក់​ម៉ាស​នឹង​ធ្វើ​ឱ្យ​ចំណង់​ហាត់​ប្រាណ​ធ្លាក់​ចុះ តែ​ការធ្វើ​កីឡា​ហាត់ប្រាណ​ជា​ការ​ចាំ​បាច់​សម្រាប់​សុខភាព​ ដូច្នេះ​ជម្រើស​ដ៏​ល្អជាង​គេ​ គឺ​ហាត់​ប្រាណ​ធ្វើ​កីឡា ដោយ​គោរព​គម្លាត​សុវត្ថិភាព។ នេះ​បើ​តាម​លោកវេជ្ជបណ្ឌិត ហ្សេរ៉េមី កាឌីយូ។

“ប្រសិនបើ​រត់ហាត់ប្រាណ​តែ​ម្នាក់ឯង ក្នុង​សួន ក្នុង​ឧទ្យាន​ គ្មាន​​ប្រយោជន៍​អ្វីត្រូវ​ពាក់​ម៉ាស​ទេ” ព្រោះ​វីរុស​កូរ៉ូណា មិន​រត់​ហើរ​ ដោយ​សេរី​ក្នុង​ទីវាល រាប់​សិប​ម៉ែត្រ​ រហូតអាច​មក​តោង​ចូល​ច្រមុះ​មាត់​ចម្លង​ជំងឺ​ឡើយ​។

ប៉ុន្តែ​កា​រសិក្សា​របស់​អ្នកស្រាវជ្រាវ​វិទ្យាសាស្ត្រ​ប៊ែលហ្សិក​និង​ហូឡង់​បាន​បំភ្លឺ​ឱ្យ​កាន់​តែ​ច្បាស់​ថា បើ​អ្នក​ចង់​ធ្វើ​កីឡា​រត់​​ត្រឹកៗ​មាន​គ្នា​ ពីរ​ឬ​បី នាក់នោះ គួរ​តែ​អ្នក​រត់​ទន្ទឹម​គ្នា ប្រសើរ​ជាង​រត់​ម្នាក់​មុខម្នាក់ក្រោយ។ ហេតុអ្វី​ ? ព្រោះ​នៅ​ពេល​រត់ នៅ​ពេល​មាន​ល្បឿន​​ ទឹកមាត់ ចំណាយ​ទឹកមាត់​របស់​យើង​អាច​អណ្តែត​ហើរ​លើ​ខ្យល់​ប្រវែង​ពី ៤ទៅ​៥​ម៉ែត្រ​មុន​ធ្លាក់​ទៅ​ដី ... មានន័យ​ថា ហានិភ័យ​ចម្លង​មេរោគ​កូវីដ​មាន​ខ្ពស់​ប្រសិន​បើ​អ្នក​រត់​ពី​ក្រោយ​ជន​មាន​ផ្ទុក​មេរោគ​តែ​គ្មានរោគ​សញ្ញា​និ​ងអាការៈ​ជំងឺ​កូវីដ។ នេះ​បើ​តាម​លទ្ធផលនៃ​ការ​សិក្សា​របស់​ប៊ែលហ្សិកនិង​ហូឡង់​ដដែល។

ហេតុ​ដូច្នេះ​ហើយ​បាន​ជា​ក្រសួង​កីឡា​បារាំង ចេញ​សេចក្តីណែនាំ​បន្ថែម​ពីលើ​សេចក្តីសម្រេច​របស់​រដ្ឋាភិបាល កំណត់​គម្លាត​សុវត្ថិភាព​​​រវាង​ពី​អ្នក​រត់​ម្នាក់ ឬ​អ្នក​ជិះកង់ម្នាក់ ទៅ​ម្នាក់​ទៀត ចម្ងាយ​យ៉ាង​ហោច​១០​ម៉ែត្រ ពី​គ្នា។ ចំពោះ​លំហាត់​ប្រាណ ធ្វើ​យូហ្កា រាំ ធាក់​កង់​មួយ​កន្លែង ឬ​លើ​វាយសី​ នៅទីវាលត្រូវ​ស្ថិត​នៅ​ឃ្លាត​ពី ចម្ងាយ​ ៤ម៉ែត្រ​ការ៉េ​ពី​អ្នក​ប្រាត់​ប្រាណ​ ទៅ​អ្នក​ហាត់​ប្រាណ​ម្នាក់​ទៀត។

សម្រាប់អ្នក​គ្មាន​ទម្លាប់​ហាត់​កីឡា​បញ្ចេញ​កម្លាំង​កាយ សូម​កុំ​ចាប់​ផ្តើម​​ដោយ​ការ​ពាក់​ម៉ាស​អី ព្រោះ​វា​អាច​នឹង​ធ្វើ​អ្នក​ជួប​គ្រោះថប់​ដង្ហើម គាំ​ងបេះដូង ​ខ្វះ​អុកស៊ីហ្សែន។​ មានការ​ធ្វើ​កីឡា​បែប​ស្រទន់ មិន​ត្រូវ​ការ​បញ្ចេញ​កម្លាំងខ្លាំង​ ដូច​យ៉ាង​លេង​វាយកូន​គោល​ទេ ដែល​ក្រុមគ្រូពេទ្យ​បារាំងយល់​ថា​ម៉ាសមិន​សូវ​រំខាន​។ ការ​សម​ធ្វើ​កីឡា​ខ្លះ​ ក៏​ត្រូវ​បាន​អនុញ្ញា​តឱ្យ​ពាក់​ម៉ាស​ដែរ ប៉ុន្តែ​គ្មានទេ​ការហាមឃាត់ដាច់​ណាត់​មិន​ឱ្យ​ពាក់​ម៉ាស​ ក្នុង​ពេល​ហាត់ប្រាណ​​នៅទីវាល។ សូម​ជ្រើសរើស​​ពាក់​​ឬមិនពាក់​ទៅ​តាមការ​យល់​ឃើញនិង​ស្ថានភាព​ជាក់​ស្តែង​នីមួយ​ៗ គ្រាន់​តែ​ត្រូវ​ចង់ចាំ​ជា​និច្ច​​ថា ម៉ាស​គ្មាន​ប្រសិទ្ធភាព​ទេនៅ​ពេល​សើម និង​ត្រូវ​ប្រកាន់​​អនាម័យ ឧស្សាហ៍​លាង​ដៃ កុំ​ប៉ះពាល់​ម៉ាស​ កុំប៉ះពាល់​មុខ និង​រក្សា​​​គម្លាត​សុវត្ថិភាព​ជានិច្ច​ទោះ​ក្នុង​លក្ខខណ្ឌ​ក៏​ដោយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI