ទស្សនៈព្រឹត្តិការណ៍ពិភពលោក

តើ​ចិនខាត ឬ​ចំណេញ បើសិន​មិនទិញ ធ្យូងថ្ម ពី​អូស្ត្រាលី?

សំឡេង ០៣:៥៤
រូបថត​នៅឆ្នាំ ២០១០ បង្ហាញ​កប៉ាល់​ដឹកធ្យូងថ្ម របស់អូស្តា្រលី ចូលចត កំពង់ផែ នៅ​ខេត្ត Shandong province
រូបថត​នៅឆ្នាំ ២០១០ បង្ហាញ​កប៉ាល់​ដឹកធ្យូងថ្ម របស់អូស្តា្រលី ចូលចត កំពង់ផែ នៅ​ខេត្ត Shandong province AP

នៅពេល​ចិន និង​អូស្ត្រាលី​តានតឹង​កាន់តែខ្លាំង​ខាងផ្នែក​ពាណិជ្ជកម្ម ទីភ្នាក់ងារ​ផ្គត់ផ្គង់​ព័ត៌មាន​ស្តីពី​ថាមពល​អន្តរជាតិ S&P Global Platts បាន​ចុះផ្សាយ​ថា រដ្ឋាភិបាល​ចិន​ទើប​បាន​និយាយ​ប្រាប់​ក្រុមហ៊ុន​រដ្ឋ​ចិន ឲ្យ​ឈប់​ទិញ​ធ្យូងថ្ម​របស់​អូស្ត្រាលី។ ខឹង​នឹង​អូស្ត្រាលី ដែល​ទាមទារ​ឲ្យ​មានការស៊ើបអង្កេត​លើ​ប្រភព​ជំងឺកូវីដ នៅប្រទេស​ចិន រដ្ឋាភិបាល​ក្រុមប៉េកាំង​ធ្លាប់​បាន​សម្រេច​ផ្អាក​ការនាំចូល សាច់ គ្រាប់ធុញ្ញជាតិ និង​ស្រា​អូស្ត្រាលី។ តើ​ចិន​អាច​ជៀសផុត​មិន​ទិញ ប្រើ​ធ្យូងថ្ម របស់​អូស្ត្រាលីដែរឬទេ? 

ផ្សាយពាណិជ្ជកម្ម

តាមតួលេខ​របស់​រដ្ឋាភិបាល​អូស្ត្រាលី នៅ​ក្នុង​រយៈពេល ៦ខែ​ដើមឆ្នាំ​នេះ ធ្យូងថ្ម នាំចេញ​ទៅ​ប្រទេស​ចិន មាន​តម្លៃ ជាង ៧ពាន់លាន​ដុល្លារ ចំណែក រ៉ែដែក​អូស្ត្រាលី លក់​ទៅ​ប្រទេស​ចិន ក៏បាន​កើនឡើង ដល់​ចំនួន ៤៣ពាន់​លាន​ដុល្លារ។ អូស្ត្រាលី​ជាប្រទេស​ផ្គត់ផ្គង់​ធ្យូងថ្ម​ធំជាងគេ​សម្រាប់​រោងចក្រ​ផលិតអគ្គិសនី​ចិន។ បន្ទាប់​ពីរ៉ែដែក ធ្យូងថ្ម ជាធនធាន​ធម្មជាតិ​សំខាន់​ទី២ ដែល​អូស្ត្រាលី លក់ នាំចេញ​ទៅប្រទេស​ចិន។ ប៉ុន្តែ នៅប៉ុន្មាន​សប្តាហ៍​មកនេះ ធ្យូងថ្ម​របស់​អូស្ត្រាលី កាន់តែ​ជួប​ការលំបាក ក្នុង​ការរកអតិថិជន នៅ​ប្រទេស​ចិន។

នៅដើម​សប្តាហ៍នេះ ​ទីភ្នាក់ងារ​S&P Global Platts ដែល​ជាទីភ្នាក់ងារ​ឯករាជ្យ​ខាងផ្តល់​ព័ត៌មាន​ស្តីពី​ថាមពល​ក្នុង​ទីផ្សារ​អន្តរជាតិ បាន​ចុះផ្សាយ​ថា រដ្ឋអំណាច​ចិន បាន​និយាយប្រាប់ ក្រុមហ៊ុន​រដ្ឋ​ចិន កុំ​ឲ្យ​កុម្ម៉ង់ ទិញ នាំចូល​ធ្យូងថ្ម ពី​អូស្រ្តាលី។ តាម​ការបញ្ជាក់​របស់​ S&P Global Platts អាជ្ញាធរ​ចិន​និយាយ​ប្រាប់ផ្ទាល់​មាត់ ប៉ុន្តែ គ្មាន​ចេញប្រកាស​ជាផ្លូវការ​នោះទេ។

នៅក្រោយ​ការចុះផ្សាយ​គួរ​ឲ្យ​ជឿជាក់​របស់​ទីភ្នាក់ងារ S&P Global Platts រដ្ឋាភិបាល​អូស្ត្រាលី បាន​ផ្តើម​ការស៊ើបអង្កេត និង​ទាមទារ ការបកស្រាយ​ពីភាគី​ចិន ប៉ុន្តែ គ្មាន​លទ្ធផល​អ្វីនោះទេ។ នាយករដ្ឋមន្រ្តី​អូស្ត្រាលី លោក​Scott Morrison បាន​និយាយ​បន្ធូរបន្ថយ​ភាពតានតឹង​មកវិញ ដោយ​អះអាងថា ប្រទេស​ចិន អាច​កាត់បន្ថយ ការទិញធ្យូងថ្ម ពីបរទេស ដើម្បី ពង្រឹង​វិស័យ​ឧស្សាហកម្ម ធ្យូងថ្ម ក្នុង​ស្រុក។ ក្រុមប្រឹក្សា​រ៉ែអូស្ត្រាលី​វិញ បាន​ប្រកាស​ថា ភាគី​អូស្ត្រាលី​កំពុង​ព្យាយាម​ស្តារ​ទំនាក់ទំនង​វិជ្ជមាន​ជាមួយ​ប្រទេស​ចិន។ ប៉ុន្តែ វិបត្តិកូវីដ​បានប៉ះពាល់ ដល់​តម្រូវការ​ផ្នែក​ថាមពល និង​ដែកថែប នៅក្នុង​ពិភពលោក។

វិបត្តិកូវីដ​ជា​រឿងមួយ។ ប៉ុន្តែ បដិសេធ​របស់អូស្ត្រាលី មិនប្រើ​បណ្តាញ​ទូរស័ព្ទ 5G របស់​ចិន សំណុំរឿង ក្រុមហ៊ុន​Huawei ហើយ​និង​ការឆាប់​អំពាវនាវ របស់​អូស្ត្រាលី ដើម្បី​ឲ្យ​មានការស៊ើបអង្កេត​ឯករាជ្យ លើ​ប្រភព​ជំងឺកូវីដ​នៅ​ទីក្រុង​វូហាន ប្រទេស​ចិន គឺ​គ្រប់គ្រាន់​ឲ្យ​ទីក្រុង ប៉េកាំង ខឹងសម្បារ រហូត​ដល់​ចាត់វិធានការ​សងសឹក អូស្ត្រាលី។ ដំបូងឡើយ ចិន​បាន​រករឿង គ្រាប់ធុញ្ញជាតិ​អូស្ត្រាលី បន្ទាប់មក ប្រកាស​ហាម​នាំចូល​សាច់គោ​ពីរោងចក្រ​ចំនួន ៥​របស់​អូស្ត្រាលី មុន​នឹង​សម្រេច​បើកការស៊ើបអង្កេត​ប្រឆាំង ស្រា​អូស្ត្រាលី។ ការហាមឃាត់​នាំចូល គ្រាប់​ធុញ្ញជាតិ សាច់គោ និង​ស្រា​អូស្ត្រាលី គ្មានប៉ះពាល់​ធំដុំ​ដល់​ការប្រើប្រាស់​ក្នុង​ស្រុក។ ចុះ ការធ្វើពហិកា មិននាំចូល​ធ្យូងថ្ម អូស្ត្រាលី​នឹង​អាចធ្វើ​ឲ្យ​ចិនខាត ឬ​ចំណេញ? តើ​ចិន​អាច​ជៀស មិន​ទិញនាំចូល​ធ្យូងថ្ម​អូស្ត្រាលីដែរឬទេ?

សម្រាប់អ្នកវិភាគ​របស់​ទីភ្នាក់ងារ ព័ត៌មាន​អង់គ្លេស Reuters ចិនអាច​គិតខុស ព្រោះថា ជា​ការពិត សម្រាប់​រោងចក្រ​ផលិត​អគ្គសនី ដើរដោយធ្យូងថ្ម ចិន​អាច​ជំនួស​ធ្យូងថ្ម អូស្ត្រាលី ដោយ​ងាក​ទៅទិញ ធ្យូងថ្ម ពីប្រទេស​រុស្ស៊ី អាហ្វ្រិកខាងត្បូង កូឡុំប៊ី ឬអាមេរិក ដោយ​មិនចាំបាច់​ត្រូវបង់​ចំណាយ​ច្រើនជាង​នោះទេ។

ប៉ុន្តែ សម្រាប់ រោងចក្រ​ផលិត​ដែកថែប របស់​ចិន វា​ជារឿងផ្សេង។ ​ធ្យូងថ្ម Cok Coal ដែលគេ​ប្រើ​សម្រាប់តែ ដុតដែកថែប ហើយ​និង​ធ្យូងថ្ម Métallurgique សម្រាប់​ដុត​លោហធាតុ ដែល​លក់​ក្នុង​តម្លៃថោក ដូចជា​ធ្យូងថ្ម របស់អូស្ត្រាលី គឺ​ចិន​ពិបាក​នឹង​រក​បាន​ណាស់។ ត្រូវដឹងថា ធ្យូងថ្ម​សម្រាប់​ដុតដែកថែប​របស់​អូស្ត្រាលី តំណាង​ឲ្យ​៥០ភាគរយ នៃ​ពាណិជ្ជកម្ម​ធ្យូងថ្ម ក្នុងពិភពលោក។ បើសិន ចិន​ចង់ជៀស មិនទិញ ធ្យូងថ្ម​របស់អូស្ត្រាលី នោះ ក្រុមហ៊ុន​ផលិត​ដែកថែប​របស់​ចិន ត្រូវ​ទៅរក​ទិញធ្យូងថ្ម ប្រទេស​ផ្សេង ក្នុង​តម្លៃ​ខ្ពស់ ដែល​នឹង​ធ្វើ​ឲ្យ​ការលក់​ដែកថែប របស់​ចិន ជួបបញ្ហា មិនអាច​ប្រកួតប្រជែង​ជាមួយ​ផលិតផល​របស់​ក្រុមហ៊ុន របស់​ប្រទេស​អាស៊ី​ផ្សេង​ទៀត។

ដោយ​ណែនាំ​កុំ​ឲ្យ​ក្រុមហ៊ុន​ចិន ទិញនាំចូលធ្យូងថ្ម​អូស្ត្រាលី អាជ្ញាធរ​ចិន​ចង់​ដាក់​សម្ពាធ​សេដ្ឋកិច្ច​មួយកម្រិត​ទៀត លើ​ទីក្រុង​កង់បេរ៉ា។ ប៉ុន្តែ រដ្ឋាភិបាល​អូស្ត្រាលី​វិញ​បាន​បញ្ជាក់​រួចហើយថា ខ្លួន​មិនផ្លាស់ប្តូរ​ជំហរ​របស់ខ្លួន នៅចំពោះមុខ​ការដាក់សម្ពាធ​ពាណិជ្ជកម្ម​របស់​ចិន។ ម្យ៉ាង អូស្ត្រាលី នៅតែ​ជឿជាក់​លើ​គុណភាព និង​តម្លៃ​សមរម្យ របស់​ផលិតផល​ធ្យូងថ្ម​របស់ខ្លួន៕

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI