ម៉ាឡេស៊ី

​​ក្រុមហ៊ុន​ដូងប្រេង​​ម៉ាឡេស៊ីជាប់បម្រាម​អាមេរិក​ពីបទ​រំលោភ​កម្លាំងពលករ

ចំការ​ដូង​ប្រេង​មួយ​នៅ​ម៉ាឡេស៊ី
ចំការ​ដូង​ប្រេង​មួយ​នៅ​ម៉ាឡេស៊ី REUTERS/Lim Huey Teng

ក្រុមហ៊ុន​យក្ស​ម៉ាឡេស៊ី FGV Holdings ​ មិន​អាច​នាំចេញ​ប្រេង​ដូង និង​ផលិតផល​ធ្វើ​ពីដូងប្រេង​ ទៅ​សហរដ្ឋ​អាមេរិក​បានទៀតទេ។ នេះ​ជា​សេចក្តី​ប្រកាស​ហាមឃាត់​របស់​អាមេរិក​ នៅ​ថ្ងៃពុធ​ទី ៣០​កញ្ញា២០២០ ព្រោះ​​ក្រុមហ៊ុន​បាន​រំលោភ​សិទ្ធ​កម្មករ​កសិកម្ម​យ៉ាង​ធ្ងន់ធ្ងរ។ ​ម៉ាឡេស៊ី​បាន​បញ្ចេញ​ប្រតិកម្ម​ភ្លាម​នៅ​ថ្ងៃ​ព្រហស្បតិ៍ ទី ១​តុលា២០២០នេះ ច្រានចោល​ទាំង​ស្រុង​ការ​ចោទ​ប្រកាន់របស់​អាមេរិក។

ផ្សាយពាណិជ្ជកម្ម

​ភ្នាក់ងារ​ពន្ធ​គយ​និង​ការពារ​ព្រំដែន​អាមេរិក ​បា​នចេញ​សេចក្តី​ប្រកាស​នៅ​ថ្ងៃពុធ​នេះ ហាមឃាត់​មិន​ឱ្យ​នាំ​ចូល​ប្រេង​ដូង​មក​ពី​ម៉ាឡេស៊ី​ទេ ក្រោយ​ពី​លទ្ធផល​អង្កេតបាន​បង្ហាញ​ថា មាន​កម្មករ​កសិកម្ម​ម៉ាឡេស៊ី​ រង​អំពើ​ហិង្សា​ផ្លូវ​កាយ ផ្លូវ​ភេទ រង​ការ​គំរាម​សម្លុត និង​ជួន​កាល​បង្អត់​​ប្រាក់​ខែ​​ទៀត។ មិន​តែប៉ុណ្ណោះ ក្រុមហ៊ុន​ដូងប្រេង​​ម៉ាឡេស៊ី ប្រើ​ក្មេងមិន​ទាន់​គ្រប់​អាយុ​ទៀត។

ប្រើវិធី​ចាប់​បង្ខំ​ឱ្យ​ធ្វើ​ការ​ មានន័យ​ថា​ក្រុមហ៊ុន​បង្ក​បង្កើត​ភាព​​ប្រកួត​ប្រជែង​មិន​ស្មើភាព ផលិតផល​របស់​ក្រុមហ៊ុន​បាន​មក​ដោយ​វិធី​ខុស​ច្បាប់​ និង​ផ្តល់​ទំនិញ​ខុស​បទដ្ឋាន​សុវត្ថិភាព​ដល់​អ្នក​ទិញ។ នេះ​បើ​បាន​ការ​លម្អិត​របស់​អ្នក​ទទួល​ខុស​ត្រូវ​អាមេរិក​នៃ​ការិយាល័យ​ពន្ធគយ​ព្រំដែន ​ លោក Brenda Smith។

សេចក្តី​សម្រេច​ដែល​ចូល​ធរមានភ្លាមនៅថ្ងៃពុធ​ទី ៣០ កញ្ញា​២០២០ ជា​ការ​ដាក់​បម្រាម​បិទ​ទ្វារ​មិន​ឱ្យ​នាំ​ចូលមក​អាមេរិក​នូវ​ ប្រេង​ដូង​ និង​ផលិតផល​ធ្វើ ​ដូង​ប្រេង​ (រាប់​តាំង​ពី​ចំណីអាហារ​ដល់​ផលិតផល​សំអាង) របស់​ក្រុមហ៊ុន​ម៉ាឡេស៊ី FGV ទាំង​អស់។

ក្រុមហ៊ុន​ម៉ាឡេស៊ី បាន​សម្តែង​កា​រខក​ចិត្ត​​យ៉ាង​ខ្លាំង​​ចំពោះ​សេចក្តី​សម្រេច​​របស់​អាមេរិក និង​បាន​អះអាង​ថា ក្នុង​រយៈ​ពេល​ប៉ុន្មានឆ្នាំ​ចុងក្រោយ​នេះ ក្រុមហ៊ុនបាន​ព្យាយាម​ចាត់​វិធានការ​ជាក់ស្តែង ដើម្បី​ធ្វើ​យ៉ាងណា​សម្រួលលក្ខខណ្ឌការងារកម្មករ​ឱ្យ​បាន​កាន់​តែ​ប្រសើរ​ឡើង។ ក្រុមហ៊ុនមិនដែល​អនុគ្រោះ​ឱ្យ​មាន​​​ការរំលោភ​សិទ្ធិ​មនុស្ស ឬ​ការ​ប្រព្រឹត្ត​ទង្វើ​ឧក្រិដ្ឋ​ណាមួយ​ក្នុង​ការងារ​ទេ។ នេះ​បើ​តាមកា​រ​លម្អិត​របស់​ក្រុមហ៊ុន​ក្នុង​សេចក្តី​ថ្លែងការណ៍​។

សូម​បញ្ជាក់​ថា​ ម៉ាឡេស៊ី​ជា​ប្រទេស​ផលិត​ ដូងប្រេង​ លំដាប់​ទីពីរ​ពិភពលោក បន្ទាប់​ពី​ប្រទេស​ឥណ្ឌូណេស៊ី​ជិត​ខាង។ ​ផលិតផលរបស់​ប្រទេស​ទាំងពីរ​​​បូកបញ្ចូលគ្នា​ តំណាង​ឱ្យ​៨៥%​​​ទីផ្សារ​ប្រេង​ដូង​ពិភពលោក។ ប៉ុន្តែ ​កសិកម្ម​ដូងប្រេង រង​ការរិះគន់​យ៉ាង​ខ្លាំងពីសំណាក់​អង្គការ​ក្រៅ​រដ្ឋាភិបាល ថា​ជា​ប្រភព​នៃ​ការ​កាប់​​​បំផ្លាញ​ព្រៃឈើត្រូពិក និង​ជា​ប្រភព​នៃការ​រំលោភ​បំពានសិទ្ធិកម្មករ។ សហរដ្ឋ​អាមេរិក​បាន​សម្រេច​បើក​អង្កេតប្រឆាំង​នឹង​ក្រុមហ៊ុន FGV Holdings នេះ​ គឺ​ដោយសារ​មាន​បណ្តឹង​ សម្ព័ន្ធ​​អង្គការ​ក្រៅរដ្ឋាភិបាល​៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI