អានតួអត្ថបទ
កូវីដ១៩-ឥណ្ឌា

ចំនួន​​អ្នកឆ្លង​​​កូវីដ​១៩ ពិតប្រាកដ នៅឥណ្ឌា​ទំនង​មាន​ច្រើន​ជាង​​៦០លាននាក់

ភ្នាក់ងារ​សុខាភិបាល​ឥណ្ឌា​ក្នុង​សម្លៀកបំពាក់​ការពារ​កូរ់ូណវីរុស​
ភ្នាក់ងារ​សុខាភិបាល​ឥណ្ឌា​ក្នុង​សម្លៀកបំពាក់​ការពារ​កូរ់ូណវីរុស​ Dibyangshu SARKAR / AFP
ដោយ៖ អៀង សុខម៉ិញ
១២ នាទី

ឥណ្ឌា​ទំនង​មានអ្នក​ឆ្លង​ជំងឺកូវីដ១៩ ច្រើន​ជាង​តួលេខ​ផ្លូវការ​ដល់​ទៅ​១០​ដង​។ នេះ​បើ​តាម​សេចក្តី​ប្រកាស​របស់​អាជ្ញាធរសុខាភិបាលទទួល​បន្ទុក​ផ្នែក​ជំងឺរាតត្បាត។ ការសិក្សា​ជាតិ​ដែល​ផ្តោត​លើ​​មូលដ្ឋាន​នៃ​ការធ្វើ​វិភាគឈាម​រក​អង់ទីក័រ បានសន្និដ្ឋាន​ថា ចំនួន​​​ពលរដ្ឋ​ឥណ្ឌា​ឆ្លង​កូវីដ​១៩ អាច​មាន​ដល់​ទៅ​ប្រមាណដល់​​ជាង​៦០លាន​នាក់។

ផ្សាយពាណិជ្ជកម្ម

បើ​តាមតួលេខ​ផ្លូវការ​ ក្នុង​ចំណោម​ប្រជាពលរដ្ឋ​សរុប ជាង​១៣០០​លាន​នាក់ ​ឥណ្ឌា​មាន​អ្នកឆ្លង​​កូវីដ១៩​ ចំនួន ៦,១​លាននាក់ ពោល​គឺ​ប្រទេស​រងគ្រោះ​កូវីដ​លំដាប់​ទីពីរ​បន្ទាប់​សហរដ្ឋ​អាមេរិក បើ​គិត​អំពី​ចំនួន​ឆ្លងកូវីដ១៩។ ប៉ុន្តែ​បើ​តាម​​សិក្សាតាមរយៈ​ការ​ធ្វើ​​​​វិភាគ​ឈាម​ នៅក្នុង​២១​រដ្ឋ​របស់​ឥណ្ឌា រវាង​ពី​ពាក់កណ្តាលខែសីហា​ដល់ពាក់កណ្តាលខែ​កញ្ញា​លើមនុស្ស​ចំនួន ២៩០០០​នាក់ បាន​បង្ហាញ​​ថា ចំនួន​អ្នក​ឆ្លង​កូវីដ១៩ អាច​មាន​ចំនួន​ច្រើន​ជាង​តួលេខ​ផ្លូវការ​ឆ្ងាយណាស់។

តាមការសន្និដ្ឋាន ក្នុង​ចំណោម​ពលរដ្ឋ​ឥណ្ឌា១៥នាក់ (អាយុចាប់​ពី​១០​ឆ្នាំ ឡើង​ទៅ) មាន​ម្នាក់រស់ប្រឈម​នឹងមេរោគកូរ៉ូណាវីរុស​ថ្មី​។ ភាពប្រឈមរបស់​ពលរដ្ឋ​រស់​នៅ​ក្នុង​សង្កាត់​ក្រីក្រ​ជាយ​ក្រុង (១៥,៦%)​ ខ្ពស់​ជាង​ជិត​ពីរ​ដង​លើស​ប្រជាពលរដ្ឋ​រស់​នៅ​ក្នុង​ក្រុង (៨,២%)​ និង​ជាង​បីដង​លើស​ពលរដ្ឋ​រស់​នៅ​តំបន់​ជនបទ​ (៤,៤%)។ នេះ​បើ​តាមលទ្ធផលនៃ​ការ​សិក្សា ដែល​អគ្គនាយកក្រុមប្រឹក្សា​ស្រាវជ្រាវ​​វេជ្ជសាស្ត្រ​ឥណ្ឌា​លម្អិតនៅ​ក្នុង​សន្និសីទ​កាសែត​របស់​ក្រសួង​សុខាភិបាល។

លទ្ធផលនៃ​ការសិក្សា​​ដំបូងតាមរយៈ​ការ​វិភាគ​ឈាម​បាន​បង្ហាញ​ថា កាលពី​មុន​ខែ​ឧសភា មានមនុស្សពេញ​វ័យ​ឥណ្ឌា​ចំនួន ០,៧៣%​ ពោលគឺ​ស្មើ​នឹង​៦លាន​នាក់​ រស់​ប្រឈម​នឹង​កូវីដ​១៩។ ប៉ុន្តែ​ការ​ធ្វើ​តេស្ត​វិភាគ​ឈាម​រក​អង់ទីក័រ មិនសូវប្រាកដ​ទេ ព្រោះបើ​តាម​អ្នកស្រាវជ្រាវ ​មនុស្ស​អាច​អង់ទីក័រ​ការពារ​ខ្លួន​ទល់​នឹង​កូរ៉ូណាវីរុស​ផ្សេង​ទៀត ដែលមិនមែន​អ្នកបង្ក​ជំងឺ​​កូវីដ១៩។ ម្យ៉ាង​វិញ​ទៀត នៅ​ឥណ្ឌា​ក៏​ដូច​បណ្តា​ប្រទេសផ្សេងទៀតដែរ ចំនួន​អ្នក​ឆ្លង​កូវីដ​១៩ ពិត​ប្រាកដ អាច​ខ្ពស់​ជាង​តួលេខផ្លូវការឆ្ងាយ​ ព្រោះ​តួលេខផ្លូវការ​រំពឹង​ទៅ​លើ​ចំនួន​អ្នក​បាន​មកធ្វើ​តេស្ត​ប៉ុណ្ណោះ និង​មិន​បាន​រាប់​អំពី​ករណី​កើត​កូវីដ​១៩​តែ​គ្មាន​រោគសញ្ញា ដែល​​មិនមកនិង​មិន​បាន​ធ្វើ​តេស្តេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ